சார் லட்டு… தலைநகரின் விதம் விதமான லட்டு!

”’திங்க’க் கிழமை” பதிவாக இந்தத் திங்களில் நெல்லைத் தமிழன் அவர்களின் லட்டு செய்முறை எங்கள் பிளாகில் வந்தது. லட்டு எனக்கும் பிடித்தமானது தான். அந்தப் பதிவினை படித்த பின்னர், ”தில்லியில் கிடைக்கும் விதம் விதமான லட்டுகளைப் பற்றி ஒரு பதிவே எழுதலாம், விரைவில் எழுதுகிறேன்” என்று சொல்லி இருந்தேன். இதோ எழுதி வெளியிட்டு விட்டேன். அரங்கேற்ற வேளை படத்தில் “சார் லட்டு… சார் லட்டு” என்று தட்டு நிறைய லட்டுடன் வருவாரே ஒருத்தர், அது மாதிரி விதம் விதமாய் லட்டுகளுடன் இதோ வந்து விட்டேன்!

அமரந்த் லட்டு - தண்டுக்கீரை விதைகளில் செய்யப்பட்ட லட்டு

ஆட்டா லட்டு - கோதுமை மாவில் செய்யப்படுவது...

உங்களுக்கு ஒரு விஷயம் தெரியுமா? நம்ம ஊர்ல, லட்டு என்றால் பூந்தி லட்டு, மாலாடு, ரவா லாடு என மூன்றோ நான்கோ தான்! ஆனால் இங்கே லட்டு என்ற பெயரில் பல இனிப்புகள் உண்டு. மற்றபடி உருண்டையாக இருக்கும் எள்ளு மற்றும் நிலக்கடலை இனிப்புகளை முறையே எள்ளுருண்டை, கடலை உருண்டை என்று தானே சொல்வோம். இங்கே அவை கூட லட்டு தான் – தில் கா லட்டு, மூம்ஃப்ளி லட்டு என்று தான் அழைப்பார்கள். லட்டு வகைகள் எத்தனை எத்தனை – மோதிசூர் லட்டு, Gகோந்த் லட்டு, Bபேசன் லட்டு, ஆட்டா லட்டு, CHசூர்மா லட்டு, மேவா லட்டு, கஜூர் லட்டு, தேங்காய் லட்டு, ட்ரை ஃப்ரூட்ஸ் லட்டு, கஜூர் எள்ளு லட்டு, ஜோத்பூரி லட்டு, சோண்ட் மேத்தி கா லட்டு, முர்முரா லட்டு, அமரந்த் லட்டு என பல வகை லட்டுகள் இங்கே கிடைக்கின்றன. ஏன் போண்டா போன்ற ஒரு வகை உணவான “ராம் லட்டு” கூட இங்கே கிடைப்பது பற்றி ஏற்கனவே என் பக்கத்தில் எழுதியது நினைவிலிருக்கலாம்!

ராகி மாவில் செய்யப்பட்ட லட்டு 

கடலை மாவு லட்டு

ஒவ்வொரு செவ்வாய்க்கிழமையிலும் லட்டு வாங்கி “பாலாஜி” என இங்கே அழைக்கப்படும் ஹனுமனுக்கு படைத்து அனைவருக்கும் விநியோகம் செய்வது இங்கே உள்ளவர்களின் வழக்கம். லட்டு வாங்க முடியாதவர்கள், பூந்தியாவது வாங்கி விநியோகிப்பார்கள். எங்கள் அலுவலக நண்பர் ஒருவர் இந்த பாலாஜி/ஹனுமனின் பக்தர். ஒவ்வொரு வாரமும் செவ்வாய்க் கிழமைகளில் லட்டு விநியோகிப்பார் – அதற்காகவே அலுவலகத்தில் ஒரு பாலாஜி ஃபண்ட் கூட வைத்திருந்தோம் – வாரா வாரம் அந்த நிதியிலிருந்து இரண்டு கிலோ லட்டு வாங்கி விநியோகம் - வருடத்தில் ஒரு முறை சுமார் 200 பேருக்கு மேல் ”Bபண்டாரா” என அழைக்கப்படும் உணவு விநியோகம் உண்டு – கண்டிப்பாக அனைவருக்கும் லட்டு உண்டு! சில செவ்வாய்க்கிழமைகளில் லட்டு வாங்கி எடுத்துப் போவது என்னுடைய வேலையாக இருந்தது – வழக்கமாக வாங்கி வருபவர் விடுமுறையில் இருந்தால்!

