கதம்பம் - சிந்தனைச் சிதறல்கள் - எழுத்துப் பிழைகள் - மூன்றாம் பிறை

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.  10 ஆகஸ்ட் 2023 அன்று வெளியிட்ட பதிவிற்குப் பிறகு இங்கே பதிவுகள் வெளியிடவே இல்லை. பெரிய இடைவெளிதான். என்னாலோ, இல்லை என்னவராலோ இங்கே பதிவுகளை வெளியிட இயலவில்லை. மீண்டும் ஒரு பதிவுடன் உங்களைச் சந்திக்க இதோ வந்திருக்கிறேன்.  இங்கே தொடர்ந்து சில நாட்கள் வெளியிடப்போகும் அனைத்தும் கடந்த சில நாட்களாக, இரண்டு மாதங்களாக முகநூலில் எழுதப்பட்டவையே - இங்கே ஒரு சேமிப்பாகவும், எனது முகநூலில் என்னைத் தொடராதவர்கள் படிக்க வசதியாகவும் இங்கே பகிர்ந்து கொள்கிறேன்.   

 

இதற்கு முன்னர் வெளியிட்ட கதம்பம் பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

 

பழகும் எல்லோர் மீதும் பரிதாபப்படுவதும் ஒரு விதமான பலவீனமே! போலிகள் யாரென்று தெரியாமலேயே போய்விடும்...

 

******

 

சிந்தனைச் சிதறல்கள்!

 

இந்த மனதுக்கு தான் எத்தனை வேகம்!! நினைத்த மாத்திரத்தில் இறக்கை கட்டிக் கொண்டு பறந்து விடுகிறது! கடிவாளமில்லா குதிரையைப் போல ஒரே சமயத்தில் பல விஷயங்களுக்குத் தாவி விடுகிறது! இதனால் தான் 'மனம் ஒரு குரங்கு! மனித மனம் ஒரு குரங்கு! என்று பாடினார்களோ..🙂

 

ஆண்களால் ஒரு சமயத்தில் ஒரு விஷயத்தை பற்றி மட்டும் தான் சிந்திக்க முடியுமாம்! ஆனால் Multi tasking கொண்ட பெண்களால்  பலவித விஷயங்களை மனதில் சிந்திக்க முடியும், செயல்படுத்தவும் முடியும் என்று சொல்கிறார்கள்! 

 

அடுப்பில் தோசை வார்த்துக் கொண்டே அருகில் இருக்கும் சிங்க்கில் போட்ட பாத்திரங்களை சுத்தம் செய்து கொண்டிருப்போம்! மனதில் நாளைய திட்டமிடல்களும், இன்றைய நிகழ்வுகளின் ஓட்டமுமாக சிந்தனைகள் கிளைக்கு கிளை தாவிக் கொண்டிருக்கும்..🙂

 

நேற்றைய மாலைப் பொழுதில் நடைப்பயிற்சியை முடித்துக் கொண்டு வீட்டிற்கு வந்ததும் புழுக்கத்தினால் வியர்வை ஆறாக பெருகிக் கொண்டிருக்கும் சீதோஷ்ணத்தை நினைத்து புலம்பியவாறு, 'ஒரு மழை வந்தால் எவ்வளவு நன்றாக இருக்கும்'? என்று மகளிடம் சொல்லிக் கொண்டிருந்தேன்.

 

மழை என்றதும் 'ஹைய்யா! நாளைக்கு லீவ் விட்டுருவாங்க! என்று சொல்பவள்...! நேற்று வழக்கத்திற்கு மாறாக, மாங்கு மாங்குன்னு அசைன்மெண்ட் பண்ணியிருக்கேன்! இதை சப்மிட் பண்ணனும்! லீவெல்லாம் விட்டுடக் கூடாது! என்றாள்! அந்த சமயம் பார்த்து அத்தி பூத்தாற் போல சற்று நேரம் மழையும் வந்தது!

