நட்பின் இழப்பு…

அன்பின் நண்பர்களுக்கு, வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திக்கிறேன்.   

இதற்கு முன்னர் வெளியிட்ட நலம் தானா… நலம் தானா? பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி. 

******

இன்றைக்கு ஒரு நட்பின் இழப்பு குறித்த தகவலுடன் பதிவுலகம் பக்கம் வர வேண்டிய சூழல்…  சென்ற வருடத்திலிருந்தே ஏதேதோ துக்கச் செய்திகள் என்னை துரத்திக் கொண்டே இருக்கிறது.  நண்பர்களின் வீடுகளிலும், எனது வீட்டிலும் ஏதோ இழப்புகள் நிகழ்ந்தபடியே இருந்தது.  இந்த வருடம் நன்றாக இருக்க வேண்டும் என்ற எண்ணத்துடனும், விருப்பத்துடனும் இருந்தால், இந்த வருடத்தின் ஆரம்பமே ஒரு இழப்புடன் தொடங்கியிருக்கிறது.  கிட்டத்தட்ட நாற்பது ஆண்டுகால நட்பை - எனது பள்ளிப்பருவத்திலிருந்து தொடர்ந்த நட்பை நேற்று காலன் தனது பாசக்கயிற்றை வீசி எங்களிடமிருந்து பிரித்து எடுத்துச் சென்றிருக்கிறான்.  பள்ளியைத் தொடர்ந்து கல்லூரியில் ஒரே வகுப்பில் மூன்று வருடங்கள். அதன் பிறகும் தொடர்ந்து கொண்டிருந்தது எங்கள் நட்பு.  ஆனால் இன்றைக்கு அவன் இல்லை! 

எங்கள் கல்லூரியில் எங்களுடன் படித்த அனைவரையும் ஒருங்கிணைக்க நண்பன் குமாரின் பங்கு அளப்பரியது! எங்கள் வாட்ஸப் குழு தொடர்ந்து இயங்கிக் கொண்டே இருக்க அவனது தொடர் செயல்களும் அவனது இடைவிடாத பங்களிப்பும் மிக மிக முக்கியமான ஒரு காரணம்.  ஆனால் இன்று அவன் இல்லை! நேற்று காலை பதினோரு மணி அளவில் எங்களை விட்டு பிரிந்த அவனது பூத உடல் இன்றைக்கு நெய்வேலியில் மின் மயானத்தில் தகனம் செய்யப்பட்டது.  எனது கல்லூரி நண்பர்கள் அங்கே சென்று இருந்தார்கள்.  என்னால் செல்ல முடியவில்லை என்பதில் எனக்கு வருத்தம் தான்.  சூழல் என்னை அங்கே இருக்க விடவில்லை என்றாலும் மனதளவில் அங்கே தான் இருந்தேன்.  நண்பர் குமார் ஆத்மா இறைவனின் பாதங்களில் இளைப்பாற எனது பிரார்த்தனைகள். 

நட்புடன்

வெங்கட் நாகராஜ்

புது தில்லி

3 ஜனவரி 2025