மலையடியை முத்தமிடும் நதி – கவிதை எழுத அழைப்பு

என்னைப் போன்று கவிதை எழுதத் தெரியாதவனிடம் ஒரு படத்தினைக் கொடுத்து அதைப் பற்றி கவிதை எழுத வேண்டும் என்று சொன்னால் – கூடவே ”எழுதாவிட்டால் கடுமையான தண்டனை உண்டு” என்றும் சொல்லிவிட்டால் கூட “தண்டனை எதுவானாலும் பரவாயில்லை அதைப் பெற்றுக் கொள்கிறேன். கவிதை எழுதத் தெரியாது” என்று தான் சொல்லுவேன். உரைநடையாக எதையாவது எழுத வேண்டுமானாலும் கொஞ்சம் முயற்சித்துப் பார்க்கலாம்! கவிதை நமக்கு சுட்டாலும் வராது! 

கல்லூரி காலத்தில் வரிகளை மடக்கிப் போட்டு கவிதை என்று சொல்லி தமிழாசிரியை ஒருவரிடம் திட்டு வாங்கியதுண்டு! அந்த கவிதை என்ன என்று கூட இப்போது நினைவில்லை.

”மனைவி

அமைவதெல்லாம்

தரகர் கொடுத்த வரம்”

என்று எழுதி விட்டு அதை கவிதை என்று நினைத்துக் கொண்டவன் நான்! :)

இப்படியெல்லாம் இருந்தாலும், மற்றவர்களின் கவிதைகளைப் படித்தாவது இன்புறுவோம் என்று நிறைய கவிதைகளைப் படித்து மகிழ்ச்சி அடைவது வாடிக்கையாகிவிட்டது. கல்லூரி காலத்தில் படித்த பல கவிதைகளை நாட்குறிப்பில் எழுதி வைத்துக் கொண்டிருந்தேன். அந்த நாட்குறிப்பு இன்னமும் என்னிடம் உண்டு! அதாவது 1989-91 வரை நான் படித்த பல கவிதைகள் அதில் உண்டு!

அதனால் தான் பதிவெழுத வந்ததிலிருந்து கவிதைகளை தொடர்ந்து படித்து வருவது மட்டுமல்லாமல், எனது பக்கத்தில் படம் ஒன்றைக் கொடுத்து கவிஞர்களையும், கவிதாயினிகளையும் கவிதை எழுத அழைப்பதை வழக்கமாக வைத்திருந்தேன்.  அப்படி கொடுத்த படங்களும், அதற்கு நண்பர்கள் எழுதிய கவிதைகளும் உங்களுக்கு நினைவிருக்கலாம். அப்படி விடுத்த அழைப்புகளின் சுட்டி கீழே.

அன்னம் விடு தூது

கவிதை எழுத வாருங்கள்

சமீபத்தில் முகப்புத்தகத்தில் இப்படி ஒரு படமும் அதற்கான கவிதையும் நெய்வேலி நகரில் எங்கள் அடுத்த வீட்டில் இருந்த ”ஸ்ரீ” வெளியிட்டு இருந்தார்.  அதைப் பார்த்தவுடனே மிகவும் பிடித்து விட்டது. படமும் மிக அருமையான படம்.  ஒரு நதி. பக்கத்தில் மலைத் தொடர். நதியின் ஓரத்தில் ஒரு சிறிய வீடு. ரம்மியமான சூழல்.  இப்படி ஒரு இடம் இருந்தால் நிம்மதியாக நான்கு ஐந்து நாட்கள் அங்கே ஏகாந்தமாய் இருக்கத் தோன்றும். 

இந்தப் படத்திற்கு நண்பர்கள் எப்படி கவிதை எழுதுவார்கள் என்று யோசித்துக் கொண்டிருந்தேன். அதைக் கேட்டுவிடுவோமே என்று தோன்றியதால் தான் இந்தப் பதிவு!

அந்தப் படத்தினையும்,  அதற்கு ”ஸ்ரீ” எழுதிய கவிதையும் கீழே கொடுத்திருக்கிறேன். 

மலைத் தொடர்கள் இருபுறமும்

கரை படர்த்த

நடுவில் ஓடும்

நதியின் நீரோட்டம்!

நீரின் சலனம்

மலையை அசைப்பதில்லை

மலையின் மௌனம்

நதியை நிறுத்துவதில்லை!

தொடர்ந்து ஓடும் நதியால்

மலைமுகட்டைத் தீண்டமுடியாது!

நதியைத் தீண்ட

மலை தன் தலையைத் தாழ்த்தாது!

மலையடியை முத்தமிட்டு

நதி தன் விரகத்தைச் சொல்லும்!

மலை உச்சியை அதன் ஏக்கம்

அசைக்கவே முடியாது!

மலையின் கம்பீரம் அதன் மௌனத்தில்தான்!

நதியின் நளினம் அதன் நீரோட்டத்தில்தான்!

ஓடும் நதி ஓடிக்கொண்டிருக்கும்!

வளரும் மலை வளர்ந்து கொண்டிருக்கும்!

இரண்டையும் நீல வானம் வேடிக்கைப் பார்க்கும்!

-          ஸ்ரீ

என்ன நண்பர்களே, படத்தைப் பார்த்தது மட்டுமின்றி, கவிதையையும் படித்து ரசித்தீர்களா!  எதற்கு காத்திருப்பு, மடை திறந்த வெள்ளம் போல உங்கள் கற்பனை ஊற்றுகள் கவிதைகளாகப் பாயட்டும்! உங்கள் கற்பனையில் வடித்த கவிதைகளை பின்னூட்டத்திலோ உங்கள் தளத்திலோ வெளியிடுங்கள். கவிதையை உங்கள் பக்கத்தில் வெளியிட்டால், அத்தகவலை இப்பதிவிற்கான பின்னூட்டத்தில் சொல்லுங்கள்!  உங்களுக்கு கவிதை எழுத ஒரு வாய்ப்பு! என்னைப் போன்ற கவிதை ரசிகர்களுக்கு பல கவிதைகள் படித்திட வாய்ப்பு! 

உங்கள் கவிதைகளுக்கான காத்திருப்புடன்....

வெங்கட்

புது தில்லி.

வலைச்சரத்தில் இன்று:   கூட்டுக்குடும்பம் - படித்து உங்கள் மேலான கருத்துகளைச் சொல்லுங்களேன்!