சாக்லேட் லட்டு....

ட்ரை ஃப்ரூட்ஸ் லட்டு

லட்டு கோபால் என அழைக்கப்படும் தவழும் கிருஷ்ணர்....

சாப்பிடும் லட்டுகளை விடுங்கள். இறைவனைக்கூட இங்கே லட்டு என்று அழைக்கும் வழக்கம் இங்கே உண்டு. மதுராவில் பிறந்த கண்ணனை – “Bபால் கோபால்” [அதாவது குழந்தை கோபால்] என்று அழைப்பதோடு லட்டு கோபால் என்றும் அழைப்பதுண்டு. கிருஷ்ண ஜெயந்தி அன்று “லட்டு கோபால் ஆயாரே….” என பாடல்கள் கூட பாடுவார்கள் இங்கே.  லட்டு கோபால் என்றால் அப்படி ஒரு ஆனந்தம்.  திருமணம் ஆனவர்களுக்கு திருமணப் பரிசாக லட்டு கோபால் சிலைகள் கொடுப்பதைக் கூட இங்கே வழக்கமாக வைத்திருக்கிறார்கள். மதுரா, விருந்தாவன், கோகுலம், கோவர்த்தன், பர்சானா என இந்தப் பகுதியில் எங்கே சென்றாலும், கடைகளில் லட்டு கோபாலின் சின்னச் சின்ன சிலைகளும், படங்களும் கிடைக்கும். கூடவே அழகான தொட்டில்களும், அலங்காரப் பொருட்களும்!

கோந்த் லட்டு...

ஜோத்பூரி லட்டு...

ஏற்கனவே சொன்னது போல உருண்டையாக இருந்தாலே லட்டு தான் இங்கே. அது மனிதர்களுக்கானவை மட்டும் அல்ல! மாடுகளுக்கும் கொடுக்கும் ஒரு உணவினை லட்டு என அழைக்கிறார்கள்! நாங்கள் வழக்கமாகச் சென்று வரும் ஒரு Gகோஷாலாவில் வைக்கோல், புல், தீவனம், கோதுமை மாவு என பலவற்றையும் கலந்து உருண்டைகளாக உருட்டி லட்டு என்ற பெயரில் வைத்திருப்பார்கள். 50 ரூபாய், 100 ரூபாய் என கொடுக்கும் பணத்திற்கு ஏற்ப லட்டுகள் தட்டுகளில், கூடைகளில் கிடைக்கும். அவற்றை எடுத்துக் கொண்டு சென்று மாடுகளுக்கு நம் கையாலேயே உண்ணக் கொடுக்கலாம். அவ்வப்போது சென்று மாடுகளுக்கு இந்த லட்டுகளைக் கொடுப்பது எங்கள் வழக்கமாக இருக்கிறது!

கஜூர் [பேரீச்சை ] லட்டு

மேத்தி  லட்டு 

ஹரியானா பகுதிகளில் இருக்கும் ஒரு வழக்கம் – இங்கே விதம் விதமாக இனிப்புகள் செய்வது வழக்கமல்ல. எந்த விழாவாக இருந்தாலும் லட்டு தான் செய்வார்கள் – நாம் செய்வது போல ஒரு கிலோ, இரண்டு கிலோ அல்ல – மூட்டை கணக்கில் தான் இங்கே லாட்டூ [laddoo] செய்வது வழக்கம். ஏக் போரி லட்டு, தோ போரி லட்டு என்று தான் சொல்வார்கள் – அதாவது பயன்படுத்தப்படும் சர்க்கரை தான் கணக்கு – ஒரு மூட்டை சர்க்கரை கொடுத்து லட்டு! யோசிக்கவே பிரமிப்பாக இருக்கிறது அல்லவா! கிராமிய திருமணங்களில் ஒவ்வொரு வீட்டில் எத்தனை நபர் இருக்கிறார்களோ, அத்தனை கிலோ லட்டு விநியோகம் செய்வது ஹரியானா கிராமங்களில் வழக்கமாக இருக்கிறது. எங்கள் அலுவலக நண்பர் வீட்டில் ஐந்து பேர் – ஊரில் எந்தத் திருமணம் என்றாலும் ஐந்து கிலோ லட்டு இவர் வீட்டுக்கு வந்து விடும்!

