சினிமா - Gubbaare - நானா படேகர்

அன்பின் நண்பர்களுக்கு, இனிய காலை வணக்கம். இந்த நாளில் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

நேற்று வெளியிட்ட ராஜா ராணி - கதை கேளு கதை கேளு பதிவினை படித்து கருத்துகளைப் பகிர்ந்து கொண்ட அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

பிரார்த்தனையும் நம்பிக்கையும் கண்ணுக்குத் தெரியாத விஷயங்கள்… ஆனால் நிகழவே முடியாது என்று சொல்லும் எந்த விஷயத்தையும் நிகழ்த்திக் காட்டும் வலிமை உடையவை அவை.

******

சமீபத்தில் ஒரு காஃபி வித் கிட்டு பதிவில் எனக்கு நானா படேகர் அவர்களின் நடிப்பு பிடிக்கும் என்று சொல்லி இருந்தேன்.  அது உங்களுக்கும் நினைவில் இருக்கலாம்.  சமீப நாட்களில் அவரது படங்கள் எதுவும் வெளிவரவில்லை என்று தோன்றுகிறது.  2007-ஆம் ஆண்டு “Dhதஸ் கஹானியா(ன்)”  என்று ஒரு படம் வந்தது - ஒன்றுக்கு ஒன்று சம்பந்தம் இல்லாத பத்து கதைகளை ஆறு இயக்குனர்கள், பல நடிகர்கள் நடிக்க எடுக்கப்பட்ட படம் அது.  அதில் வரும் மற்ற கதைகளை விட்டு விடுங்கள் - நாம் இன்றைக்கு பார்க்கப் போவது அதில் ஒரு கதையாக நானா படேகர் நடித்த “Gubbaare” என்ற படம். இந்த ஹிந்தி வார்த்தைக்கு அர்த்தம் Baloon!  அது சரி Baloon எனும் ஆங்கில வார்த்தைக்கு ஈடான தமிழ் வார்த்தை என்னவென்று யாரேனும் சொல்லுங்களேன்! எத்தனை யோசித்தும் மனதுக்கு இதற்கு இணையான தமிழ் வார்த்தை இருக்கிறதா என்பது தோன்றவில்லை. 

ஒரு பேருந்து - அதில் ஒரு இளம் கணவன் - மனைவி! பேருந்தில் பயணிக்கும் போதே இருவருக்கும் ஏதோ வாக்குவாதம் - கணவனும் மனைவியும் வேறு வேறு இருக்கைகளில் தனித்தனியே உட்கார்ந்து வருகிறார்கள். அதே பேருந்தில் நானா படேகரும்!  அவர் கைகளில் நிறைய பலூன்கள்.  அவரும் சண்டை போட்டுக்கொண்டு உட்கார்ந்திருந்த அந்த இளைஞனின் மனைவியும் பேசிக் கொள்கிறார்கள். நானா படேகர் தனக்கும் தனது மனைவிக்கும் இடையேயான ஊடல்களைப் பற்றிச் சொல்லிக் கொண்டு வருவார்!  முப்பத்தி ஐந்து வருட திருமண வாழ்க்கையில் எட்டு வருடங்களுக்கு மேல் ஊடலிலேயே போய் விட்டது என்று சொல்லி, அந்த இளம்பெண்ணுக்கு அறிவுரை சொல்லுவார்.  தனது மனைவிக்கும் தனக்கும் ஊடல் வந்தால் 11 பலூன்களும் Sorry Greeting Card-உம்   வாங்கிக் கொடுத்து அவரை சமாதானப் படுத்துவேன் என்றும் - நான் ஊடல் கொண்டால் எனக்குப் பிடித்த இனிப்பு செய்து, அதனுடன் Sorry Greeting Card-உம் மனைவி தருவார்  என்றும் தனது கதையைச் சொல்லிக் கொண்டு வருவார்.  

ஒரு இடத்தில் பேருந்து நிற்க, நானா படேகர் பலூன்களுடன் இறங்கி விடுவார்.  Sorry Greeting Card பேருந்திலேயே மறந்து வைத்து விடுவார்.  அதை எடுத்துக் கொண்டு அந்த இளம்பெண் அவரின் பின்னாலேயே செல்ல அங்கே பார்க்கும் காட்சி - யாருமே எதிர்பார்க்காத விதத்தில் இருக்கும். பிறகு இளம் தம்பதியர் என்ன செய்தார்கள் என்பதைச் சொல்வார்கள் காட்சியாக.  இந்தப் படத்தினை பார்க்காதவர்கள் இருந்தால் பாருங்களேன்.  முழு திரைப்படத்தில் இந்தப் பகுதி மட்டும் 11 நிமிடம் தான்.  அந்தப் பதினோறு நிமிட படம் கீழே!

மேலே காணொளியில் பார்க்க முடியவில்லை எனில் கீழே உள்ள சுட்டி வழி பார்க்கலாம்.  

Gubbare 

Life is too short!  So do not waste it in silly fights! என்ற கருத்தைச் சொல்லும் இந்தப் படம் உங்களுக்கும் பிடித்ததா?

என்ன நண்பர்களே, படத்தினைப் பார்த்து ரசித்தீர்களா? நிச்சயம் உங்களுக்கும் பிடித்திருக்கும் என நம்புகிறேன்.  நான் பார்த்து ரசித்த இந்தப் படத்தினை உங்களுடன் பகிர்ந்து கொண்டதில் மகிழ்ச்சி.  பதிவு குறித்த உங்கள் எண்ணங்களை பின்னூட்டமாக பகிர்ந்து கொள்ளுங்களேன்.  நாளை வேறொரு பதிவின் வழி சந்திக்கும் வரை…

நட்புடன்

வெங்கட் நாகராஜ்

புது தில்லி.