கதம்பம் – தேன் நெல்லி – அப்பா சொல்லே வேதம் – கட்டபொம்மன் – பாலங்கள் – சிமிலி உருண்டை

சாப்பிட வாங்க – தேன்நெல்லியும் நீர்நெல்லியும் – 4 February 2019

நெய்வேலிக்குச் சென்று தன் தோழமைகளைப் பார்த்து வரச் சென்ற என்னவரிடம், கல்லூரித் தோழி ஒருவர் தன் வீட்டு தோட்டத்திலிருந்து  நெல்லிக் காய்களையும், எலுமிச்சம் பழங்களையும் கொடுத்து விட்டிருந்தார்.

உறவுகளுக்கும், குடியிருப்பில் இருப்பவர்களுக்கும் பங்கீடு செய்து கொடுத்தோம். எலுமிச்சம்பழங்களை சற்றே பழுக்க வைத்து விட்டு, நெல்லிக்காய்களை சுத்தம் செய்து தேன்நெல்லியும், வெந்நீரில் உப்பும், மஞ்சளும் சேர்த்து நீர்நெல்லியும் செய்தேன்.

அப்பா சொல்லே வேதம் – 14 ஃபிப்ரவரி 2019

அப்பா சொல்லுக்குத் தான் எவ்வளவு சக்தி!! அம்மா காட்டுகத்தலாக பலமுறை சொன்னாலும் காதிலேயே வாங்காத மகள், அப்பா சொன்னதும் அதை செவ்வனே செய்து முடிக்கும் மாயமென்ன!!!

வாரத்தில் இரண்டு நாளாவது வாசலில் கோலம் போட்டு பழகும்மா! எப்படியிருந்தாலும் பரவாயில்லை. யார் என்ன சொல்லப் போறாங்க! என்று மகளிடம் பலமுறை சொல்லியிருக்கேன். ம்ம்ம்ஹும்!! ஒண்ணும் செல்லுபடியாகலை :))

இம்முறை ஊருக்கு வந்த அப்பா!! "அம்மாவுக்கு ஹெல்ப் பண்ணும்மா!! உடம்பு சரியில்லன்னாலும் அம்மாவே தானே செய்யறா!!! வீட்டுவேலைகளும் சீக்கிரம் கத்துக்கோ!! வாசலில் தினமும் கோலம் போட்டு ஃபோட்டோ எடுத்து வாட்ஸப்ல அப்பாவுக்கு அனுப்பி விடு!! அப்பா பார்க்கிறேன் என்று அறிவுரைகள் சொல்லிச் சென்றுள்ளார் :)

அதனால் அன்றாடம் கோலம் போடும் வேலை சிறப்பாக நடக்கிறது :) அம்மா கண்ணுக்குள் வைத்து வளர்த்தாலும் மகள்களுக்கு அப்பா மீது தான் பாசம் அல்லவா!!

அப்பாவுக்கு அழுகை பிடிக்காது என்று கட்டுப்படுத்திக் கொண்டு, கிளம்பிச் சென்றதும் இந்த பதினான்கு வயது குழந்தை என் தோளின் மீது சாய்ந்து தேம்பித் தேம்பி அழுகிறாள்..அன்று சமாதானம் செய்யவே நெடுநேரம் ஆனது.

அப்பாவோ தன் பாசத்தை வெளிக்காட்டிக் கொள்ளாமல், மனதிலேயே குழப்பங்களுடன் கிளம்பிச் செல்கிறார்.

நானும் என் அப்பாவை நினைத்து தவிக்கும் மகள் தானே!!!!

சிமிலி உருண்டை எனும் எள்ளுருண்டை – 13 February 2019

மகளுக்கு மிகவும் பிடித்த எள்ளுருண்டை!!! பாகு எல்லாம் செய்யாமல் எள்ளை வறுத்து, வெல்லத்தையும் பொடித்து மிக்சியில் விட்டு விட்டு அரைத்தால் ஆச்சு!!

படித்ததில் பிடித்தது - பாலங்கள் – 14 February 2019

எனக்கு மிகவும் பிடித்த புத்தகங்களுள் ஒன்று. மனதில் பதிந்து போன கதை. வாடகை நூலகத்தில் எடுத்து நான்கு நாட்களுக்குள் வாசித்து மனமில்லாமல் திருப்பித் தந்தேன்.

சமீபத்தில் என் மாமா பெண்ணிடமிருந்து அலைபேசியில் அழைப்பு. அக்கா! புத்தக கண்காட்சியில் இருக்கிறேன்! உங்களுக்கு என்ன வேண்டும் என்றாள்!! வேண்டாமென மறுத்தும், வற்புறுத்திக் கேட்டாள். உடனே என் மனதில் முதலில் தோன்றியது இந்த புத்தகமே!! எனக்காக வாங்கி வைத்திருக்கிறாள். விரைவில் என் கைகளில் கிடைக்கப் போகிறது. நிதானமாக வாசிக்க வேண்டும்.

ரோஷ்ணி கார்னர் – 14 ஃபிப்ரவரி 2019

மகளின் Social Studies பாடத்திற்கான ஒரு Activity – கட்டபொம்மன் பற்றி எழுத வேண்டியிருந்தது. வீரபாண்டிய கட்டபொம்மன் படத்தினை கத்தரித்து ஒட்டுவதற்கு பதில் அவளே வரைந்தாள் – அந்தப் படம் கீழே….

என்ன நண்பர்களே, இந்த நாளில் பகிர்ந்து கொண்ட கதம்பம் பதிவு உங்களுக்குப் பிடித்திருக்கிறதா? பின்னூட்டத்தில் சொல்லுங்களேன்....

நட்புடன்

ஆதி வெங்கட்