சாப்பிட வாங்க – கட்டல் சப்ஜி

சாப்பிட வாங்க பதிவு எழுதி ரொம்ப நாட்களாகி விட்டன. சில நாட்கள் முன்னர் எழுதிய பிறந்த நாள் பார்ட்டி - ரிட்டர்ன் கிஃப்ட் – கட்டல் சப்ஜி!…. பதிவில், பதிவர் ஏஞ்சலின் அவர்கள் ”கட்டல் சப்ஜி ரெசிப்பிக்கு வெயிட்டிங்” என்று பின்னூட்டத்தில் எழுதி இருந்தார். கேட்ட பிறகு நான் செய்யும் முறையை பகிர்ந்து கொள்ளாமல் இருக்க முடியவில்லை! இதோ களத்தில் இறங்கி விட்டேன்.  கட்டல் என்ற ஹிந்தி வார்த்தைக்கு பலாக்காய் என அர்த்தம். कटहल என ஹிந்தியில் கட்ஹல் என எழுதினாலும் பெரும்பாலும் கட்டல் எனவே சொல்வது வழக்கமாக இருக்கிறது. வட இந்தியாவில் இந்த பலாக்காயை காய்கறி கடையில் தோல் சீவி சின்னச் சின்னத் துண்டுகளாக வெட்டிக் கொடுத்து விடுவார்கள்.  அப்படிக் கொடுப்பதை வாங்கி வந்து சுலபமாக சப்ஜி செய்யலாம்!

தேவையான பொருட்கள்:

துண்டுகளாக நறுக்கிய பலாக்காய்...

வெங்காயம், தக்காளி, பச்சை மிளகாய், பூண்டு, இஞ்சி...

சிறு துண்டுகளாக நறுக்கிய பலாக்காய் – 200 கிராம், பூண்டு – 8 முதல் 10 பல், வெங்காயம் – 2, தக்காளி – 2, இஞ்சி – கொஞ்சம், பச்சை மிளகாய் – 2, சிவப்பு மிளகாய் – 2, கொத்தமல்லி அலங்கரிக்க! ஜீரா, மிளகு, கரம் மசாலா, தனியா, மஞ்சள் பொடி, மிளகாய் பொடி, உப்பு, எண்ணை….

எப்படிச் செய்யணும் மாமு?

தோலுரித்த பூண்டு, இஞ்சி, ஜீரா, மிளகு, தனியா, பச்சை மிளகாய் ஆகியவற்றை மிக்சி ஜாரில் போட்டு விழுதாக அரைத்துக் கொள்ளவும்.

குக்கரில் சிறிதளவு எண்ணை விட்டு, கொஞ்சம் ஜீரா போட்டு அது டப் டிப்பிய பிறகு, சிவப்பு மிளகாய் இரண்டையும் போட்டு, பொடியாக நறுக்கிய வெங்காயத்தினைப் போட்டு பொன்னிறமாக வறுக்கவும். அரைத்து வைத்த விழுதினில் கொஞ்சமும் சேர்க்கவும். 

வெங்காயம் பொன்னிறமாக வதங்கிய பிறகு பொடியாக நறுக்கிய தக்காளியையும் சேர்த்துக் கொள்ளவும். தக்காளி, வெங்காயம் நன்கு வதங்கி எண்ணை விட ஆரம்பிக்கும் பொழுது, மீதி இருக்கும் விழுதினைப் போட்டு, கொஞ்சம் மஞ்சள் பொடி, மிளகாய் பொடி, கரம் மசாலா, உப்பு சேர்த்து வதக்கவும். வதங்கும் போதே வாசனை உங்கள் நாசியை அடைந்து சீக்கிரம் சீக்கிரம் எனச் சொல்ல ஆரம்பிக்கும்!

அதன் பிறகு கொஞ்சமாக தண்ணீர் [சுமார் ஒரு டம்ளர்] சேர்த்து, காய்கறிக் கடைக்காரர் துண்டுகளாக வெட்டிக் கொடுத்த பலாக்காயைப் போட்டு குக்கரை மூடி இரண்டு அல்லது மூன்று விசில் விடலாம்! அதிகமாய் விசில் அடித்தால் குழைந்து விடும் அபாயம் உண்டு! இங்கே விசில் அடிக்கப் போவது குக்கர் மட்டுமே….  சந்தோஷத்தில் நீங்களும் விசில் அடித்தாலும் தவறில்லை!

