புதன், 22 பிப்ரவரி, 2017

ராகினி…



ராகினி – என்னவொரு இனிமையான பெயர்.  ராகத்திலிருந்து பிறந்தது ராகினி….. ஹிந்தி மொழி பேசும் பகுதிகளில் பல பெண்களுக்கு ராகினி என்ற பெயர் வைப்பதுண்டு.  ராகினி என்ற பெயருக்கு அன்பானவள் என்ற அர்த்தமும் உண்டு. நாம் இன்று பார்க்கப் போகும் ராகினி ஒரு பெண் அல்ல! சில மாதங்களுக்கு முன்னர் ஹிந்தி மொழியில் வந்த ராகினி எம்.எம்.எஸ். படம் பற்றிய பதிவும் அல்ல!  இது வேறு விஷயம். 

ராகினி என்பது ஹரியானா மாநிலத்தின் பாரம்பரியமான இசை.  முன்பெல்லாம் ராகினி என்றழைக்கப்படும் பாடல்கள் மூலம் பாரம்பரியக் கதைகள், புராணங்கள் ஆகியவற்றை மக்களுக்கு எடுத்துச் சொல்லும் வழியாக வைத்திருந்தார்கள்.  நமது ஊரில் நடக்கும் கதாகாலட்சேபம் மாதிரி, கதையும், நடுநடுவே பாடல்களும் என அருமையான வழியாக வைத்திருந்தார்கள். 

சமீபத்தில் அப்படி ஒரு காணொளி காண நேர்ந்தது.  பள்ளி மாணவிகள் சேர்ந்து பாடிய ஒரு ராகினி அது – கிருஷ்ண பகவான் சுதாமாவிடம், ”நீண்ட நாட்களுக்குப் பின்னர் வந்திருக்கிறாயே எப்படி இருக்கிறாய்?” என்று கேள்வி கேட்பது போல ஒரு பாடல்.  நீங்களும் கேளுங்களேன்…. ஹரியான்வி மொழியில் இருந்தாலும், உங்களுக்குப் புரியவில்லை என்றாலும் கேட்பதற்கு நன்றாகவே இருக்கும்.


ஆனால் சில காலமாக நமது தமிழகத்தில் அழிந்து வரும் நாட்டுப் புறக் கலைகளைப் போலவே ராகினியும் அழிந்து போனது – அதன் பாரம்பரியத்திலிருந்து வேறு பாதைக்கு மாறி விட்டது.  இப்போது ராகினி வேறு வடிவம் கொண்டுவிட்டது! இப்போது பாடப்படும் ராகினி பெரும்பாலும் ஆபாசத்தினை நோக்கி நகர்ந்து விட்டது.  ராகினி என்ற பெயரில் பாடலுடன் ஆடலும் சேர்ந்து கொண்டுவிட, ஆபாச அசைவுகளே அதிகமாக இருக்கும்படி செய்துவிட்டார்கள். 

அலுவலகத்தில் இருக்கும் நண்பர் ஒருவர் இப்படி ராகினி பாடி ஆடும் ஒரு பெண்ணின் நிகழ்ச்சிக்காக ஆயிரக்கணக்கில் செலவு செய்கிறார். சமீபத்தில் அப்படி ஒரு நிகழ்வில் பார்த்த ஒரு விஷயத்தினை ரொம்பவும் பெருமையுடன் சொல்லிக் கொண்டிருந்தார் – இப்போது மிகவும் பிரபலமாக இருக்கும் ராகினி பாடல்/ஆடல் நிகழ்ச்சி நடத்தும் பெண் சப்னா – அவருடைய நிகழ்ச்சிக்கு சென்றபோது ஒருவர் அந்தப் பெண்ணிடம் ”நான் உன்னை விரும்புகிறேன், ஆனால் வேறு பெண்ணுடன் திருமணம் ஆகிவிட்டது…. நான் உன்னை விரும்பியதற்காக, இதோ ஒரு லட்சம் உனக்குத் தருகிறேன்…..” என்று ஒரு லட்ச ரூபாய் கொடுத்தாராம். கூட்டத்தில் ஆரவாரம்…. அடுத்த நிமிடம், இன்னுமொரு ரூபாய் கட்டு எடுத்து, இப்போதும் உன்னை விரும்புகிறேன், இந்தா இன்னுமொரு லட்சம்!” என்று கொடுத்திருக்கிறார்!

