மழையே மழையே - விஜி வெங்கடேஷ்

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

இதற்கு முன்னர் வெளியிட்ட பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

சென்ற வருடம் இதே நாளில் சென்னை மாநகரை உலுக்கி எடுத்த மிசாங்க் புயலும் அதனால் நகரம் முழுவதும் வெள்ளப்பெருக்கு எடுத்து ஓடியதும் உங்களுக்கு நினைவில் இருக்கலாம்.  வருடங்கள் ஓடிக்கொண்டே இருந்தாலும், ஒவ்வொரு மழையிலும் அரசியல்வாதிகள்/ஆட்சியாளர்கள், வெள்ளப்பெருக்கை சமாளிக்க சரியான ஏற்பாடுகள் செய்திருக்கிறோம் என்று சொன்னாலும், மழை வந்தபின்னர் உண்மை நிலை புரிகிறது. ஒவ்வொரு மழையிலும் அவதிப்படுவது என்னவோ பொதுஜனம் மட்டுமே.  சென்ற வருட மழையின் போது திருமதி விஜி வெங்கடேஷ் அவர்கள் எழுதிய சில வரிகளை இன்றைய பதிவாக - ஓவர் டு விஜி வெங்கடேஷ் - வெங்கட், புது தில்லி.

மழையே மழையே!

குடிக்கத் தானே கேட்டேன்;  எங்களை முடிக்கக் கேட்டேனா?

ஒரு வாய் முழுங்கக் கேட்டேன் ; ஒரேயடியாய் மூழ்கக் கேட்டேனா?

நீராடக் கேட்டேன்,எனை நீராட்டக் கேட்டேனா?

நிலத்தடி நீர் எடுத்தது நானல்ல;

காட்டை அழித்தது நான் அல்ல;

ஏரியைத் தூர்த்ததும் நானல்ல;

செய்தவனை விட்டுவிட்டு எமை ஏன் வெச்சு செய்கிறாய்?

கோடியிலே புரளும் கோமான்களை விட்டுவிட்டு,

ஊர்க்கோடி குடிசையில் உழலும் எமை ஏன் சோதிக்கிறாய்?

எய்தவன் இருக்க அம்பை ஏன் வாதிக்கிறாய்?

மீண்டும் மீண்டும்  எமையே ஏன் சோதிக்கிறாய்?

பஸ்ஸில் போகவே காசில்லை; 

இதில் படகில் போவதும் லேசில்லை;   

கூரையை பிய்த்துக்கொண்டும் வருகிறாய்;

தரையைத் தகர்த்துக் கொண்டும் நுழைகிறாய்;

கிழிந்த பாய், உடைந்த சட்டியில் என்னத்தைக் கண்டாய்?

அடுப்பில்  அனலில்லை;

சோறாக்க அரிசியுமில்லை;

குளிரடங்க ஒரு போர்வையில்லை;

குழந்தை அழுகுரல் கேட்கத் த்ராணியில்லை!

கூலியில் கூழ் குடித்த எமை பிச்சையும் எடுக்க வைத்தாய்; 

எம் தன்மானத்தை மேலும் தகர்த்து வைத்தாய்!

கூப்பிடா இடத்திற்கு வரலாமா? வந்தும் பேரிடர் தரலாமா?

போதும், உன் ஆட்டத்தை நிறுத்திக்கொள்; 

இயற்கையை இனி சீண்டமாட்டோம்!

இது எம் உறுதிமொழி, ஏற்றுக்கொள்!🙏🏻🙏🏻🙏🏻

மீண்டும் வேறு ஒரு பதிவு வழி சந்திப்போம்…

நட்புடன்

விஜி வெங்கடேஷ்

*******

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

புது தில்லி

5 டிசம்பர் 2024