காஃபி வித் கிட்டு - 234 - ஜில் ஜில் ரமாமணி - பெண்ணைப் பார்க்காதே - [G]கோ ரதமும் ஆண்டாளும் - Ishq Ki Umar - பெற்றோரின் திருமண நாள் - சுண்டாட்டம் - வெண்டைக்காய்

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

இதற்கு முன்னர் வெளியிட்ட அழகிய படங்களும் சில வரிகளும் பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

இன்றைய எண்ணங்கள்  : ஜில் ஜில் ரமாமணி

ஒரு கண் மருத்துவமனை. அங்கே கண் பிரச்சனைகளுக்கு பலர் வந்து போவது வழக்கம் தானே. அங்கே வருபவர்களும் சரி, பணிபுரிபவர்களும் சரி எப்படி நடந்து கொள்ள வேண்டும் என்பது தெரிந்திருந்தால் நல்லது.  எந்த மருத்துவமனையாக இருந்தாலும், அங்கே பணிபுரியும் நபர்கள் சலங்கை வைத்த கொலுசு போட்டுக்கொண்டு - முதலிலேயே சொல்லிவிடுகிறேன் - கொலுசு போட்டுக் கொள்வதை தவறென்று சொல்ல வரவில்லை, அது அவரவர் விருப்பம் - மருத்துவமனையில் ஜில் ஜில்லென்று அங்கேயும் இங்கேயும் சென்று கொண்டிருந்தால் ஒருவித எரிச்சல் வருகிறது.  மருத்துவமனை என்பது பிரச்சனைகளுக்குத் தீர்வு தரும் இடம். அங்கே அமைதி நிலவினால் தான் நன்றாக இருக்கும். அங்கேயும் ஜில் ஜில் ரமாமணியாக அங்கே பணிபுரியும் பணியாளர் இருந்தால் நன்றாக இராது என்பது என்னுடைய சிந்தனை.  சிலர் இதனைத் தவறென்று சொல்லலாம் என்றாலும் என்னுடைய நிலையில் மாற்றமில்லை. என் அலுவலகத்தில் கூட ஒரு பெண்மணி இப்படித்தான் மூன்றாம் மாடியில் அவர் நடந்தால் இரண்டாம் மாடியில் ஜில் ஜில் சப்தம் கேட்கும் அளவுக்கு சலங்கைகள் வைத்து கொலுசு போட்டிருப்பார். அது அவர் விருப்பம் என்று சொல்லி இருக்கிறேன் சக அலுவலரிடம். இடம் பொருள் ஏவல் என்பதெல்லாம் பார்க்க வேண்டும் என்பதில் மாற்றுக் கருத்துக்கு இடமில்லை தானே!  இந்த விஷயம் குறித்து நீங்கள் என்ன நினைக்கிறீர்கள் என்று பின்னூட்டத்தில் சொல்லுங்களேன்!

******

ராஜா காது கழுதைக் காது :  பெண்ணைப் பார்க்காதே

அதே மருத்துவமனையில் கேட்ட ஒரு விஷயம் தான் இன்றைய பதிவில் ராஜா காது கழுதைக் காது பகுதியாக! என்னதான் நிறைய விஷயங்கள் ராஜாவின் காதுகளில் விழுந்தாலும் ஏனோ எழுதவில்லை.  இதோ இன்றைக்கு எழுதி விட்டேன்.  

நாற்பது வயதுக்கும் மேல் மதிக்கத்தக்க ஒரு மனிதர்.  தனது கண்ணில் பிரச்சனை என்று வந்தார். மருத்துவர் பார்ப்பதற்கு முன்னர் கண்களைச் சோதிக்கும் நர்ஸ் அவரது கண்களை அதற்கான கருவி மூலம் பரிசோதித்துக் கொண்டிருந்தார்.  “தாடையை சரியா வச்சு, கண்ணைச் சரியா அந்த லென்ஸ் ல வச்சுக்கோங்க! உள்ள பச்சை லைட் தெரியுதா, அத நல்லா பாருங்க! நல்லா பாருங்க!” என்று கதறிக் கொண்டிருந்தார்.  ஆனால் அவர் பார்வை வேறு எங்கோ அலைந்து கொண்டிருந்தது.  அப்போது அந்த நர்ஸ், சொன்னது தான் இன்றைய ராஜா காது கழுதைக் காது பகுதி! 

“லைட்ட தாங்க பார்க்க சொன்னேன்…  மெஷினுக்குப் பின்னாடி இருக்க பொண்ணைப் பார்த்துட்டே இருந்தா எப்படி கண் Check பண்ணறது?”

