நதிக்கரை நகரங்கள் - பயணத் தொடர் - பகுதி முப்பத்தி ஐந்து - வாரணாசி - தென்னிந்திய உணவும் அய்யர் கஃபேவும்

 

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

 

நேற்று வெளியிட்ட வாசிப்பனுபவம் பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

 

JUST BECAUSE A PERSON SMILES ALL THE TIME, DOESN’T MEAN THEIR LIFE IS PERFECT. THE SMILE IS A SYMBOL OF HOPE AND STRENGTH.

 

******

 

பயணங்கள் இனிமையானவை.  தற்போது எழுதி வரும் நதிக்கரை நகரங்கள் பயணத் தொடர் உங்களுக்கும் பயன்படலாம்.  இதுவரை நதிக்கரை நகரங்கள் என்ற  தலைப்பில் இதுவரை வெளியிட்ட பயணத் தொடரின்  பகுதிகளுக்கான சுட்டி கீழே! 

 

பகுதி ஒன்று - பயணத் தொடர் - சற்றே இடைவெளிக்குப் பிறகு.  

 

பகுதி இரண்டு - அதிகாலையில் நீண்ட ஆட்டோ பயணம்.  

 

பகுதி மூன்று - நைமிசாரண்யம் - தங்குமிடங்கள். 

 

பகுதி நான்கு - நைமிசாரண்யம் - உள்ளூர் சாரதி.  

 

பகுதி ஐந்து - நைமிசாரண்யம் - உலா - மா லலிதா தேவி. 

 

பகுதி ஆறு - நைமிசாரண்யம் - ததீச்சி குண்ட். 

 

பகுதி ஏழு - நைமிசாரண்யம் - காலை உணவு. 

 

பகுதி எட்டு - நைமிசாரண்யம் - ருத்ர குண்ட். 

 

பகுதி ஒன்பது - நைமிசாரண்யம் - தேவதேவேஷ்வர் dhதாம் மற்றும் ராமேஷ்வர் dhதாம்.

 

பகுதி பத்து - நைமிசாரண்யம் - சக்கரத் தீர்த்தம்.

 

பகுதி பதினொன்று - நைமிசாரண்யம் - நவநரசிம்மர் கோவில்.

 

பகுதி பன்னிரெண்டு - நைமிசாரண்யம் - ஹனுமான் Gகடி.

 

பகுதி பதிமூன்று - நைமிசாரண்யம் - வ்யாஸ் Gகdhத்dhதி

 

பகுதி பதிநான்கு - நைமிசாரண்யம் - (Dh)தஸாஸ்வமேத்(dh) Gகாட்

 

பகுதி பதினைந்து - நைமிசாரண்யம் - பாண்டவ் கில்லா

 

பகுதி பதினாறு - அடுத்த நதிக்கரை நோக்கி ஒரு பயணம்

 

பகுதி பதினேழு - சரயு நதிக்கரையில்…

 

பகுதி பதினெட்டு - மதிய உணவும் அயோத்யா ஜி உலாவும்…

 

பகுதி பத்தொன்பது - அயோத்யா ஜி - ஹனுமான் Gகடி - லட்டு பிரசாதம்

 

பகுதி இருபது - அயோத்யா ஜி - தசரத் மஹல்

 

பகுதி இருபத்தி ஒன்று - அயோத்யா ஜி - ஜானகி மஹல்

 

பகுதி இருபத்தி இரண்டு - அயோத்யா ஜி - இராம ஜென்ம பூமி

 

பகுதி இருபத்தி மூன்று - அயோத்யா ஜி - சரயு நதி அனுபவங்கள்

 

பகுதி இருபத்தி நான்கு - Bபேல் PபThத்தர் மற்றும் இரவு உணவு

 

பகுதி இருபத்தி ஐந்து - ராஜ் (dh)த்வார் மந்திர் 

 

பகுதி இருபத்தி ஆறு - கனக் Bபவன் எனும் தங்க மாளிகை

 

