கதம்பம் - டிராகன் ஃப்ரூட் - பேபிகார்ன் - எலுமிச்சை - நெல்லிக்காய்

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

நேற்று வெளியிட்ட கதம்பம் பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

லட்சியம், அலட்சியம் இரண்டிற்கும் ஒரே ஒரு எழுத்து மட்டுமே வித்தியாசம். லட்சியம் உங்களை முன்னே கூட்டிச் செல்லும்; அலட்சியம் உங்களை பின்னே தள்ளிச் செல்லும்.

******

டிராகன் ஃப்ரூட்!

முன்பு மெக்ஸிகோவிலும், அமெரிக்காவிலும் மட்டுமே விளைந்து கொண்டிருந்த இந்தப் பழம் தற்போது எல்லா இடங்களிலுமே குறிப்பிட்டுச் சொல்ல வேண்டுமென்றால் நம்ம ஊர்களில் மாடித் தோட்டத்திலும் கூட பயிரிடப்பட்டு எளிதாக கிடைக்கின்றது! இது ஒரு காக்டஸ் வகையைச் சேர்ந்ததாம்!

உடலுக்கு நன்மை செய்யக்கூடிய பல விஷயங்கள் இந்த பழத்தில் இருப்பதாக படித்து தெரிந்து கொண்டேன்! Fibre, Antioxidants, Anticancer, Low calorie, Low insulin என்று பல குணங்கள் கொண்டதாம்! இதில் மூன்று விதமான ரகங்கள் இருக்கின்றது! நேற்றைய வாரச்சந்தையில் ஒரு  பழம் 80 ரூக்கு கிடைத்தது! 

உள்ளே வெள்ளை நிறத்தில் கறுப்பு நிற விதைகள் கொண்ட ரகம் இது! உள்ளே பிங்க் நிறத்தில் இருப்பது விலை கூடுதல் என்பதால் அந்த வியாபாரி எடுக்க வில்லையென சொன்னார்! இந்தப் பழம் கிவி போன்றும் பேரிக்காய் போன்றும் இருக்குமாம்!

முன்பு ஒருமுறை இந்த சந்தையில் Kiwi கூட கிடைத்தது! ஒரு டப்பாவில் இரண்டே இரண்டு பழங்கள் பேக் செய்யப்பட்டு இருந்தன! முதன்முறையாக வாங்கி சுவைத்தோம்! அதன் விதைகள் வாயில் கடிபடும் போது 'கஷ்க் முஷ்க்' என வித்தியாசமான உணர்வைத் தந்தது...🙂

&*&*&*&**&*&*

பேபிகார்ன்!

டிராகன் ஃப்ரூட் வியாபாரியிடமே டப்பாவில் பேக் செய்யப்பட்ட  பேபிகார்னும் கிடைத்தது! 50ரூ எனக் கொடுத்தார்! இதை வைத்து பஜ்ஜி தான் செய்யலாம் என்று இருக்கிறேன். கொஞ்சம் பிரெட் துண்டுகளும் இருக்கிறது! இரண்டையும் காலி செய்ய பஜ்ஜி ஒன்றே வழி!

&*&*&*&**&*&*

எலுமிச்சை!

தட்டு 20 ரூ என்று விற்றுக் கொண்டிருந்த எலுமிச்சைகளில் இரண்டு தட்டு வாங்கிக் கொண்டேன்! மொத்தம் 26 பழங்கள்! காலையில் வெறும் வயிற்றில் குடித்துக் கொண்டிருக்கும் Lemon honeyக்காக 6 பழங்களை வைத்து விட்டு 20 பழங்களை நறுக்கி உப்பில் போட்டு வைத்திருக்கிறேன்! டெல்லி பயணம், மகளின் கல்லூரி அட்மிஷன் போன்ற காரணங்களால் இந்த வருடம் ஊறுகாய், வடாம் என்று எதுவுமே போடவில்லையே! கைவசம் ஊறுகாய் எதுவும் இல்லை! கடையில் வாங்கி உபயோகிக்கும் பழக்கமில்லை! 

&*&*&*&**&*&*

நெல்லிக்காய்!

இதுவும் தட்டு 20 ரூ தான்! நறுக்கி உப்பு, மஞ்சள் சேர்த்து வைத்திருக்கிறேன்! அப்படியே கூட  சாப்பிடலாம் அல்லது தேவைப்படும் போது மோரில் நெல்லிக்காய், கறிவேப்பிலை, இஞ்சி சேர்த்து அரைத்தும் குடிக்கலாம்! நான் தினமும் ஒரு பிடி கறிவேப்பிலை மென்று சாப்பிடுவேன் என்பதால் உடன் நெல்லியும் சேர்த்துக் கொள்ளலாமே என்று நினைத்து செய்திருக்கிறேன்...🙂

******

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

ஆதி வெங்கட்