கதம்பம் - Fashion Designing - சம்மர் ஸ்பெஷல் - பிறந்தநாள்

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

இதற்கு முன்னர் வெளியிட்ட மின்னூல் வெளியீடு - மீண்டும் கல்லூரிக்குப் போகலாம் பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

ரோஷ்ணி கார்னர் - Fashion Designing - 19 மார்ச் 2025: 

மகள் இந்தக் கோர்ஸில் சேர்ந்தது முதலாகத் தான் நிறைய நிறைய  விஷயங்களை என்னால் தெரிந்து கொள்ள முடிகிறது! அவளுக்கு எப்படி இதில் ஆர்வம் வந்தது என்று எனக்கு  தெரியவில்லை!! A to Z Cotton seed to fabric! என்று சொல்லலாம்! அவ்வளவு விஷயங்கள் இருக்கின்றது!

ஒவ்வொரு செமஸ்டரிலும் Theoryல் கற்பது போக practicalக்காக நிறைய நிறைய செய்து வருகிறாள்! போன செமஸ்டரில் Wet processing என்று துணிகளை ப்ளீச்சிங் செய்வது, வண்ணம் ஏற்றுவது, பிரிண்ட் போடுவது என்று பலவற்றை செய்து வந்து காண்பித்தாள்!

இந்த செமஸ்டரில் அவளுக்கான பாடம் Kids garment! கல்லூரியில் பெரும்பாலும் தியரி தான் கற்று வருகிறாள் என்றாலும் இணையத்தில் தேடி குட்டி குட்டியாக நிறைய டிரஸ்களை தைத்து முடித்தாள்! ரெகார்டுக்காக தனியே miniature டிரஸ்களும் தைத்தாள்!

கைகளில் மட்டுமே ஒரு ஆடையை வடிவமைக்க முடிந்தால் போதுமா! கணினியிலும் Corel draw எனும் Computer aided designing மூலம் அத்தனை ஆடைகளையும் வடிவமைத்தாள்! என் கல்லூரிப்பருவத்தில் இயந்திரபாகங்களை நான் வடிவமைத்திருக்கிறேன் என்றால் மகள் அவள் துறையில்! மிகவும்  நுணுக்கமான வேலை இது!

சம்மர் ஸ்பெஷல் - 23 மார்ச் 2025:

கொளுத்தும் வெயிலுக்கு ஏற்ற குளிர்பானம்! அல்லது காலையில் எழுந்ததும் குடிக்க ஏற்ற பானம்! இதனால் உடலில் நோய் எதிர்ப்பு சக்தியும் மேம்படும் என்றால் நல்லது தானே! என்ன இது???!!

ABC ஆப்பிள், பீட்ரூட், கேரட் மூன்றையும் சமஅளவு எடுத்து சுத்தம் செய்து மிக்சியில் இட்டு அரைத்து ஐஸ் ட்ரேக்களில் விட்டு வைத்துக் கொண்டால் ஒரு தம்ளர் நீருக்கு இரண்டு க்யூப் வீதம் போட்டு பருகலாம்! தேவைப்பட்டால் இதில் சிறிதளவு எலுமிச்சைசாறு, உப்பு, சாட் மசாலா சிறிதளவும் சேர்த்துக் கொள்ளலாம்! அல்லது இதற்குப் பதிலாக இதில் தேன் அல்லது நாட்டுச் சர்க்கரை சேர்த்தும் பருகலாம்!

மார்கெட்டில் ABC malt என்று கொள்ளை விலையில் விற்கப்படுகிறது! அதன் செய்முறையில் அவற்றை அரைத்து கடாயில் இட்டு கிளறுவதன் மூலம் சத்துக்களும் போய்விடும்! 

நெல்லிக்காய், கறிவேப்பிலை, இஞ்சி மூன்றையும் சுத்தம் செய்து மிக்சியில் அரைத்துக் கொண்டு ஐஸ் ட்ரேக்களில் போட்டு வைத்துக் கொண்டால் அன்றாடம் காலையில் எழுந்ததும் பருக ஏற்ற பானம்! நெல்லிக்காய், கறிவேப்பிலை இவற்றில் உள்ள நன்மைகள் நம் அனைவரும் அறிந்ததே!

சில வருடங்களுக்கு முன்பு காலையில் வெறும் வயிற்றில் ஒரு பிடி கறிவேப்பிலை சாப்பிடுவதை வழக்கமாக கொண்டிருந்தேன்! பின்பு அதனுடன் ஒரு நெல்லிக்காயும் சேர்த்து சுவைத்துக் கொண்டிருந்தேன்! இப்போது இந்த செய்முறையில் அன்றாட பழக்கத்தைத் தொடரலாம்!

நெல்லிக்காய், கறிவேப்பிலை, இஞ்சியுடன், பச்சை மஞ்சள் அல்லது மஞ்சள்தூள், எலுமிச்சை சாறு, மிளகு இவற்றையும் சேர்த்து அரைத்துக் கொள்ளலாம்! ஒரு தம்ளர் நீரில் இரண்டு க்யூப் போட்டு குடிக்கலாம்! தேவைக்கேற்ப இதில் தேன் அல்லது உப்பு, சாட் மசாலா, மோர் சேர்த்தும் பருகலாம்! 