பகுதி இருபத்தி ஏழு - காலை உணவு - குஷி க்ளிப் - சரயு படித்துறை

 

பகுதி இருபத்தி எட்டு - ஸ்ரீ நாகேஷ்வர்நாத் ஜி எனும் சிவன் கோவில்

 

பகுதி இருபத்தி ஒன்பது - அயோத்யா ஜி - Khகாந்தானி DHதவா Khகானா

 

பகுதி முப்பது - அடுத்த நதிக்கரை நகரை நோக்கி

 

பகுதி முப்பத்தி ஒன்று - காசி விஷ்வநாத் ஆலயம் - புதிய ஏற்பாடுகள்

 

பகுதி முப்பத்தி இரண்டு - வாரணாசி - துர்கா கோவில் (எ) குரங்கு கோவில்

 

பகுதி முப்பத்தி மூன்று - வாரணாசி - சங்கடங்கள் தீர்க்கும் ஹனுமன்

 

பகுதி முப்பத்தி நான்கு - வாரணாசி - துள்சி மானஸ் மந்திர்

Dhதஷாஸ்வமேத Gகாட் செல்லும் வழி…

 

சென்ற பகுதியில் சொன்னது போல, காலையிலிருந்து சில கோவில்கள் பார்த்து விட்டு தங்குமிடம் திரும்பி மதிய உணவை தங்குமிடத்திலேயே இருந்த உணவகத்தில் உண்டு கொஞ்சம் ஒய்வு எடுத்துக் கொண்டோம்.  எங்கள் தங்குமிடம், Dhதஷாஸ்வமேத Gகாட் பகுதியில் தான் இருக்கிறது என்பதை முன்னரே சொல்லி இருந்தேன்.  ஆனால் சொல்லாமல் விட்ட விஷயம் ஒன்று உண்டு! அந்த விஷயத்தினையும் இன்றைய பதிவில் சொல்லி விடுகிறேன். வடக்கே சிவன் கோவில்கள் எங்கே சென்றாலும் “Bபம் Bபோலே..... ஹர் ஹர் மகாதேவ்…”  போன்ற முழக்கங்கள் எழுப்புவது வழக்கம். அங்கே பல வருடங்கள் இருந்து விட்ட எங்களுக்கும் இந்த முழக்கங்கள் செய்வது வழக்கமாக இருக்கிறது. காசி விஸ்வநாதர் குடிகொண்டு இருக்கும், அனைவருக்கும் படி அளக்கும் அன்னபூரணியும் இருக்கும் வாரணாசி நகர் வந்து சேர்ந்த பிறகு எங்கே பார்த்தாலும் இந்த முழக்கங்கள் தான். எங்களது நாளை தங்குமிடத்தின் அருகே இருக்கும் Dhதஷாஸ்வமேத Gகாட் சென்று கங்கையில் புனிதநீராடிய பின்னரே எங்கள் கோவில் உலாவை துவங்கினோம்.  

 

சற்றே ஒய்வு எடுத்த பிறகு நகர் வலம் வரலாம் என்று புறப்பட்டோம்.  எங்களது அன்றைய திட்டம் மாலை வரை நகர் வலம் வருவது தான்.  மாலை நேரத்தில் ஒரு முக்கியமான நிகழ்வு இருப்பதால் அது வரை கால் போன போக்கில் ஒரு உலா தான்.  வாரணாசி நகர் - எண்ணற்ற வட இந்திய உணவகங்கள் இருந்தாலும், சாலையோரக் கடைகளில் இட்லி, தோசை போன்றவை கிடைக்கிறது. அந்தக் கடைகளில், வட இந்தியர்கள் மட்டுமல்லாது காசிக்கு வரும் எண்ணற்ற தெலுகு தேசத்தவர்களும் புகுந்து விளையாடுகிறார்கள். இரண்டு இட்லி, தோசை என அனைத்தையும் புரச/ஆல இலைகளில் செய்யப்பட்ட தொன்னைகளில் போட்டு மேலே சாம்பார் அல்லது சட்னி ஊற்றி தருகிறார்கள். சாலை ஓரங்களில் இருக்கும் கடைகள் என்பதால் நின்றபடியோ, அங்கே இருக்கும் ஒன்றிரண்டு இருக்கைகளில் அமர்ந்தோ சாப்பிடுபவர்கள் அதிகமாக இருக்கிறார்கள். இப்படியான நிறைய கடைகளை வாரணாசி நகரில் பார்க்க முடிந்தது.

