கல்கோனா!

 

அனைத்து நண்பர்களுக்கும் இனிய காலை வணக்கம். இன்றைய பதிவை, நல்லதொரு வாசகத்துடன் ஆரம்பிக்கலாம். 

யானைக்குக் கரும்புத் தோட்டமே தேவைப்படுகிறது. எறும்புக்கு சக்கையே போதுமானதாக இருக்கிறது. தோட்டம் கிடைக்கும்போது யானையாய் இரு. சக்கை கிடைக்கும்போது எறும்பாய் இரு. வாழ்க்கையில் திருப்தியில்லை என்ற பேச்சுக்கே இடமிருக்காது!

***** 

கல்கோனா – ஆஹா பெயரைப் படிக்கும்போதே நாவில் எச்சில் ஊறினால் நீங்கள் நிச்சயம் 40+ வயதினராகவே இருக்க முடியும்! இந்த கல்கோனா சாப்பிடாதவர்கள் யார்? சிறு நகரமாக இருந்தாலும் சரி, கிராமமாக இருந்தாலும் சரி, பட்டணமாக இருந்தாலும் சரி இந்த கல்கோனா கிடைக்காத பெட்டிக் கடைகள் இல்லை! பாட்டிலில் வைக்கப்பட்ட கல்கோனா உருண்டையும் ஐந்து பைசாவில் வாங்கி வாயில் அடக்கிக் கொண்டால் குறைந்தது அரை மணி நேரமாவது வாயில் ஊறினால் தான் முழுவதும் கரையும்! கொஞ்சம் கொஞ்சமாக கரையக் கரைய அதைச் சாப்பிடுவது அலாதியான இன்பம் – அந்த வயதில்! இப்போது கூட கல்கோனா கிடைத்தால் நான் சாப்பிடத் தயார்! ஆனால் தலைநகர் தில்லியில் எங்கே சென்று கல்கோனாவினைத் தேடுவது? ஊரில் கூட கிடைப்பதாகத் தெரியவில்லை – அப்படியே கிடைத்தாலும் முன்பு கிடைத்த அளவு சுவையுடன் கிடைக்குமா என்பது சந்தேகமே! சரி இப்போது எதற்கு கல்கோனா பற்றிய நினைவலைகள் என்ற கேள்வி உங்களுக்குள் எழுந்திருக்கலாம்! விஷயத்திற்கு வருகிறேன். 

சமீபத்தில் நண்பர் ரிஷபன் அவர்கள், “ரங்க விலாசம்” எனும் அவரது புதிய தொடர்கதை ‘கல்கோனா’-வில் வெளிவருகிறது என்று முகநூலில் தெரிவித்து இருந்தார். அதே சமயத்தில் நண்பர் பால கணேஷ் அவர்களும் தனது ஒரு தொடர் (சிகரம் தொட்ட சினிமாக்கள்) கல்கோனாவில் வெளிவருகிறது என்று எழுதி இருந்தார்! கல்கோனாவில் எப்படி தொடர் என்று மேலும் படித்த போது தான் தெரிந்தது “கல்கோனா” என்பது ஒரு மின்னிதழ் என்பது! திரு பெ. கருணாகரன் – குமுதம் ஜங்ஷன் இதழில் பொறுப்பாசிரியராக இருந்து பின்னர் புதிய தலைமுறையில் பணியாற்றியவர்! தற்போது ஃப்ரீலான்ஸ் பத்திரிகையாளராக இருப்பவர் – இவரது ஒரு சில படைப்புகளை படித்து ரசித்திருக்கிறேன். அவர் தற்போது மாதமிருமுறை வெளிவரப் போகும் மின்னிதழ் ஒன்றை ஆரம்பித்து இருக்கிறார் – அந்த மின்னிதழின் பெயர் தான் “கல்கோனா”. சிறப்பான பல பகுதிகளை தன்னகத்தே கொண்டு ஆரம்பித்து இருக்கிறது “கல்கோனா” மின்னிதழ். முதல் கல்கோனா மின்னிதழ் சுதந்திர தினம் (15 ஆகஸ்ட்) வெளியாகி இருக்கிறது. 

ரிஷபன் ஜி, பால கணேஷ் தவிர இன்னும் சில நண்பர்களுடைய படைப்புகளும் இந்த மின்னிதழில் வெளி வந்திருக்கிறது – கவிதை, நகைச்சுவை, கட்டுரைகள், என பல பகுதிகளை இந்த கல்கோனா இதழ் உள்ளடக்கியிருக்கிறது. கல்கோனா மின்னிதழ் தொடர்ந்து வெளிவர எனது வாழ்த்துகளும்! மின்னிதழில் தங்களது படைப்புகளை வெளியிடும் நண்பர்களுக்கும் மனம் நிறைந்த வாழ்த்துகள். 

தற்போதைக்கு இந்த மின்னிதழ் PDF-இல் வெளிவருகிறது. முதல் மின்னிதழை வாசிக்க முடிந்தது. படைப்புகளை வரவேற்றிருக்கிறார்கள். படைப்புகள் அனுப்ப விரும்புபவர்கள் kalkonaeditor@gmail.com என்ற மின்னஞ்சல் முகவரியிலும், மற்ற தொடர்பிற்கு kalkonasweet@gmail.com எனும் மின்னஞ்சல் முகவரியிலும் தொடர்பு கொள்ளலாம். ”திரையும் புதிரும்” என்ற தலைப்பில் ஒரு சினிமா சம்பந்தப்பட்ட புதிரும் உண்டு. அதற்கான பரிசுத் தொகையும் உண்டு! ஒரு கடிதப் போட்டி பற்றிய தகவலும் இந்த முதல் கல்கோனா மின்னிதழில் இருக்கிறது! முதல் மின்னிதழைப் படித்ததில் ஸ்வாரஸ்யமாகவே துவங்கியிருக்கிறது இவர்களின் மின்னிதழ் பயணம்! மின்னிதழ் சம்பந்தப்பட்ட அனைவருக்கும் வாழ்த்துகள். மின்னிதழில் பங்களித்திருக்கும் நண்பர்கள் ரிஷபன் ஜி, பால கணேஷ், திருமதி செல்வி சங்கர் ஆகியோருக்கும் மனம் நிறைந்த பாராட்டுகள்! 

இன்றைய பதிவில் பகிர்ந்து கொண்ட தகவல் பற்றிய எண்ணங்களையும் கருத்துகளையும் பின்னூட்டமாகச் சொல்லுங்களேன். விரைவில் வேறு ஒரு பதிவுடன் மீண்டும் ச[சி]ந்திப்போம்... 

நட்புடன் 

வெங்கட் நாகராஜ் 

புது தில்லி