கதம்பம் - கேரளத்து மரச்சீனி கறி - பண்டிகைகளும் கொண்டாட்டங்களும் - சமுத்திரம்

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.  

 

நேற்று வெளியிட்ட கதம்பம் பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

 

அனைத்தையும் துறந்து ஒதுங்கி இருப்பவர்கள் துறவியாகத்தான் இருக்கவேண்டும் என்று அவசியமில்லை… துரோகங்களையும் வலிகளையும் அதிகம் அனுபவித்தவர்கள் கூட அனைத்தையும் விட்டு விலகி இருப்பார்கள். 

 

******

 

கேரளத்து மரச்சீனி கறி - 23 ஆகஸ்ட் 2023:

வீட்டில் தேவையில்லாத பொருட்கள் அல்லது பேப்பர் போன்றவற்றை எடைக்குப் போட்டால் அப்போதெல்லாம் மரவள்ளிக்கிழங்கு தான் தருவார்கள்! மழைநாளில் மரவள்ளிக்கிழங்கை உப்பு, மஞ்சப்பொடி சேர்த்து வேகவைத்து தருவாள் அம்மா! அல்லது வேகவைத்த கிழங்கை  துண்டங்களாக நறுக்கி தேங்காய் எண்ணெயில் தாளித்து தருவாள்! 

 

ஒருநாள் சமையலுக்கும் ஆச்சே! வத்தக்குழம்பு பண்ணுகிற நாளில் தொட்டுக் கொண்டு சாப்பிட மரவள்ளிக்கிழங்கு கறி ரெடி! இருப்பதை வைத்து சிறப்பாக செய்து தந்த நாட்கள்! வாரச்சந்தையில் 1/2 கி 20 ரூ தான் அக்கா! வாங்கிக்கோங்க! என்று சொல்லவும் வாங்கிக் கொண்டேன்! இன்று அம்மாவை நினைத்துக் கொண்டு பண்ணினேன்!

 

&*&*&*&**&*&*

 

பண்டிகைகளும் கொண்டாட்டங்களும் - 26 ஆகஸ்ட் 2023:

 

பண்டிகைகளும் அதற்கான கொண்டாட்டங்களும் நம்மை மனதளவிலும் உடலளவிலும் மேலும்  பக்குவப்படுத்துகின்றன என்று தான் சொல்லணும்! 

 

விழா என்றதும் அவற்றுக்கான மெனக்கெடல்களும், திட்டமிடல்களும் அதை பக்குவமாக செயல்படுத்துவதும் என்று மனதும் உடலும் அதற்கேற்ற பக்குவத்துக்கு தன்னை மாற்றிக் கொள்கிறது என்பது ஆச்சரியம்!

 

"இவ்வளவு சின்ன முகத்துக்கு எப்படி புடவை கட்டி விட்டீங்க? உங்கள மாதிரியே அம்பாளும் உயரமா இருக்கா! முழுப்புடவை தானா!  கலர் அழகா இருக்கு! எங்கே வாங்குனது?  

 

மந்திரம் சொல்லி பூஜை நீங்களே பண்ணிட்டீங்களா? உங்க வீட்டுக்காரர் இந்த  பண்டிகைக்கெல்லாம் வர மாட்டாரா? சார்! அங்கேயே தான் இருக்காரில்ல! அவர் கூட யார் இருக்காங்க?"

 

பலதரப்பட்ட மனிதர்களை சந்திப்பதும், அவர்களின் மனநிலையை புரிந்து கொள்வதும், நாம் அவர்களின் முன்னிலையில் தனித்து தெரிவதும், சிலநேரங்களில் நாம் பெருந்தன்மையாக நடந்து கொள்வதும், நமக்கான பாராட்டில் மகிழ்வதும் என இந்த மனதிற்கு தான் எத்தனை வேலை!!!

 

சாலையோர மரத்திலிருந்து  சட்டென்று உதிர்ந்து விழும் மலரின் சுகந்தம் அந்தச் சூழலை மெய்மறக்கச் செய்வது போல நம்மை புத்துணர்வாகவும் புதுப்பித்துக் கொள்ளவும் அவ்வப்போது வரும் கொண்டாட்டங்களும் அதனால் ஏற்படும் சந்தோஷங்களும் நமக்கான டானிக்!

 

&*&*&*&**&*&*

 

சமுத்திரம் - 3 செப்டம்பர் 2023

 

ஒவ்வொரு நாளும் சலனமில்லாத நீரோடையைப் போன்று வழக்கமான வேலைகளால் கடந்து செல்கிறது! சிலநேரங்களில் பொழுது போகாமல் இணையத்தில் ஏதாவது காணொளிகளைப் பார்த்து நேரத்தைக் கடத்துவதாக தான் இருக்கிறது!

 

வார இறுதிக்களில் மகளுடன் சேர்ந்து  சில வருடங்களுக்கு முன் வெளிவந்த திரைப்படங்களை தேர்வு செய்து  பார்த்து வருகிறேன். ஒவ்வொரு முறை பார்க்கும் போதும் ஒவ்வொரு கோணத்தில் பார்க்க முடிகிறது! எங்களுடைய அனுமானங்களையும்,  அந்தத் திரைப்படத்தின் பின்னணியில் இருக்கும் அதன் கதைகளைப் பற்றி பேசிக் கொள்வதுமாக சுவாரஸ்யமாகச் செல்கிறது!

 

அப்படித்தான் 2001ல் வெளிவந்த 'சமுத்திரம்' என்ற திரைப்படத்தை இம்முறை யூட்டியூபில் பார்த்தோம்! அண்ணன்கள் தங்கைக்காக தங்கள் சொத்துக்களை விட்டுத் தருவதும், ஒரு கட்டத்தில் புகுந்த வீட்டினர் செய்யும் கொடுமைகளை பொறுக்க முடியாத தங்கை அண்ணன்களுடன் வந்துவிடுவதாகவும், சில நாட்களுக்குப் பின்னர் தங்கையின் புகுந்த வீட்டினர் அவளிடம் மன்னிப்புக் கேட்டு சேர்வதாகவும் தான் இதுவரை டிவியில்  பார்த்திருக்கிறேன்!

 

ஆனால் இம்முறை புரொடக்‌ஷன் கம்பெனியின் சேனலிலேயே நாங்கள் பார்த்ததால் ஒரிஜினல் க்ளைமேக்ஸை தெரிந்து கொள்ள முடிந்தது! என்றாவது ஒருநாள் தங்கையின் புகுந்த வீட்டினர் அவளைப் புரிந்து கொள்வார்கள் என நினைத்துக் கொண்டு அண்ணன்களுடனேயே தன் வாழ்நாளை கடப்பதாக வருகிறது! 

 

க்ளைமேக்ஸை முதலில் இப்படி எடுக்கப்பட்டதாகவும் பின்பு சில காரணங்களால் அது மாற்றப்பட்டதாகவும் தெரிந்து கொள்ள முடிந்தது! இப்படி ஒவ்வொரு திரைப்படத்துக்குப் பின்னேயும் சொல்லப்படாத கதைகள் பல உள்ளன! பலருடைய உழைப்பில் உருவாகும் ஒரு திரைப்படத்தை சட்டென்று நாம் மதிப்பிட்டு விடுகிறோம்!!

 

******

 

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

 

நட்புடன்

 

ஆதி வெங்கட்