 

மாலை நேரம் அப்படியே உலாத்திய போது பார்த்த ஒரு பதாகையில் "அய்யர் கஃபே" என்று ஆங்கிலத்திலும், அய்யர் காபி என தமிழிலும் எழுதி இருக்க, உள்ளே நுழைந்து காஃபி இருக்கிறதா என்று கேட்டோம் - ஃபில்டர் காஃபி மற்றும் இன்ஸ்டன்ட் காஃபி இரண்டுமே இருந்தது. 20 ரூபாய்க்கு ஃபில்டர் காஃபி! உள்ளே பார்த்த போது மிகவும் பழமையான கடை என்று தோன்றியது. கடை உரிமையாளரிடம் பேச்சுக் கொடுத்தேன். மூன்று தலைமுறைகள் கடந்து நடக்கும் கடை என்றும், தாத்தா  L.R. சுப்ரமண்ய அய்யர் காலத்தில் ஆரம்பித்து, அவரது மகன் S. பாலகிருஷ்ண அய்யர் தொடர்ந்து நடத்திய இந்த உணவகம் தற்போது மூன்றாம் தலைமுறையில் திரு ராமச்சந்திர அய்யர் அவர்களால் நடத்தப்பட்டு வருகிறது.

 

தொடங்கி 90 வருடங்களுக்கு மேலாக ஆகிவிட்ட இந்த உணவகத்தில் இட்லி, வடை,  தோசை, ஊத்தப்பம், உப்புமா, போன்ற பல தென்னிந்திய உணவுகள் கிடைக்கின்றன. கிடைக்கும் உணவு வகைகள் மற்றும் விலைப்பட்டியல் படமாக இணைத்து இருக்கிறேன். ஒரு வாரமாக வட இந்திய உணவு சாப்பிட்டதால், மாறுதலுக்காக தென்னிந்திய உணவு சாப்பிடலாம் என அடுத்த நாள் (ஞாயிறு) காலை அங்கே சென்ற போது தெரிந்தது கடைக்கு அன்று விடுமுறை என! முதல் நாள் (சனிக்கிழமை) மாலை காஃபி மட்டுமே குடித்தோம் என்பதால் உணவின் தரம் குறித்து ஒன்றும் சொல்வதற்கு இல்லை. ஃபில்டர் காஃபி, கொடுத்த விலைக்கு சுவை ஓகே! அதுவும் காசி நகர் வரை வந்து நமக்கு ஃபில்டர் காஃபி கொடுப்பதால் அதிகம் குறை சொல்லக் கூடாது!

 

காசி சொம்பு...... 

 

நம் ஊரில், பல வீடுகளில், சின்னதும் பெரிதுமாக தாமிரத்தில் காசி சொம்பும் பித்தளையில் சிறு அன்னபூரணி விக்ரஹமும் இருக்கும். யார் காசி சென்று வந்தாலும் அவரவர் வீட்டிற்கும் உறவினர்கள் மறறும் நண்பர்கள் வீடுகளுக்கும் இப்படி காசி சொம்பு, காசி கயிறு மற்றும் அன்னபூரணி விக்ரஹம் வாங்கி வருவது நீண்ட நெடும் காலமாக இருந்து வரும் பழக்கம். எங்கள் வீட்டில் கூட இப்படி சின்னதும் பெரிதுமாக சில சொம்புகளும் சிலைகளும் உண்டு. ஹரித்வார், ரிஷிகேஷ் நகரங்களில் கூட இப்படியான சொம்பில் கங்கை நீரை நிரப்பி, ஒழுகா வண்ணம் தட்டு அடித்து தருவார்கள் என்றாலும் கொஞ்சம் கொஞ்சமாக அந்த ஊர்களில் பிளாஸ்டிக் அரக்கன் கோலோச்சத் தொடங்கி விட்டான். வரும் பயணிகள்/பக்தர்கள் அனைவரும் இப்படியான பிளாஸ்டிக்கில் விதம் விதமான குப்பிகள் வாங்கி கங்கை நீரை நிரப்பி எடுத்துச் செல்ல ஆரம்பித்து விட்டார்கள். 