அடுப்பை அணைத்து [சூடா இருக்க அடுப்பை அணைச்சுக்கப் போறீங்க, ஜாக்கிரதை!] Pressure குறைந்த பிறகு குக்கர் மூடியைத் திறக்க, தண்ணீர் அதிகமிருந்தால், மீண்டும் அடுப்பைப் பற்ற வைத்து கொஞ்சம் வதக்கிக் கொள்ளலாம். 

குக்கரிலிருந்து எடுத்து பாத்திரத்தில் போட்டு, கொஞ்சமாக கொத்தமல்லி தழைகளைத் தூவி அலங்கரித்தால் ஆச்சு கட்டல் சப்ஜி!

இங்கே சப்பாத்தி, பூரி, பராந்தா என அனைத்துடனும் உண்ணுகிறார்கள்! நீங்களும் செய்து பார்க்கலாம்!  நல்லாவே இருக்கும்!

செய்து பாருங்களேன்!

மீண்டும் ச[சி]ந்திப்போம்….

நட்புடன்

வெங்கட்

புது தில்லி. 

கொல்கத்தா – பழசும் புதுசும் – எகோ பார்க்!

ஏழு சகோதரி மாநிலங்கள் பயணம் – பகுதி 102

இந்தப் பயணக் கட்டுரையின் முந்தைய பகுதிகளைப் படிக்கவில்லையா.....  இதோ உங்களுக்காகவே அந்தப் பகுதிகளின் சுட்டிகளுக்கான ஒரு Drop Down Menu, வலைப்பூவின் வலது ஓரத்தில் “ஏழு சகோதரிகள்” என்ற தலைப்பின் கீழே இருக்கிறது.

நீர் நிலையில் Cruise பயணம்

கொல்கத்தா என்றதும் எங்கே பார்த்தாலும் இருக்கும் மக்கள் கூட்டமும், அழுக்கும் மட்டுமே என்று நினைத்திருப்பவர்களில் நானும் உண்டு. கொல்கத்தா நகரம் என்றதுமே எல்லா இடங்களிலும் வெற்றிலைச் சாறை துப்பி சிவப்பாக வைத்திருப்பார்கள் என்று சொல்லுவது உண்டு! அந்தச் சிவப்பு பல வருடங்களாக அவர்களுக்குப் பழகிப் போன வண்ணம் என்றும் சொல்லலாம்.  பழைய கொல்கத்தா அழுக்காகவே இருக்க, புதிய கொல்கத்தாவை இழைத்து வைத்திருக்கிறார்கள்.  பல அடுக்கு மாடிக் கட்டிடங்கள், பூங்காக்கள் என அழகாய் இருக்கிறது.  அப்படி ஒரு பூங்காவிற்கு தான் நாங்கள் சென்றிருந்தோம்.

நீர் நிலை.....

அந்தப் பூங்கா Eco Park என அழைக்கப்படும் பூங்கா. சுமார் 480 ஏக்கர் பரப்பளவில் அமைந்துள்ள இந்தப் பூங்கா 2012-ஆம் ஆண்டு தான் திட்டமிடப்பட்டு அமைத்திருக்கிறார்கள். மிகவும் நன்றாகவே பராமரிக்கிறார்கள். நடைபாதைகள், புல்வெளி, சைக்கிள் பாதைகள், நீர் விளையாட்டுகள் என பல விஷயங்கள் இங்கே உண்டு. குடும்பத்துடன் சைக்கிள் - இரண்டு பேர் அமர்ந்து பெடல் செய்யக்கூடிய Duo சைக்கிள்கள் வைத்திருக்க, அவற்றில் சைக்கிள் ஓட்டும் பல ஜோடிகளைப் பார்க்க முடிந்தது. படகுச் சவாரி, பலூன் சவாரி என நிறைய விஷயங்கள் – பெரும்பாலான குடும்பத்தினர் தங்களது பொழுதைப் போக்க இங்கே வந்து விடுகிறார்கள். 

பூங்காவில் நண்பர்களுடன்....

