கதம்பம் – பழைய சோறு – மறுசுழற்சி – வாழைப்பூ வடாம் - தேர்

இன்றைய உணவு!!!

மண்பாத்திரத்தில் செய்த கறிவேப்பிலைக் குழம்பு, ஜவ்வரிசி வடாம், கோவைப் பயணத்தில் தோழி வாங்கித் தந்த பப்படம்!!

 

பப்படம் சாப்பிட்டு பல வருடங்கள் ஆச்சு. இங்கே அப்பளம் தான். வழக்கம் போல் பதிவின் மூலம் சாப்பிட வாங்க.

பழைய சோறு:

திருவானைக்காவல் வழியாகப் பேருந்தில் வரும் போது ஒரு கடையின் பதாகை கண்ணில் பட்டது.

கடையின் அலமாரிகளில் மண் குவளைகள் அடுக்கப்பட்டிருந்தது. வாங்குவதற்கும் ஆட்கள் தயாராக இருந்தனர்.

கடையின் பெயர் பழைய சோறு!!!

ஆம்!! பழைய சோறு தான் இங்கு விற்பனையே!!!

வீட்டில் மீந்த சாதத்தை தண்ணீர் விட்டு வைத்து, கரைத்து சாப்பிட்டது போய், கடையில் வாங்கத் தயாராக இருக்கின்றனர்!

திருவரங்கத்தில் சித்திரைத் தேர்!!!

சென்ற மாதம் திருவரங்கத்தில் சித்திரைத் தேர். காலையில் தேரோட்டத்தைப் பார்த்தோம். எங்கும் கும்பல். சுற்றுவட்டார கிராமங்களிலிருந்தும், பல ஊர்களிலிருந்தும் மக்கள் வெள்ளம் போல திரண்டிருந்தனர்.

வீதிகளில் படுத்து உறங்கி கிடைக்கும் உணவை சாப்பிட்டு, தங்கள் நேர்த்திக்கடன்களையும், பக்தியையும் ரங்கனிடம் செலுத்தினர். எந்த இடையூறும் இல்லாமல் தேர் சீக்கிரமே நிலைக்கு சென்றது.

நான் நின்ற இடத்தில் ஒழுங்காக விழாமல் நின்று தேரோட்டத்தைப் பார்ப்பதே பெரிய விஷயமாக இருந்ததால், புகைப்படமெடுக்க முடியவில்லை. என்னவர் காலை 6 முதல் வளைத்துக் கட்டி எடுத்த படங்கள் அவருடைய பதிவுகளில் விரைவில் வரும்.

மாலை தேரோடிய நான்கு வீதிகளில் வீதி பிரதட்சணம் செய்தோம். அங்கு போடப்பட்டிருக்கும் கடைகளைப் பார்வையிட்டு ஒருசில பொருட்களையும் வாங்கிக் கொண்டோம். அப்போது மகள் எடுத்த புகைப்படம் இதோ.

 

வாழைப்பூ வடாம்

திருவரங்கத்தில் இங்கே இடியும், காற்றும் பலமா இருந்தது. மழை இப்போ தான் தூறலுடன் ஆரம்பித்த வேளையில்… தேநீருடன் சிவகங்கையில் மாமி கொடுத்த வாழைப்பூ மற்றும் வெங்காய வடாம்!

கடைசி பெஞ்ச்!

மகளுக்கு பள்ளி ஆரம்பித்து விட்டார்கள்! இந்த வருடம் முதல் நாள் பள்ளிக்குச் செல்லும் போது:

கடைசி பெஞ்ச் தான் அப்பாவுக்கும், எனக்கும். நாம உயர ஃபேமிலி. அதனால கடைசில உட்கார வெச்சா டல்லாகக் கூடாது. ஒரே டீச்சர் எல்லா கிளாஸூக்கும் வர மாட்டாங்க! ஃபிரண்ட்ஸ் பிரிஞ்சிட்டா வருத்தப்படக்கூடாது. எதையும் ஈஸியா எடுத்துக்கோ!!

எவ்வளவு வருஷம் ஆனாலும் இதெல்லாம் சொல்ல வேண்டியிருக்கு.

தற்போது வாசிப்பில்!

மகள் பஞ்சுவிரட்டும், நான் 12ம் மணிமாறனும்... வயிறு குலுங்கும் சிரிப்பு பக்கமெங்கும். ஒருவருக்கொருவர் அவரவர் ரசித்த வரிகளை பகிர்ந்து கொள்கிறோம். பிரமாதம் கணேஷ் சார். வாழ்த்துக்களும், பாராட்டுகளும்..மேலும் பல படைப்புகள் உங்கள் எழுத்துகளால் மிளிரட்டும்.

ரோஷ்ணி கார்னர்:

பேக்கிங் செய்து வரும் அட்டை டப்பாக்களை ( அ ) பெட்டிகளை வெட்டி தனக்கு வேண்டியவற்றை செய்து கொள்வாள். அவளுடையப் பொருட்களை வைக்கவும், ரிமோட், செல்போன் வைக்கவும், எனக்கு கத்தி, கரண்டிகள் வைக்கவும் என பலவிதத்தில் உபயோகப்படுத்திக் கொள்வாள்.

செருப்பு ( அ ) ஷூ வைத்து தரும் டப்பா முதல், பார்சல் வரும் டப்பா வரை இங்கு எதையும் வீணடிப்பதில்லை. அப்படிச் செய்த சிலவற்றின் புகைப்படங்கள் மேலே!

விரைவில் வேறு சில கதம்பச் செய்திகளோடு மீண்டும் ச[சி]ந்திப்போம்….

 

நட்புடன்

ஆதி வெங்கட்