காஃபி வித் கிட்டு - 180 - தைத் தேர் - தைப் பூசம் - சமயபுரத்தாள் - பயணம் குறித்த முகநூல் குழு - வண்ணத்துப்பூச்சி பூங்கா - அடையாளம் - பிறந்த நாள்

 

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

 

இதற்கு முன்னர் வெளியிட்ட திருவரங்கம் கோவில் - சேஷராயர் மண்டபம் - ஒரு தூண் சிற்பங்கள் பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

 

செயல்கள் சில நேரங்களில் மகிழ்ச்சியைக் கொடுக்காது; ஆனால் செயலின்றி மகிழ்ச்சியில்லை - டிஸ்ரேலி.

 

******

 

பூபதித் திருநாள் : தைத் தேர் 2024

 

கடந்த 24-ஆம் தேதி திருவரங்கத்தில் தேர் திருவிழா… பூபதித் திருநாள் என்று அழைக்கப்படும் கொண்டாட்டங்களில் ஒரு பங்காக தைத் தேர் என்று அழைக்கப்படும் சிறு தேரில்  அரங்கனின் வீதி உலா.  காலை ஆறரை மணிக்கு வடம் பிடிக்கலாம் என்று தெரிந்தது.  காலை எட்டு மணிக்கு வீட்டை விட்டு புறப்பட்டுச் சென்றபோது வடக்கு வாசலை தாண்டியிருந்தது தேர்.  பக்கவாட்டில் கிடைத்த இடத்தில் தேரைத் தாண்டிச் சென்று கிழக்கு உத்திர வீதியில் நின்று கொண்டேன்.  வடக்கு வாசல் வழி வரும்போது வெய்யில் படும் என்று நான்கு பக்கங்களிலும் திரை கட்டிவிட்டார்கள் என்பதால் வடக்கு வாசல் பக்கம் அரங்கனை தரிசிக்க இயலாது! கிழக்கு உத்திர வீதியில் நின்று கொண்டு மக்களை கவனித்தபடி அரங்கனின் வருகைக்காக நானும் காத்திருந்தேன்.  வடக்கு உத்திர வீதியிலிருந்து கிழக்கு உத்திர வீதிக்குத் திரும்பும் இடத்தில் அதிக நேரம் எடுத்தது.  ஒருவழியாக தேர் திரும்ப, அதீத வேகத்தில் அரங்கன் வீதி உலா!  நின்று நிதானித்து அரங்கனை தரிசித்தேன்.  ஆண்டாள், லக்ஷ்மி, இரண்டு குதிரைகள் என முன்னாள் வர அரங்கன் திருத்தேரில் வீதி உலா!  இன்றைக்கு எடுத்த சில படங்களும் காணொளிகளும் உங்கள் பார்வைக்கு.

 

******

 

தைப்பூசமும் சமயபுரத்தாள் வருகையும் : 

 

தைப்பூசம்..... 25-01-2024 அன்று கொள்ளிடக்கரை கோவிலில் சிறப்பாக நடந்தது. மதியம் இரண்டு மணிக்கு மேல் தான் காவடி புறப்பாடு. மாலை ஆறு மணிக்கு மேல் வடக்கு அடையவளைந்தான் தெருவில் காவடிகளை பார்த்ததோடு வீதி உலா வந்த வள்ளி தெய்வானை சமேத முருகப் பெருமானையும் தரிசனம் செய்து கொண்டேன். பறக்கும் காவடி, அலகுக் காவடி, பால் குடங்கள் என விதம் விதமான வேண்டுதல்கள்..... பறக்கும் காவடி பார்க்கும் போதே உடலில் ஒரு சிலிர்ப்பு...... 

 

பிறகு பொடி நடையாக கொள்ளிடக்கரை வரை சென்று அங்கே எழுந்தருளி இருந்த சமயபுரம் மாரியம்மன் மற்றும் உத்தமர் கோவில் பெருமாளையும் தரிசனம் செய்து திரும்பினேன். ஒவ்வொரு தைப்பூச நாளிலும் மாரியம்மன் கொள்ளிடக்கரை வந்து பக்தர்களுக்கு அருள் பாலிப்பதோடு திருவரங்கம் பெருமாள் தரும் சீரும் பெற்றுச் செல்வார்.