பூங்காவிற்குச் செல்ல நுழைவுச் சீட்டு உண்டு – 20 ரூபாய் மட்டுமே. காமிராவுக்கு தனியே கட்டணம் கிடையாது! நிறைய பூஞ்செடிகள், புல்வெளிகள் இருக்க, பலரும் செல்வி புள்ளைகளாக – செல்ஃபி எடுத்த வண்ணமே இருக்கிறார்கள்.  திங்கள் கிழமைகள் தவிர மற்ற எல்லா தினமும் மாலை நேரங்களில் [02.30 PM to 08.30 PM on week days and 12.00 Noon to 08.30 on Sundays and Holidays] திறந்திருக்கும் இந்தப் பூங்காவிற்கு பழைய கொல்கத்தாவிலிருந்து நிறைய மக்கள் வந்து போகிறார்கள். நாங்களும் இந்தப் பூங்காவிற்குச் சென்று சிறிது நேரம் அமர்ந்து மக்களை வேடிக்கை பார்த்துக் கொண்டிருந்தோம்.  எங்கள் பயணத்தின் கடைசி நாள் இன்று தான் என்பதால் – பதினைந்து தினங்களில் பார்த்த இடங்கள், கிடைத்த அனுபவங்கள் ஆகியவற்றை மனதுக்குள் அசைபோட நல்லதொரு வாய்ப்பு.

பூங்காவின் வெளியே நடைபாதைக் கடைகள்....

Toy Train, Ice Skating, Archery, Baby Cycling, Bird Watching, Cruise, Duo Cycling, E-byke, floating pontoon, Laser Bumpi Boat, Paddle Boating, Roller Skates, Water Cycling, Water Zorbing, Speed Boat என பல விஷயங்கள் இங்கே உண்டு.  ஒவ்வொன்றும் ஒவ்வொரு வித குஷி தரும் விஷயம். குறிப்பாக குடும்பத்துடன் வருபவர்கள், இளைஞர்கள், சிறுவர்கள் என அனைவருக்கும் பிடித்த ஏதாவது ஒரு விளையாட்டு/பொழுதுபோக்கு இங்கே இருப்பதால் பொழுது நன்றாக போகும்.  நுழைவுச் சீட்டு 20 ரூபாய் மட்டுமே என்றாலும், இந்த பொழுது போக்கு அம்சங்களுக்கான கட்டணம் தனி என்பதையும் இங்கே சொல்ல வேண்டும்.

நீர் நிலையில் இப்படி பயணம் செய்யலாம்!

இந்தப் பூங்காவினைச் சுற்றி நிறைய புதிய விஷயங்களை ஆரம்பித்திருக்கிறார்கள்.  குறிப்பாக Floating Musical Fountain, Butterfly garden, Bamboo Garden, Fruits Garden, Food Court, Tea Garden, Mask Garden, Formal Garden மற்றும் Wax Museum  என புதியதாக அமைக்கப்பட்ட விஷயங்கள் ஏராளம். நிறைய கட்டிடங்கள், அகன்ற சாலைகள் என புதிய கொல்கத்தா நன்றாகவே நிர்மாணித்து இருக்கிறார்கள். இவை அனைத்தும் தீதி என அழைக்கப்படும் மம்தா முதலமைச்சராக வந்த பிறகு நடந்த விஷயங்கள்.

தண்ணீருக்குள்ளும் சைக்கிள் ஓட்டலாம்! 

நிறைய நேரம் அங்கே அமர்ந்து கதைகள் பேசி அந்த நாளை இனிமையாகக் கழித்துக் கொண்டிருந்தோம்.  அடுத்த நாள் கொல்கத்தாவிலிருந்து கேரள நண்பர்கள், திருவனந்தபுரத்திற்குப் புறப்பட, நான் மட்டும் தலைநகர் தில்லி புறப்பட வேண்டும். பதினைந்து நாட்கள் பயணம் முடியப்போகிறதே என்ற வருத்தம் இருந்தது.  இனிமையான பயணமாக இருந்தாலும் முடிவுக்கு வந்தாகத்தானே வேண்டும். அடுத்த நாள் புறப்படுவதால், வீடு திரும்பும் கேரள நண்பர்கள் வீட்டிற்கு ஏதாவது இனிப்பு வாங்க வேண்டும் என்று சொல்ல, பெங்காலி நண்பரை அழைத்தேன். 

ஏலேலோ ஐலேசா...  

