தினம் தினம் தில்லி - (KH)காரி (B)பாவ்லி - ஆசியாவின் மிகப் பெரிய சந்தை

அன்பின் நண்பர்களுக்கு, இனிய காலை வணக்கம். இந்த நன்நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.  

 

இதற்கு முன்னர் வெளியிட்ட கதம்பம் பதிவினை  படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

 

*******

 

தலைநகர் தில்லி - மிகவும் பழமையான இந்த நகரில் பல புதிய விஷயங்கள் சேர்ந்து கொண்டே இருந்தாலும், இன்னமும் பல விஷயங்கள் பழமையானவை.  பழமையின் நினைவுகளை இன்றைக்கும் கண்முன்னே காண்பித்துக் கொண்டிருக்கும் பல விஷயங்கள் இங்கே உண்டு.  பழைய தில்லி என்று வழங்கப்படும் தில்லியின் பகுதி பெயரிலே இருப்பது போல மிகவும் பழமையான ஒரு பகுதி! முகலாயர் காலச் சின்னங்கள் இருக்கும் இந்தப் பகுதியில் நிறைய மாற்றங்கள் வந்துவிட்டாலும் பழமையின் எச்சங்கள் இன்றைக்கும் நிறைந்திருக்கும் பகுதி.  தலைநகர் தில்லியில் பல இடங்களில் (B)பாவ்லி என்ற பெயர்கொண்ட நீர் நிலைகள் பரவி இருந்தன - சில நீர் நிலைகள் பத்தாம் நூற்றாண்டைச் சேர்ந்தவை என்றால் எத்தனை பழமையானவை என்பதை நம்மால் புரிந்து கொள்ள முடியும்.  

 

(B)பாவ்லி என்றால் என்ன?  

 

ஆங்கிலத்தில் சொல்வதென்றால் Step Well! தரையிலிருந்து படிகள் வழி சில நிலைகளைக் கடந்து கீழே சென்று அங்கே சேமித்து வைக்கப்பட்டிருக்கும் மழை நீரைக் கொண்ட கிணறு போன்ற அமைப்பு தான் (B)பாவ்லி. மழைக்காலங்களில் கிடைக்கும் தண்ணீரை சேமித்துக் கொள்ள இப்படி பல இடங்களில் (B)பாவ்லி-களை அமைத்து வைத்திருந்தார்கள் அந்தக் கால ராஜாக்கள். கோடைக் காலங்களில் தண்ணீர் தேவை அதிகமாக இருந்த சமயங்களில் இந்த நீர் நிலைகளில் சேமித்து வைக்கப்பட்டிருந்த நீர் தான் மக்களுக்கு பயன்தரக் கூடியதாக இருந்தது.  குடிநீருக்கென்றே சில (B)பாவ்லிகள் பயன்பட்டன என்றால் சில மற்ற விஷயங்களுக்காக - குளிப்பதற்கு, துணி துவைப்பதற்கு - என பல விஷயங்களுக்கு பயன்படுத்தப்பட்டன.  தில்லியில் மட்டும் இப்படியான (B)பாவ்லி-க்கள் நூற்றுக்கணக்கில் இருந்ததாகச் சொல்லப்படுகிறது. இன்றைக்கும் தலைநகர் தில்லியில் Gகந்தக் கி (B)பாவ்லி, மஹாராஜா அகர்சேன் (B)பாவ்லி, நிஜாமுத்தீன் (B)பாவ்லி, ஹிண்டு ராவ் (B)பாவ்லி, புராணா கிலா (B)பாவ்லி, ஃபெரோஸ் ஷா கோட்லி (B)பாவ்லி என வரிசையாக பல இடங்களை எடுத்துக்காட்டாகச் சொல்ல முடியும். அப்படியான ஒரு (B)பாவ்லி தான் (KH)காரி (B)பாவ்லி!

 

(KH)காரி (B)பாவ்லி - இந்த வார்த்தைகளில் (B)பாவ்லி என்பது குறித்து நிறைய சொல்லியாயிற்று! முதல் வார்த்தைக்கு என்ன அர்த்தம்?  (KH)காரி அல்லது (KH)காரா என்றால் உப்புத்தன்மை கொண்ட என்று அர்த்தம்.  அதாவது (KH)காரி (B)பாவ்லி என்பது காரணப் பெயர் - இந்தக் கிணற்றில் இருக்கும் தண்ணீரானது உப்புத்தன்மை கொண்டது என்பது தான் இந்தப் பெயருக்கான காரணம்! இந்தக் கிணறு இங்கே இருந்ததன் அடையாளமாக இன்றும் இப்பகுதி  (KH)காரி (B)பாவ்லி என்று அழைக்கப்பட்டாலும் இந்தக் கிணறு இப்போது இங்கே இல்லை. ஆனால் அதே பெயரில் இங்கே ஒரு மிகப்பெரிய சந்தை  - ஆசியாவிலேயே மிகப்பெரிய சந்தை என்றும் சொல்கிறார்கள் - உண்டு.  அந்தச் சந்தையின் பெயர் கூட (KH)காரி (B)பாவ்லி தான்!  இங்கே கிடைக்காத பொருட்களே இல்லை. அதிலும் குறிப்பாக உலர் பழங்களுக்கான மிகப்பெரிய சந்தை இது.  அனைத்து மளிகை பொருட்களும்,  மசாலாப் பொருட்களும் இங்கே மொத்த விலைக்கு (WHOLESALE) வாங்கலாம். 

