காஃபி வித் கிட்டு – கனிமொழி – பை நிறைய பட்டாணி – ப்ரேமம் - ஹோலி - சந்திப்பு

காஃபி வித் கிட்டு – பகுதி 57

அனைத்து பதிவுலக நண்பர்களுக்கும் இனிய காலை வணக்கம். இன்றைய பொழுதை ஒரு இனிமையான வாசகத்துடன் ஆரம்பிக்கலாம்.

இந்த வாரத்தின் ரசித்த வாசகம்:

முடிவுகளைத் தயங்காமல் எடுக்கும் திறன் நம்மிடம் இருந்தால் முன்னேற்றத்திற்கான வாயிற்கதவுகள் எப்போதும் திறந்தே இருக்கும்.

இந்த வாரத்தின் செய்தி –  கனிமொழி:

கனிமொழி என்றவுடன் அரசியல் என நினைத்து விடவேண்டாம்! இந்தக் கனிமொழி வேறு ஒருவர் – இறந்தும் வாழ்பவர் இந்த கனிமொழி! வாருங்கள் தினமலரில் வெளியான இந்தச் செய்தியைப் பார்க்கலாம்! கனிமொழி அவர்களின் குடும்பத்தினருக்கு இந்த வாரத்தின் பூங்கொத்து!

கனிமொழி

கள்ளக்குறிச்சி மாவட்டம் தியாகதுருகம் பகுதியைச் சேர்ந்த ஒய்வு பெற்ற அரசு ஊழியர் இளங்கோ என்பவரின் மகள். சிறந்த படிப்பாளி தொல்பொருள் துறையில் ஆர்வம் கொண்டவர் நேர்மையாக இருப்பதும் எளிமையாக வாழ்வதும் இவருக்கு பிடித்த விஷயம்.லஞ்சம் என்ற வார்த்தையைக் கூட வெறுப்பவர். தான் பிறந்த வீட்டிற்கும் ஊருக்கும் கவுரவத்தை தேடிக்கொடுத்தவர்.தஞ்சை தமிழ்ப் பல்கழகத்தில் கவுரவ பேராசிரியையாக வேலை பார்தது வந்தார்.கடந்த 27 ந்தேதி பணி முடித்து பேருந்தில் ஏறுவதற்காக ரோட்டை கடந்து வந்தவர் கார் மோதி படுகாயமடைந்தார்.

உடனடியாக தஞ்சையில் உள்ள ஆஸ்பத்திரியில் அனுமதிக்கப்பட்டார் தீவிர சிகிச்சையும் வழங்கப்பட்டது ஆனால் உடல் நிலை தேறவில்லை மூளைச்சாவு நிலையை அடைந்தார். சோகம் கப்பிய மனதோடு விஷயத்தை உறவினர்களிடம் டாக்டர்கள் தெரியப்படுத்தினர் அந்த வேதனையிலும் கனிமொழியின் அண்ணன் சதிஷ்குமார் உள்ளீட்டோர் ஒரு முடிவு எடுத்தனர்.அந்த முடிவு கனிமொழியின் உடல் உறுப்புகளை தானம் செய்வது என்று. அதன்படி அவரது ஒரு சீறுநீரகம் தஞ்சைக்கும் இன்னோரு சீறுநீரகம் திருச்சிக்கும் இதயமும் நுரையீரலும் சென்னைக்கும் கல்லீரல் மதுரைக்கும் கண்கள் தஞ்சை பொது மருத்துவமனைக்கும் தானமாக வழங்கப்பட்டது. நாலு பேருக்கு நல்லது செய்ய வேண்டும் என்று எப்போதும் தியாக சிந்தனையுடனேயே வளர்ந்த கனிமொழி தன் படிப்பால் பதவியால் ஆற்றலால் நாலு பேருக்கு இருந்து உதவி செய்வார் என்று எண்ணினோம் ஆனால் இறந்து ஏழு பேருக்கு உதவி செய்துள்ளார் என்ற அவரது உறவினர்கள் அனைவரது கண்களிலும் கண்ணீர்.

இந்த வாரத்தின் இசை – கேரளத்திலிருந்து:

ப்ரேமம் – இந்தப் படம் பற்றி நீங்கள் அனைவருமே அறிந்திருக்கக் கூடும்.  அப்படத்திலிருந்து ”ஆலுவா புழையுட தீரத்து” எனும் பாடல் இந்த வாரத்தின் ரசித்த பாடலாக… நீங்களும் கேட்டு ரசிக்க இதோ இங்கே!