கடைகளில் விற்கும் Aerated drinksஐயும் வெள்ளை சர்க்கரை சேர்த்த பானங்களையும் தவிர்த்து விட்டு நமக்கு நாமே செய்து கொள்ளும் வகையில் ஒரு ஆரோக்கியமான ஜூஸ்! சுவையிலும் எந்த குறைவும் இல்லை! உடலை மட்டுமல்ல வயிற்றையும் குளிர்விக்கிறது! நீங்களும் முயன்று பாருங்களேன்!

******

பிறந்தநாள் - 25 மார்ச் 2025: 

வருடங்கள் கடந்து செல்வதைப் போல வயதும் கூடிக் கொண்டே தான் செல்கிறது! இந்த பூமியில் நான் ஜனித்து 43 வருடங்களாகி விட்டதாம்! இதுவரை என் வாழ்நாளில் யாராவது ஒருவருக்காவது உபயோகமாக இருந்திருப்பேன் என்று நினைப்புடன் மிகுதி வாழ்வைத் தொடரப் போகிறேன்! 

சாப்பிடாமல் இருப்பது மட்டும் விரதம் என்பது அல்ல! துன்பங்களை பொறுத்துக் கொள்வதும் யாருக்கும் துன்பம் விளைவிக்காமல் இருப்பதும் கூட விரதமாம்! இதை செவி வழி செய்தியாக நேற்று வானொலியில் கேட்க முடிந்தது! உண்மை தானே! அப்படியென்றால் நானும் அப்படி பல விரதங்களை இருந்திருக்கிறேன்!

என் வாழ்வை சற்றே திரும்பிப் பார்த்தால் கடந்து வந்த வாழ்நாளில்  எல்லா வித அனுபவங்களையும் ரொம்ப சீக்கிரமே பார்த்து விட்டேன் என்று தான் சொல்லணும்! அன்பு, பாசம், பிரிவு, இழப்பு என்று என்னைச் சுற்றியுள்ள மனிதர்களிடமிருந்து எனக்கு கிடைத்ததும், நான் அவர்களுக்கு  கொடுத்ததும் என பல எண்ணங்கள் அவ்வப்போது தோன்றிய வண்ணம் தான் இருக்கின்றது!

பிறந்தநாள் கொண்டாட்டங்கள் என்பதெல்லாம் எப்போதும் தோன்றியதில்லை! அம்மா பண்ணித் தந்த பாயசமும், குலோப்ஜாமூனும் இன்னும் தித்தித்துக் கொண்டிருக்க, அப்போது என் பிஞ்சு கைகளில் வைத்துக் கொண்ட  மருதாணியின் வாசமும் பசுமையாய் மனதில் படர்ந்திருக்க அதை பொக்கிஷமாய் பாதுகாத்துக் கொள்ளவே நினைக்கிறேன்!

இது உனக்காக வாங்கினேன்! பர்த்டேக்கு உனக்கு ஒரு சர்ப்ரைஸ் குடுக்கலாம்னு நினைச்சேன்! என்ற என்னவரின் அன்பிலும், அம்மா! எனக்கு வாங்கினது எல்லாம்  இருக்கட்டும்! உனக்காக இப்போ நான் செலக்ட் பண்ணுவேன்! நீ போட்டுக்கணும்! என மகளின் அன்பிலும் நெகிழ்ந்து போகிறேன்! இந்த அன்புக்கு முன்னால் கொண்டாட்டம் என்பது பெரிதல்ல!

ஒவ்வொரு நாளும் இறைவனிடம் இறைஞ்சுவது நோய் நொடியில்லாத  வாழ்வும், விழிப்பு தட்டாத நிம்மதியான உறக்கமும், இன்னும் செய்து முடிக்க வேண்டிய கடமைகளை நிறைவேற்ற உடலில் தெம்பும், மனதில் நிதானமும், பக்குவமும் மட்டுமே! பணம் பொருளின் மீது என்றுமே பற்று இருந்ததில்லை!

இணைய உலகில் 15 வருடங்களாக எழுதிக் கொண்டிருக்கிறேன்! காலை முதல் முகநூல், வாட்ஸப், மெசஞ்சர் என்று எங்கும் பல அன்பான  நட்புள்ளங்களின் வாழ்த்து மழையால் இன்று மலைக்கோட்டை நகரின் வெப்பம் கூட சற்று தணிந்துள்ளது என்று சொல்லிக் கொள்வேன்! அனைவரின் அன்புக்கும் என் நெஞ்சார்ந்த நன்றிகள்! பெரியோர்களுக்கு என் நமஸ்காரங்கள்!

இந்த நாள் இனிய நாள்!

******

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

ஆதி வெங்கட்

திருவரங்கம்

25 ஜூன் 2025