 

மொத்த விலை கடைகள் மட்டுமல்லாது சில்லறை விலை கடைகளும் உண்டு என்றாலும், பலரும் இங்கே வந்து வருடத்திற்குத் தேவையான பொருட்களை வாங்கிச் செல்வது வழக்கமாக இருக்கிறது - குறிப்பாக முதியவர்கள் இருக்கும் வீடுகளில் உள்ளவர்கள் இங்கே தான் வந்து வாங்குகிறார்கள். இப்போதைய இளைஞர்களுக்கு இதில் எல்லாம் நம்பிக்கை இல்லை - அது மட்டுமின்றி இங்கே வந்து செல்வதற்கான, கூட்டத்தில் தேடி அலைவதற்கான  பொறுமை இல்லவே இல்லை! இருக்கவே இருக்கிறது Blinkit, Zepto போன்ற செயலிகள். வீட்டில் இருந்தபடியே தேவையானத்தைச் சொன்னால் சில நிமிடங்களில் வீட்டு வாசலுக்கு வந்துவிடுகிறது என்பதால் இவற்றையே அதிகம் விரும்புகிறார்கள்.  என்னைப் போன்ற தனிக்கட்டைகளுக்கு மொத்தமாக வாங்கி அதை பாதுகாப்பது சரிவராது என்பதால் நான் அங்கே சென்று பொருட்கள் வாங்குவதில்லை என்றாலும் அங்கே வருடத்திற்கு ஒரு முறையேனும் சென்று கொண்டிருந்தேன்.  

 

எங்கள் பகுதியில் நடக்கும் விழாக்களுக்குத் தேவையான மளிகை சாமான்களை நாங்கள் வாங்கிக் கொடுத்து சமையல் ஆட்கள் மூலம் சமையல் செய்து உணவு வழங்குவது வழக்கம். ஒரு குழு காய்கறிகள் வாங்கச் சென்றால் ஒரு குழு மளிகை சாமான்கள், எண்ணெய் போன்றவை வாங்கச் செல்வது வழக்கம். அப்படியான விழாக்கள் சமயத்தில் சில முறை நானும் (KH)காரி (B)பாவ்லி சென்று மாளிகைப் பொருட்களை வாங்கியதுண்டு.  தேவையான பொருட்களின் பட்டியலை அங்கே இருக்கும் பெரிய கடை ஒன்றைத் தேர்ந்தெடுத்து அங்கே கொடுத்தால் எல்லாவற்றையும் மலிவு (மொத்த) விலையில்  தந்து விடுவார் அந்த கடைக்காரர்.  எல்லா பொருட்களையும் கட்டி, மூட்டைகளில் சேகரித்து, அவற்றை தூக்குவதற்கென்று இருக்கும் சுமைக்கூலிகள் எடுத்து வந்து Tata Ace போன்ற வாகனங்களில் வைக்க, அவற்றில் நாங்களும் அமர்ந்து கொண்டு விழா நடக்கும் இடத்திற்குக் கொண்டு சேர்ப்போம்.  எங்கள் பகுதியில் இருக்கும் கடைகளில் வாங்குவதை விட மிகக் குறைவான விலையில் நிறைய பொருட்களை வாங்கி வந்திருக்கிறோம்.  பொதுவான விழா எனில் எவ்வளவு செலவு குறைவோ அவ்வளவு நல்லது தானே! 

 

(KH)காரி (B)பாவ்லி - இன்றைக்கு சந்தையாக தெரியப்பட்டாலும், இங்கேயும் ஒரு சிறப்பான கிணறு - மக்களுக்கு பயன்பட்ட ஒரு கிணறு இருந்திருக்கிறது என்பதும், மக்களுக்காக போடப்பட்ட பல திட்டங்கள் இன்றைக்கு இல்லை என்பதும், பழமையை பாதுகாக்க தவறிவிட்ட வேதனையான உண்மையும் இன்றைய பதிவு வழி உங்களுடன் பகிர்ந்து கொண்டிருக்கிறேன்.  இன்றைய பதிவு வழி தந்த, தில்லி குறித்த தகவல்கள் உங்களுக்கு புதியதாகவும், பயனுள்ளதாகவும் இருக்கும் என நம்புகிறேன்.  மீண்டும் விரைவில் தில்லி குறித்த வேறு ஒரு தகவலுடன் உங்களைச் சந்திக்கிறேன். 

 

*******

 

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

 

நட்புடன்

 

வெங்கட் நாகராஜ்

திருவரங்கத்திலிருந்து…