******

 

பழைய நினைப்புடா பேராண்டி : [G]கோ ரதமும் ஆண்டாளும்

2013-ஆம் ஆண்டு இதே நாளில் வெளியிட்ட பதிவு - திருவரங்கம் ‘[G]கோ ரதமும் ஆண்டாளும் - அந்தப் பதிவிலிருந்து சில வரிகள் இங்கே. 

ஒவ்வொரு வருடமும் திருவரங்கத்தில் சேர்த்தி விழாவின் ஒரு பகுதியாக கோரதம் எனும் தேரோட்ட நிகழ்வு நடக்கிறது. இந்த வருடம் கூட வியாழானன்று (02.04.2026) நடந்தது.  அலுவலக நாள் மட்டுமல்லாது காலை பத்து மணிக்கு மேல் தான் தேரோட்டம் என்பதால் செல்ல முடியவில்லை. 2013-ஆம் ஆண்டு சென்று வந்த அனுபவங்களை, அந்த வருடம் இதே நாளில் எழுதி இருக்கிறேன்.  அந்தப் பதிவு இன்றைய பழைய நினைப்புடா பேராண்டி பதிவாக! 

திருச்சி அருகிலிருக்கும் இரண்டாவது திவ்யதேச ஸ்தலமான உறையூரில் கமலவல்லி நாச்சியார் கோவில் இருக்கிறது. இங்கே இருக்கும் கமலவல்லி நாச்சியாருக்கு தனது கணையாழியை அன்பளிப்பாகக் கொடுத்துவிட்டு திருவரங்கம் திரும்புகிறார் நம்பெருமாள். நம்பெருமாளிடம் கணையாழி இல்லாதது தாயாரின் கண்களிலிருந்து தப்பிவிடுமா என்ன? ஆரம்பித்தது பிரச்சனை! அவர் அது பற்றி கேட்க, நம்பெருமாள் சாமார்த்தியமாக, கொள்ளிடக் கரையில் தொலைந்து விட்டது என பொய் சொல்கிறார். 

“தேடிக் கொண்டுவந்தால் தான் ஆச்சு” என நம்பெருமாளை விரட்ட அவரும் தங்கக் குதிரையில் சென்று கொள்ளிடக் கரையில் தேடுவதாக பாவனை செய்துவிட்டு சித்திரை வீதியில் “வையாளி” ஆட்டம்போட்டு வெறும் கையோடு திரும்புகிறார். சும்மா இருப்பாரா தாயார்! மட்டையடி தான். ஒவ்வொரு வருடமும் இது போல் மட்டையால் அடித்து விளாசும் “மட்டையடி உற்சவம்” நடக்கும்.

அதன் பிறகு ஊடல் முடிந்து பக்தர்களுக்கு திருவரங்கத்தில் நம்பெருமாளும் தாயாரும் சேர்ந்து ‘சேர்த்தி’ தரிசனம் தருவார்கள். வருடத்தில் ஒரு முறை தான் “சேர்த்தி” தரிசனம் என்பதால் நிறைய பக்தர்கள் இங்கே கூடுவார்கள். இந்த வருடம் சேர்த்தி அன்று நான் திருச்சியில் இருந்தாலும் திருவரங்கத்தில் இல்லை! அருகே உள்ள வேறு ஒரு ஊருக்குச் சென்று விட்டேன். அது பற்றி வேறொரு பகிர்வில்!

அடுத்த நாள் தான் கோ ரதம்! ”கோ ரதம்” எனச் சொல்லப்படும் பங்குனி மாத ரதத்தில் பெருமாள் வீதிவுலா நடைபெறும். திருவரங்கத்தில் இந்த ரதம் நிறுத்தி வைத்திருக்கும் இடத்தில் ஒரு ‘[G]கோ சாலை’ இருந்ததாலும் இப்பெயர். காலை 06.30 மணிக்கே தேரோட்டம் தொடங்கி இருக்கவேண்டியது. ஏதோ பிரச்சனையால், பொறுமையாக பத்து மணிக்கு தான் ஆரம்பித்தது. அதுவே பிரச்சனையாகவும் ஆனது! என்ன பிரச்சனை என்றால் வெய்யில் தான்!

மேலே உள்ள சுட்டி வழி முழு பதிவையும் படி(பார்)க்கலாமே - இது வரை நீங்கள் படி(பார்)த்திருக்காவிட்டால்!  

******

இந்த வாரத்தின் ரசித்த பாடல் : Ishq Ki Umar

சமீபத்தில் பார்த்து ரசித்த ஒரு ஹிந்தி பாடல் - Vadh 2 எனும் படத்திலிருந்து Ishq Ki Umar என்ற பாடல். சஞ்சய் மிஷ்ரா மற்றும் நீனா குப்தா ஆகியோர் நடிப்பில் - அற்புதமான சூழலில் படம் பிடித்திருக்கிறார்கள் - மெல்லிசை நிச்சயம் உங்களுக்கும் பிடிக்கலாம் - கேட்டுப் பாருங்களேன்.