 

சென்ற ஆண்டும் தைப்பூச நாளில் திருவரங்கத்தில் இருந்து தைப்பூச நாளில் காவடிகள் பார்த்த நினைவு மனதுக்குள்...... எல்லாம் வல்ல இறைவனின் பரிபூரண அருள் அனைவருக்கும் கிடைத்திடட்டும். தைப்பூச நாளில் எடுத்த படங்களும் காணொளிகளும் உங்கள் பார்வைக்கு. 

 

******

 

இந்த வாரத்தின் தகவல் - பயணம் குறித்த முகநூல் குழுக்கள்:

 

சமீபத்தில் முகநூலில் பயணம் குறித்த சில குழுக்களில் என்னை இணைத்துக் கொண்டேன்.  எனது பங்களிப்பு அங்கே ஒன்றும் இருக்கப் போவதில்லை என்றாலும் பயணம் குறித்து அங்கே பலரும் எழுதும் தகவல்கள் எனக்கும் பயனுள்ளதாக இருக்கலாம் என்ற எண்ணத்தில் அங்கே இணைத்திருக்கிறேன்.  அவ்வப்போது அந்தக் குழுக்களில் இருப்பவர்கள் பகிர்ந்து கொள்ளும் தகவல்கள் சுவாரஸ்யமாக இருந்தாலும், சில தகவல்கள் தேவையற்றவையாக இருக்கிறது!  தேவையானவற்றை எடுத்துக் கொள்வோம், மற்றவற்றை விட்டு விடுவோம் என்ற எண்ணத்துடன் அந்தக் குழுக்களில் தொடர்ந்து கொண்டிருக்கிறேன். அப்படிப் பார்த்த ஒரு பதிவில் அருணாச்சல பிரதேசத்தில் இருக்கும் ஒரு கிராமமான கஹோ எனும் இடம் குறித்து சில படங்களை பகிர்ந்து கொண்டிருந்தார் ஒரு நபர்.  ஆஹா என்ன அழகு அந்த இடம் (ஒரு படம் உங்கள் பார்வைக்கு!) இந்த கிராமம் தான் சீன எல்லையிலிருந்து இந்தியாவில் இருக்கும் முதல் கிராமம் என்கிறது தகவல்.  இணையத்தில் இந்த இடம் குறித்து தகவல்கள் நிறையவே இருக்கின்றன.   இந்த இடம் குறித்த ஒரு காணொளி பார்த்தேன். நீங்களும் பார்க்க நினைத்தால் கீழே உள்ள சுட்டி வழி பார்க்கலாம்.  

 

India's First Village KAHO || India China Border in Arunachal Pradesh (youtube.com)

 

******

 

பழைய நினைப்புடா பேராண்டி : வண்ணத்துப்பூச்சி பூங்கா – திருச்சி

 

2016-ஆம் ஆண்டு இதே நாளில் வெளியிட்ட பதிவு - வண்ணத்துப்பூச்சி பூங்கா – திருச்சி - அந்தப் பதிவிலிருந்து சில வரிகள் இங்கே.  

 

ஒவ்வொரு முறை திருவரங்கம் வரும்போதும் ”இங்கே ஒரு வண்ணத்துப் பூச்சி பூங்கா இருக்கிறது, போக வேண்டும் என்று மகள் சொல்வாள்.  ஆனாலும் அங்கே போக முடிந்ததில்லை. எங்கே இருக்கிறது என சிலரிடம் விசாரித்தால் யாருக்கும் தெரியவும் இல்லை.  ஆனால் இம்முறை தான் திருவரங்கத்தில் சில இடங்களில் “வண்ணத்துப்பூச்சி பூங்கா செல்லும் வழி” என்ற பதாகைகளைக் காண முடிந்தது. பிறகு தான் தெரிந்தது ஒரு விஷயம் – இரண்டு வருடம் முன்னரே இது அமைப்பதற்கான அறிவிப்பு வந்தாலும், இரு மாதங்களுக்கு முன்னரே இப்பூங்கா பொதுமக்கள் பார்வைக்கு திறந்திருக்கிறார்கள் என்பது!