பொதுவாகவே வட இந்தியாவில் நடனமாடும்போது, ரூபாய் நோட்டுகளை நடனமாடுபவர் மீது அபிஷேகம் செய்வது பரவலான ஒன்று. அதுவும் பெண் ஆடினால் போதும் ரூபாய் நோட்டுகளை அள்ளி விடுவார்கள் – அதற்காகவே புதிய ரூபாய் நோட்டுகள் வங்கியிலிருந்து மாற்றுபவர்கள் உண்டு. திருமண ஊர்வலமான bபராத் சமயத்தில் சாலையில் நடனமாடுபவர்கள் மீது இப்படி வீசும் நோட்டுகளை எடுத்துக் கொள்ள பெரும் போட்டியே நடக்கும்! திருமண நிகழ்விலேயே இப்படி என்றால் விரச/ஆபாச நடனமென்றால் சும்மா இருப்பார்களா?

மேலே சொன்ன அலுவலக நண்பர், நடனமாடிய சப்னா மீது ஆறாயிரம் ரூபாய் அள்ளி வீசிவிட்டு வந்ததை ரொம்பவும் பெருமையாகச் சொல்லிக் கொண்டிருந்தார். நிகழ்ச்சிக்கான நுழைவுக் கட்டணம் தனி! இத்தனைக்கும் அவருக்குத் திருமணம் ஆகி மூன்று குழந்தைகளும் உண்டு. அதில் இரண்டு பெண்கள்!

இணையத்திலும் ஹர்யான்வி ராகினி எனத் தேடினாலே சப்னாவின் காணொளிகள் தான் வருகிறது.  பாரம்பரிய கலைகள் கொஞ்சம் கொஞ்சமாக அழிந்து வருவது சோகம் தான்…… அது தமிழகக் கலைகளாக இருந்தாலும் சரி, இந்தியாவின் எந்தப் பகுதி கலையாக இருந்தாலும் சரி….  இதை எல்லாம் எப்போது புரிந்து கொள்ளப் போகிறோம்…..

நாளை வேறு ஒரு பதிவில் சந்திக்கும் வரை…..

நட்புடன்

வெங்கட்

புது தில்லி.

செவ்வாய், 21 பிப்ரவரி, 2017

கொல்கத்தா – விக்டோரியா நினைவிடம் – இந்திய மக்களின் செலவில்!


ஏழு சகோதரி மாநிலங்கள் பயணம் – பகுதி 98

இந்தப் பயணக் கட்டுரையின் முந்தைய பகுதிகளைப் படிக்கவில்லையா.....  இதோ உங்களுக்காகவே அந்தப் பகுதிகளின் சுட்டிகளுக்கான ஒரு Drop Down Menu, வலைப்பூவின் வலது ஓரத்தில் “ஏழு சகோதரிகள்” என்ற தலைப்பின் கீழே இருக்கிறது.

சற்றே இடைவெளிக்குப் பிறகு பயணத்தொடரின் அடுத்த பகுதிக்கு வருகிறேன்…. அதனால் சென்ற பதிவின் கடைசி சில வரிகள் உங்கள் நினைவூட்டலுக்காக….

பெரும்பாலும் ஆடுகளை மட்டுமே இங்கே பலி கொடுக்கிறார்கள். ஆட்டின் பின்பக்கத்தில் சிலர் ஆட்டைப் பிடித்துக் கொள்ள பெரிய கத்தியால் ஒரே வெட்டு… கழுத்தும் உடலும் தனியாகும். வெட்டிய பிறகு சில நிமிடங்கள் வரை துடிக்கும் உடலைப் பார்க்காமல் வெளியே வருவார்கள் அனைவரும் – ஆடு இறந்தது உறுதியான பிறகு அந்த ஆட்டின் தலை மீது சூடம் வைத்து காளிக்கு ஒரு ஆரத்தி…. அதன் பிறகு ஆட்டின் தலை பூஜாரிக்கு – உடல் பகுதி முழுவதும் பலி கொடுத்தவருக்கு… அதை அவர் கிராமத்து மக்கள் அனைவருக்கும் பகிர்ந்து கொடுக்கிறார். இப்படித்தான் மிருக பலி நடக்கும் என்பதை விவரித்து நண்பர் சொன்னதைக் கேட்டு சில நிமிடங்கள் ஆடிப்போயிருந்தேன் நான்.  கொடுமையான விஷயம்……

எப்போதுமே பக்தர்கள் கூட்டம் அதிகமாகவே இருக்கிறது இந்த காளி Gகாட் கோவில். காலை ஐந்து மணி முதல் மதியம் இரண்டு மணி வரையும், மாலை ஐந்து மணி மணி முதல் இரவு பத்தரை மணி வரையும் கோவில் திறந்திருக்கும். முடிந்த போது பார்த்து வரலாம். 

