கதம்பம் – காவேரி அக்கா – நட்பு – ஓவியம் – மிஷன் மங்கள்

 

அனைத்து நண்பர்களுக்கும் இனிய காலை வணக்கம். இன்றைய நாளை, நல்லதொரு வாசகத்துடன் ஆரம்பிக்கலாம். 

துன்பத்தை தூரமாக வைத்து, இன்பத்தினை இதயத்தில் வைத்து, நம்பிக்கையை நமக்குள் வைத்தால், எல்லாம் வெற்றியே! 

காவேரி அக்கா - 13 ஆகஸ்ட் 2020: 

எப்போதும் இஸ்திரி செய்ய கொடுப்பது அல்ல என்றாலும் என்றேனும் பக்கத்து ரோடில் இஸ்திரி செய்பவரிடம் கொடுப்பேன். அப்படி அறிமுகமானவர் தான் இந்த அக்கா. என்றாவது என் கணவரை சாலையில் பார்த்துவிட்டால் துணி இருக்கா அக்கா! என்று வந்துவிடுவார் :) அக்காவுக்கு சைஸ்வாரியாக குழந்தைகள் உள்ளனர். அதனால் என்னுடைய உடைகளும், எங்கள் மகளின் உடைகளும் அவரின் ஏதோ ஒரு மகளுக்கு சரியாக இருக்கும் என்று கேட்டு வாங்கிக் கொள்வார். 

இந்த கொரோனா காலத்தில் வெளியில் கொடுக்காமல் நானே தான் செய்து கொள்கிறேன் என்பதால் ஒருநாள் என்னிடம் "யாருமே இப்போ இஸ்திரிக்கு துணி கொடுக்க மாட்டேங்கறாங்க" சாப்பாட்டுக்கு காசு இல்ல. கடைசிப் பையனுக்கு பால் வாங்கக் கூட முடியல என்று புலம்பிக் கொண்டிருந்தார். என்னால் முடிந்த பணத்தை அவரிடம் தந்தேன். 

நேற்று வீட்டுக்கு வந்த அக்கா ஒரு தட்டில் கல்யாண பத்திரிக்கை வைத்து தந்தார். "சார் கிட்டயும் சொல்லுங்க! இது கொரோனா சமயம் என்கிறதால ஊரில தான் கல்யாணம்! மாப்பிள்ளை, பொண்ணு அழைப்பு கூட இல்ல என்றார். உடன் ஒரு பெண்ணும் குட்டிப் பையனும் வந்திருந்தனர். 

இந்தப் பொண்ணுக்கா கல்யாணம்? என்றேன். இது இரண்டாவது பொண்ணு! சீர்வரிசை வேணாம்னு கல்யாணம் பண்ணிகிட்டாங்க. பொழுதன்னிக்கும் புருஷன்காரன் குடிச்சுட்டு வந்து அடிச்சுட்டு இருந்தான். இந்த பையன் பொறந்ததும் வந்தவ தான்! எங்க கூட தான் இருக்கா! மூத்த பொண்ணுக்குத் தான் இப்போ கல்யாணம். நாத்தனார் பையனுக்கு தான் கொடுக்கறோம் என்றார். 

இருவீட்டு அழைப்பு என்று கொடுத்த அந்தப் பத்திரிக்கையில் மணமகன், மணமகள் உள்பட சொந்தங்கள் அனைவருமே பட்டதாரிகள். M.A, B.Ed, B.B.A, M.Phil, Phd முடித்தவர்கள் கூட உள்ளார்கள். 

அளவில்லாத குழந்தைகளும், குடிப்பழக்கமும் தான் இவர்களின் நிலைக்கு காரணமோ? 

இணைந்த நட்பு – 14 ஆகஸ்ட் 2020: 

ஆடியின் கடைசி வெள்ளியான இன்றும் வழக்கம் போல் செம்மண் படிக்கோலமும், முளைக்கீரை மசியலுடன் சென்றது. வெள்ளிக்கிழமையில் உப்பு வாங்குவதும், கீரை சமைப்பதும் நல்லது என்பார்கள். 

இணைந்த நட்புவட்டம்! 

என்னம்மா சமைச்சிருக்க? ஒரு கிண்ணத்தில் போட்டுக் குடு! என்று அடுக்களைக்கே உரிமையுடன் வந்து கேட்கும் நண்பர். 

‘இன்னிக்கு எங்க வீட்டுல ராத்திரிக்கு பூரியும், சப்ஜியும். நீங்க சீக்கிரம் சாப்பிடுவீங்களேன்னு சுடச்சுட உங்க இரண்டு பேருக்கும் கொண்டு வந்திருக்கேன்’ என்று கீழ் வீட்டுத் தோழி எடுத்து வருவார். 

உடம்பு சரியில்லையா! குழந்தைய நான் பாத்துக்கறேன்! ரெஸ்ட் எடு! 

இப்படி திருமணமாகி டெல்லி சென்ற நாள்முதலாக அறிமுகமான சில நெருங்கிய நட்புகள் சந்தர்ப்பம், சூழ்நிலை என ஆளுக்கொரு புறமாக பிரிந்து விட்டோம். 