மேற்கு வங்கம் இனிப்புக்குப் பெயர் போனதாயிற்றே… வங்காளிகள் இனிப்பு இல்லாமல் இருக்கவே மாட்டார்கள். அதிகாலை நேரத்தில் கூட இனிப்பு கொடுத்தால் வேண்டாம் என்று சொல்லாமல் இனிப்பு சாப்பிடுபவர்கள் அவர்கள்.  இனிப்புக்குப் பெயர்போன ஊரிலிருந்து வீடு செல்லும் போது வாங்கிச் செல்லாமல் இருப்பது நல்லதல்லவே! நேராக நண்பர் சொன்ன கடைக்குச் சென்று தேவையான இனிப்பு வகைகளை வாங்கிக் கொண்ட பின்னர் நேரே தங்கி இருக்கும் இடத்திற்கு வந்தோம்.   

தங்கும் விடுதிக்கு அருகே இருந்த உணவகத்தில் இரவு உணவு முடித்துக் கொண்டு, விடுதிக் காப்பாளரிடம் அடுத்த நாள் காலையில் எங்களுக்கு விமானநிலையம் செல்ல வண்டி தேவை என்பதைச் சொல்லி, அறைக்கான வாடகையும் கொடுத்து உறங்கச் சென்றோம். அடுத்த நாள் என்ன நடந்தது என்பதை வரும் பகுதியில் சொல்கிறேன்!

தொடர்ந்து பயணிப்போம்.....

நட்புடன்

வெங்கட்.

புது தில்லி.

சூரஜ்குண்ட் மேளா – 2017 – ஒரு காமிரா பார்வை….

தில்லியை அடுத்த சூரஜ்குண்ட் [ஹரியானா] பகுதியில் வருடா வருடம் 15 நாட்களுக்கு மேளா நடக்கும் – பெரும்பாலும் 1 ஃபிப்ரவரி முதல் 15 ஃபிப்ரவரி வரை நடக்கும் இந்த மேளாவிற்கு நான் நண்பர்களோடு சென்று வருவது வழக்கமாக இருக்கிறது. இந்த வருடம் சென்றபோது எடுத்த சில புகைப்படங்களை அவ்வப்போது எனது பக்கத்தில் வெளியிட்டு இருக்கிறேன்.  இன்றைக்கு இன்னும் சில புகைப்படங்கள்……

ஆம் கா பன்னா என ஒரு பானம் – மாங்காய் கொண்டு தயாரிக்கப்படுவது – அதை விற்பவர் அணிந்திருந்த தொப்பி…. தொப்பி எதைக் கொண்டு தயாரிக்கப்பட்டது என்று புரிந்தால் சொல்லுங்களேன்….

சுவர் அலங்காரத்திற்கு பொம்மைகள்….  டெரகோட்டா பொம்மைகள்!

வாயிற்காப்போன்….  ராஜஸ்தானிய பொம்மைகள்….

பிள்ளையார் – ஜார்க்கண்ட் மாநில மண் பொம்மை.

தேவி - ஜார்க்கண்ட் மாநில மண் பொம்மை.

சிவன் - ஜார்க்கண்ட் மாநில மண் பொம்மை.

சிங்கமும் தேவியும் - ஜார்க்கண்ட் மாநில மண் பொம்மைகள்.

யோசனையில் புத்தர்….

ஜார்கண்ட் மாநில Dhokra Craft....

ஜார்கண்ட் மாநில Dhokra Craft....

ஜார்கண்ட் மாநில Dhokra Craft....

ஜார்கண்ட் மாநில Dhokra Craft....

ஜார்கண்ட் மாநில Dhokra Craft....

ஒரு ஓவியம்.....

விதம் விதமாய் கதவுக்கான கைப்பிடிகள்...

அழகிய சிற்பமொன்று.... யானைச் சிற்பத்திலும் சிறு சிற்பங்கள்.... 

கம்பிகளில் விளக்கு...  Lamp Shade!

மற்றுமொரு ஓவியம்... 

மற்றுமொரு ஜார்கண்ட் மாநில Dhokra Craft....

நான்கடி உயர சக்கரத்தில் பிள்ளையார் சிலைகள்....

கொட்டட்டும் முரசு....

கீதோபதேச காட்சிகள்....

என்ன நண்பர்களே, படங்களை ரசித்தீர்களா? பின்னூட்டத்தில் சொல்லுங்களேன்….

மீண்டும் சந்திப்போம்….

நட்புடன்

வெங்கட்

புது தில்லி.