கோவில், கோவில் பகுதிகளில் இப்படி பல விதக் காட்சிகளைப் பார்த்து அங்கிருந்து புறப்பட்டோம்.  அடுத்ததாய் நாங்கள் சென்ற இடம் என்ன என்பதை அடுத்த பகுதியில் சொல்கிறேன்…..

இதோ அடுத்த பகுதிக்கு வந்துவிட்டோம்…..

விக்டோரியா மெமோரியல் ஹால்...

கொல்கத்தா நகர் என்றதுமே பலருக்கும் நினைவுக்கு வருவது ராணி விக்டோரியாவின் நினைவிடம்.  நம்மை இரண்டு நூற்றாண்டுகளுக்கு மேல் ஆண்ட பிரிட்டிஷ் சாம்ராஜ்யத்தினைச் சேர்ந்த ஒருவரின் நினைவிடமாக இருந்தாலும், இந்த கட்டிடத்தினுள் பல அரிய பொருட்களையும் சேமித்து வைத்திருக்கிறார்கள்.  கொல்கத்தா சென்றால் பார்க்க வேண்டிய இடங்களும் மிகவும் முக்கியமான இடத்தில் இருப்பது இந்த விக்டோரியா மெமோரியல்.  

கம்பீரமாக வீற்றிருக்கும் ராணி....

கட்டிடம் முழுவதுமே மார்பிள் கற்களால் மிகவும் அற்புதமாக வடிவமைக்கப்பட்ட இந்த விக்டோரியா மேமோரியல் ஹால், 1901-ஆம் ஆண்டு ஜனவரி மாதம் இறந்து போன ராணி விக்டோரியாவின் நினைவாக அமைக்க முடிவு செய்தவர் அப்போதைய வைஸ்ராயாக இருந்த லார்டு கர்சன். 6 ஃபிப்ரவரி 1901 அன்று நடந்த ஒரு கூட்டத்தில் இந்த முடிவு எடுக்கப்பட்டது. விக்டோரியா ராணியின் நினைவிடமாக மட்டுமல்லாது இந்தியாவின் பழம்பெருமையையும் பறைசாற்றும் அருங்காட்சியகமாகவும் அமைக்க வேண்டும் என்று முடிவு செய்யப்பட்டதாம்…. இதில் ஒரு சூட்சுமமும், திட்டமும் உண்டு! அது….

விக்டோரியா மெமோரியல் ஹால் பகுதியில் அமைந்த பூங்காவும் நீர்நிலையும்...

இந்த நினைவிடத்தினைக் கட்ட தேவையான பணத்தினைத் திரட்ட Indian Memorial Fund என்ற ஒன்றை ஏற்படுத்தி மக்களிடமிருந்தே வசூல் வேட்டை நடந்தது. அப்படி வசூலிக்கப்பட்ட தொகை ஒரு கோடியே ஐந்து லட்ச ரூபாய்!  அதாவது 1901-ல் – இன்றைக்கு கிட்டத்தட்ட 116 வருடங்களுக்கு முன்னர்! அதன் இன்றைய மதிப்பு எவ்வளவாக இருக்கும் என்பதை உங்களுடைய கற்பனைக்கே விட்டுவிடுகிறேன்!  இங்கிலாந்து ராணிக்கு நினைவிடம் அமைக்க இந்திய மக்களிடமிருந்தே பண வசூல்! அப்போதைய வேல்ஸ் இளவரசரான ஐந்தாம் ஜார்ஜ் அவர்கள் 4 ஜனவரி 1906 அன்று அடிக்கல் நாட்ட, விக்டோரியா மெமோரியல் ஹால் கட்டி முடிக்க கிட்டத்தட்ட பதினைந்து வருடங்கள் ஆனது!  1921-ஆம் ஆண்டில் மக்களின் பார்வைக்கு திறந்து வைக்கப்பட்டது….

விக்டோரியா மெமோரியல் ஹால்...
வெளிப்புற மார்பிள் சிற்பங்கள்....