உடன்பிறந்தவர்கள் போல ஒருவருக்கொருவர் தங்கள் சுக துக்கங்களை பகிர்ந்து கொள்ளவும், வாரஇறுதி நாட்களில் ஒன்றாக இணைந்து பூங்காக்களுக்கு சென்று அரட்டை அடிப்பதும், ஆளுக்கொரு உணவாக சமைத்து சாப்பிடுவதுமாக இனிமையாக சென்ற நாட்கள் அவை..மீண்டும் அந்நாட்கள் வரப் போவதில்லை என்றாலும் இன்றைய காலகட்டத்தில் வாட்ஸப் மூலம் இணைந்து கொண்டதில் மிக்க மகிழ்ச்சி. 

ரோஜா குல்கந்து! 

உடலுக்கு குளிர்ச்சி, வயிற்றுப்புண்களை ஆற்றும், கண்பார்வையை தெளிவடையச் செய்யும் என்று பல மருத்துவ குணங்களை கொண்டது ரோஜா குல்கந்து. இது பொதுவாக நாட்டு மருந்துக் கடைகளில் கிடைக்கும். இதை வீட்டிலேயும் தயாரிக்கலாம். பன்னீர் ரோஜா இதழ்களுடன் கற்கண்டும், தேனும் சேர்த்து அன்றாடம் கிளறி விட்டால் சில நாட்களில் தயாராகி விடும். 

சுதந்திர தினம் – ஓவியம் – ரோஷ்ணி கார்னர் – 15 ஆகஸ்ட் 2020: 

இந்த வருடம் சுதந்திர தினத்திற்காக மகள் வரைந்த ஓவியம் ஒன்று உங்கள் பார்வைக்கு! 

பார்த்த திரைப்படம் - Mission Mangal – 16 ஆகஸ்ட் 2020: 

சென்ற ஆண்டு சுதந்திர தினத்தன்று வெளியான இந்தத் திரைப்படம் ISROவில் பணியாற்றும் விஞ்ஞானிகளின் நடைமுறை வாழ்க்கையும், ஒரு செயற்கைகோள் உருவாக அவர்கள் செய்யும் தியாகத்தையும் எடுத்துச் சொல்லும் திரைப்படம். 

வித்யா பாலன், அக்ஷய் குமார், நித்யா மேனன் மற்றும் பலர் சிறப்பாக நடித்துள்ளனர். "மங்கள்யான்" உருவாக 17000 விஞ்ஞானிகளும், இஞ்சினியர்களும் பாடுபட்டுள்ளனர். குறைந்த பட்ஜெட்டில் தயாரிக்க ஒவ்வொருவரின் யுக்தியும் பயன்படுகிறது. 

பூரி பொரிக்கும் போது கேஸ் சிலிண்டர் தீர்ந்து போகப் போகிறது என்று தெரிய வருகிறது. அடுப்பை நிறுத்தி அந்த எண்ணெய் சூட்டிலேயே சில பூரிகளை பொரித்தெடுத்து, மீண்டும் சூடுபடுத்தி செய்ததில் அனைத்துமே பொரித்தெடுக்க முடிந்தது. பெண்களுக்கே உரித்தான இந்த சிக்கன நடவடிக்கையால் மங்கள்யானில் எரிபொருளை சேமிக்க யோசனை கிடைக்கிறது!! 

4 பில்லியன் தான் பட்ஜெட். அதற்குள் முடிக்க முடியுமா என்று மேலிடம் யோசிக்க, அசால்ட்டாக வித்யா பாலன் சந்த்ராயன் 2 பகுதிகளை இதில் உபயோகித்துக் கொள்ளலாமே சார்! என்று யோசனையைச் சொல்ல, அக்க்ஷய்குமார் " women sir " டின்னருக்கு செய்த மீதி உணவை காலை உணவுக்கு புதிதாக மாற்றித் தருபவர்கள் ஆச்சே! க்ரேட் என்று பாராட்டுகிறார்! 

இப்படி அந்த டீமில் உள்ள ஒவ்வொருவரும் பாடுபட்டு இறுதியில் மங்கள்யான் வெற்றிகரமாக விண்ணில் செல்கிறது. நிச்சயம் அனைவரும் பார்க்க வேண்டிய திரைப்படம். இந்தியில் இருந்தாலும் ஆங்கில சப் டைட்டிலுடன் எளிதில் புரிந்து கொள்ளலாம்.  

வாய்ப்புக் கிடைத்தால் Hotstar-இல் கண்டுகளிக்கலாம். 

நண்பர்களே, இன்றைய பதிவில் உங்களுடன் பகிர்ந்து கொண்ட விஷயங்கள் பற்றிய உங்கள் கருத்துகளைச் சொல்லுங்களேன். விரைவில் வேறு ஒரு பதிவுடன் மீண்டும் ச[சி]ந்திப்போம்... 

நட்புடன் 

ஆதி வெங்கட்