 

நிஜமாகவே அந்த நிமிடம் உணர்வுப்பூர்வமாக நான் சிறுபிராயத்திற்கு சென்று விட்டேன்! ஒரு மழைநாளில் மாலை வேளையில் என் பள்ளியில் இருந்ததும், மழையில் நனைந்து கொண்டே வீட்டிற்கு வந்ததும், தம்பியும் நானும் ஓடிச் சென்று கப்பல்களை ஓடும் நீரில் மிதக்க விட்டதுமாக காட்சிகள் கண்முன்னே விரிந்தன! 

 

இப்போது சொல்லுங்கள்! எத்தனை அழகான தருணங்கள் இவை! அதை  நினைத்த மாத்திரத்தில் பறந்து சென்று காட்சிகளை கண்முன்னே ஒளியிட்டுக் காண்பிக்கிறது! அந்த உணர்வை ஸ்பரிசிக்க வைக்கிறது! அந்த நேரத்தை இனிமையாக்குகிறது!

 

மனம் என்னும் மந்திரச்சாவி கொண்டு ஒவ்வொரு நாளையும் அழகாக்குவோம்!

 

&*&*&*&**&*&*

 

எழுத்துப் பிழைகள் - 15 ஆகஸ்ட் 2023

 

எத்தனையோ பேர் பாடுபட்டு போராடி பெற்றுத் தந்த சுதந்திரம்! நம்மால்  இன்று நினைத்ததை பேச முடிகிறது! எழுத முடிகிறது என்றால் அதற்குப் பின்னால் போராடியவர்கள் ஏராளம்! 

 

கிடைத்த சுதந்திரம் என்ற சொல்லைக் கூட பிழையோடு எழுதினால் என்னவென்று சொல்வது?? 

 

ஊடகங்களில் பிழைதிருத்தம் செய்யாமல் எப்படி பகிர்ந்து கொள்கிறார்கள் என்று புரியவில்லை! முதலில் யார் பகிர்ந்து கொள்கிறார்கள் என்பதில் போட்டிகள் இருக்கலாம்! கொட்டை எழுத்தில் பிழைகளை பார்க்கும் போது வேதனையாய் இருக்கிறது! வரும் தலைமுறைக்கு உதாரணமாய் இருக்க வேண்டிய ஊடகங்கள் இதை கவனிக்க வேண்டும்!

 

'செய்வன திருந்தச் செய்'! என்பதை நினைவில் கொண்டு இனி எழுத்து பிழை இல்லாமல் தமிழை எழுதவும் பகிர்ந்து கொள்ளவும் முயற்சி செய்வோம்!

 

&*&*&*&**&*&*

 

மூன்றாம் பிறை - 18 ஆகஸ்ட் 2023:

 

மூணாம் பிறை பார்த்தேன்...! என்று தொடங்கும் ஒரு பாட்டின் நாலு வரிகளை அப்பா எப்போதும் சொல்வார். 

 

பிறையைப் பார்த்ததும் நாம போட்டுண்டு இருக்கிற துணியில இருந்து ஒரு நூலை உருவிப் போட்டா புதுத்துணி கிடைக்கும்னு எங்க தாத்தா சொல்லுவா! என்று சொல்லியவாறு அப்பா தன் மேல் போர்த்திக் கொண்டிருக்கும் மேல்துண்டிலிருந்து ஒரு நூலை உருவிப் போடுவார்! இப்படி தன்  சிறுபிராயத்தில் தெரிந்து கொண்டதையெல்லாம் எனக்கும் தம்பிக்கும் கதை போல சொல்வார்!

 

இன்றைய மாலை நடைப்பயிற்சியின் போது மூன்றாம் பிறையைப் பார்த்ததும் அப்பாவுடனான நினைவுகள் மனதில் பசுமையாய் நிறைந்து நின்றது! 

 

******

 

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

 

நட்புடன்

 

ஆதி வெங்கட்