ஃப்ரூட் சாலட் 195 – மனமும் கரமும் – வரவும் செலவும் – நீயாக இரு…

இந்த வார ஃப்ரூட் சாலட் - ”லைவ் ரிலே கொஞ்சம் டிலே!” வெள்ளிக்கிழமைக்கு பதில் சனிக்கிழமையில்! :)

இந்த வார காணொளி:

கருத்துள்ள காணொளி.... பாருங்களேன்.

இந்த வார குறுஞ்செய்தி:

உங்களுக்கு மதிப்பில்லை என நீங்கள் உணரும் தருணத்தில் மௌனமாக இருந்திடுங்கள்…..  காலப்போக்கில் உங்களின் மௌனம் அதீத மதிப்பை அங்கே பெற்றுத் தரும்.

இந்த வார முகப்புத்தக இற்றை:

உதவி செய்ய கரம் பெரிதாய் இருக்கத் தேவையில்லை ! மனம் பெரிதாய் இருந்தால் போதும் !

இந்த வார WhatsApp தகவல்:

வரவு என்பது கண்ணீர் போல.... ஒரே இடத்துல தான் வருது....

செலவு என்பது வியர்வை போல.... எங்கிருந்தெல்லாமோ வருது..... 

இந்த வார படமும் கவிதையும்:

கம்பீரமாய் அமர்ந்து சிரிக்கிறார் மாப்பிள்ளை

கல்யாணமான மகிழ்வில்.

மணப்பெண்ணின் கவலையெல்லாம்

அன்றைய தொலைக்காட்சித் தொடர்நாடகம்

என்னவாகியிருக்கும் என்பதில் தான்.

நிலாமகள், நெய்வேலி.

குறிப்பு: புகைப்படக் கவிதைகள் எழுதச் சொல்லிக் கேட்டதற்கு, வந்த கவிதைகளை தொகுத்துக் கொண்டிருக்கிறேன்.  இன்னும் அனுப்ப விருப்பமிருப்பவர்கள் அனுப்பலாம்….

இந்த வார புகைப்படம்:

சூரஜ்குண்ட் மேளாவில் எடுத்த புகைப்படம்....   என்ன ஒரு ஒய்யாரப் படுக்கை!

படித்ததில் பிடித்தது:

நீ . . .நீயாக இரு !

தங்கம் விலை அதிகம்தான் . . .

தகரம் மலிவு தான் . . .

ஆனால் தகரத்தைக் கொண்டு

செய்யவேண்டியதை

தங்கம் கொண்டு செய்யமுடியாது . . .

அதனால் தகரம் மட்டமில்லை . . .

தங்கமும் உயர்ந்ததில்லை . . .

எனவே நீ . . .நீயாக இரு !

கங்கை நீர் புனிதம் தான் . . .

அதனால் கிணற்று நீர் வீண் என்று

அர்த்தமில்லை . . .

தாகத்தில் தவிப்பவருக்கு

கங்கையாயிருந்தால் என்ன ?

கிணறாகயிருந்தால் என்ன ?

நீ . . .நீயாக இரு !

காகம் மயில் போல் அழகில்லை தான் . . .

ஆனாலும் படையல் என்னவோ காக்கைக்குத்தான் !

நீ . . .நீயாக இரு !

நாய்க்கு சிங்கம் போல் வீரமில்லை தான் . . .

ஆனாலும் நன்றி என்னவோ நாய்க்குத் தான் !

நீ . . .நீயாக இரு !

பட்டு போல் பருத்தி இல்லை தான் . . .

ஆனாலும் வெய்யிலுக்கு சுகமென்னவோ பருத்திதான் !

நீ . . .நீயாக இரு !

ஆகாசம் போல் பூமி இல்லைதான் . . .

ஆனாலும் தாங்குவதற்கு இருப்பது பூமிதான் !

நீ . . .நீயாக இரு !

நேற்று போல் இன்றில்லை . . .

இன்று போல் நாளையில்லை . . .

அதனால் ஒவ்வொன்றும் அற்புதம்தான் !

எனவே நீ . . .நீயாக இரு !

அதில் வெட்கப்பட ஒன்றுமில்லை !

அதில் வருத்தப்பட ஒன்றுமில்லை !

அதில் நொந்துபோக ஒன்றுமில்லை !

அதில் பாபம் ஏதுமில்லை !

அதில் அசிங்கம் ஒன்றுமில்லை !

 உன்னை உரசிப் பார் . . .

