பின் பக்கமாக நடப்பது நல்லதா?

படம்: இணையத்திலிருந்து....

காலையில் நடைபயில தால்கட்டோரா பூங்கா செல்லும் போது, சில மனிதர்கள் பின் புறமாக நடப்பதைப் பார்க்கிறேன். முன்பு தலைநகரின் ராஜ்பத் என அழைக்கப்படும் ராஜபாட்டையில் இப்படி பின் புறமாகவே நடந்து செல்லும் ஒரு மனிதரைப் பற்றி எனது பதிவில் எழுதி இருப்பதாக நினைவு. அந்தப் பதிவினைத் தேடினால் கிடைக்க வில்லை – என்ன தலைப்பு கொடுத்திருப்பேன் என யோசிக்க வேண்டும்! பின் புறமாக நடப்பதில் ஏதேனும் உபயோகம் உண்டா? இப்போதெல்லாம், எதையாவது ஒன்றைச் சொன்னால், அதனால் என்ன பலன் என்று கேள்விகள் வருகின்றன. முன் நோக்கி நடக்காமல், பின்னோக்கி நடப்பதால் அப்படி என்ன பெரிய பலன் இருந்து விடமுடியும்? பலன் உண்டு என்கிறது இணையம் – நீங்கள் பின்னோக்கி எடுத்து வைக்கும் ஒவ்வொரு 100 அடியும், முன் நோக்கி எடுத்து வைக்கும் 1000 அடிக்குச் சமம் என்கிறது இணையம்!

முட்டி வலி இருப்பவர்கள், முட்டி அறுவை சிகிச்சை செய்து கொண்டவர்கள், இடுப்பு சதைப் பகுதியில் வலி உள்ளவர்கள் என பலரும் இப்படி பின்நோக்கி நடப்பதில் பலன் அடைய முடியும் என விவரம் சொல்கிறது ஒரு இணைய தளம். இது எந்த அளவு உண்மை, தளத்தில் சொல்லி இருப்பது உண்மையிலேயே பலன் உடையதா, இல்லையா என்பதை எல்லாம் நிபுணர்கள் சொல்லட்டும். இப்படி நடப்பதில் வேறு சில பலன்களும் உண்டு என்று இந்த காணொளி மூலம் சொல்கிறார் – பாருங்களேன்!

எங்கள் பிளாக் ஸ்ரீராம் கூட அவரது முகநூல் பக்கத்தில் பின் நோக்கி நடப்பது பற்றி ஒரு தகவல் - தினமலரிலிருந்து எடுத்து வெளியிட்டிருந்தார். அது கீழே... நன்றியுடன்!

மூட்டு, கணுக்கால் தசைகள் வலுவடையும்!

பின்னோக்கி நடப்பதால் ஏற்படும் நன்மைகளை கூறும், பிசியோதெரபிஸ்ட், ஸ்ரீநாத் ராகவன்:

"அனைவராலும் செய்ய முடிந்த, எளிமையான பயிற்சி, நடை பயிற்சி.

இதயம், நுரையீரலை வலுப்படுத்தவும், ரத்த அழுத்தம், ரத்தத்தில் சர்க்கரை அதிகரிக்காமல் தவிர்க்கவும், நடை பயிற்சி மிகவும் அவசியம்.

நடை பயிற்சி என்றதும், முன்னோக்கி நடக்கும் பயிற்சி மட்டுமே நமக்கு தெரியும்.

அதை மட்டுமே நம்மில் பெரும்பாலானோர் செய்து வருகிறோம்.

ஆனால், பின்னோக்கி நடந்து பயிற்சி செய்யலாம் என்கின்றனர் நிபுணர்கள்.

முன்னோக்கி நடப்பதை விட, பின்னோக்கி நடப்பதில், அதிக நன்மைகள் இருக்கின்றன.

பின்னோக்கி நடப்பதால், நம் உடலின் சமநிலை மேம்படுகிறது.

நடை பயிற்சியின் மீதான, நம்பிக்கையை அதிகரிக்கும்.

முன்னோக்கி நடப்பதை விட பின்னோக்கி நடக்கும் போது, காலை வீசி நடக்கும் அளவு குறைவாக இருக்கும்.

