தலைநகரிலிருந்து 23112021 - மட்டர் குல்ச்சா - காஜு ரிம்ஜிம் (B)பால்

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

நேற்று வெளியிட்ட கங்கோத்ரி பதிவை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

யாருக்கும் உங்களை கணிக்கும் உரிமை கிடையாது… ஏனெனில் அவர்களுக்கு உங்களை பற்றி வதந்திகளே அதிகம் தெரிந்திருக்குமே தவிர, வலிகளை அல்ல.

******

மட்டர் குல்ச்சா

தலைநகர் தில்லி வந்த புதிது..... சைக்கிள், தள்ளு வண்டிகளில் அடுப்பில் ஒரு தவாவை வைத்துக் கொண்டும், பக்கத்தில் இன்னொரு அடுப்பில் பெரிய அலுமினிய பாத்திரத்தில் எதையோ வைத்து கிளறிக் கொண்டும்,  பன்னும் இல்லாமல் ரொட்டியும் இல்லாமல் வட்ட வடிவில் லேசான புளிப்பு வாடையுடன் ஒரு பதார்த்தத்தை வைத்து விற்றுக் கொண்டிருப்பதைப் பார்த்து வியந்ததுண்டு. சாலை ஓரங்களில் இருந்த இது போன்ற தற்காலிக கடைகளில் வாடிக்கையாளர்களும் நிறைய வந்து அந்த உணவை வாங்கி உண்பார்கள்.  அதன் பெயர் குல்ச்சா என்பதனை கேட்டு தெரிந்து கொண்டேன்.

தற்காலிக கடைகள் மட்டுமன்றி பெரிய உணவகங்களில் கூட இந்த குல்ச்சா கிடைத்தாலும் ஏனோ சுவைக்க மனம் வந்ததில்லை.  நண்பர் ஒருவர் என்னிடம் "என்னது நீ இன்னும் குல்ச்சா சாப்பிட்டதே இல்லையா? நல்லா தான் இருக்கும். சாப்பிடு" என என்னையும் அழைத்துக் கொண்டு நடைபாதைக் கடை ஒன்றில் வாங்கிக் கொடுத்தார் இந்த குல்ச்சாவை.  கொஞ்சம் பயந்தபடியே தான் குல்ச்சாவை கொஞ்சமாக எடுத்து தொட்டுக்கையாகக் கொடுத்த மட்டர்-சோலே சப்ஜி (பச்சை பட்டாணி - கொண்டக்கடலை) உடன் சாப்பிட்டு ஒரு பச்சை மிளகாயையும் கடித்துக் கொண்டேன்.

 

நான் பயந்த அளவுக்கு இல்லை என்றாலும் ஏனோ அதன் புளிப்புடன் கூடிய சுவை அவ்வளவாக பிடிக்கவில்லை. ஆனாலும் நண்பரிடம் அப்படியே சொல்லாமல் ஓகே நல்லாதான் இருக்கு என்று சொல்லிவிட்டேன். அதன் பிறகு வேறு வழியில்லாமல் சாப்பிட்டதுண்டே தவிர, விரும்பி சாப்பிட்டதில்லை. குல்ச்சா தனியாக தயாரித்து கொண்டு வந்து, சப்ஜியும் வீட்டிலேயே தயாரித்து அவ்வப்போது சூடு செய்து தருவார்கள். அதன் புளித்த சுவை எனக்கு பிடிப்பதில்லை.

சமீபத்தில் நீண்ட இடைவெளிக்குப் பிறகு அலுவலகத்தில் இருந்து கால தாமதமாக வந்த ஒரு நாளில் வேறு வழியில்லாமல் உணவகம் ஒன்றில் மட்டர் குல்ச்சா மட்டுமே இருக்க அதனை வீட்டுக்கு வாங்கி வந்து சுவைத்தேன். ஆனால் இந்த முறை ஏனோ மிகவும் பிடித்து இருந்தது.... தலைநகர் வந்தால் இந்த மட்டர் குல்ச்சாவை சுவைத்துப் பாருங்களேன்.

