குரோதி வருடம் - வாழ்த்துகள்

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

இதற்கு முன்னர் வெளியிட்ட கதம்பம் பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

அனைவருக்கும் இனிய தமிழ் புத்தாண்டு வாழ்த்துகள்!

பிறந்திருக்கும் இந்த புதுவருடமாம் குரோதி ஆண்டில் எல்லாருக்கும் எல்லாம் கிடைக்கணும்! நல்லதே நடக்கணும்! மனதில் உள்ள கசடுகள் யாவும் நீங்கி இன்பமும், நிம்மதியும், ஆரோக்கியமும் மேலோங்கி இருக்கணும்! 

நீர்வளம் மேம்பட்டு  பசுமையான சூழல் எங்கும் இருக்கணும்! நமது நாட்டிலும் சமுதாயத்திலும் எழுச்சி ஏற்பட்டு எங்கும் வளமையான வாழ்வு மலர்ந்து நிலைக்கணும்! 

நல்லதே நடக்கும்!

எல்லாம் நன்மைக்கே!

இந்த வருட தமிழ் புத்தாண்டுக்கு என்னவர் என்னுடன் இருப்பதால் சற்றே உற்சாகத்துடனும் அவரின் உதவிகளோடும் பண்டிகைச் சமையலை செய்தேன்! ரசித்து சாப்பிடுவோர் இருந்தால் தானே விதவிதமாக சமைக்க ஆர்வமும் ஏற்படும் இல்லையா..🙂

புத்தாண்டு சிறப்பாக மாங்காய் அறுசுவை பச்சடி, அரிசி தேங்காய் பாயசம், முப்பருப்பு வடை, முதல் தடவையாக பாரம்பரிய இனிப்பான சொஜ்ஜி அப்பமும் இன்று செய்திருந்தேன்! என் அம்மா செய்து தந்து சிறுவயதில்  ருசித்திருக்கிறேன்! என்னவர் இதுவரை சாப்பிட்டதில்லை என்பதால் இன்று செய்தேன்! 

சொஜ்ஜி பஜ்ஜியெல்லாம் பெண் பார்க்க வரும் போது தருவான்னு கேள்விப்பட்டிருக்கேன்! இது என்ன! சொஜ்ஜி அப்பம்??

சூஜின்னா ரவை இல்லையா! அதனால அதை சொஜ்ஜின்னு சொல்லியிருக்கலாம்! அதை கேசரியா கிளறி போளி மாவுல வெச்சு தட்டி எண்ணெயில போட்டெடுத்தா அது தான் சொஜ்ஜி அப்பம்!

அது சரி! இந்த சொஜ்ஜி பஜ்ஜியெல்லாம் நான் உன்னப் பார்க்க வந்த போது குடுத்தாளான்னு தெரியலையே...🙂

இன்னும் கொஞ்ச வருஷம் கழிச்சு கேளுங்கோ...🙂

இதனுடன் சாதம், வெண்டக்காய் சாம்பார், ரசம், கத்திரிக்காய் பொடித்தூவல் என இன்றைய சமையல் இருந்தது!

மீண்டும் அனைவருக்கும் ஒரு முறை குரோதி வருட தமிழ் புத்தாண்டு நல்வாழ்த்துகள்.

*******

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

ஆதி வெங்கட்