ஷிம்லா ஸ்பெஷல் – ஷிம்லாவில் தமிழர்களின் கோவில்

ஷிம்லா ஸ்பெஷல் – பகுதி – 7

இப் பயணத்தொடரின் முந்தைய பதிவுகளை படிக்க வலைப்பூவின் இடது ஓரத்தில் “ஷிம்லா ஸ்பெஷல்” என்ற தலைப்பில் ஒரு Drop Down Menu இருக்கிறது. அதில் ஒவ்வொன்றாக க்ளிக்கி படிக்கலாமே!

ஷோடஸ கணபதி கோவில், தாராதேவி, ஷிம்லா

 

இந்திய இராணுவம் அமைத்திருக்கும் பாரம்பரிய அருங்காட்சியகத்தினைப் பார்த்த பிறகு அடுத்ததாக நாங்கள் சென்ற இடம் ஒரு கோவில் – தாரா தேவி பகுதியில் – ஷிம்லா நகரிலிருந்து சுமார் ஐந்து கிலோமீட்டர் தொலைவில் அமைதியான மலைப்பகுதியில் அமைந்திருக்கும் ஒரு கோவில் தான் இந்த ஷோடச கணபதி மற்றும் சங்கட மோச்சன் ஹனுமான் கோவில்கள். கோவில் பகுதியிலிருந்து ஷிம்லா நகர் முழுவதும் பார்க்க முடியும். அமைதியான சூழலில் சில நிமிடங்கள் அமர்ந்து நகரின் அழகை பார்க்க நினைத்தால் இந்த இடத்திற்கு நிச்சயம் செல்ல வேண்டும். ஹனுமான் மற்றும் பிள்ளையார் கோவில் தவிர நவக்ரஹங்கள் மற்றும் சிவபெருமானுக்கும் தனி சன்னதி உண்டு!

சங்கட மோச்சன் ஹனுமான் கோவில், தாராதேவி, ஷிம்லா

 

ஷிம்லாவில் நிறையவே வழிபாட்டுத் தலங்கள் உண்டு என்றாலும் தாரா தேவி பகுதியில் அமைந்திருக்கும் இந்த சங்கட மோச்சன் ஹனுமான் கோவிலுக்கு வரும் பக்தர்களின் எண்ணிக்கை அதிகம் – சங்கடங்களை தீர்த்து வைப்பவர் ஆயிற்றே. கூடவே இதே இடத்தில் நவகிரஹங்களுக்கான கோவிலும், ஷோடஸ கண்பதி கோவிலும் இருப்பதால் வாரத்தின் எல்லா நாட்களிலும் மக்கள் வந்த வண்ணமே இருக்கிறார்கள். கூடவே பாபா நீப்B கரோரி மஹாராஜ் என்பவருக்கும் இங்கே ஒரு சன்னதி உண்டு – இந்த பாபா தான் முதன் முதலாக 1950-களில் இங்கே வந்து இந்த இடத்தின் அழகில் மயங்கி, த்யானம் செய்தவர். இங்கே ஹனுமனுக்கு கோவில் கட்ட வேண்டும் என்ற நோக்கத்தினை தெரிவித்தார்.

அமைதியான சூழலில்....

ஷோடஸ கணபதி கோவில், தாராதேவி, ஷிம்லா

 

மரங்களுக்கிடையே....

ஷோடஸ கணபதி கோவில், தாராதேவி, ஷிம்லா

ஹிமாலய மலைத்தொடர், நடுநடுவே பள்ளத்தாக்கு, பசுமையான இடங்கள், ஷிம்லா நகர் என அனைத்துமே அவருக்கு பிடித்து விட்டது. இந்த இடத்தில் ஹனுமனுக்கு கோவில் கட்ட நினைத்தார். அவருக்கு பக்தராக இருந்தவர்களில் ஒருவர் – அந்த மாநிலத்தின் கவர்னராக இருந்தவர். பிறகென்ன, பாபாவின் வேண்டுகோளுக்கிணங்க 1962-ஆம் ஆண்டு கோவில் கட்டுமானம் ஆரம்பிக்கப்பட்டது. 21 ஜூன் 1966 அன்று கோவில் கும்பாபிஷேகம் நடத்தப்பட்டது. இப்பொழுது கோவில் நிர்வாகம் ட்ரஸ்ட் கையில் இருக்கிறது. ஒவ்வொரு ஞாயிறும் 3000-4000 பேர்களுக்கு அன்னதானம் வழங்கப்படுகிறது. கோவிலில் ஒரு ஆயுர்வேத மருத்துவமனையும் செயல்படுகிறது. செவ்வாய்க் கிழமைகளில் ஹல்வா பிரசாதமாக வழங்கப்படுகிறது. இங்கே ஒரு திருமண மண்டபமும் இருக்கிறது.  கோவில் குளிர் காலத்தில் காலை 07.00 மணி முதல் மாலை 06.30 வரையும், கோடைக் காலத்தில் காலை 06.30 முதல் இரவு 08.00 மணி வரையும் திறந்திருக்கும்.