******

காஜு ரிம்ஜிம் (B)பால்

தீபாவளி சமயம் என்றாலே தலைநகர் தில்லியின் உணவகங்கள்/இனிப்பகங்களில் விதம் விதமான இனிப்புகள் அணிவகுப்பு இருக்கும்! சாதாரண நாட்களிலேயே அதிகமான இனிப்புகள் கிடைக்கும் என்றாலும் தீபாவளி சமயத்தில் கேட்கவா வேண்டும்.  கூடவே இங்கே தீபாவளி சமயத்தில் நண்பர்களுக்கும் தெரிந்தவர்களுக்கும் உலர் பழங்கள், இனிப்புகள், பரிசுப் பொருட்கள் என பலவும் கொடுப்பதுண்டு என்பதால் கடைகளில் பெரிதும் அதிகமான கூட்டம் இருக்கும்.  உலர் பழங்கள் நான்கு ஐந்து வகைகளில் கிண்ணங்களில் வைத்து கொடுப்பதும் உண்டு.  எல்லா இனிப்புகளைப் பார்த்தாலும் சாப்பிடத் தோன்றினாலும், இரண்டு மூன்று இனிப்புகளைச் சுவைத்த பிறகு திகட்டிவிடும் என்பதை உணர்ந்தே இருக்கிறேன்.  சில வகை இனிப்புகள் பால் கொண்டு செய்யப்பட்டது என்றால், சில வகை இனிப்புகள் உலர் பழங்கள் கொண்டு செய்தவை - அதிலும் குறிப்பாக காஜு எனப்படும் முந்திரி (Cashew) கொண்டு செய்தவை.  

இந்த வருடம் தீபாவளி சமயத்தில் நிறைய இனிப்புகள் - அலுவலக நண்பர்கள் கொண்டு வந்தது - சாப்பிட வேண்டியிருந்தது.  கூடவே ஒரு நிகழ்விலும் இனிப்புகள் - அதிலும் ஒரு பெட்டியில் சமோசா, பனீர் பகோடா, ஒரு பழரசம் (டெட்ரா பேக்), மற்றும் மூன்று வித இனிப்புகள் என இருந்தது! சமோசா, பனீர் பகோடா இரண்டுமே கொஞ்சம் Heavy! அதனுடன் மூன்று இனிப்பு என்றால் என்னாவது?  ஆனாலும் உணவுப் பொருட்களை வீண் செய்வது எனக்குப் பிடிக்காத விஷயம்.  கொஞ்சம் வைத்திருந்து சுவைத்து விட வேண்டியது தான் என நினைத்தேன். அப்படிச் சுவைத்த இனிப்பில் ஒன்று தான் இந்த காஜு ரிம்ஜிம் (B)பால்! முந்திரியை அரைத்து நெய் சேர்த்து கிளறி மேலே வண்ண வண்ண சர்க்கரை மிட்டாய் சேர்த்து செய்யப் பட்ட இந்த இனிப்பைச் சுவைத்த போது மிகவும் பிடித்திருந்தது.  விலை கேட்டபோது ஒரு முறை சுவைத்ததே போதும் என்று தோன்றிவிட்டது - ஏன் என்று கேட்கிறீர்களா?  இந்த இனிப்பின் ஒரு கிலோவுக்கான விலை ரூபாய் 1350/- மட்டும் - GST வரிகள் இல்லாமல்!

இந்த இனிப்பு தவிர முந்திரி கொண்டு செய்யப்பட்ட விதம் விதமான இனிப்புகள், பிஸ்கெட் போன்றவையும் உண்டு - அனைத்துமே விலை அதிகம் தான் - முந்திரியின் விலையும் அதிகம் தானே! அதிலும் தில்லியில் முந்திரி விலை கிலோ எண்ணூறு ரூபாய்க்கு மேல்!

******

நண்பர்களே, இந்த நாளில் பகிர்ந்து கொண்ட தகவல்கள் உங்களுக்கும் பிடித்திருக்கலாம், பயனுள்ளதாகவும் இருக்கலாம்! பதிவு குறித்த உங்கள் எண்ணங்களை பின்னூட்டம் வாயிலாகச் சொல்லுங்களேன்.  மீண்டும் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

புது தில்லியிலிருந்து…