நம்மால் முடிந்ததைச் செய்வோம்…

கடந்த வியாழன் அன்று புல்வாமா, ஜம்மு காஷ்மீரில் நடந்த தாக்குதலில் உயிரிழந்த நமது சகோதரர்களுக்கு அஞ்சலி செலுத்துவோம்.

 

கணவனை இழந்து தவிக்கும் மனைவி, அப்பாவை இழந்து தவிக்கும் மகன், மகனை இழந்து தவிக்கும் பெற்றோர்கள் என ஒவ்வொரு குடும்பமும் கண்முன்னே வந்து போகிறது.

எதற்கு இத்தனை காழ்ப்புணர்வு – அரசியல் – உயிரிழப்பு? 

எத்தனை தான் வேறுபாடுகள் இருந்தாலும், அடுத்தவருடைய உயிரைப் பறிக்க ஒருவருக்கும் உரிமை இல்லை.

இந்த சமயத்தில் நம்மால் இயன்ற உதவியைச் செய்யலாம். உயிரிழந்த CRPF ஜவான்களுக்கு உதவி செய்ய நினைப்பவர்கள் மத்திய உள்துறை அமைச்சகத்தின் ஒரு தளத்தின் மூலம் உதவலாம். இந்த தளம் பற்றி பலரும் அறிந்திருக்க வாய்ப்பில்லை.  அதனால் தான் இங்கே பகிர்ந்து கொள்கிறேன். அந்த தளம் கீழே….

BHARAT KE VEER

அத்தளத்தில் இருவித வசதிகள் உண்டு – ஏதேனும் ஒரு உயிரிழந்த வீரரின் குடும்பத்திற்கு உதவலாம் – அல்லது அந்த நிதியில் உங்கள் சிறுதுளியைச் சேர்க்கலாம். ஒரு உயிரிழந்த வீரரின் குடும்பத்திற்கு 15 லட்சம் வரை தருகிறார்கள். மேலகதிக விவரங்கள் இத்தளத்தில் உண்டு. அதன் மூலமாகவே நிதி உதவி செய்ய முடியும். நீங்கள் கொடுக்கும் நிதிக்கு வரிவிலக்கு உண்டு. இத்தளத்தின் மூலம் நம் நாட்டின் பாதுகாப்புப் பணியில் உயிர் நீத்த Assam Rifles, BSF, CISF, CRPF, ITBP, NDRF, NSG மற்றும் SSB ஆகிய எட்டு படைகளைச் சேர்ந்த வீரர்களின் குடும்பத்திற்கு உதவி செய்கிறார்கள்.

நமது இராணுவ வீரர்களின் குடும்பத்திற்கு உதவி செய்ய இதைப் போலவே Army Welfare Fund Battle Casualties என்ற ஒரு வசதியும் இருக்கிறது.  அந்த நிதிக்கு உங்களால் ஆன தொகையினை அனுப்ப முடியும். அதன் தகவல்கள் கீழே உள்ள பக்கத்தில் இருக்கிறது.

https://www.syndicatebank.in/Announcement/Army_Battle_Casualties.pdf

நாட்டின் பாதுகாப்பு பணியில் ஈடுபட முடியாத நம்மால், அப்படி பணி செய்து, அதில் உயிரிழக்கும் வீரர்களின் குடும்பத்தினருக்கு உதவி செய்வது நிச்சயம் முடியும். என்னால் முடிந்த உதவியை, இத்தளத்தின் மூலம் பணமாக அனுப்பி விட்டேன். சிறு துளி பெரு வெள்ளம் என்பதை நினைவில் கொள்வோம். என்னதான் தனியார் நிறுவனங்கள் மற்றும் சில அரசு சாரா குழுக்கள் இப்படி நிதியை வழங்குகிறோம் என்று சொல்லி பணம் வசூலித்தாலும், அரசு மூலம் உதவி செய்வது நல்லது. பல நிறுவனங்கள்/குழுக்கள் இப்படி பணம் வசூலித்து மோசடி செய்வது நிறையவே நடக்கிறது.

இந்தத் தகவல்களை இங்கே தருவது தெரியாதவர்களுக்கு இந்தத் தகவலைத் தெரிவிக்க மட்டுமே. யாரையும் கட்டாயப்படுத்தவோ, இதில் எந்த அரசியல் நோக்கமோ இல்லை என்பதையும் இங்கே குறிப்பாகச் சொல்லி விடுகிறேன். முதலாம் தளத்தின் செயல்பாடுகள், எந்த வீரருக்கு எவ்வளவு பணம் சேர்ந்திருக்கிறது என்பதை முழுவதுமாக தளத்திலேயே பார்க்க முடியும் என்பது கூடுதல் வசதி.

மீண்டும் இறந்த சகோரர்களுக்கு எனது அஞ்சலி. அவர்களது குடும்பத்தினருக்கு ஆழ்ந்த அனுதாபங்கள்...... 

நாளை வேறு ஒரு பதிவுடன் சந்திப்போம்...

என்றென்றும் அன்புடன்

வெங்கட்

புது தில்லி.