காஃபி வித் கிட்டு – திறமை – பைக்காரா – மழைநீர் சேகரிப்பு – குழந்தையும் தெய்வமும்

காஃபி வித் கிட்டு – பகுதி – 36

அனைத்து பதிவுலக நண்பர்களுக்கும் இனிய காலை வணக்கம். குழந்தையும் தெய்வமும் ஒன்று எனச் சொல்வதுண்டு. இங்கே இருவரும் ஒன்றாக! தில்லியில் எங்கள் பகுதியில் அமைந்திருக்கும் திருப்பதி பாலாஜி கோவில் வளாகத்தில், எனது அலைபேசியில் எடுத்த படம் ஒன்றுடன் இந்த பதிவினை ஆரம்பிக்கலாம்!

திறமை எங்கேயும் உண்டு:

முன்பு ஒரு பதிவில் எங்கள் பகுதியில் இருக்கும் ஒரு இளைஞன் – காலை வேளையில் பேப்பர் போடுவது, பலரது இல்லங்களில் தோட்ட வேலைகள் செய்வது, பகல் நேரத்தில் ஒரு வேலை என நாள் முழுவதும் உழைக்கும் ஒரு இளைஞன் – பற்றியும் அவன் வரைந்த ஓவியங்கள் பற்றியும் ஒரு பதிவு எழுதி இருந்தேன். அந்தப் பதிவு – ஓவியம் - கண் பார்ப்பதை கை வரையும் – படிக்காத/பார்க்காதவர்கள் பார்க்கலாமே! சமீபத்தில் ஒரு கோவிலுக்குத் தேவை என்று சொல்ல அந்த இளைஞன் அமித் வரைந்த ஒரு ஓவியம் மேலே!

படித்ததில் பிடித்தது – பைக்காரா:  

நகைச்சுவை கட்டுரை எழுதுவது கொஞ்சம் கடினமான வேலை. வலையுலகிலும் சேட்டைக்காரன், பாலகணேஷ், அனன்யா மஹாதேவன் போன்ற சிலர் இப்படி நகைச்சுவை கட்டுரைகள்/பதிவுகள் எழுதிக் கொண்டிருந்தனர்.  இப்போது இவர்களில் யாருமே பதிவுலகம் பக்கம் வருவதில்லை. முகநூலில் மூழ்கிவிட்டார்கள்.  இப்படி ஆனதில் எனக்கு பெரிய வருத்தம் உண்டு. சமீபத்தில் ”பைக்காரா” என்ற ஒரு கட்டுரை படித்தேன்.  பை தூக்கும் கணவர்கள் பற்றி திரு அப்துல் கையூம் திண்ணையில் எழுதிய ஒரு நகைச்சுவை கட்டுரை. அதிலிருந்து சில வரிகள் இங்கே. முழுக்கட்டுரையும் இங்கே படிக்கலாம்!  

பெரியவர் ஒருவர் கருமியிடம் சென்று காசு கேட்டிருக்கிறார். அவர் காசு கொடுப்பதற்கு மனமில்லாமல் “காசா லேசா?” என்று பதில் கூறியிருக்கிறார். அதாவது “காசு என்றால் உனக்கு லேசா? அவ்வளவு எளிதில் உனக்கு தூக்கி கொடுத்துவிடுவேனா?” என்ற அர்த்தத்தில். அதற்கு அந்த பெரியவர் கருமியின் வாயிலிருந்து வந்த அதே வார்த்தைகளை வைத்தே “காசாலே சா” என்று சாபம் விட்டு விட்டார். அதாவது காசாலே(யே) சா – நீ சொத்து ஒழி; என்ற அர்த்தத்தில்.

இந்த வெள்ளைக்காரன் செய்து விட்டுப் போன குசும்பு அதை விட மோசம். பணத்திற்கு ரூபாய் என்று பெயர் வைத்துவிட்டு சில்லறைக் காசுக்கு ‘பைசா’ என்று பெயர் வைத்துவிட்டுப் போய் விட்டான். பை தூக்கியே சா(வு) என்று சாபம் விட்டுப் போய்விட்டானோ என்னவோ தெரியாது.

அந்தக் காலத்தில் ஒரு பெரிய கோபுரத்தை சாய்வாக கட்டி விட்டு அதற்கு “பைசா” கோபுரம் என்று பெயரையும் வைத்து விட்டுப் போனவர்களின் செயலை ஊமைக்குசும்பு என்று

ஏன் சொல்லக் கூடாது.

