வாசிப்பனுபவம் - இரா. அரவிந்த் - வலிமைக்கான நாற்பத்து எட்டு விதிகள் - தொடர் - விதி ஐந்து

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

 

நேற்று வெளியிட்ட நந்தி குண்ட் நிழற்பட உலா பதிவை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

 

EVERY CLOSED EYE IS NOT SLEEPING AND EVERY OPEN EYE IS NOT SEEING.

 

******

 

வலிமைக்கான நாற்பத்து எட்டு விதிகள் - தொடர் - விதி ஐந்து

 

வலிமைக்கான நாற்பத்து எட்டு விதிகள் - தொடர் - முந்தைய பகுதிகளுக்கான சுட்டிகள் கீழே!

 

அறிமுகம் ;  விதி ஒன்று ; விதி இரண்டு ; விதி மூன்று ; விதி நான்கு ;

 

என் வாழ்வை வளமாக்கும் நண்பர்கள் எல்லோருக்கும் உற்சாகம் கலந்த வணக்கங்கள். 

 

திரு "ராபர்ட் கிரீன்" அவர்களின் "48 Laws of Power" நூலில் விளக்கப்பட்டுள்ள அடுத்த விதியை இப்போது சுவைக்கலாமா? 

 

ஐந்தாம் விதி சொல்வது, "உன் மீதான உயர் பிம்பத்தை, உன் உயிரினும் மேலானதாக மதித்துக் காத்துக்கொள்". 

 

மூல நூலில், இதை "SO MUCH DEPENDS ON REPUTATION GUARD IT WITH YOUR LIFE" என்கிறார் எழுத்தாளர். 

 

சென்ற பகுதியின் இறுதியில் எழுந்த கேள்விக்குப் பதிலாக இவ்விதி சொல்வது, நாம் உருவாக்கியுள்ள நற்பெயரே, நம் பேச்சின் மீதான மதிப்பையும் கவனத்தையும் உருவாக்கும் என்பதே. 

 

ஆரம்பக்கட்ட மாணவர்கள், தத்தம் குருக்களிடமோ, மேலாளர்களிடமோ, முதல் விதியில் சொல்வதுபோல், அடக்கமுடன் கற்று, குருவின் வளர்ச்சிக்குத் துணை நிற்பதின் மூலம், தம் நற்பெயரை படிப்படியாக உருவாக்குவதே சிறப்பான தொடக்கம். 

 

இங்ஙனம், நம் ஒவ்வொரு செயலும், பிறர் கவனத்தைக் கவரும் வண்ணம் அமைவதே, நம் மீதான உயர் பிம்பத்தை சிறிதுசிறிதாக உருவாக்கும் வழியாகும். 

 

ஒரு சிறு தவறு கூட,  அத்தகைய பிம்பத்தைச் சுக்குநூறாக உடைத்துவிடும் என்பதையும், அதை மீளுருவாக்க பல ஆண்டுகள் கூட ஆகும் என்பதையும் மனதில் கொள்ளவேண்டும். 

 

உதாரணமாக, பல்திறன் பேசிகளின் முன்னோடியான ஐஃபோன்களின் விலை அதிகமாக இருப்பினும், உயர்தட்டு மக்கள் வாங்குவதற்கான காரணம், அதில் உள்ள பாதுகாப்பு அம்சங்களே. 

 

இந்த நம்பிக்கையை தவிடுபொடியாக்கியது, இஸ்ரேலிய நிறுவனமான "NSO" உருவாக்கிய பெகஸஸ் வைரஸ் விவகாரம். 

 

இதனால் ஏற்பட்ட களங்கத்தைத் துடைக்க, ஆப்பிள் நிறுவனம், தன் அடுத்த இயங்குதளத்தில் "Lockdown mode " வசதியை அறிமுகப்படுத்த உள்ளதாகவும், இதன் பாதுகாப்பு அம்சங்களை உடைப்போருக்குப் பெறும் தொகையைப் பரிசளிப்பதாகவும் துணிச்சலுடன் கூறியுள்ளது. 

 

இருப்பினும், வாடிக்கையாளர்களின் பழைய நம்பிக்கையைப் பெற, ஆப்பிள் தொடர்ந்து பல்லாண்டுகள் பாடுபட வேண்டியிருக்கும் என்பதில் ஐயமே இல்லை. 

 

பிறர் கண்ணோட்டத்தில் நம் பிம்பம் உயர, நம்மைப் பணக்காரராகக் காட்டிக்கொள்வதோ, தெரியாததையும் தெரிந்ததுபோல் காட்டிக்கொள்வதோ, நாளடைவில் நம்மை பெரும் கடனாளியாகவும், எதிரிகளால் சூழப்பட்டவர்களாகவுமே மாற்றிவிடும் என்பதையும் இவ்விதியைக் கைகொள்வோர் மனதில் கொள்ளவேண்டும். 

 

இதற்கான உதாரணமாக, தம் ஆடம்பர  வாழ்க்கையை வெளிப்படையாகக் காட்டியதால், பலர் நிந்தனைக்குள்ளான கிங்ஃபிஷ்ஷர் உரிமையாளர், திரு விஜய் மல்லையா அவர்களைக் குறிப்பிடலாம். 

 

அவரை விட அதிகம் கடன் பெற்றுக் கட்டத் தவறிய "A. B. G. Shipyard" நிறுவனத் தலைவர் திரு ரிஷி அகர்வால் போன்றோர் இருக்க, மல்லையா அவர்கள் குறித்தே ஊடகங்கள் பேசுவதற்கும் இதுவே காரணம்.  

 

எனவே, எளிமையான வாழ்க்கை முறையும், படிப்படியான கற்றலுமே, நம் பிம்பத்தை உயர்த்தும் கருவிகளாக இவ்விதி கூறுகிறது. 

 

நற்பெயரை உருவாக்க இயலாதோர், மற்றவர்கள் பெயரைக் கெடுப்பதன் மூலமும் தம்மை உயர்த்திக் கொள்ளலாம் என நூல், இதன் விதி விலக்காக சில அரசியல் உதாரணங்களுடன் விளக்கியுள்ளது. 

 

இக்கருத்தில் எனக்கு உடன்பாடு இல்லை என்பதையும், இது போன்ற குறுக்குவழிகள், காலப்போக்கில் நமக்கே ஆபத்தாக முடிந்துவிடும் என்பதையும் நண்பர்களுக்கு ஒரு எச்சரிக்கையாகப் பதிவு செய்கிறேன். 

 

எனவே, எளிமையான வாழ்வோடு, படிப்படியாகக் கட்டியமைக்கப்படும் நம் உயர் அடையாளமே, நம்மைக் குறித்து மற்றவர்களை உயர்வாகப் பேச வைத்து நம் வலிமை பெருக வழிகோலும் எனப் புரிந்துகொள்ளலாம். 

 

இத்தகைய பிம்ப உருவாக்கத்தில், நாம் கை கொள்ளவேண்டிய மிக முக்கியமான ஒன்றைக் குறித்து, அடுத்த விதியைச் சுவைக்கையில் விவாதிக்கலாம். 

 

நூல் குறித்த விவாதம் தொடரும். 

 

*****

 

இந்த நாளின் வாசிப்பனுபவம் குறித்த உங்கள் கருத்துகளை பின்னூட்டம் வாயிலாக தெரிவிக்கலாமே! மீண்டும் ஒரு வாசிப்பனுபவத்துடன் உங்கள் அனைவரையும் சந்திக்கும் வரை…

 

நட்புடன்,

 

இரா. அரவிந்த்