சோலோ ட்ரிப் - ஆதி வெங்கட்

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

இதற்கு முன்னர் வெளியிட்ட Sugar Cut - மலையாள குறும்படம் பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

*******

பயணங்கள் வாழ்விற்கான அனுபவங்கள் பலவற்றை தரும் என்று அடிக்கடி என்னவர் சொல்லிக் கொண்டிருப்பார்! நம்ம பதிவர் அமுதாக்கா தனித்தே காஷ்மீர் வரை செய்யும் சோலோ ட்ரிப்களை பார்த்து ஆச்சரியப்பட்டிருக்கிறேன்! சிறுவயது முதலே அப்பாவின் துணையுடனோ பின்பு என்னவரின் துணையுடனோ ஏன் மகளுடன் கூட தான் பயணம் செய்திருக்கிறேன்! 

நான் முதன்முதலில் தனித்தே பயணம் செய்தது என்றால் அது என் 22வது வயதில் டெல்லியிலிருந்து கோவை வரையிலான இரண்டு நாட்கள் மேற்கொண்ட ரயில் பயணம் தான்! அம்மா இன்னும் பத்து நாள் தான் இவ்வுலகில் இருப்பாள் என்று டாக்டர்கள் கைவிட்ட நிலையில் அம்மாவைக் காண அப்போது தனித்தே ஓடி வந்தேன்! அதன் பின்பு அம்மாவுடன் ஒன்றரை மாதங்கள் போல உடனிருந்து அவளுக்கு பணிவிடை செய்யும் வாய்ப்பை இறைவன் அருளினார்!

அன்று மேற்கொண்ட ரயில் பயணத்தில் நேரத்தை செலவிட அமரர் கல்கி அவர்களின் ‘தியாக பூமி' எனும் புத்தகம் பெரிதும் உறுதுணையாக இருந்தது! டெல்லியிலிருந்து நான் வந்து கொண்டிருந்த ரயில் மூன்று மணிநேரம் போல தாமதமானதால் அடுத்து கோவைக்கு செல்லும் ரயிலை பிடிக்க வேண்டிய பதட்டம்! அன்றைய சூழலை எளிதென கடந்து வர உதவிய மனிதர்கள் என்று சிறந்ததொரு அனுபவத்தினை பெற்றேன்!

எதற்காக இந்தக் கதைகள்?? நேற்றைய தினம் கோவையிலிருந்து திருச்சி வரை தனித்தே மேற்கொண்ட ஒரு பயணம் தந்த இனிய அனுபவத்தினை பற்றி எழுதலாம் என்று தான் துவங்கினேன்! முன்கதை சுருக்கம் அல்லது ஃப்ளாஷ் பேக் கதைகள் இல்லாமல் என் பதிவுகள் எப்போதுமே இருக்காது…:) சரி! வாங்க! 

ரயில் பயணங்களில் ஒருவருக்கொருவர் பேசி பழகி வாழ்நாள் நட்புவட்டத்தை பெற்றுக் கொண்ட நாட்கள் மறைந்துவிட்டது! அலைபேசியில் முடங்கிப் போய்விட்ட சமூகத்தில் இந்த முறை நான் செய்த ரயில் பயணத்தில் சட்டென்று ஏதோ நேற்று விட்ட உரையாடலை இன்று தொடர்வது போன்று அருவிப் பிரவாகமாய் எங்களுக்குள் பெருகிக் கொண்டிருந்தது!

திருச்சிக்கும் கோவைக்கும் இடையே செய்த ரயில் பயணம் என்பதால் திருச்சியைப் பற்றியும் கோவையைப் பற்றியும் துவங்கிய எங்கள் பேச்சு, காலநிலை, விலைவாசி, அறியப்படாத கோவில்கள் அதன் சிறப்புகள், பாடல் பெற்ற ஸ்தலங்கள், இறைவனின் அருள் என்பதாகச் சென்று கொண்டிருந்தது! நேரம் போனதே தெரியவில்லை! 

நான் திருச்சி ஜங்ஷனில் இறங்க முற்படும் போது என்னருகில் அமர்ந்திருந்த பெண்மணி என்னிடம் நானும் உங்களோடயே இறங்கிடலாம்னு தோணுது! நேரம் போனதே தெரியலை! என்றார்! அவர் அந்த ரயிலிலேயே கும்பகோணம் வரை செல்ல வேண்டியவர்! எதிர்சீட்டில் இருந்த பெண்மணி திருச்சி fort ஸ்டேஷனில் இறங்கினார்! அவர் சொன்ன தகவல்களில் இதுவரை அறியாத கோவில்களைப் பற்றி மனதில் முடிச்சிட்டுக் கொண்டேன்! நல்லதொரு இனிய பயணமாக இருந்தது!