சிட்டிசன் படத்தில் வசுந்தராதாஸ் மழலைத் தமிழில் “பூக்காரா..! பூக்காரா.. !” என்று பாடும் பாட்டை வானொலி பண்பலையில் கேட்கும் போதெல்லாம் “பைக்காரா..! பைக்காரா..!” என்று அந்த அம்மா நம்மை கேலி செய்கிறதோ என்று சந்தேகப்படுவேன்.

ரசித்த காணொளி: மழை நீர் சேகரிப்பு

நாட்டின் பல பகுதிகளிலும் நீர் இன்றி மக்கள் திண்டாடுகிறார்கள். மழை நீர் சேகரிப்பு பற்றிய சரியான உணர்வு பலருக்கும் இல்லை என்று தான் சொல்ல வேண்டும். மழை நீர் சேகரிப்பு பற்றிய இந்தக் காணொளி மிகவும் பழைய ஒன்று தான். உங்களில் சிலர் முன்னரே பார்த்திருக்கவும் கூடும். ஆனாலும் மனதைத் தொட்ட விளம்பரம் என்பதால் மீண்டும் பார்த்தாலும் தவறில்லை. பாருங்களேன்.

குருக்ஷேத்திரா பயணம்:

சென்ற காஃபி வித் கிட்டு பதிவில் குருக்ஷேத்திரா சென்று வந்தது பற்றி எழுதி இருந்தேன். இந்தப் பயணத்தில் ஒரு செய்தி உண்டு – எங்கள் பகுதி நண்பர்கள் சிலர் வந்திருந்தார்கள். கூடவே உங்களுக்கும் தெரிந்த பத்மநாபன் அண்ணாச்சியும் இப்பயணத்தில் வந்திருந்தார். பயணம் முழுவதும் பல விஷயங்களை பேசிக் கொண்டு வந்தோம். நானும் அவரும் சேர்ந்து செல்லும் முதல் பயணம் இது! தில்லி நகருக்குள் பல இடங்களில் சேர்ந்து சுற்றி இருந்தாலும், வெளியூர் பயணம் செல்வது முதல் முறை! அவரது டைமிங் ஜோக்குகளால் பயணம் முழுவதும் கலகலக்க வைத்தார் பத்மநாபன் அண்ணாச்சி! இது போன்ற பயணங்கள் தொடர வேண்டும் என்பது எனது அவா! பார்க்கலாம்!

பின்னோக்கிப் பார்க்கலாம் வாங்க:

இப்போது காஃபி வித் கிட்டு எழுதுவது போல, ஆரம்ப நாட்களில் ஃப்ரூட் சாலட் பதிவு எழுதிக் கொண்டிருந்தேன். அப்படி இதே ஜூன் 29-ஆம் தேதி 2012-ஆம் வருடம் எழுதிய ஃப்ரூட் சாலட் பதிவு ஒன்று – ஃப்ரூட் சாலட் – 3 – அரசியல் – குட்டிக் கதை.  இந்தப் பதிவினை படிக்காதவர்கள் படிக்க வசதியாக! அப்பதிவில் வெளியிட்டிருந்த ஒரு ஹாஸ்யம் இங்கேயும்!

மருத்துவர்: உங்களுக்கு மூணு பல்லு எப்படி உடைஞ்சது?

கணவர்: என் மனைவி செய்த பர்ஃபி சாப்பிட்டதால்!

மருத்துவர்: பர்ஃபி வேண்டாமென மறுத்திருக்கலாமே?

கணவர்: மறுத்திருந்தால் முப்பத்திரெண்டு பல்லும் போயிருக்கும் :(

இந்த வாரத்தின் புகைப்படம்:

குருக்ஷேத்திராவில் எடுத்த படம் ஒன்று – அலங்கார விளக்குகள் நிறைய இருந்தன – அவற்றில் ஒன்று இங்கே படமாக!

என்ன நண்பர்களே, இந்த வாரத்தின் காஃபி வித் கிட்டு பதிவு உங்களுக்குப் பிடித்திருக்கிறதா? உங்கள் கருத்துகளைச் சொல்லுங்களேன். விரைவில் வேறு சில செய்திகளோடு மீண்டும் ச[சி]ந்திப்போம்….

 

நட்புடன்

வெங்கட்

புது தில்லி