அழகான கட்டிடக் கலை, உள்ளே இருக்கும் பலவித சரித்திரப் புகழ் சொல்லும் பொருட்கள், வித்தியாசமான கலைப் பொருட்கள், பழங்கால புத்தகங்கள் என பார்க்க வேண்டிய நிறைய விஷயங்கள் என கிட்டத்தட்ட 30000 பொருட்கள் இங்கே இடத்தில் உண்டு. கிட்டத்தட்ட 57 ஏக்கர் பரப்பளவில் அமைந்திருக்கும் இந்த நினைவிடம் திங்கள் கிழமைகள், அரசு விடுமுறை தினங்கள் தவிர வருடம் முழுவதும் திறந்திருக்கும் இந்த இடத்தின் பணி நேரம் காலை 10 மணி முதல் மாலை ஐந்து மணி வரை.  இங்கே 21 பூங்காக்களும் அமைந்திருக்கின்றன. நினைவிடம் அமைந்திருக்கும் முகவரி 1, Queen’s Way, Kolkata. இங்கே உள்ளே சென்று பார்க்க நுழைவுக்கட்டணமும் உண்டு – இந்தியர்களுக்கு ரூபாய் 20, வெளிநாட்டவர்களுக்கு ஒரு பூஜ்ஜியம் சேர்த்து ரூபாய் 200/-. தவிர கேமராவிற்கும் கட்டணம் உண்டு!

விக்டோரியா மெமோரியல் ஹால்...
வேறு நுழைவாயில்!

விக்டோரியா மெமோரியல் ஹால் முன்னர் நண்பர்களுடன்... 


விக்டோரியா மெமோரியல் ஹால்...
வேறொரு கோணத்தில்....


விக்டோரியா மெமோரியல் ஹால்...
குறுக்கு வெட்டுப் பார்வையாக.....


விக்டோரியா மெமோரியல் ஹால்...
காத்திருக்கும் குதிரை வண்டிகள்....


விக்டோரியா மெமோரியல் ஹால்...
முன்புறத்தில் இருக்கும் இரட்டை சிங்கங்களில் ஒன்று!


விக்டோரியா மெமோரியல் ஹால்...
சுவர் சிற்பங்களில் ஒன்று....

விக்டோரியா மெமோரியல் ஹால்...
மார்பிள் சிற்பங்களில் ஒன்று.....


முழுவதும் பார்க்க நினைப்பவர்கள் அரை நாளாவது இந்த இடத்திற்காக ஒதுக்குவது நல்லது. கொல்கத்தா சென்றால் நிச்சயம் சென்று பார்த்து வரலாம்! விக்டோரியா மெமோரியல் ஹால் வாசலில் நிறைய குதிரை வண்டிகள் நிறுத்தி வைத்திருக்கிறார்கள் – அதில் அமர்ந்து ராஜ பவனி வரலாம் – மனதுக்குள் உங்களை ராஜாவாகவோ, அல்லது ராணியாகவோ நினைத்துக் கொண்டு என்பதையும் சேர்த்துக் கொள்ளலாம்! நாங்கள் சென்றபோது நிறைய குதிரைக்காரர்கள் எங்களை சூழ்ந்து கொண்டார்கள் – குதிரை ஒன்று எங்களைப் பார்த்து மிரள, எதற்கு அதைப்படுத்த வேண்டும் என, நாங்கள் எங்கள் வாகனத்தில் பவனி வந்தோம்!

ராணி விக்டோரியா மெமொரியல் ஹால் பார்த்த பிறகு நாங்கள் சென்ற இடம் எது, அங்கே என்ன பார்த்தோம் என்பதை அடுத்த பகுதியில் சொல்கிறேன்……

தொடர்ந்து பயணிப்போம்.....

நட்புடன்

வெங்கட்.
புது தில்லி.

