காஃபி வித் கிட்டு – பிறந்த நாள் – ரோட்டல் – குடிபோதை

காஃபி வித் கிட்டு – பகுதி – 40

அனைத்து பதிவுலக நண்பர்களுக்கும் இனிய காலை வணக்கம். இன்றைய பொழுதை ஒரு இனிமையான வாசகத்துடன் ஆரம்பிக்கலாம்.

இந்த வாரத்தின் ரசித்த வாசகம்:

எனக்கு ஒரு பிரச்சனை என்று ஒரு போதும் சொல்லாதீர்கள். பிரச்சனை என்று சொன்னாலே கவலையும் பயமும் கட்டாயம் கூடவே வரும்… எனக்கு ஒரு சவால் என்று சொல்லிப் பாருங்கள், தைரியமும் தன்னம்பிக்கையும் தானாகவே வரும்.

பிறந்த நாள் – மறக்க முடியாத தோழி:

கல்லூரியில் உடன் படித்தது மூன்றே வருடங்கள் என்றாலும் கல்லூரிப் படிப்பு முடிந்து, அவரவர் திருமணம் முடிந்தும் தொடர்ந்த நட்பு அந்தத் தோழியுடனானது. தோழி மட்டுமல்லாது அவருக்கு வந்த கணவரும், என்னுடன் நட்பு பாராட்டியவர். இதே நாளில் தான் தோழியின் பிறந்த நாள் – எத்தனை வருடங்கள் தொடர்ந்து வாழ்த்துச் செய்தியை அனுப்பி இருக்கிறேன் – வாழ்த்து அட்டையாகவோ, அல்லது குறுஞ்செய்தியாகவோ அல்லது அழைப்பின் மூலமாகவோ. இன்று அவர் பிறந்த நாள் என்றாலும் அவருக்கு வாழ்த்துச் சொல்ல முடியாத நிலை! ஏனெனில் காலன் அவரை விட்டு வைக்க வில்லை. நல்ல மனதுடைய அந்தத் தோழிக்கு அப்படி ஒரு பிணி வந்திருக்க வேண்டாம் – தொண்டையில் கான்சர். இறப்பதற்கு இரண்டு நாட்கள் முன்னர் கூட நான் அவரிடம் பேசி இருக்கிறேன். அவரால் என்னிடம் பேச முடியவில்லை – வெறும் அழுகை சப்தம் மட்டுமே என்னால் கேட்க முடிந்தது. பேச முடியாமல், தனது நிலையைச் சொல்ல முடியாமல் அவர் புண்பட்ட தொண்டையிலிருந்து புறப்பட்ட அழுகைக் குரல் என் உயிர் உள்ளவரை மறக்காது…

ஹோட்டல் தெரியும் அது என்ன ரோட்டல்:

பயணம் நல்லது ஆதலினால் பயணம் செய்வீர் அப்படின்னு அடிக்கடி சொல்வது எனது வழக்கமாச்சே… பயணம் பற்றிய கட்டுரைகளும் படிப்பது பிடிக்கும். சமீபத்தில் அப்படி படித்த ஒரு கட்டுரை தான் இந்த ரோட்டல் பற்றியது. ரோட்டல் என்பது பேருந்திலேயே இருக்கும் ஹோட்டல் – 20 முதல் 40 பேர் வரை இதில் பயணிக்கலாம். பேருந்தில் படுக்கை வசதி, பாத்ரூம் வசதி, சமையலறை வசதி என அனைத்தும் உண்டு. சமீபத்தில் ஜெர்மனியிலிருந்து புறப்பட்டு இத்தாலி, க்ரீஸ், துருக்கி, துர்க்மெனிஸ்தான், பாகிஸ்தான் வழியாக இந்தியாவின் ஜெய்பூர் வந்திருக்கிறார்கள். இங்கிருந்து சென்னை மற்றும் கோவா சென்று பிறகு அங்கிருந்து விமானம் வழியே ஜெர்மனி செல்லப் போகிறார்கள். போதிய வசதிகள் இன்றி நம் ஊரிலிருந்து பேருந்திலேயே பதினைந்து, இருபது நாள் என வட இந்திய பயணம் வருபவர்களையும் இங்கே நினைக்கத் தோன்றுகிறது. முழுக்கட்டுரையும் இங்கே வாசிக்கலாம்!

