கதம்பம் – ஆயாம்மா – குட்டி தேவதை – ஓவியம் – புளியோதரை

மார்க்கரெட் ஆயாம்மா:

கோவையின் அவினாசி சாலையில் உள்ள YWCA மெட்ரிகுலேசன் பள்ளியில் படித்துக் கொண்டிருந்த காலம். சிரித்த முகத்துடன் எப்போதும் காணப்படும் இந்த ஆயாம்மாவிடம் எல்லா குழந்தைகளுமே அன்போடு வளைய வருவார்கள். சாப்பிட மறுப்பவர்களுக்கு அன்போடு ஊட்டி விட்டு, கைகளை சுத்தம் செய்து வகுப்புக்கு அனுப்பி வைப்பார். எங்களை சைக்கிளில் காலையில் கொண்டு விடும் அப்பா பணம் தந்து மதியம் எதிர் சாலையில் கொட்டி கிடக்கும் தர்பூசணி பழக்கடைக்காரரிடம் எனக்கும் தம்பிக்கும் வாங்கி தரும்படி சொல்லிவிட்டு செல்வார். மதியம் எங்களை ஒரு இடத்தில் அமர வைத்துவிட்டு ஆயாம்மா வாங்கி வந்து தருவார். நாங்களும் அதை சாப்பிட்டு விட்டு வகுப்புக்கு செல்வோம்.

 

நாங்கள் அந்தப் பள்ளியை விட்டு மாறிய பின்னரும் எங்கள் வீட்டு வழியே செல்ல நேர்ந்தால் கட்டாயம் எங்களை பார்த்து விட்டுத் தான் செல்வார். அம்மாவும் அவருக்கு தன்னால் முடிந்த வகையில் அரிசி, துணிமணிகள் என்று கொடுத்து உதவி செய்வார்.

இன்றும் மனதில் நிற்கும் ஆயாம்மாவின் முகம். இது போல் பணத்திற்கு அப்பாற்பட்டு வேலையில் உண்மையாக இருக்கும் மனிதர்களை பார்ப்பது அரிது தான்.

குட்டி தேவதை:

கீழ்வீட்டு குட்டிதேவதை

புதுச்சீருடையை காண்பித்து

துள்ளி குதித்து

ஓடிச் செல்வதைப்

பார்த்ததும்

அந்த உற்சாகம்

என்னுள்ளும்

ஒட்டிக்கொண்டது!!

இந்த நாளை

இனிமையாக்கிய

குட்டிப்பொண்ணுக்கு

அன்பு முத்தங்கள்!!!

போட்டிக்கு புகைப்படம்:

சமீபத்தில் க்ளிக்கிய ஒரு புகைப்படம்!

ரோஷ்ணி கார்னர்:

மகள் சமீபத்தில் வரைந்த ஓவியம் ஒன்று…

படமும் கவிதையும்…

என்னவர் எடுத்த படம் ஒன்றிற்கு நான் பகிர்ந்து கொண்ட கவிதை!

குமிழ் குமிழாய்!!

நீர்க்குமிழியாய்!!

பறந்து வரும்!!

பட்டென்று உடைந்து

கரைந்து போகும் -

நம் கவலைகளும்…

புளியோதரையும் புளிக்காய்ச்சலும்:

நெடுநாட்களுக்குப் பிறகு மகளுக்கு மதிய உணவுக்கு கொடுப்பதற்காக புளிக்காய்ச்சல் செய்தேன்.

ஒரு உணவுக்குழுமத்தில் நடத்திய போட்டியில் பரிசாகக் கிடைத்த மூங்கிலால் ஆன mat மேல் வைத்துள்ளேன். இது போல் ஆறு மேட்கள் கிடைத்தன.

விரைவில் வேறு சில கதம்பச் செய்திகளோடு மீண்டும் ச[சி]ந்திப்போம்….

 

நட்புடன்

ஆதி வெங்கட்