சினிமா - மண்டேலா - யோகி பாபு

அன்பின் நண்பர்களுக்கு, இனிய காலை வணக்கம். இந்த நாளில் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

நேற்று வெளியிட்ட கதம்பம் பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

IF SPEAKING KINDLY TO PLANTS CAN HELP THEM GROW, JUST IMAGINE WHAT SPEAKING KINDLY TO HUMANS CAN DO!

******

திரையரங்கத்திற்குச் சென்று சினிமா - எந்த மொழியாக இருந்தாலும் சரி - பார்த்து நீண்ட மாதங்கள்/வருடங்கள் ஆகிவிட்டது. கடைசியாக நான் பார்த்த படம் எது என்று என்னிடம் கேட்டால் நிச்சயம் பதில் கிடைக்காது - நினைவில் இருந்தால் தானே?  எப்போதாவது பொழுதைப் பிடித்து தள்ள வேண்டியிருக்கும் சமயத்தில், யூட்யூபில் எதையாவது பார்த்துக் கொண்டிருப்பேன் - அது கூட சினிமாவாக இருக்காது - விளம்பரங்கள், குறும்படங்கள், நகைச்சுவை காட்சிகள் என்றே இருக்கும்!  சமீபத்தில் பரிவை குமார் அவர்களின் பதிவில் “மண்டேலா” என்ற சினிமா குறித்து எழுதி இருந்தார். புதிய இயக்குனர் ஒருவரின் படம் என்றும், நன்றாக இருக்கிறது என்றும் எழுதி இருக்க, பார்க்கலாம் என்று தோன்றியது.  தியேட்டர் சென்று பார்க்க விருப்பமில்லை - அதுவும் இப்போதுள்ள சூழலில் அலுவலகம் தவிர வேறெங்கும் சென்று வருவதைத் தவிர்த்து வேறெங்கும் செல்வதில்லை.

யூட்யூபில் தேட, மண்டேலா முழு படமும் இருந்தது.  புதிய படமாக இருந்தாலும் அதற்குள்ளாகவே யூட்யூபில் இருக்கிறதே என்ற நினைவுடனே பார்க்க ஆரம்பித்தேன்.  நடுநடுவே சமையல், வீடு சுத்தம் செய்தல் என்ற வேலைகளும் நடந்தது - யூட்யூபில் இது ஒரு வசதி!  நடுவே போரடித்தால் நிறுத்திவிட்டு மற்ற வேலைகளைச் செய்யலாம்! படத்தில் பிரதான கதாபாத்திரம் யோகிபாபு - இளிச்சவாயன் என்ற பட்டப் பெயர் அவருக்கு - அதனை ஆங்கிலத்தில் ”ஸ்மைல்” என்று வைத்துக் கொண்டு அவரது சூரங்குடி கிராமத்தில் முடி திருத்துபவராக இருக்கிறார்.  கூடவே ஊர்காரர்கள் சொல்லும் அனைத்து வேலைகளும் செய்ய வேண்டும் - அதற்கு பணமாகக் கிடைப்பதை விட, பொருட்களாக கிடைக்கும் கூலி தான் - பல சமயங்களில் அது கூடக் கிடையாது!  இளிச்சவாயனாகவே ஊருக்குள் சுற்றி வருகிறார்.  அவருக்கு உதவியாளாக, “கிருதா” என்ற பட்டப் பெயருடன் ஒரு இளைஞன்.  

சூரங்குடி கிராமத்தில் இரண்டு பகுதிகள் - வடக்கூர், தெக்கூர்! இரண்டு பகுதி மக்களுக்கும் எப்போதும் தகராறு - அடிதடி, ஜாதிச் சண்டை என இருக்கிறது.  கிராமப் பஞ்சாயத்து தலைவர் இரண்டு பகுதிகளையும் சச்சரவில்லாமல் வைத்துக் கொள்ள இரண்டு பக்கத்திலிருந்தும் ஒவ்வொரு ஜாதியிலிருந்தும் பெண்ணைத் திருமணம் செய்து கொண்டு ஆளுக்கு ஒரு பிள்ளை என இருக்கிறார்.  ஆனாலும் இரு பகுதிகளுக்கும் சண்டை தீர்ந்தபாடில்லை.  பள்ளிக்கூடம், கழிப்பறை  என எதைக் கட்டினாலும் எங்கூர், எங்க ஜாதிக்காரனுக்குத் தான் முதலிடம் என்று சண்டை வர, கட்டிய பள்ளிக்கூடம், கழிப்பறை இரண்டுமே இடிக்கப்பட்டு பழையபடியே படிக்க வேறொரு ஊருக்கும், காலைக் கடன்களுக்கு காட்டுக்குள்ளும் செல்கிறார்கள். 