திருச்சி ஜங்ஷனில் இறங்கியதும் வாயிலில் இருந்த A2B உணவகத்தை நோக்கி தான் சென்றேன்! காலையில் கோவை ரயில்நிலையத்தில் 50ரூ கொடுத்து வாங்கிய 3 இட்லிகளும் 1வடையும் கொண்ட பொட்டலத்தை 8மணி போல ரயிலில் சாப்பிட்டேன்! இப்போது மதியமாகி விட்டது! 

‘நான் ஒண்ணும் சமைச்சு வைக்கல! இருந்த மாவில் தோசை வார்த்து சாப்பிட்டுட்டு ஆபீஸுக்கு வந்துட்டேன்! நீ வரும் போது A2B ல சாப்பிட்டுட்டு வீட்டுக்கு போ! என்று என்னவர் அனுப்பியிருந்த மெசேஜை பார்த்தேன்! சரி! இதுவும் ஒரு அனுபவம்! ஹோட்டலுக்கெல்லாமும் தனித்து சென்று எனக்காக ஆர்டர் செய்ததில்லை..🙂

உடமைகளையும் எடுத்துச் சென்று ஒரு இருக்கையில் அமர்ந்தேன்! என்ன இருக்கு? என்று சர்வரைக் கேட்க, அந்த நேரத்தில் டிபன் ஐயிட்டங்கள் குறைவாகத் தான் இருந்தது! அவர் சொல்லிச் சென்றதில் தோசை வெரைட்டிகளில் சாதா, பொடி, மசாலா என்றதும் அதற்குமேல் அவரை நான் பேச விடவில்லை..🙂 ஒரு மசால் தோசை! என்றேன்..🙂 எங்கு சென்றாலும் நான் என்ன ஆர்டர் செய்வேன் என்று என்னை அறிந்தவர்களுக்குத் தெரியும்..🙂

சூடான மசால் தோசையை விள்ளல்களாக எடுத்து சட்னி, சாம்பாருடன் ரசித்து சாப்பிட்டேன்! ஏதாவது குடிக்கலாமே என்று தோன்றவே, மில்க்‌ஷேக் ஏதாவது இருக்கா? என்று சர்வரைக் கேட்டதும் காபி, டீ, சூடான பாதாம் மில்க் தான் இருக்கு என்றார்! சரி! சூடா பாதாம் பால் கொண்டு வாங்க என்று சொல்லி டபரா டம்ளரில் வந்ததை ஆற்றி சிறிது சிறிதாக ருசித்தேன்! பில்லை கொண்டு வரச் சொல்லிவிட்டு வீட்டுக்கு செல்வதற்காக Red taxiயும் அங்கேயே புக் செய்து கொண்டேன்!

இந்தப் பயணத்தை அசை போட்டுப் பார்த்தால் என்னை நினைத்து எனக்கே மிகுந்த ஆச்சர்யமாக இருந்தது! நிர்பந்தமோ, கட்டாயமோ, சூழலோ வாழ்வில் ஒவ்வொரு நாளும் கிடைக்கும் அனுபவங்கள் நிச்சயம் நமக்கான பக்குவத்தை தந்து மெருகேற்றும் என்பது உறுதி என்பதை புரிந்து கொண்டேன்! சந்திக்கும் மனிதர்களால் நட்பு மட்டுமல்ல பாடங்களும் பெறலாம்!

பின்குறிப்பு:-

படத்தில் இணைத்திருக்கும் முல்லைச்சரம் நான் ரயில் பயணத்தில் வாங்கியது தான்! வட்டமாக சுற்றி வைத்திருக்கும் இரண்டு முழம் முல்லைசரத்தின் விலை 50ரூ. அந்த அண்ணா ‘இத உடனே உபயோகிச்சுடுங்க! காசு ஏதும் தர வேணாம்! என்று இன்னும் மூன்று முழ முல்லைச்சரத்தையும் என்னிடம் கொடுத்தார்!

******

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

ஆதி வெங்கட்

திருவரங்கம்

11 ஜூலை 2026