காஃபி வித் கிட்டு - 130 - கூட்டுக் குடும்பம் - நகோடி ஹல்வா - Language of Humanity - துக்கத்தில் முடிவு - வாழ்க்கை - சிவப்பு - காது

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

நேற்று வெளியிட்ட பொண்ணு மாப்பிள்ளை லேட் எண்ட்ரி பதிவை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

GOOD BEHAVIOUR DOESN’T HAVE ANY MONETARY VALUE; BUT, IT HAS THE POWER TO PURCHASE MILLION HEARTS. 

******

பழைய நினைப்புடா பேராண்டி: கூட்டுக் குடும்பத்தை இழந்தோமா?

2011-ஆம் ஆண்டு இதே நாளில் வெளியிட்ட பதிவு - கூட்டுக் குடும்பத்தை இழந்தோமா?

பதிவிலிருந்து சில வரிகள் இங்கே! முழு பதிவினையும் படிக்க, மேலே உள்ள சுட்டியைச் சொடுக்கலாம்! 

சரி என்னை யோசிக்க வைத்த அந்த நிகழ்ச்சிக்கு வருகிறேன்.  அலுவலகத்தில் இருக்கும் ஒரு சக ஊழியர், தனது உத்திரப் பிரதேச கிராமத்தினை விட்டு, மனைவி மற்றும் ஒன்றரை வயது சிறு மகனுடன் தில்லி வந்து வசித்துக் கொண்டிருக்கிறார்.  அவரது தாய்-தந்தை கிராமத்தில் இருக்கிறார்கள். 

சென்ற மாதத்தில் ஒரு ஞாயிறு அன்று மனைவி வழக்கம் போல் சில காலை வேலைகளை செய்து  விட்டு துவைத்த துணிகளை  காயப் போட்டு அதற்கு கிளிப் போடாமல் சமையல் வேலை செய்யப் போய் இருக்கிறார்.  ஹாலில் இப்போது தான் தவழ்ந்து போய்  எதையாவது பிடித்து எழுந்து நிற்கத் தொடங்கிய தன்னுடைய குழந்தையுடன் விளையாடிக் கொண்டிருந்திருக்கிறார் நண்பர். 

அப்போது மனைவி சமையலறையிலிருந்து “வெளியில் காற்று பலமாக அடிக்கிறது, கிளிப் வேறு போடவில்லை, நீங்கள் கொஞ்சம் போட்டு விடுங்கள்” என்று கணவரிடம் சொல்ல, அவரோ குழந்தை விளையாடிக்கொண்டு தானே இருக்கிறான் என்று  வெளியே சென்று கிளிப் போட்டுக்கொண்டிருக்க, சில வினாடிகளில் வீட்டினுள் இருந்து பலமான சத்தம்.  உள்ளே விரைந்து வந்து பார்த்தால்…

******

இந்த வாரத்தின் உணவு - நகோடி ஹல்வா - (B)பேட்மி பூரி :

சில நாட்களுக்கு முன்னர் பழைய தில்லியின் சாவ்டி பஜார் பகுதியில் அமைந்திருக்கும் ஷ்யாம் ஸ்வீட்ஸ் கடைக்குச் சென்றிருந்தேன்.  சனிக்கிழமை அன்று காலை மெதுவாக எழுந்திருந்ததால் சமைக்க பொறுமை இல்லை.  தில்லி மெட்ரோ இருக்க கவலை ஏன்? நேராக சாவ்டி பஜார் மெட்ரோ இரயில் நிலையத்தில் இறங்கி பொடி நடையாக ஷ்யாம் ஸ்வீட்ஸ் கடைக்குச் சென்று சேர்ந்தேன். மிகவும் பழமையான கடை - நூறு வருடங்களுக்கும் மேலாக அந்தப் பகுதியில் இருக்கும் கடை அது.  சிறு கடை தான். வெளியே நின்று கொண்டு சாப்பிட வசதி உண்டு என்றாலும் மிகவும் கூட்டமாக இருக்கும் இடம்.  கொஞ்சம் ஏமாந்தால் சாலையில் செல்லும் வாகனம் உங்கள் மீது மோதி விடக் கூடும்!  அதனால் காத்திருந்து இடம் பிடித்து, உங்களுக்குத் தேவையானதைச் சொன்னால் சிப்பந்தி கொண்டு வந்து தந்து விடுவார்.  அங்கே மிகவும் பிரபலமான உணவு என்றால் Bedmi Poori மற்றும் Nagori Halwa!  Lussi-உம் அங்கே பிரபலம்.  இன்னும் நிறைய உணவு வகைகள் உண்டு. 

