எங்கிருந்தோ வந்த ரதி….

இந்த ரதி வேறு ரதி!

படம்: இணையத்திலிருந்து...

ரதி – எங்கிருந்தோ வந்த ரதி… பதிவின் தலைப்பைப் பார்த்து ஓடோடி வந்த ரசிகப் பெருமக்களை ஏமாற்றக் கூடாது என்பதற்காகவே சீக்கிரம் பதிவினைப் பற்றி சொல்லி விட வேண்டும்.

ஆனாலும் அதற்கு முன்னால் சில விஷயங்கள் பேசலாம். கிட்டத்தட்ட ஒரு வருடத்திற்கு மேலாகிவிட்டது – என் வீட்டில் இருந்த தொ[ல்]லைக் காட்சி பெட்டியை எங்கள் பகுதி கூர்க்காவிடம் கொடுத்து – எப்படியும் பார்ப்பதில்லை – அதற்கு தண்டத்திற்கு மாதா மாதம் டாடா ஸ்கை கட்டணம் வேறு கட்டிக் கொண்டிருந்தேன். பழைய Phillips TV தான் – வாங்கி கிட்டத்தட்ட பதினைந்து வருடங்களாகி விட்டது. கொஞ்சம் நடுநடுவே கோடுகள் வரத் துவங்கி இருந்தன. பார்க்காத ஒரு டி.வி. எதற்கு, அதற்கு ஒரு டாடா ஸ்கை கனெக்‌ஷன் எதற்கு என முடிவு செய்து கூர்க்காவிடம் கொடுத்து விட்டேன். எப்போதாவது பாட்டு கேட்க வேண்டுமென்றால் இருக்கவே இருக்கிறது இணையமும் – யூட்யூபும்!

நானும் இல்லத்தரசியுமாகச் சேர்ந்து “ரசித்த பாடல்” என்ற தலைப்பில் ஒரு வலைப்பூ கூட வைத்திருந்தோம். நாங்கள் ரசித்த பாடலை காணொளி அல்லது ஒலியுடன் கூடிய பதிவுகள் – கூடவே பாடல் வரிகளும்! 23 டிசம்பர் 2013-க்குப் பிறகு அதில் ஒன்றுமே பதிவு செய்யவில்லை. கிட்டத்தட்ட 63 பாடல்கள் அப்படி பதிவு செய்திருக்கிறோம் அங்கே! இரண்டு மூன்று வலைப்பூக்களை வைத்து பதிவுகள் எழுதுவது கடினம் என்பதால் அங்கே எழுதுவதே இல்லை!

சரி இப்போது எதற்கு “ரசித்த பாடல்” புராணம்! சில நாட்கள் முன்னர் கேட்ட ஒரு பாடல் – இது வரை நான் கேட்டிராத பல பாடல்களுக்குள் ஒன்று – 1955-ஆம் வருடம் வந்த படத்திலிருந்து – நான் பிறப்பதற்கு 16 வருடங்கள் முன்னர் வந்த படம்! எங்கே பார்ப்பது? கேட்க நன்றாக இருக்கவே இங்கே பகிர்ந்து கொள்ளலாம் என்று தோன்றியது. முல்லை வனம் என்ற படத்திலிருந்து தான் இந்தப் பாடல் – கீழே கொடுத்திருக்கும் இணைப்பில் ஜிவாஜியோட ஸ்டில் இருந்தாலும் அவர் இந்தப் படத்தில் நடிக்கவில்லை – பாடல் இணைத்தவர் அப்படி கொடுத்திருக்கிறார். இதோ நீங்களும் ரசிக்க….

இந்தப் படத்தில் நடித்த நடிகர் யார் தெரியுமா? – ஸ்ரீராம்! நான் கூட எங்கள் பிளாக் ஸ்ரீராம் அவ்வளவு வயதானவரா என்று நினைத்தேன்! அவர் அனுஷ்காவை ரசிக்கும் இளைஞராயிற்றே! அட இது வேறு ஸ்ரீராம்! நாயகி – குமாரி ருக்மணி! படத்தில் மொத்தம் 9 பாடல்கள் – ஒன்று கூட கேட்ட மாதிரி இல்லை.

அப்படி கேட்டு ரசித்த பாடல் – எங்கிருந்தோ இங்கு வந்த ரதியே…. வி. கிருஷ்ணன் அவர்களின் இயக்கத்தில் வந்த இந்தப் படத்திற்கு இசை கே.வி. மஹாதேவன்.

பாடலை ரசித்தீர்களா? நண்பர்களே? முடிந்தால் அவ்வப்போது இது போன்று ரசித்த பாடல்களை இந்த வலைப்பூவிலேயே பகிர்ந்து கொள்ள முயற்சிக்கிறேன் – உங்களுக்கும் பிடித்திருந்தால்.

மீண்டும் ச[சி]ந்திப்போம்….

 

நட்புடன்

வெங்கட்

தமிழகத்திலிருந்து.....