மேவா லட்டு

மோதிசூர் லட்டு...

நாம் சாப்பிடுவது போல ஒன்றிரண்டு லட்டு சாப்பிடுவதில்லை – ஹரியானாவில் லட்டு விநியோகம் செய்யும் போது “dhardhe!” என்று தான் சொல்வார்கள் – அதாவது அப்படியே தட்டுடன் இலையில் போடுவது/கொட்டுவது! வீட்டில் உள்ள முதியவர்கள் இறந்தால் கிராமம் முழுவதும் லட்டு விநியோகம் செய்வது இங்கே வழக்கமாக வைத்திருக்கிறார்கள். நம் ஊரில் கல்யாணச் சாவு என்று சொல்வார்களே அதே போல ஒரு வழக்கம். இறந்தவர் 70 வயதுக்கு மேலானவராக இருந்தால் கிராமம் முழுக்க கண்டிப்பாக இப்படி லட்டு விநியோகம் உண்டு – கல்யாணம் என்றாலும் கல்யாணச் சாவு என்றாலும் லட்டு விநியோகம்! ஹரியானாவும் லட்டுவும் இணைபிரியாத நண்பர்கள்! இன்னுமொரு விஷயம், குழந்தைகளைக் கொஞ்சும் போது, இவர்கள் “ஹே மேரா லட்டு!” என்று கொஞ்சுவதை வழக்கமாக வைத்திருக்கிறார்கள்!

முர்முரா லட்டு

ரபடி லட்டு... 

ராஜஸ்தான் மாநிலத்தில் இருக்கும் சாலாசர் மற்றும் மெஹந்திபூர் பாலாஜி [ஹனுமான்] கோவில்களில் சவாமணி பிரசாத் மிகவும் பிரபலம். பொதுவாக சவாமணி பிரசாத் லட்டு தான் 51 கிலோ லட்டு பிரசாதம்! இந்த சவாமணி பற்றி ஏற்கனவே என்னுடைய வலைப்பூவில் எழுதி இருக்கிறேன் – படிக்காதவர்கள் இங்கே படிக்கலாம்! சவாமணி - ஹிந்தி மொழியில் சவா என்றால் ஒன்றே கால்! மன் அல்லது மான்ட் என்றால் 40 கிலோ அளவு. சவா மன் அதாவது சவாமணி என்றால் 50 கிலோ! லட்டு அல்லது சூர்மா, அல்லது பர்ஃபி அல்லது மூன்றும் கலந்து 50 கிலோ [அ] 51 கிலோ பிரசாதமாக பாலாஜிக்கு படைப்பது சவாமணி! ஒவ்வொரு நாளும் சவாமணி பிரசாதத்திற்குக் கொடுக்கும் பக்தர்கள் எண்ணிக்கை நூற்றுக் கணக்கில்! இங்கே நிறைய கடைகள் இருந்தாலும், சஞ்சய் மிஷ்டான் Bபண்டார் என்ற கடை பிரபலம் – ஒவ்வொரு நாளும் சுமார் ஐந்தாயிரம் கிலோ லட்டு இங்கே தயாரிக்கிறார்கள்.

என்ன நண்பர்களே, எங்கள் பிளாக் லட்டு படித்ததும் தோன்றிய லட்டு எண்ணங்களை ஒரு பதிவாக இங்கே பகிர்ந்து கொண்டேன். லட்டு உங்களுக்குப் பிடித்திருந்ததா என்று பின்னூட்டத்தில் சொல்லுங்களேன்! முடிந்தால் நானே சில லட்டு வகைகளைச் செய்து செய்முறையும் இங்கே பகிர்ந்து கொள்கிறேன்! நேரம் கிடைக்கும்போது செய்ய வேண்டும் என நினைத்திருக்கிறேன்!

மீண்டும் வேறு ஒரு பகிர்வுடன் சந்திப்போம்…. சிந்திப்போம்….

நட்புடன்

வெங்கட்

புது தில்லி.