சாலைக் காட்சி – பை நிறைய பட்டாணி…

தலைநகரின் பேருந்து நிறுத்தம் ஒன்று. அதன் அருகே சாலையின் ஓரத்திலே கீழே அமர்ந்திருக்கிறார் ஒருவர் – அவர் அருகே சில பல மூட்டை முடிச்சுகள். அழுக்கு படிந்த தலை – தண்ணீர் பார்த்தே பல மாதங்கள் ஆகியிருக்கும் உடல்! கிழிந்த உடைகள். தனியே சிரித்தபடி பேசிக் கொண்டிருக்கிறார். அவருக்கு என்ன பிரச்சனையோ? எதிரே ஒரு பெரிய பை நிறைய பச்சைப் பட்டாணி – தோலுடன். கூடவே வேரோடு எடுக்கப்பட்ட செடிகள் ஒரு கொத்தாக. அதில் இருக்கும் காய்களை எடுத்து ஒவ்வொன்றாக சாப்பிட்டுக் கொண்டிருக்கிறார் அந்த மனிதர்.  நடுநடுவே பட்டாணியும் உள்ளே போய்க் கொண்டிருக்கிறது. பக்கத்தில் யாரும் வந்து விட்டால், அந்தச் செடிகளால் அடித்து விடுவேன் என்று காண்பித்து விரட்டுகிறார் – கூடவே – “எனக்கு மட்டும் தான்! உனக்கு தர மாட்டேன் போ!” என்று கத்துகிறார். பேருந்துக்காக காத்திருந்த சில நிமிடங்களில் ஒருவர் கூட அந்த மனிதர் பற்றி கவலைப்படவில்லை!

தனிமையும் யாருமில்லாத கொடுமையும் மனிதர்களை ரொம்பவே பாதித்து விடுகிறது – எந்தத் தாய் பெற்றெடுத்த மகனோ? தன் மகன் இப்படி கிடந்து அல்லாடுகிறான் என்பது அந்தத் தாய்க்கு தெரிந்தால் எத்தனை வேதனை?   விரைவில் அவருக்கு விடிவுகாலம் பிறக்கட்டும்…

இந்த வாரத்தின் ரசித்த விளம்பரம் – Fresh Cement, Bangladesh

இந்த வாரத்தின் ரசித்த விளம்பரமாக பங்க்ளாதேஷிலிருந்து ஒரு விளம்பரம்.  வங்க மொழியில் இருந்தாலும் காட்சி வழி புரிந்து கொள்ள முடியும். தன் வீட்டில் வேலை செய்பவருக்கு வீட்டு உரிமையாளர் தரும் மரியாதை – மனதைத் தொட்டது - பாருங்களேன்.

சந்திப்பு – நெல்லைத் தமிழன்:

குஜராத், ஆக்ரா-மதுரா வழி தலைநகர் தில்லிக்கு வந்திருந்த நெல்லைத் தமிழன் அவர்களை இந்த வியாழன் சந்திக்க முடிந்தது. புதன் இரவு தில்லி வந்து சேர்ந்தவர் வியாழன் காலை லக்ஷ்மி நாராயண் மந்திர் என அழைக்கப்படும் பிர்லா மந்திர் வந்த போது தகவல் தர, வீட்டிலிருந்து புறப்பட்டு அவரைச் சந்தித்து சில நிமிடங்கள் உரையாடிக் கொண்டிருந்தோம்.  தலைநகர் வரும் பதிவுலக நண்பர்களை இப்படிச் சந்திப்பது மகிழ்ச்சியான விஷயம் – இப்படி நிறைய பேரை சந்தித்து விட்டேன் – சில பதிவர்களை சந்திக்க முடிவதில்லை – வாய்ப்பு வரும் போது நிச்சயம் சந்திக்கலாம்!  படம் எதுவும் நான் எடுக்கவில்லை! அவர் தனது அலைபேசியில் எடுத்திருக்கிறார் – என்றாலும் பொதுவாக அவரது படங்களை வெளியிடுவதில்லை என்பதால் எனக்கு அனுப்பி வைத்தாலும் இங்கே பகிர்ந்து இருக்க மாட்டேன்! :) இன் ஃபாக்ட் நானே இன்னும் அந்தப் படங்களை (பதிவு எழுதும் வரை!) பார்க்கவில்லை! தொடரட்டும் பதிவுலக நட்பும் சந்திப்புகளும்!

பின்னோக்கிப் பார்க்கலாம் வாங்க:

இதோ வரும் வெள்ளி ஹோலி பண்டிகை. இதே ஹோலி சமயத்தில் 2012-ஆம் வருடம் இதே நாளில் எழுதிய ஒரு பதிவு – ஹோலி சமயத்தில் Bபர்சானாவில் நடக்கும் ஹோலி பண்டிகை கொண்டாட்டங்கள் பற்றி எழுதி இருக்கிறேன்! அந்தப் பதிவின் தலைப்பு “அடி வாங்கும் கணவர்கள்”  - ஹாஹா…

படிக்காதவர்கள் வசதிக்காக, அப்பதிவின்  சுட்டி கீழே…

அடி வாங்கும் கணவர்கள்

நண்பர்களே, இந்த வாரத்தின் காஃபி வித் கிட்டு பதிவு பற்றிய உங்கள் கருத்துகளைச் சொல்லுங்களேன். விரைவில் வேறு சில செய்திகளோடு மீண்டும் ச[சி]ந்திப்போம்...

நட்புடன்

வெங்கட்

புது தில்லி