வெள்ளி, 17 பிப்ரவரி, 2017

ஃப்ரூட் சாலட் 193 – மக்காச் சோள உணவு – காயம் – மனிதனும் மரணமும் – கவிதை எழுத அழைப்பு


இந்த வார செய்தி:

இந்த மாதத்தின் முதல் பதிவாக புகைப்படக் கவிதைகள் – `கவிதை எழுத அழைப்பு - மின்னூலாக்க முயற்சி….. என்ற பதிவினை வெளியிட்டு, நான் எடுத்த புகைப்படங்களுக்குப் பொருத்தமான கவிதைகளை எழுதி அனுப்பும்படி கேட்டிருந்தேன்.  இந்த மாதத்தின் கடைசி வரை கவிதைகள் எழுதி அனுப்பலாம் எனச் சொல்லி இருந்தது உங்களுக்கு நினைவில் இருக்கலாம்.  இந்த அழைப்பினை ஏற்று சில கவிதைகள் எனது மின்னஞ்சலுக்கு வந்திருக்கின்றன.  மேலும் கவிதைகள் எழுதி அனுப்ப விருப்பமிருப்பவர்கள் இந்த மாதக் கடைசிக்குள் எழுதி அனுப்பினால் தொகுத்து மின்புத்தகமாக வெளியிட வசதியாக இருக்கும்.  எனது வலைப்பூவில் வெளியிட்ட எந்தப் புகைப்படத்திற்கு வேண்டுமென்றாலும் கவிதை எழுதலாம்…. வந்திருந்த கவிதைகளில் ஒன்று கீழே…..



இந்தத் தோடு யார் வாங்கித் தந்தா?
இந்த சட்டை?
உன் கழுத்து மணி அழகாயிருக்கே...
சாக்லேட்டா சாப்பிடுகிறாய்?
உருட்டி விழிக்கும் கண்களோடு
வாய் திறவாமல் மென்று கொண்டிருக்கிறாய்
என் பொறுமையை.

---------- நிலாமகள், நெய்வேலி.

இந்த வார குறுஞ்செய்தி:

காயப்படுத்தியவர்கள் மறந்து விடலாம், காயப்பட்டவர்கள் என்றும் மறப்பதில்லை – காயங்களையும் அதன் வலிகளையும்…..

இந்த வார முகப்புத்தக இற்றை:

ஆறு நாள் வேலை செய்துவிட்டு, ஒரே ஒரு நாள் வீட்டில் ஓய்வு எடுக்க நினைக்கும் ஆண்……

ஆறு நாள் வீட்டிற்குள்ளேயே வேலை செய்து விட்டு ஒரு நாள் வெளியே செல்ல நினைக்கும் பெண்….

இந்த இருவருக்கும் நடக்கும் சண்டை தான் சண்டே!

வேலைக்கும் சென்று வீட்டு வேலையும் பார்க்கும் பெண்களின் நிலை பற்றி என்ன சொல்ல!

இந்த வார காணொளி:

என்னலே நடக்குது இங்கே!

ஆண்களும் ப்யூட்டி பார்லர் சென்றபோது....


இந்த வார WhatsApp:

கணவரை அடிப்பதில் இந்திய பெண்களுக்கு மூன்றாவது இடம் – பத்திரிகை செய்தி!

ஒட்டுமொத்த ஆண்களின் குரல் [இல்லைன்னா மதுரைத் தமிழனோட குரலா?]: “அடேய்… இதெல்லாம் ஏண்டா வெளியே சொல்லுறீங்க… இனி முதல் இடம் வர வரைக்கும் அடிப்பாளுகடா….”

இந்த வார உணவு:



Bhutte ke kees: Bhutte எனும் ஹிந்தி வார்த்தை சோளத்தைக் குறிப்பது.  மக்காச் சோளம் வைத்து செய்யப்படும் இது, மத்தியப் பிரதேசத்தில் ரொம்பவும் பரவலாகச் சாப்பிடப் படும் ஒரு உணவு வகை. சமீபத்தில் சென்று வந்த ஹுனர் ஹாட், நேற்றும் மீண்டும் சென்ற போது இந்த Bhutte ke kees சாப்பிட்டுப் பார்த்தேன்! ஒரு முறை முயற்சிக்கலாம்!  இணையத்தில் தேடிப்பாருங்கள் – எப்படிச் செய்வது என்ற செய்முறைகள் இருக்கின்றன….. 

இந்த வார புகைப்படம்:

மகள் ரோஷ்ணியின் சமீபத்திய இரண்டு கணேஷா ஓவியங்கள்…



படித்ததில் பிடித்தது:

மரணம்: வா, மனிதா….  நீ கிளம்புவதற்கான நேரம் வந்து விட்டது…

மனிதன்: “இப்பவேவா? இவ்வளவு சீக்கிரமாகவா? என்னுடைய திட்டங்கள் என்ன ஆவது?”

மரணம்: “மன்னித்துவிடு மனிதா… உன்னைக் கொண்டு செல்வதற்கான நேரம் இது…”

மனிதன்: நான் இரவு பகலாக, உழைத்து சேர்த்த எனது பொருளாதாரம்….