எங்கே பார்த்தாலும் கட்டிடங்கள்....

ஷோடஸ கணபதி கோவில், தாராதேவி, ஷிம்லா

அது சரி தமிழர்களின் கோவில் என்று சொல்லி விட்டு ஹனுமான் கோவில் கட்டியது யாரோ பாபா என்று சொல்கிறீர்களே என்ற எண்ணம் உங்களுக்கு வரலாம்.  இந்த கோவில் வளாகத்தில் இருக்கும் ஒரு கோவில் தான் ஷோடஸ கணபதி கோவில். காஞ்சி காமகோடி மடத்தினரால் இங்கே தென்னிந்திய கோபுரத்துடன் கட்டப்பட்டிருக்கும் கோவில் தான் இந்த கணபதி கோவிலும் நவக்ரஹங்கள் கோவிலும். தினம் தினம் கோவிலில் பாரம்பரிய முறையில் பூஜைகள் நடைபெறுகின்றன.  மாத சதுர்த்தி தினங்களில் சிறப்பு பூஜைகள் நடக்கின்றன. விநாயக சதுர்த்தி சமயத்தில் பத்து நாட்கள் உற்சவமும் நடைபெறுவதாகத் தெரிகிறது.  கோவில் தமிழர்களின் பாரம்பரிய முறையில் தான் கட்டப்பட்டிருக்கிறது.

நாங்கள் சென்ற போது கோவிலில் இருந்தவரிடம் தமிழில் பேசினேன் – பதில் வரவில்லை! சரி என்று ஹிந்தியில் பேச பதில் கிடைத்தது – லோக்கல் ஆள் தான் கோவிலைப் பார்த்துக் கொள்கிறார் போலும்! இந்தக் கோவில் பிரதான ஹனுமான் கோவில் மாதிரி இல்லாது, காலையில் சில மணி நேரமும், மாலையில் சிறிது நேரமும் மட்டுமே திறந்திருக்கும். கோவில் அருகே நிறைய மரங்களும், அழகிய புல்வெளிகளும் உண்டு. நிறைய இருக்கைகள் ஓரங்களில் போட்டு வைத்திருக்கிறார்கள். அங்கே அமர்ந்து இயற்கை எழிலை ரசிக்க முடியும். நாங்களும் சிறிது நேரம் அங்கே அமர்ந்து இயற்கை எழிலை இரசித்தோம்.  பாபாவின் காலத்தில் பசுமை நிறைந்த மலைகளைப் பார்த்திருக்கலாம். இப்போது மலைப்பகுதி எங்கும் கட்டுமானங்கள்! எங்கே பார்த்தாலும் கட்டிடங்கள். பசுமை எங்கே என்று கேட்கும் அளவிற்கு தான் இருக்கிறது என்றாலும் பறவைப் பார்வையில் பார்க்க நல்ல ஒரு இடம் இந்த இடம்.

கோவிலில் சில நிமிடங்கள் இருந்து தரிசனம் செய்த பிறகு அங்கிருந்து புறப்பட்டோம். அடுத்ததாக நாங்கள் சென்ற இடம் என்ன இடம் – இத்தனை நேரமா சுத்திட்டே இருக்கீங்களே – சாப்பாடெல்லாம் வேண்டி இருக்காதா உங்களுக்கு என்ற கேள்வி உங்களுக்குள் தோன்றியிருக்கலாம் – அடுத்ததாக நாங்கள் சென்றது மதிய உணவு சாப்பிடத் தோதான ஒரு இடத்திற்கு. அது எந்த இடம் அங்கே என்ன சாப்பிட்டோம் என்பதை அடுத்த பகுதியில் சொல்கிறேன்.

பயணம் நல்லது. ஆதலினால் பயணம் செய்வீர்!

மீண்டும் ச[சி]ந்திப்போம்…

நட்புடன்

வெங்கட்

புது தில்லி.