 

ஆனால் இன்றைக்கும் காசி நகருக்கு வரும் பல பக்தர்கள் டஜன் கணக்கில் காசி சொம்புகளையும் அன்னபூரணி சிலைகளையும் வாங்கி எடுத்துச் செல்கிறார்கள். அங்கே இந்த காசி சொம்பு தயாரிப்பதும் சிலை தயாரிப்பதும் பெரிய அளவில் நடைபெறும் தொழில். 70 ரூபாய்க்கு ஆறு சொம்பு தண்ணீர் அடைத்து விற்பனை செய்வார்கள். இந்த சிறு அளவு சொம்புகள், தாமிர சொம்புகள் அல்ல! அவை தகரத்தால் செய்யப்பட்டு மேலே முலாம் பூசப்பட்டவை. அது மட்டுமல்லாது தகரத்தில் கங்கை நீரை நிரப்பி வைத்தால் துரு பிடித்து ஓட்டை ஆகிவிடும் என்பதால் மிகச் சிறிய பிளாஸ்டிக் கவர்களில் தண்ணீர் நிரப்பி சீல் வைத்து சொம்பின் உள்ளே வைத்து தகடுகளால் மூடி விடுவார்கள். பலருக்கும் இது தெரியாது! 

 

இன்னும் பல இடங்களில் சொம்புகளை தகரத்தில் செய்து விற்று வருகிறார்கள் என்பதால் முன் அனுபவம் பெற்ற சிலர், கடையிலியே, ஹிந்தியில் Chசும்பக் என அழைக்கப்படும் காந்தத்தினைக் கேட்டு வாங்கி பரிசோதனை செய்து கொள்வதும் உண்டு! முன் ஜாக்கிரதை முத்தண்ணாவாக இப்படிக் கேட்டு பரிசோதித்த, ஒரு ஆந்திர மாநிலத்தைச் சேர்ந்த முதியவரை ஒரு கடையில் பார்த்தேன். மேலே இருக்கும் மூடி Chசும்பக் - இல் ஒட்டிக் கொண்டது! கடைக்காரர் மூடி தகரம், சொம்பு மட்டும் தான் தாமிரம். இந்த விலைல இப்படித்தான் என்றார்.... 

 

நம்பிக்கை தானே எல்லாம் - நம்பிக்கை வைத்து பல இடங்களிலிருந்தும் பயணம் செய்து வரும் பக்தர்களால் பல மக்கள் பிழைக்க முடிகிறது - காசி சொம்பு விற்பனை செய்பவர்களையும் சேர்த்து! பயணம் நமக்கு நல்ல பல விஷயங்களை அள்ளித் தருகிறது… நம்மால் பலருக்கு உதவவும் முடிகிறது. ஆதலால் பயணம் செய்வோம். இந்த பயணத்தில் பார்த்த இடங்கள், கிடைத்த அனுபவங்கள் குறித்த இடுகைகள் தொடரும்… ஆதலால் இந்தப் பயணத்தில் இணைந்திருக்க வேண்டுகிறேன் நண்பர்களே. 

 

*****

 

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

 

நட்புடன்

 

வெங்கட் நாகராஜ்

திருவரங்கத்திலிருந்து…