மரணம்: நீ கூறியவை அனைத்தும் உன்னுடையதல்ல…. அவைகள் பூமியில் நீ வாழ்வதற்கு…..

மனிதன்: என்னுடைய திறமைகள்…..

மரணம்: அவை உன் சூழ்நிலைகளுடன் சம்பந்தப்பட்டது.

மனிதன்: அப்படி என்றால், என் மனைவி, மக்கள் மற்றும் உற்றார் உறவினர்…

மரணம்: அவர்கள் உன் இதயத்துடன் சம்பந்தப்பட்டவர்கள்….

மனிதன்: எனது உடல்?

மரணம்: அது இந்த மண்ணுக்குச் சொந்தமானது.

மனிதன்: கண்களில் நீர் வழிய, “என்னுடையது என்று எதுவும் இல்லையா?”

மரணம்: நீ வாழ்ந்த ஒவ்வொரு நொடி மட்டுமே உன்னுடையது. நீ செய்த தர்மம், பிறருக்கு நன்மை செய்தது, பிறர் துன்பத்தில் பங்கு கொண்டது, பிறருக்கு தீங்கு செய்யாமல் இருந்தது போன்ற நல்ல செயல்கள், மற்றும் நீ செய்த பாவ கருமங்கள்… இவை மட்டுமே உன்னுடையது. மற்ற எதையும் இறுதிக்காலத்தில் நீ உன்னுடன் கொண்டு போக முடியாது…..

வாழும் காலம் கொஞ்சமே…. மனிதா நீ மாறிவிடு, உன் மறு உலகத்திற்காக…..

மீண்டும் அடுத்த வெள்ளியன்று வேறொரு ஃப்ரூட் சாலட்-ல் சந்திக்கும் வரை…..

நட்புடன்

வெங்கட்.

புது தில்லி.

செவ்வாய், 14 பிப்ரவரி, 2017

பஞ்ச துவாரகா – பயணக்கட்டுரைகள் - புஸ்தகா மின்புத்தகமாக…..

அன்பின் நண்பர்களுக்கு,


தமிழகத்தில் நிலவும் சூழலில் வலைப்பக்கம் வரும் நண்பர்களின் எண்ணிக்கை கணிசமாகக் குறைந்திருக்கிறது.  எல்லா இடங்களிலும் VKS மற்றும் OPS பற்றிய தகவல்களும், சித்திரங்களும், கார்ட்டூன்களும் என எல்லாவற்றிலும் அரசியல் நெடி! இந்தப் பதிவு வெளியிட்ட சில மணி நேரங்களுக்குள் இந்தச் சூழலில் இருந்து விடுதலை கிடைக்குமா என்பது தெரிந்து விடும். என்ன நடக்கப் போகிறது என பலரும் காத்திருக்கும் வேளையில் இந்த விஷயங்களிலிருந்து கொஞ்சம் மாற்றாக ஒரு பதிவு!

எனது வலைப்பூவில் பயணக்கட்டுரைகள் எழுதி வருவது உங்களுக்குத் தெரிந்த விஷயம் தான்.  எனது பயணக்கட்டுரைகளைத் தொகுத்து புத்தகமாக வெளியே கொண்டு வர வேண்டும் என பலரும் என்னைத் தொடர்ந்து கேட்பது வழக்கம்.  அவர்களுக்கு பதிலாக ஒரு புன்சிரிப்பை மட்டுமே அளித்து வந்திருக்கிறேன்.  புத்தகமாகத் தான் கொண்டு வரவில்லை, மின்புத்தகமாக கொண்டு வரலாமே எனவும் கேட்க, மூன்று மின்புத்தகங்கள் இது வரை வெளிவந்திருக்கின்றன. 

சமீபத்தில் புதுக்கோட்டை நகரில் 18 ஜனவரி 2017 அன்று நடந்த முதலாவது மின்னூலாக்க முகாம் பற்றி கேள்விப்பட்டிருப்பீர்கள்.  புதுக்கோட்டை நண்பர்களின் நல் முயற்சியால் கிட்டத்தட்ட 100 புத்தகங்கள் மின்னூலாக மாற்ற வழி செய்திருந்தார்கள்.  அடுத்த மின்னூலாக்க முகாம் வருகிற 25 ஃபிப்ரவரி 2017 அன்று சென்னையில் நடக்க இருக்கிறது. இந்த முகாம்களின் மூலம் மின்புத்தகங்களை வெளியிட வழிசெய்யும் புஸ்தகா நிறுவனத்தின் மூலமாகத் தான் எனது நான்காவது மின்னூலாக “பஞ்ச துவாரகா” நேற்றைய தினம் வெளிவந்திருக்கிறது.