பஞ்சாயத்துத் தலைவரான ஊர் பெரியவர், இந்தச் சண்டைகளை தீர்த்து வைக்க எத்தனை முயன்றும் முடியவில்லை. கழிப்பறைக்கான சண்டையில் அவர் உடல்நிலை பாதிக்க,  பஞ்சாயத்துத் தலைவர் தேர்தல் வருகிறது - அதே சமயத்தில்.  இரு மகன்களும் தேர்தலில் நிற்கிறார்கள்.  ஓட்டுகளை எண்ணி எண்ணி, 20 ரூபாய் நோட்டு கொடுத்து, 2000 தருவேன் என்பது, தாலி மீது சத்தியம் செய்ய வைத்து 2000 ரூபாய் கொடுப்பது என எல்லா அரசியல் லீலைகளும் நடக்கிறது.  இருவருமே ஓட்டுக் கணக்கு பார்த்துக் கொண்டே இருக்கிறார்கள். இருவருக்குமே சம ஓட்டு என்ற நிலை இருக்கும்போது தான் தெரிய வருகிறது “ஸ்மைல்” எனும் இளிச்சவாயன் வாக்காளர் அடையாள அட்டை வாங்கி இருப்பது!  அதன் பிறகு ஆரம்பிக்கிறது நாற்காலிக்கான போட்டி அவலங்கள்!

ஒப்புக்குச் சப்பாணியாக, கதாநாயகி பாத்திரத்தில் ஒரு நடிகை - உள்ளூர் தபால் நிலையப் பணியாளராக!  அவர் தான் ஸ்மைல்-க்காக அஞ்சலகத்தில் கணக்குத் துவங்க அடையாள அட்டைகளை ஏற்பாடு செய்வது, அவனுக்கு “நெல்சன் மண்டேலா” என்று பெயர் வைப்பது, அவ்வப்போது காதலுடன் பார்ப்பது :), உதவியாளர் கிருதாவுக்கு அடிபட்ட போது மருத்துவ உதவிகள் செய்வது, மண்டேலா தவறான வழியில் வாக்கை விலை பேசுவது போன்ற வழியில் போகும்போது தட்டிக் கேபது என எல்லாம் செய்கிறார்.  மொத்தத்தில் அவருக்குக் கிடைத்த சிறு வாய்ப்பைச் சரியாக பயன்படுத்திக் கொண்டிருக்கிறார்.  

ஸ்மைல்/மண்டேலா பாத்திரத்தில் வரும் யோகிபாபு தனக்குக் கிடைத்த வாய்ப்பினை நன்றாக பயன்படுத்திக் கொண்டு இருக்கிறார் என்று தான் சொல்ல வேண்டும் - கூப்பாடு இல்லாத சின்னச் சின்ன நகைச்சுவை பஞ்ச், தனது உதவியாளர் அடிபட்டுக் கிடக்கும்போது ஊரில் பலரிடம் உதவி கேட்டபடி அலையும்போது போன்று சில சில இடங்களில் மிளிர்கிறார்.  கடைசியில் அவரது வாக்கை சரியானபடி பயன்படுத்திக் கொண்டாரா, தேர்தல் என்னவாயிற்று, ஊர் ஒன்று சேர்ந்ததா போன்ற விஷயங்களை நீங்களும் சினிமா பார்த்து தெரிந்து கொள்ளலாம்!  என்ன நீங்கள் தியேட்டரிலோ அல்லது தொலைக்காட்சிப் பெட்டியிலோ பார்க்க வேண்டியிருக்கும்.  யூட்யூபில் அந்த இணைப்பை இப்போது எடுத்து விட்டார்கள் - காப்பி ரைட் பிரச்சனைகளால்!

எனக்கு படத்தில் மிகவும் பிடித்த ஒன்று - யோகிபாபு அந்தப் பெரிய மரத்தில் படுத்து உறங்க கட்டி இருக்கும் தூளி போன்ற அமைப்பு!  இயற்கைச் சூழலில் அப்படி படுத்துக் கொண்டால் எப்படி இருக்கும் என்று தோன்றியது! அப்படிப் படுத்துக் கொண்டு இயற்கையை ரசித்தபடி இருக்கலாம் - என்ன என் உயரத்துக்கு தூளி அமைக்க வேண்டும் - அது தான் ஒரு கஷ்டம்! ஹாஹா...

******

நண்பர்களே, இன்றைய பதிவு குறித்த உங்கள் கருத்துகளை பின்னூட்டத்தில் சொல்லுங்கள். மீண்டும் நாளை வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

புது தில்லியிலிருந்து...