தலைநகர் தில்லி - சுற்றுச் சூழல் - பராலி

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

 

நேற்று வெளியிட்ட பதிவை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

 

TO BE SUCCESSFUL IN LIFE, ALWAYS FORGET THE PROBLEMS THAT YOU FACED IN LIFE, BUT NEVER FORGET THE LESSONS THAT THOSE PROBLEMS TAUGHT YOU.

 

******

 

பராலி எனும் ஹிந்தி வார்த்தையை ஆங்கிலத்தில் சொல்வதென்றால் Stubble என்று சொல்லலாம். அறுவடை முடிந்த பிறகு விளை நிலங்களில் இருக்கும் மீதி தான் இந்த பராலி என்பது. ஒரு போகம் அறுவடை முடிந்தபிறகு அடுத்த போகம் பயிர் செய்வதற்கு முன்னர் இவற்றை நிலத்திலே விட்டு வைக்காமல் எடுத்து, மீண்டும் உழவு செய்து பயிரிடுவார்கள். பஞ்சாப் மாநிலத்தில் வருடத்தில் மூன்று போகம் பயிரிடுகிறார்கள். ஒரு போகத்திற்கும் அடுத்த போகத்திற்குமான இடைவெளி மிகவும் குறைவு. 

 

அந்த நாட்களுக்குள் பராலியை நிலத்திலிருந்து அப்புறப்படுத்தி மீண்டும் நிலத்தினை அடுத்த போகம் பயிர் செய்ய பஞ்சாப் மற்றும் ஹரியானா மாநிலத்தில் உள்ள விவசாயிகள் செய்யும் செயல் அந்த பராலியை கொளுத்திவிடுவது தான். அதிக பட்சமாக பயிர் செய்யும் நிலங்களைக் கொண்ட இந்த மாநிலத்தவர்கள் இப்படி மொத்தமாக கொளுத்திவிடுவதால் புகை அதிகமாகி அனைத்து வட மாநிலங்களிலும் பரவி சுற்றுப்புறச்சூழல் மாசுபடுகிறது. கடந்த சில வாரங்களாகவே Air Quality Index எனப்படும்  காற்றுத் தரக் குறியீடு மிகவும் மோசமாக உள்ளது. 

 

0 முதல் 100 வரையிலான AQI நல்லதாகக் கருதப்படுகிறது, அதே சமயம் 100 முதல் 200 வரை மிதமானது, 200 முதல் 300 வரை மோசமானது, 300 முதல் 400 வரை இது மிகவும் மோசமானது என்றும் 400 முதல் 500 வரை அல்லது மேலே அது கடுமையானதாக கருதப்படுகிறது. தொடர்ந்து 300க்கும் மேலாகவே இந்த குறியீடு இருப்பதால் மூச்சு பிரச்சனைகள், கன் எரிச்சல், சளி, இருமல், மற்ற தொல்லைகள் என பலரும் அவதிப்படுகிறார்கள். 

 

இந்த மாசு பிரச்சனைக்கு பராலியை கொளுத்திவிடுவது மட்டுமே காரணம் இல்லை என்று சொன்னாலும் இதுவே பிரதான காரணமாக இருக்கிறது. அரசியல் காரணமாகவும் இந்த பிரச்சனையை வைத்துக்கொண்டு லாபம் பார்க்கும் அரசியல்வாதிகளை இந்தச் சமயத்தில் பார்க்க முடிகிறது. பிரச்சனையை சரி செய்ய முன்வரவேண்டும் அதை விட்டு விட்டு "வீடு பற்றி எரியும்போது குளிர்காய" நினைக்கும் விதத்திலேயே பலரும் நடந்து கொள்கிறார்கள். 

 

தலைநகர் தில்லியில் இருக்கும் Pusa Agriculture Institute இந்த பிரச்சனையை சமாளிக்க ஒரு வித இரசாயனத்தை கண்டுபிடித்து இருக்கிறார்கள். பராலியை ஓர் இடத்தில் சேமித்து அவற்றின் மீது அந்த இரசாயனத்தை தெளித்து விட்டால் சில நாட்களில் அவை பயிர்களுக்கு இடும் உரமாக மாறிவிடும். ஆனால் இதையும் பயன்படுத்த விவசாயிகள் தயாராக இல்லை. கொளுத்தி விடுவதே அவர்களுக்கு சுலபமான வழியாக இருக்கிறது.

 

வருடா வருடம் மூன்று நான்கு மாதங்கள் இவற்றை குறித்த விவாதங்களும் தகவல்களும் பறந்து கொண்டே இருக்கும். பிறகு அனைத்தையும் மறந்து விடுவார்கள் - அடுத்த வருடம் இதற்கு தீர்வு கண்டுவிடுவோம் என்ற வாக்குறுதி தருவார்கள். இந்த வருடமும் இதையே சொல்கிறார்கள். தலைநகர் தில்லிவாசிகளும் அவர்கள் கொடுக்கும் வாக்குறுதிகளை நம்பிக்கொண்டு காத்திருக்கிறார்கள் - அடுத்த வருடமாவது இந்த பிரச்சனை தீர வேண்டும். பார்க்கலாம். 

 

சரி இன்றைய Air Quality Index என்ன? 175 - மிதமானது - இருந்தாலும் வீட்டை விட்டு வெளியே போகாதே என்கிறது அலைபேசியில் இருக்கும் செயலி! தினம் தினம் இப்படியே இருந்தால் வீட்டிலேயே அடைந்து கிடக்க முடியாதே! நடுநடுவே பள்ளிகளுக்கு விடுமுறை அளித்து விடுகிறார்கள். தில்லி அரசின் அலுவலகங்களில் பாதி பேர் அலுவலகத்தில் வேலை செய்யவும் மீதி பேர் வீட்டிலிருந்தே பணிபுரியும்படியும் அவ்வப்போது சொல்கிறார்கள். மத்திய அரசு அலுவலகங்களில் பணி புரிபவர்களுக்கு இந்த வசதி இல்லை. 

 

தற்காலிக தீர்வுகள் தருவதை விட்டு நிரந்தர தீர்வுகளை தரும் நாள் எந்நாளோ என்று மற்ற தில்லிவாசிகளை போலவே நானும் காத்திருக்கிறேன். 

 

******

 

இந்த வாரத்தின் பதிவு குறித்த தங்களது எண்ணங்களை பின்னூட்டம் வாயிலாக சொல்லுங்களேன்.  மீண்டும் வேறொரு பதிவுடன் உங்கள் அனைவரையும் சந்திக்கும் வரை…

 

நட்புடன்

 

வெங்கட் நாகராஜ்

புது தில்லியிலிருந்து….