புஸ்தகா டிஜிட்டல் மீடியா மூலம் தமிழ, கன்னடம், தெலுங்கு, மலையாளம் மற்றும் ஆங்கில மின்புத்தகங்கள் வெளியிடுகிறார்கள். இந்த தளத்தில் மின்புத்தகங்களை விலை கொடுத்து வாங்கிக் கொள்ள முடியும் என்பதோடு இன்னுமொரு வசதியும் உண்டு.  அது மின்புத்தகங்களை வாடகைக்கு எடுத்துக் கொள்ளும் வசதி. தலைநகரின் கரோல் பாக் பகுதியில் இருந்த போது Lending Library மூலம் தான் நிறைய புத்தகங்கள் படித்திருக்கிறேன். இந்த வசதி இப்போது இணையத்திலும் கிடைப்பது நல்ல விஷயம். 

பல முன்னணி எழுத்தாளர்களின் மின்புத்தகங்கள் தவிர வலையுலக நண்பர்களின் புத்தகங்களும் இந்த தளத்தின் மூலம் நீங்கள் தரவிறக்கம் செய்தோ, வாடகைக்கு எடுத்தோ படிக்க முடியும்.  இந்த தளத்தின் மூலம் எனது மின்புத்தகமான “பஞ்ச துவாரகா” புத்தகமும் வந்திருக்கும் தகவலை உங்கள் அனைவருடனும் பகிர்ந்து கொள்வதில் மகிழ்ச்சி.  பஞ்ச துவாரகா மின்புத்தகம் பற்றிய தகவல்கள்/விவரங்கள் கீழே…. 



புத்தகத்தினை வாங்க/வாடகைக்கு எடுக்க இங்கே சொடுக்கலாம்!

இந்தப் புத்தகத்தில் பஞ்ச துவாரகா என அழைக்கப்படும் ஐந்து துவாரகா – குஜராத்/ராஜஸ்தான் மாநில கோவில்களுக்கு செல்பவர்களுக்கு நல்ல வழிகாட்டியாக இருக்கும்.  நானும் நண்பர்களும் சென்ற போது எங்களுக்குக் கிடைத்த அனுபவங்கள், பார்த்த இடங்கள், அந்த இடங்களில் எடுத்த புகைப்படங்கள், சாப்பிட என்ன கிடைக்கும், பயணம் செய்ய என்ன தேவை போன்ற பல விவரங்கள் இப்புத்தகத்தில் உண்டு. 

இந்தப் புத்தகத்திற்கு முன்னுரை எழுதித் தந்த ரஞ்சனிம்மா அவர்களுக்கு எனது மனம் நிறைந்த நன்றி.  தனது பணிச் சுமைகளுக்கு இடையே மிகச் சிறப்பான ஒரு முன்னுரை எழுதித் தந்திருக்கிறார்கள்.  புத்தகத்தினை வாங்கி/வாடகைக்கு எடுத்துப் படிக்கப் போகும் அனைவருக்கும் எனது நெஞ்சார்ந்த நன்றி……. 

மீண்டும் ச[சி]ந்திப்போம்……

நட்புடன்

வெங்கட்

புது தில்லி.   

ஞாயிறு, 12 பிப்ரவரி, 2017

இலை அடை – லிட்டி சோக்கா – ஹுனர் ஹாட்!



ஹிந்தியில் हुनर என்ற வார்த்தை ஒன்று உண்டு. ஆங்கிலத்தில் இதற்கு ஈடாக Art, Skill, Talent, Merit என்று பல வார்த்தைகள் உண்டு.  கலை, திறமை என தமிழிலும் அர்த்தம் சொல்லலாம்… நேற்றிலிருந்து தலைநகர் தில்லியில் हुनर हाट என்ற பெயரில் சில நாட்களுக்கு உணவு மற்றும் கலைப்பொருட்களின் திருவிழா! हाट என்ற ஹிந்தி சொல்லுக்கு Mart/அங்காடி என்ற அர்த்தம்.  மத்திய அரசின் Ministry of Minority Affairs முன்னின்று உணவு மற்றும் கலைத்திறமைகளை பரவச் செய்ய இந்த மாதிரி அங்காடிகளை தலைநகரில் சில நாட்களுக்கு நடத்துகிறார்கள்.