உன்னை சரி செய்து கொண்டே வா . . .

நீ . . .நீயாக இரு !

உலகம் ஒரு நாள்,

உன்னைப் போல் வாழ ஆசைப்படும் ! ! !

நீ . . .நீயாக இரு !

உலகம் ஒரு நாள்

உன்னை உதாரணமாகக் கொள்ளும் ! ! !

நீ . . .நீயாக இரு !

உலகம் ஒரு நாள்,

உன்னைப் பாடமாக ஏற்கும் ! ! !

நீ . . .நீயாக இரு !

உலகம் ஒரு நாள்,

உன் வழி நடக்கும் ! ! !

நீ . . .நீயாக இரு !

நீ . . .நீயாகவே இரு !

மீண்டும் அடுத்த வெள்ளியன்று வேறொரு ஃப்ரூட் சாலட்-ல் சந்திக்கும் வரை…..

நட்புடன்

வெங்கட்.

புது தில்லி.

பிறந்த நாள் பார்ட்டி - ரிட்டர்ன் கிஃப்ட் – கட்டல் சப்ஜி!….

நேற்று மாலை அலுவலகத்திலிருந்து வீடு திரும்பிக் கொண்டிருந்தேன். பேருந்து நிறுத்தத்திலிருந்து வீடு திரும்புகையில் மனதுக்குள் யோசனை – என்ன சமையல் செய்வது? காலையும் மதியமும் சப்பாத்தி சாப்பிட்டாயிற்று. இரவுக்கு சாதம் வைத்து கொஞ்சம் ரசமும், தொட்டுக்கொள்ள ஏதேனும் செய்து விடலாம் என யோசித்தபடியே நடந்த போது வரிசையாக அலைபேசியில் குறுஞ்செய்திகள்… என்ன என்று பார்த்தால் அலுவலத்தில் இருந்த போது Jammer காரணமாக நிறைய அழைப்புகள் வரவில்லை போலும்! பத்து பன்னிரெண்டு மிஸ்டு கால் வந்ததாக குறுஞ்செய்தி. 

ஒவ்வொருவராக அழைத்து என்ன விஷயத்திற்காக அழைத்தார்கள் எனக் கேட்டுக்கொண்டே வந்தேன். நண்பர் ஒருவரிடமிருந்து மட்டும் ஒன்பது Missed Call என குறுஞ்செய்தி – ஏர்டெல்லிலிருந்து வந்தது! இத்தனை முறை அழைத்திருக்கிறாரே என்ன விஷயமோ, என அவரை அழைத்துக் கேட்க, ”எத்தனை முறை அழைத்தேன்… Call போகவே இல்லையே…” என்று சொன்னதோடு இப்போது எங்கே இருக்கிறேன் எனக் கேட்டார். விஷயம் இது தான்! அவரது மூன்று வயது மகளுக்கு பிறந்த நாள் என்றும் வீட்டுக்கு வந்து பார்ட்டியில் கலந்து கொள்ள வேண்டும் என்று சொல்ல, தர்மசங்கடமாகி விட்டது!

இத்தனை Short Notice-ல் அழைத்தால், பிறந்த நாள் கொண்டாடும் அவரது மகளுக்கு என்ன Gift கொடுப்பது? முதலில் தெரிந்திருந்தால் ஏதாவது வாங்கி வைத்திருக்கலாம். அதுவும் மார்க்கெட் சென்று வாங்கிச் செல்லலாம் என்றால் அதற்கு நேரம் கொடுக்காது உடனே வர வேண்டும் எனச் சொல்லி, வந்திருக்கும் அனைவரும் எனக்காகக் காத்திருப்பார்கள் எனச் சொன்ன பிறகு நேரம் எடுத்துக் கொள்வது நன்றாக இருக்காது! சரி வழியில் இருக்கும் கடையில் சாக்லேட் வாங்கிக் கொண்டு செல்லலாம் என என் வீட்டுக்குச் செல்லாமல் அவருடைய வீட்டிற்குச் சென்றேன்.