பானிபூரியை விட கொஞ்சம் பெரிதான பூரிக்குள் ஹல்வா வைத்து சாப்பிட வேண்டும்.  Bedmi Poori உடன் இரண்டு மூன்று வித தொட்டுக்கைகள் தருவார்கள் - அதில் ஒன்று மஞ்சள் பூசணி/பரங்கிக்காய் கொண்டு செய்யப்படும் தொட்டுக்கை - தித்திப்பாக இருக்கும்! வித்தியாசமான உணவுகளைச் சுவைப்பதில் ஆர்வம் இருப்பவர்கள் இந்த உணவு வகைகளைச் சுவைக்கலாம்.  எப்படிச் செய்வது, என்ன சேர்ப்பார்கள் என்றெல்லாம் தெரிந்து கொள்ள நினைத்தால், இணையத்தில் இதற்கான செய்முறைகள் கொட்டிக் கிடக்கின்றன.  பார்த்து தெரிந்து கொள்ளலாம்! இங்கே நான் சாப்பிடுவதற்கு முன்னர் உணவை படமாக எடுத்ததை உங்களுடன் பகிர்ந்து கொண்டு இருக்கிறேன். சுவைக்க முடியாதவர்கள், பார்த்து ரசிக்கலாம்! பூரியுடன் ஹல்வா - என்ன Combination இது என சிலர் நினைக்கக் கூடும்! ஒரு மாதிரி குண்ட்சான சுவையாகவே இருக்கும்! :) 

******

இந்த வாரத்தின் காணொளி - Language of Humanity :

சமீபத்தில் பார்த்து ரசித்த ஒரு காணொளி/விளம்பரம் Tata Harrier விளம்பரம்.  நன்றாகவே இருக்கும் விளம்பரம். பாருங்களேன்.

மேலே உள்ள காணொளியைப் பார்க்க இயலவில்லை எனில் கீழே உள்ள இணைப்பு வழியேயும் பார்க்கலாம். 

Harrier | Language of Humanity #AboveAll - YouTube

******

இந்த வாரத்தின் அறிவுரை - துக்கத்தில் முடிவு எடுக்காதீர்கள் :

"துக்கமான சூழலில் நீங்கள் என்ன முடிவு எடுத்தாலும் அது மீண்டும் உங்களை துக்கத்தில் தான் கொண்டு போய் விடும் "

இதை உங்கள் வாழ்க்கையில் ஒரு அடிப்படையான பாடமாக வைத்து கொள்ளுங்கள்.

ஏனென்றால் மனநிலை சரியில்லாத துக்கமான நேரத்தில் எந்த முடிவையும் அவசரப்பட்டு எடுக்காதீர்கள்.

அது போன்ற நேரங்களில் இறைவனை மனதில் நினைத்து கொண்டு அமைதியாக தியானம் செய்யுங்கள் அல்லது நன்றாக சாப்பிட்டு விட்டு உறங்கி விடுங்கள்.

மேலே உள்ள அறிவுரையைச் சொன்னது யார் என்று உங்களால் சொல்ல முடியுமா?  முடிந்தால் சொல்லுங்களேன்! 

******

இந்த வாரத்தின் வாட்ஸப் நிலைத்தகவல் - துக்கத்தில் முடிவு எடுக்காதீர்கள் :

******

இந்த வாரத்தின் நிழற்படம் - சிவப்பு :

சமீபத்தில் எடுத்த ஒரு நிழற்படம்...

******

இந்த வாரத்தின் ரசித்த கவிதை - காது :

சமீபத்தில் முகநூலில் படித்து ரசித்த ஒரு கவிதை, உங்கள் பார்வைக்கு - நீங்களும் ரசிக்க!  கவிதையை விட படம் இன்னும் அதிகம் ரசித்தேன்! 

அற்புதமான காது

அந்தக் குரங்கு

எங்கேயோ பார்த்தபடி 

ஒரு பாறை மீது அமர்ந்திருந்தது 

அது நோக்கிய தூரத்தில் 

தழை கடித்துக் கொண்டிருந்தது ஆடு

அந்த வேலி முழுக்க இலைகள் 

ஆட்டின் தாடைகள் அசைவதைக் கண்டு

குரங்கின் கண்கள் சிரித்தன

அதன் முகத்தில் புன்னகை நிரம்பியது

திருவிளக்கு ஒன்றிலிருந்து

நின்றெரியும் சுடரைப்போல் 

அதில் ஒளி கூடியது

நான் நெகிழ்ந்த கணங்கள் பலவுண்டு

அதில் இதுவும் ஒன்று 

அந்தக் குரங்குக்கு 

விரிந்த பூவரசம்பூவைப்போல் காது 

அந்தக் காதில் என் மனக்குரல் கேட்டிருக்கும் தானே.

- மௌனன் யாத்ரீகா (PC: Suresh Suriya)

******

இந்த வாரத்தின் காஃபி வித் கிட்டு பதிவு குறித்த தங்களது எண்ணங்களை பின்னூட்டம் வாயிலாக சொல்லுங்களேன்.  மீண்டும் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

புது தில்லியிலிருந்து….