சினிமா உலகம் - Beyond Periods - வெங்கட் நாகராஜ்

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

இதற்கு முன்னர் வெளியிட்ட குலுக்கி சர்பத் - சமோசா சாட் - Lulu Mall Coimbatore  பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

********

சினிமா உலகம்:

சினிமா உலகம் - அதில் எனக்கு பெரிதாக ஈடுபாடு கிடையாது. நான் பார்த்த படங்கள் எண்ணிக்கை மிகமிகக் குறைவாகவே இருக்கும். அதில் நடிக்கும் நடிகர்கள் மீது பெரிதான அபிப்ராயம் கிடையாது. சினிமா உலகம் மிகவும் மோசமான பல விஷயங்களை உள்ளடக்கியது என்ற எண்ணம் எனக்கு உண்டு. என்னதான் பலரை வாழ வைத்தாலும் அதில் தன்னை இழந்தவர்கள் தான் அதிகம். நடிக்க வரும் அனைவரும் star ஆகிவிடுவதில்லை. Director ஆக வேண்டும் என்று வரும் ஒவ்வொருவரும் அந்த எல்லையைத் தொடுவதில்லை. வாழ்க்கையைத் தொலைத்த பலரும் இந்த சின்னா உலகில் உண்டு. பெரிய எதிர்பார்ப்புகள், ஆசைகள் உடன் வீட்டை விட்டு ஓடிவந்து இந்த சினிமா உலகில் சிக்கிச் சீரழிந்து சின்னாபின்னமான கதைகள் நிறையவே உண்டு. இந்த இடம் பலரை வாழ்க்கையில் இடர வைத்திருக்கிறது. ஜெயித்தவர்கள் என்று பார்த்தால் மிக மிகக் குறைவு. அப்படி ஜெயித்தவர்களும் இழந்த விஷயங்கள் குறித்து வெளியில் சொல்ல முடியாது - குறிப்பாக நடிகைகள்.

இந்த சினிமா உலகம் குறித்த நிறைய கதைகள் உண்டு. அப்படி ஒரு கதை தான் சமீபத்தில் கிண்டில் வழி வாசித்த  கல்லூரிப் பூக்கள் என்ற தலைப்பிட்ட கதை...... பாலகுமாரன் அவர்களின் எழுத்தில் பல நூல்களை வாசித்து இருந்தாலும் இந்த நூலை இப்பொழுது தான் முதன் முதலாக வாசிக்கிறேன். அப்பப்பா சினிமா உலகில் இருக்கும் போட்டி, பொறாமை, அசிங்கங்கள், வெற்றி பெற நடத்தும் போராட்டங்கள், இழந்த வாழ்க்கை என பலவற்றையும் இந்தக் கதை வழி நம் கண் முன்னே கொண்டு நிறுத்தி இருக்கிறார் பாலகுமாரன். வழக்கமான அவரது பாணியில் நிறைய வாக்கியங்கள். ஒவ்வொன்றும் அட்சர சுத்தமாக சினிமா உலகினை நமக்கு படம் பிடித்துக் காட்டும் விதமாக எழுதி இருக்கிறார். அமேசான் கிண்டில் தளத்தில் படிக்கக் கிடைக்கிறது. முடிந்தால் வாசித்துப் பாருங்கள். மின்னூல் வாசிக்க சுட்டி கீழே.

கல்லூரிப் பூக்கள்

*******

Beyond Periods:

உதிரப் போக்கு நாட்களில் மனைவி படும் கஷ்டங்களை, அவளின் வேதனையை புரிந்து கொள்ளாத ஒரு இளம் கணவன். இந்த மாதிரி நாட்களில் என் அம்மாவோ, சகோதரியோ வேதனை அடைந்து நான் பார்த்ததில்லை, நீ தான் ஓவராக டிராமா போடுகிறாய் என்று சொல்லிச் சொல்லி நோகடிக்கிறான். முதல் மூன்று நாட்கள் வேதனை அடைந்தாலும் அவனுக்குப் புரிய வைக்கும் முயற்சிகள் பலனளிக்காது போக, நான்காம் நாள் வேறு ஒரு விஷயத்தைச் செய்கிறாள். அதன் பிறகு என்ன நடந்தது என்பதைச் சொல்லும் ஒரு குறும்படத்தினை - மலையாள மொழியில் பார்த்தேன். தலைப்பு Beyond Periods....... YouTube இல் பார்க்கக் கிடைக்கிறது. பார்க்கச் சுட்டி கீழே...... முடிந்தால் பாருங்களேன். நன்றாகவே எடுத்து இருக்கிறார்கள்.

Beyond Periods

*********

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

திருவரங்கம்

21 ஜூலை 2026