இதனால், மூட்டு மற்றும் கணுக்கால் தசைகள் வலுவடையும்.தொடைக்குப் பின் உள்ள தசை நார்கள் சீராக இயங்க உதவும்; முதுகுவலியைக் குறைக்கும்; மூளையின் செயல் திறனை மேம்படுத்தும்; உடல் எடையைக் குறைக்க உதவும்.

வாரத்தில் நான்கு நாட்கள், 15 நிமிடம் என, நான்கு வாரம் தொடர்ந்து செய்தால், இதற்கான பலன்களை அடையலாம்.

சில உடல் நல பாதிப்புகள் உள்ளோரை தவிர, மற்ற அனைவரும் இந்தப் பயிற்சியை செய்யலாம்.

நரம்பு கோளாறு உள்ளோர், முன்னோக்கி நடக்கவே சிரமப்படுபவர், அறுவை சிகிச்சை செய்து கொண்டவர்கள், சில நாட்களுக்கு பின்னோக்கி நடக்கக் கூடாது.

பின்னோக்கி நடக்கும் போது, மிகவும் கவனமாக இருக்க வேண்டும்.

துணைக்கு ஒருவரை வைத்து மட்டுமே, இந்தப் பயிற்சியை மேற்கொள்ள வேண்டும்.

தவறும்பட்சத்தில் ஏராளமான ஆபத்துகள் ஏற்பட வாய்ப்புள்ளது.

தினமலரிலிருந்து....

இன்றைக்கு எதற்காக இந்த Retro Walking அல்லது Walking Backwards பற்றிய சிந்தனை? இந்த Retro Walking என்னால் செய்ய முடியுமா? என்று யோசிக்கும் போது முடியாது என்று தான் தோன்றுகிறது. பின் நோக்கி நடக்க முடிகிறதோ இல்லையோ, கொஞ்சம் நினைவுகளை பின்னோக்கிக் கொண்டு செல்லலாம் என்ற யோசனை – குறிப்பாக வலையுலக நினைவுகளை, என் பதிவுகளை… கீழே என் சில பதிவுகளும், அந்தப் பதிவுகளிலிருந்து சில வரிகளும் கொடுத்திருக்கிறேன். பதிவுகளைப் படிக்க விருப்பமிருந்தால் படிக்கலாம்! எதற்காக இப்படி ஒரு Retro Walk through my posts…. கடைசியில் சொல்கிறேன்.

3 மார்ச் 2018 – பிஜோரா

அந்த இனிப்பு ஊறுகாயின் பெயர் Bபிஜோரா! Bபிஜோரா என்பது நம் ஊரில் கிடைக்கும் நார்த்தங்காய் தான்! ஆனால் அதில் வெல்லம் சேர்த்து ஊறுகாய் செய்கிறார்கள்.  நன்றாகவே இருந்தது. ரோட்லி என அழைக்கப்படும் ரொட்டியுடன் இந்த Bபிஜோரா சேர்த்து சாப்பிடப் பிடித்திருந்தது.

5 டிசம்பர் 2017 – அதிகாலையில் கேட்ட காதல் கதை….

”நாங்கள் ஏற்கனவே திருமணம் புரிந்து கொண்டோம். இந்த ஜன்மத்தில் இவரைத் தவிர வேறு யாரையும் நான் மணம் முடிக்க மாட்டேன்” என்று என் மனைவி கண்டிப்பாகச் சொல்ல, வேறு வழியின்றி ஒத்துக் கொண்டார்கள்.

9 ஜூலை 2016 – நாய் நேசன்

தொடர்ந்து தெரு நாய்களுக்காக செலவு செய்வது என்பது – அதுவும் தனி ஒருவராய் இப்படிச் செலவு செய்வது கொஞ்சம் கடினமான விஷயம்.  சேமிப்பு எல்லாம் செலவாகிவிட, நாய்களுக்கு இறைச்சி வழங்குவதற்காகவே அவர் வங்கிகளில் கடன் வாங்க ஆரம்பித்தார் – அதுவும் Personal Loan

4 நவம்பர் 2015 – மகன் மட்டும் என்ன ஸ்பெஷல்?

மகன்களின் நலனுக்கு மட்டும் தான் விரதமா? மகள் என்ன பாவம் செய்தாள்? அவள் நலனுக்கும் விரதம் கூடாதா என எனக்குத் தோன்றியது.  மகன்கள் மட்டும் என்ன ஸ்பெஷல்?

