மின்னூல் – ஓரிரவில்… ஒரு ரயிலில்… - பயணங்கள் பலவிதம்

அனைத்து நண்பர்களுக்கும் இனிய காலை வணக்கம். இன்றைய பொழுதை, நல்லதொரு வாசகத்துடன் ஆரம்பிக்கலாம். 

யாரிடமும் உங்களை நிரூபிக்க முயலாதீர்கள்… இயல்பாக இருந்து விடுங்கள்… பிடித்தவர்கள் நெருங்கட்டும்… வேண்டாதவர்கள் விலகி விடட்டும்… 

******

சற்றேறக்குறைய ஒரு மாத இடைவெளிக்குப் பிறகு இன்று மீண்டும் எனது புதிய மின்னூல் வெளியீடு பற்றிய தகவலுடன் உங்களைச் சந்திக்கிறேன். ஏப்ரல் மாதத்திலிருந்து தொடர்ந்து எனது பயணக் கட்டுரைகளைத் தொகுத்து மின்னூல்களாக, அமேசான் தளத்தில் வெளியிட்டு வந்திருக்கிறேன் – பல சமயங்களில் வாரம் ஒரு மின்னூல் வெளியிட்டு வந்திருக்கிறேன் – கடந்த சில வாரங்களாக பணிச்சுமை காரணமாக, இந்த வேலையைத் தொடர இயலவில்லை. இதோ மீண்டும் ஒரு மின்னூல் – அமேசான் தளத்தில் எனது 24-ஆவது மின்னூல்! கடந்த பத்து ஆண்டுகளில் தமிழகம் வரும்போதெல்லாம் ரயில், விமானம், பேருந்து என பலவற்றில் பயணித்திருக்கிறேன். அது தவிர தலைநகரிலும் வேறு சில இடங்களிலும் இப்படியான பயணங்களில் சந்தித்த மனிதர்கள், நிகழ்வுகள் என பலவற்றையும் எனது வலைப்பூவில் எழுதி வந்திருக்கிறேன். 

அப்படி எழுதிய கட்டுரைகளைத் தொகுத்து இதோ, இந்த வாரத்தில் “ஓரிரவில்… ஒரு ரயிலில்” என்ற தலைப்புடன், “பயணங்கள் பலவிதம்” என்ற உபதலைப்புடன் மின்னூலாக வெளியிட்டு இருக்கிறேன். சுவையான பல சம்பவங்களை, அனுபவங்களை உள்ளடக்கிய மின்னூல் இந்த மின்னூல். நிச்சயம் உங்களுக்கும் அதனைப் படிக்கும்போது நீங்கள் மேற்கொண்ட விமான/ரயில்/பேருந்துப் பயணங்களும், அவற்றில் கிடைத்த அனுபவங்களும் நினைவுக்கு வர, அவற்றை அசைபோட்டபடியே இந்த மின்னூலை மேலும் வாசிக்கலாம். 

தலைப்பு சுஜாதா அவர்களின் இதே தலைப்பில் வந்த நூலை நினைவுக்குக் கொண்டு வரலாம். அந்த நூலின் கதை நினைவில்லாதவர்களுக்காக ஒரு கதை சுருக்கம் இங்கேயும்! 

ஒரு இந்திய அரசியலின் மறைமுக சூத்ரதாரி சுவாமிஜி ராஜ பண்டிதர். மதுரையில் விழா ஒன்றில் கலந்து கொள்வதற்காகச் செல்கிறார். அவருக்குப் பாதுகாப்பாகச் செல்கிறார் மத்திய உள்துறை செகயூரிட்டி பிரிவின் அதிகாரி அஷோக். உன் வருங்கால மனைவியை அதே ரயிலில் சந்திப்பாய் என்று சுவாமிஜி அருள் வாக்கு சொல்ல, தன் பழைய நண்பனின் தங்கையே அதே ரயிலில் காண்கிறான். பல சுவாரஸ்ய சம்பவங்கள் அரங்கேற, கதையின் தலைப்பே சொல்வது போல ஒரு ரயிலில், ஒரு ராத்திரியில் நடந்து முடியும் கதை. 

சுஜாதாவின் கதை போல என்று சொல்ல வரவில்லை. இந்த மின்னூலில் வரும் கட்டுரை, ஒரு இரவு நேர ரயில் பயணத்தில், பயணிக்கு ஏற்பட்ட அசௌகர்யங்கள், அதன் விளைவு, நிகழ்வு குறித்த சக பயணிகளின் எண்ணங்கள் ஆகியவற்றைச் சொல்லும் கட்டுரை ஒன்றை இந்த மின்னூலில் சேர்த்திருக்கிறேன் – அதனால் தான் இந்த கட்டுரைத் தொகுப்பின் தலைப்பு ”ஓரிரவில்… ஒரு ரயிலில்!” மற்றபடி சுஜாதாவின் கதைக்கும், இந்த தொகுப்பிற்கும் எந்த சம்பந்தமும் இல்லை – தலைப்பினைத் தவிர! 

மின்னூலை வாசிக்க விரும்புபவர்கள் அமேசான் தளத்திலிருந்து தரவிறக்கம் செய்து வாசிக்கலாம். Kindle Unlimited Subscription வைத்திருப்பவர்கள், இந்த மின்னூலை இலவசமாகவே தரவிறக்கம் செய்து படிக்கலாம். மற்றவர்கள் ரூபாய் 70 மட்டும் செலுத்தி, தரவிறக்கம் செய்து கொண்டு வாசிக்கலாம்! இல்லை பணம் செலுத்த விருப்பமில்லை என்றால் – சற்றே காத்திருந்தால் சில நாட்களில் ஐந்து நாட்கள் மட்டும் இலவசமாக தரவிறக்கம் செய்து கொள்ளும் வசதியை தரும்போது தரவிறக்கம் செய்து கொள்ளலாம்! மேற்கண்ட மூன்று வழிகளில் எது உங்கள் விருப்பமோ அதைத் தேர்ந்தெடுக்கலாம்! அது உங்கள் இஷ்டம்! தரவிறக்கம் செய்து கொள்ள சுட்டி கீழே! 

ஓரிரவில்… ஒரு ரயிலில்… 

இன்னும் ஒரு தகவலும்… ஏற்கனவே சென்ற சனிக்கிழமை காஃபி வித் கிட்டு பதிவில் சொன்னது போல, ஏற்கனவே வெளியிட்ட மின்னூலான “ஹனிமூன் தேசம்” மின்னூலை வரும் புதன் கிழமை மதியம் 12.29 வரை இலவசமாகத் தரவிறக்கம் செய்து கொள்ளலாம். அதற்கான சுட்டி – ஹனிமூன் தேசம்! முடிந்தால் தரவிறக்கம் செய்து, வாசித்து உங்கள் கருத்துகளை எழுதி அனுப்பினால், எனது வலைப்பூவிலும் பகிர்ந்து கொள்வேன்! 

தொடர்ந்து மின்னூல்கள் வெளியிட விருப்பம் உண்டு – நேரமும் காலமும் சரியாக இருந்தால் அடுத்த வாரமே வெளியிடும் வாய்ப்பு இருக்கிறது. வெளியிட்டால் நிச்சயம் தகவலை பகிர்ந்து கொள்கிறேன். நாளை வேறு ஒரு பதிவுடன் உங்கள் அனைவரையும் சந்திக்கும் வரை… 

நட்புடன் 

வெங்கட் நாகராஜ் 

புது தில்லி