******

இந்த வாரத்தின் தகவல் :  பெற்றோரின் திருமண நாள்

இன்றைக்கு - 11 ஏப்ரல்! இந்த நாள் எனது பெற்றோரின் திருமண நாள். இரண்டு பேருமே இப்போது இப்பூவுலகில் இல்லை என்றாலும் இந்த நாள் நினைவில் இருக்கிறது! பல முறை மறந்து போயிருக்கிறேன் - பணிச் சுமைகளில் வாழ்த்தாமல் விட்ட நாளில் அப்பா மாலை வரை காத்திருந்து, பிறகு அலைபேசி வழி அழைப்பார் - இன்னிக்கு என்ன நாள் தெரியுமா? என்று கேட்கும்போது தான் அடடா, மறந்து விட்டோமே என்று வருத்தம் தோன்றும்.  இன்று, எனக்கு நினைவிருந்தாலும் அவர்களுக்கு திருமண நாள் வாழ்த்துகள் சொல்ல நினைத்தாலும் அவர்கள் இருவருமே இல்லை - இது தான் வாழ்வின் நிதர்சனமோ? இன்றைக்கு அவர்கள் இருந்திருந்தால் 60 ஆண்டுகள் திருமண பந்தத்தில் இருந்திருப்பார்கள்….

******

இந்த வாரத்தின் தமிழ் - எல்லாம் தமிழ் :

சமீபத்தில் நெய்வேலி நகருக்குச் சென்ற போது பல இடங்களில் தகவல் பதாகைகள் பார்க்க முடிந்தது. ஒவ்வொரு இடத்திலும் ஆங்கிலம், தமிழ் மற்றும் ஹிந்தி மொழிகளில் எழுதி வைத்திருந்தார்கள் - ஹிந்தி மொழியில் இருப்பது புதிது! - முன்பு ஸ்ட்ரைக் என்ற பெயரில் “ஹிந்தி ஒழிக” என்ற கோஷம் போட்டு கூட்டத்தோடு கூட்டமாக சென்றதும், தபால் நிலையத்தில் இருந்த ஹிந்தி பதாகைகளில் தார் பூசியதும் இப்போதும் நினைவில் இருக்கிறது.  இன்றைக்கு பல இடங்களில் மூன்றாம் மொழியாக ஹிந்தியில் எழுதி வைத்திருக்கிறார்கள் - நெய்வேலி நிறுவனத்தில் பணிபுரிபவர்களில் பலரும் வட இந்தியர்கள் தான் என்றும் தெரிந்து கொண்டேன்.  அது ஒரு புறம் இருக்க, பல பதாகைகளில் எழுதி இருக்கும் தமிழ் புரிவதற்கு தனியே படித்து வர வேண்டும் என்று தோன்றியது! உதாரணத்திற்கு இரண்டு தமிழ் பதாகைகளில் இருந்த தகவல்…

சுண்டாட்ட அரங்கம்

பொறி வண்டிகள் நீரால் சீராக்கும் நிலையம்

என்னதான் சொல்ல வருகிறார்கள் என்பதைச் சொல்லி விட்டால் நல்லது! பக்கத்தில் ஆங்கிலத்தில் எழுதி இருந்ததால் புரிந்தது எனக்கு! உங்களுக்கு புரிந்ததா? சொல்லுங்களேன் பின்னூட்டத்தில்!

******

இந்த வாரத்தின் நகைச்சுவை - வெண்டைக்காய் :

சமீபத்தில் படித்த ஒரு நகைச்சுவை!

ரோட்'ல ஒருத்தர் வெண்டக்காய் முனையை ஒடிச்சு போட்டுக்கிட்டே போனார்.

அதைப் பார்த்த இன்னொருத்தர், ஏன் சார் இப்படி ஒடிச்சு போட்டுக்கிட்டே போறீங்க?ன்னு கேட்டார்.

அதுக்கு அவர், என்னங்க பண்ணுறது, கடைல ஓடிச்சா கடைக்காரர் திட்டுறார், ஒடிக்காம வீட்டுக்குப் போனா, ஏன் ஒடிச்சுப் பாக்காம வாங்கி வந்தீங்கன்'னு வீட்ல திட்டுறாங்க, அதான்ங்க...!

******

இந்த வாரத்தின் காஃபி வித் கிட்டு பதிவு குறித்த தங்களது எண்ணங்களை பின்னூட்டம் வாயிலாக சொல்லுங்களேன்.  மீண்டும் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

திருவரங்கம்

11 ஏப்ரல் 2026