5 ஃபிப்ரவரி 2014 – தொடர்ந்து வந்த பேய்….

சுடலைமாடனுக்கு நிச்சயம் கட்டுப்படும், ஆகவே இன்னும் வேகமாக நடப்போம் எனச் சொல்லிக் கொண்டே, ”திரும்பி மட்டும் பார்க்காதலே, ஒரே அப்பு அப்பினா, ரத்தம் கக்கிடுவோம்!” என நடந்தோம் – அதாவது நடப்பதாக நினைத்து ஓடினோம்.

10 ஜூன் 2013 – கஸ்தூரி பாட்டி….

கஸ்தூரி பாட்டிங்கறது அவங்களோட உண்மையான பேர் இல்ல. நாங்க வைச்ச பேருதான். தொடர்ந்து “கஸ்தூரி” சீரியல் நேரத்துக்கு கரெக்டா பெரியம்மா வீட்டுக்கு வந்து பார்த்ததனால என்னோட துணைவி அவங்களுக்கு வெச்ச பேரு தான் கஸ்தூரி பாட்டி. அவங்களோட உண்மையான பேரு என்னன்னு நானும் இது வரைக்கும் கேட்கல, அவங்களும் சொல்லல!

25 ஜூன் 2012 - என்னோட நியூயார்க் வந்துடும்மா...

“மாதாஜி ரொம்ப நேரமா இங்கே உட்கார்ந்து இருக்கீங்களே, ஏதாவது உதவி வேணுமா?”ன்னு கேட்டார். அட பழைய நினைவுகளில் மூழ்கியதில் நேரம் போனதே தெரியலையேன்னு நினைச்சு சிரிச்சுக்கிட்டே, “என் பையனோட நியூயார்க் போகக் காத்திருக்கேன்,

21 மார்ச் 2011 - கிடைத்தாள் கனவு ராணி

நான் தேடும் கனவு ராணி எங்கே இருக்காங்க என்பதே தெரியவில்லை. சில வீடுகளின் நடுவில் சின்னஞ் சிறிய வீடுகளும் இருந்தது. இரண்டு மூன்று வீடுகளில் சென்று கேட்டபோது ”போ போ, இங்க சப்னா இல்லை” என்று கழுத்தைப் பிடித்து தள்ளாத குறைதான்.

21 ஜூன் 2010 – விருந்து

என்ன ஆச்சோன்னு பதறியபடி நாங்களும் சமையலறைக்கு ஓடினா, சமையலறைக் கதவைப் பிடித்தபடி நின்னுட்டு அழுதுட்டு இருந்தாங்க.. சமையலறை முழுவதும் சாதமும் பருப்பும் இறைந்து கிடக்கிறது. கீழே மட்டும் இல்லாம, அந்த அறையோட சீலிங் முழுதும் சாதம் ஒரு டிசைன் போட்ட மாதிரி ஒட்டிட்டு இருக்கு.

15 அக்டோபர் 2009 - எதிர் வீட்டுதேவதை

கதிருக்கு அந்த கூந்தல் அழகியின் மேல் காதல் வர எப்படியாவது அந்த அழகியைப் பார்த்து தன்னுடைய காதலை வெளிப்படுத்திவிட வேண்டும் என்ற எண்ணத்துடன் அன்று இரவு யாருக்கும் தெரியாமல் எதிர் வீட்டு மொட்டை மாடிக்கு சென்று….

என்ன நண்பர்களே, Retro walk எப்படி இருந்தது? எதற்காக இந்த Retro Walk என்ற கேள்விக்கு பதில் சொல்லி விடுகிறேன் – இந்தப் பதிவு இந்த வலைப்பூவில் 1600-வது பதிவு! 30 செப்டம்பர் 2009-ல் துவங்கிய இந்த பயணத்தில் 2018-ஆம் ஆண்டு 1600-வது பதிவினைத் தொட்டிருக்கிறேன். எழுதி இருக்கும் அனைத்து பதிவுகளுமே ஏதோ விதத்தில் ஒருத்தருக்காவது பயனுள்ளதாக இருந்திருக்கும் என நம்புகிறேன். தொடர்ந்து பயணிக்க விருப்பம் – பார்க்கலாம்!

வேறொரு பதிவுடன் மீண்டும் சந்திப்போம்… சிந்திப்போம்….

நட்புடன்

வெங்கட்

புது தில்லி