 

பூங்கா திறக்கப்பட்ட விஷயம் இம்முறை தெரிந்து கொண்டதும் அங்கே சென்று வந்தோம். வண்ணத்துப்பூச்சி பூங்கா, திருவரங்கம் என்று சொன்னாலும், இது இருப்பது திருவரங்கம் தாலுகாவில் உள்ள அணைக்கரை என்ற இடத்தில் தான்.  திருவரங்கத்திலிருந்து மேலூர் வழியாக சென்றால் சுமார் எட்டு கிலோ மீட்டர் தொலைவில் 25 ஹெக்டேர் அளவு பரப்பளவில் 9 கோடி ரூபாய் செலவில் அமைக்கப்பட்டிருக்கிறது.  இன்னும் பாதி இடத்திற்கு மேல் வேலைகள் முடிக்கவில்லை என்றாலும் வேலை முடிந்த இடங்கள் மிகச் சிறப்பாக இருக்கின்றன. 

 

முழுப்பதிவினையும் மேலே உள்ள சுட்டி வழி படிக்கலாமே!

 

******

 

இந்த வாரத்தின் ரசித்த சிறுகதை : அடையாளம்…

 

இந்த வாரத்தின் ரசித்த சிறுகதையாக சொல்வனம் தளத்திலிருந்து, ஸிந்துஜா அவர்கள் எழுதிய “அடையாளம்” என்ற சிறுகதையிலிருந்து சில வரிகள் உங்கள் பார்வைக்கு! 

 

ஓர் இளம் பெண் தெருவில் வளையல் கடை வைத்திருந்த கிழவனிடம் பேசிக் கொண்டிருந்தாள். 

 

“ரொம்ப விலை சொல்லுறையே?”

 

“நீதான் போணி பண்ணி வைக்கணும். மகாலட்சுமி மாதிரி இருக்கே. உனக்கு வேணுங்கிறதை எடுத்துக்கோ. பாத்துப் போட்டுக் கொடு” என்றான் கிழவன்.

 

“தாத்தா, நல்லா ரீல் விடறே. ஆனா நானும் உன்னையப் போலத்தான். காசு இல்லாத மகாலட்சுமி” என்று அவள் சிரித்தாள். கறுப்பாகவும் இல்லாமல் சிவப்பாகவும் இல்லாமல் மாநிறத்தில் இருந்தாள். உயரமாகவும் லேசாகப் பூசிய மாதிரியும் காணப்பட்டாள். முகமும், கைகளும் பளபளவென்று மின்னின. எவரையும் ஒரு முறை ஏறெடுத்துப் பார்க்க வைக்கும் தோற்றம்.

 

அப்போது “யோவ் மாரிசாமி, நீ எப்போய்யா இங்கே  வந்தே?” என்றபடி அவர்களை ஒருவர் நெருங்கினார்.

 

முழுக்கதையும் கீழே உள்ள சுட்டி வழி படிக்கலாம்!

 

அடையாளம்  – சொல்வனம் | இதழ் 310|14 ஜன 2023 (solvanam.com)

 

******

 

இந்த வாரத்தின் ரசித்த விளம்பரம்: பிறந்த நாள் 

 

இந்த வாரத்தின் ரசித்த விளம்பரமாக Pathkind Diagnostics விளம்பரம் ஒன்று. மனதைத் தொடும் விதமாக இருக்கிறது.  உங்கள் மனதையும் தொடலாம். பாருங்களேன். 

  

மேலே உள்ள காணொளி வழி பார்க்க இயலவில்லை என்றால் கீழே உள்ள சுட்டி வழி பார்க்கலாம்.

 

Pathkind Diagnostics | #HumFarkNahiKarte | Anand Tiwari (youtube.com)

 

******

 

இந்த வாரத்தின் காஃபி வித் கிட்டு பதிவு குறித்த தங்களது எண்ணங்களை பின்னூட்டம் வாயிலாக சொல்லுங்களேன்.  மீண்டும் வேறொரு பதிவுடன் உங்கள் அனைவரையும் சந்திக்கும் வரை…

 

நட்புடன்

 

வெங்கட் நாகராஜ்

திருவரங்கத்திலிருந்து…