குடிபோதையிலும் நமஸ்தே சாப்:  

எங்கள் குடியிருப்பில் காவலாளியாக இருந்த ஒரு நேப்பாளி. இங்கே காவலாளியாக இருந்த வரை எனக்குத் தேவையில்லாத பொருட்களையும், உடைகளையும் அவருக்குத் தருவதை வழக்கமாக வைத்திருந்தேன் – அவருக்குப் பயன்படும் என்பதால். சில மாதங்களாக அதீத குடிபோதை என்பதால் குடியிருப்பிலிருந்து வெளியேற்றிவிட்டார்கள். குடித்து விட்டு ஒரே கலாட்டா செய்வதோடு சின்னச் சின்ன சண்டை சச்சரவுகளும் செய்து வந்தார். நேற்று வீட்டிலிருந்து பால் வாங்கலாம் என கீழே இறங்க குடியிருப்பு வளாகத்தில் வாயிலில் இப்போதைய நேப்பாளி காவலாளியுடன் முரண்டு பிடித்துக் கொண்டிருந்தார். நல்ல போதையில் உடையெல்லாம் அழுக்கு, முகத்தில் கீழே விழுந்தோ, இல்லை சண்டையிலோ அடிபட்டுக் கொண்டு இரத்தம் வடிந்து கொண்டிருந்தது.

என்னைப் பார்த்தவுடன் “நமஸ்தே சாப்… என்னை மறந்துட்டீங்களா? என்று கையைக் கூப்பி தள்ளாடியபடியே வந்தவரிடம் ஏதுவும் பேசாமல், சைகையாலேயே போகும்படிச் சொல்லி கடந்தேன். பால் வாங்கிக் கொண்டு திரும்பி வருகையிலும் அவரைப் பார்த்தேன் – வருபவர்கள் அனைவரிடத்திலும் தொடர்பில்லாமல் பேசிக் கொண்டிருந்தார் – இன்னும் நிறைய முறை கீழே விழுந்திருப்பார் போலும் – சட்டை முழுக்க சேறு – அது நான் கொடுத்த சட்டை என்பதை சேற்றைத் தாண்டியும் தெரிந்து கொள்ள முடிந்தது! என் வீட்டின் கீழே இருக்கும் வீட்டிற்கு வந்து அந்த வீட்டுப் பெண்மணியிடம் பேசிக் கொண்டிருந்தார் – அவரும் மிரட்டிக் கொண்டிருந்தார் – “நீ ஒரு நிலையில இல்ல, ஒழுங்கா இங்கேயிருந்து புறப்பட்டு உன் இருப்பிடத்திற்குப் போகிறாயா இல்லை காவல் துறையினரைக் கூப்பிடவா” என்று!

குடியிருப்பின் இப்போதைய காவலாளி அவரை நெட்டித் தள்ளிக்கொண்டு செல்வதை என் வீட்டிலிருந்து பார்க்க முடிந்தது.  குடிபோதை ஒருவரை என்னவெல்லாம் செய்கிறது… அவருடைய குடும்பத்தின் நிலை நினைத்து வருத்தம் மட்டுமே மிஞ்சுகிறது.

இந்த வாரத்தின் ரசித்த பாடல்:

இந்த வாரத்தின் ரசித்த பாடலாக ஒரு கன்னட திரைப்படப் பாடல். பாடல் மட்டுமே கேட்க வசதியாக காட்சி இல்லாத காணொளியைத் தேடி இங்கே தந்திருக்கிறேன் – காட்சியுடன் பார்த்து நான் கொஞ்சம் அதிர்ந்ததால்! விருப்பம் இருந்தால் இந்தப் பாடலை யூவில் காட்சியுடன் பார்த்து ரசிக்கலாம்! அது உங்கள் இஷ்டம்… பின் விளைவுகளுக்கு கம்பெனி பொறுப்பல்ல!

பின்னோக்கிப் பார்க்கலாம் வாங்க:

2013-ஆம் ஆண்டு இதே நாளில் பகிர்ந்து கொண்ட ஒரு பதிவு என்ன தெரியுமா? 1957-ஆம் ஆண்டின் கல்கி தீபாவளி மலரில் வெளிவந்த சில விளம்பரங்கள் தான். தில்லி தமிழ் சங்கத்தின் நூலகத்திலிருந்து எடுத்து வந்து அவற்றின் படங்களை இங்கே பகிர்ந்திருந்தேன். அந்தப் பதிவில் கருத்துரைத்த பலர் இப்போது பதிவுலகில் இல்லை என்பதும் வருத்தம் தரும் விஷயம். பதிவை பார்க்காதவர்கள் பார்க்க ஏதுவாய் சுட்டி கீழே…

28 ரூபாய்க்கு காமெரா…

நண்பர்களே, இந்த வாரத்தின் காஃபி வித் கிட்டு பதிவு பற்றிய உங்கள் கருத்துகளைச் சொல்லுங்களேன். விரைவில் வேறு சில செய்திகளோடு மீண்டும் ச[சி]ந்திப்போம்….

 

நட்புடன்

வெங்கட்

புது தில்லி