நான் சென்று சேர்ந்தவுடன் மெழுகுவர்த்தி அணைத்து, கேக் வெட்டி, ஹாப்பி பர்த்டே பாடல் பாடி கொண்டாட்டம் துவங்கி விட்டது. வாங்கிக் கொண்டு சென்ற சாக்லேட்டுகளை குழந்தையிடம் கொடுத்து நண்பர்களுடன் அரட்டை துவங்கியது – பர்த்டே கேக் உண்டபடியே. அது சாப்பிட்ட சில நிமிடங்களுக்குப் பிறகு அங்கிருந்து புறப்படலாம் என நண்பரிடம் சொல்ல,  “இரவு உணவும் அங்கே தான் எனச் சொல்லி அமர வைத்துவிட்டார். உடனே சாப்பிடுவது கடினம் என்பதால் மேலும் அரட்டை தொடர்ந்தது.

தில்லியில் ஒரு பழக்கம். இப்படி பிறந்த நாள் பார்ட்டி என அழைத்தால், வரும் குழந்தைகள் ஏதாவது பரிசு கொண்டு வருவதைப் போலவே, பிறந்த நாள் கொண்டாடும் குழந்தையும் வரும் அனைத்து குழந்தைகளுக்கும் ஏதாவது Return Gift தருவது வழக்கம்! ஒவ்வொருவருக்கும் ஒரு பரிசு தரவேண்டும் எனும்போது செலவு அதிகமாகவே ஆகிறது. பிறந்த நாள் கொண்டாட்டத்திற்கே சிலர் லட்ச ரூபாய் செலவு செய்கிறார்கள்! பணம் இருக்கிறவர்கள் கொண்டாடினால் பரவாயில்லை, சிலர் கடன் வாங்கி இப்படி கொண்டாடுவது பார்க்கும்போது தான் கஷ்டமாக இருக்கிறது – அடுத்தவர் மெச்ச வேண்டும் என்பதற்காக கடன் வாங்கி கொண்டாட வேண்டுமா….. 

குறைந்த பட்சம் இருநூறு ரூபாய்க்காவது Return Gift கொடுக்க வேண்டும் என்று ஒரு நண்பரின் மனைவி சொன்னார். ஒரு பிறந்த நாள் பார்ட்டிக்குச் சென்றுவந்த பிறகு எல்லா குழந்தைகளுக்கும் என்ன Return Gift கொடுக்கப் போகிறார்கள் என்ற எண்ணத்துடனேயே அழைப்பு கிடைக்கும் அனைத்து பிறந்த நாள் பார்ட்டிக்கும் செல்கிறார்கள். அப்படிக் கிடைக்காத பட்சத்தில், “ஒண்ணுமே கொடுக்கல அந்த Uncle-Aunty என்று சொல்லி, அவர்களின் குழந்தையையும் நட்பு வட்டத்திலிருந்து விலக்கி விடுவதையும் பார்த்திருக்கிறேன்.  தங்களது பிறந்த நாள் அன்றும் Return Gift கொடுத்தே ஆகவேண்டும் என அடம்பிடிப்பதும் உண்டு!

தவறான ஒரு பழக்கத்தினை ஆரம்பித்து வைத்துவிட்டார்களோ என்ற எண்ணம் எனக்குள் உண்டு. பிறந்த நாள் என்று மெழுகுவர்த்தி அணைத்து கேக் வெட்டுவது என்பதே எனக்கென்னமோ பிடிப்பதில்லை. இப்படி செலவு செய்வதற்கு பதில், குழந்தைகளின் பிறந்த நாள் அன்று அவர்களை ஏதாவது அநாதை இல்லத்திற்கு அழைத்துச் சென்று, அங்கே உள்ள குழந்தைகளுக்கு உணவு கொடுக்க வைத்தால் தான் நல்ல நிலையில் இருப்பது புரியும். கூடவே எத்தனை எத்தனை பேர் உண்ண உணவில்லாமல், வளர்வதற்கு தகுந்த ஆதரவில்லாமல் இருக்கிறார்கள் என்பதும் புரியும் அல்லவா…

அதெல்லாம் சரி என்னதான் அங்கே சாப்பிட்டீர்கள் என்று கேட்பவர்களுக்காக…. என்ன சாப்பிட்டோம் என்பதையும் சொல்லி விடுகிறேன்….

பூரி, மட்டர் பனீர், கட்டல் சப்ஜி புலாவ் மற்றும் [kh]கீர்!

அது என்ன கட்டல் சப்ஜி என்பவர்களுக்காக, ஹிந்தியில் கட்டல் என்றால் பலாக்காய்!

மீண்டும் சந்திப்போம்….

நட்புடன்

வெங்கட்

புது தில்லி.