நேற்று தான் துவங்கியது என்றாலும், அலுவலக நாட்களில் அங்கே செல்வது முடியாத விஷயம் என்பதால் நேற்றே நானும், நண்பர் பத்மநாபனும் சென்று அங்கே இருக்கும் அங்காடிகள் அனைத்தையும் பார்த்து வந்தோம்.  நிறைய உணவு வகைகள், விதம் விதமான கலைப் பொருட்கள், என இந்தியாவின் பல மாநிலங்களிலிருந்தும் திறமைசாலிகள் வந்திருந்து இங்கே கடை வைத்திருக்கிறார்கள்.  பெரும்பாலான உணவு வகைகள் அசைவ உணவு தான் என்றாலும், சைவ உணவுகள் சிலவும் இருந்தன.  அப்படிச் சாப்பிட்ட இரண்டு உணவு வகை – பீஹார் மாநிலத்தின் லிட்டி சோக்காவும், கேரளத்தின் இலை அடையும்! 

அலிகர் நகரத்தின் புகழ்மிகு பூட்டுகள் – வித்தியாசமான வடிவங்களில், ராஜஸ்தானின் மீனாகரி மாலைகள், ராஜஸ்தானின் லாக் வேலைப்பாடுகள், உத்திரப் பிரதேசத்தின் பித்தளை வேலைப்பாடுகள், கண்ணாடி பொம்மைகள் என பலவும் இங்கே காணக் கிடைத்தது. ஒவ்வொன்றிலும் கலை நுணுக்கமும், வேலைப்பாடும் காணும்போது நமது தேசத்தின் எண்ணிலடங்கா திறமைகளை நினைத்து பூரிப்படைந்தாலும், அவற்றில் பல அழிந்து வரும் கலைகள் என்பதை நினைக்கும் போது வருத்தம் தான் மிஞ்சுகிறது. புகைப்படங்களாகவது இருக்கட்டுமே என அங்கே எடுத்த புகைப்படங்களை சேமித்து வைத்திருக்கிறேன்.

ஹுனர் ஹாட் சென்ற போது அலைபேசியில் எடுத்த சில புகைப்படங்கள் மற்றும் ஒரு காணொளி இந்த ஞாயிறில் உங்களுடன் பகிர்ந்து கொள்வதில் மகிழ்ச்சி…..


வித்தியாசமான பூந்தொட்டிகள் மற்றும் கலைப்பொருட்கள் பார்வைக்கு....


தண்ணீர் எடுத்து வரும் பாவை.... 


வித்தியாசமான பூட்டுகள்....


சிங்கம் மற்றும் ஆமை வடிவ பூட்டுகள்.....


ஒட்டக வடிவிலும் ஒரு பூட்டு...


கண்ணாடி பார்க்கும் பாவை - ஆனால் கண் மட்டும் மேல்நோக்கி இருப்பது சற்றே இடிக்கிறது.....


Lamp Shades and Domes...


கண்ணாடியில் உருவங்கள்.....


மீனாகரி என அழைக்கப்படும் கைவேலைப்பாடுகள்....


மெழுகுவர்த்தி ஸ்டாண்ட்.....


துணியில் ஓவியம்.....


குஜராத்திலிருந்து தாமிர மணிகள்....


ராஜஸ்தானின் துணி பொம்மைகள்.....


தயாராகும் லிட்டி.....


லிட்டி சோக்கா - சுடச் சுட, கார சாரமாய்! எடுத்துக்கோங்க!


கோலாட்டம் - துணி ஓவியமாக!


லாக் வேலைப்பாடு செய்த ஒரு பொருள்.....  இது என்ன என பின்னூட்டத்தில் சொல்லுங்களேன்...  நாளை மாலை விடை சொல்லுகிறேன்!


இரும்பு வாணலியைத் திருப்பிப் போட்டு அதில் செய்யப்படும் ரொட்டி!

என்ன நண்பர்களே புகைப்படங்கள்/காணொளியை ரசித்தீர்களா? பின்னூட்டத்தில் சொல்லுங்களேன்…

மீண்டும் ச[சி]ந்திப்போம்…

நட்புடன்

வெங்கட்
புது தில்லி.