கல்யாண வைபோகமே - ஆதி வெங்கட்

அன்பின் நண்பர்களுக்கு, இனிய காலை வணக்கம். இந்த நாளில் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

நேற்று வெளியிட்ட பதிவினையும் இன்று காலை வெளியிட்ட பதிவினையும் படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

BEHIND YOU, ALL YOUR MEMORIES; BEFORE YOU, ALL YOUR DREAMS; AROUND YOU, ALL WHO LOVE YOU; WITHIN YOU - ALL YOU NEED!!!

******

இருபதாம் வருடத்தில் அடியெடுத்து!!

கிட்டு புவனா கல்யாண வைபோகமே!!

20 வயதில் திருமணமாகி டெல்லிக்கு பயணப்பட்ட போது அப்பா, அம்மா, தம்பியே உலகமாக நினைத்தேன். பின்பு கணவரால் ஈர்க்கப்பட்டு அவரே எனக்கு எல்லாமுமாக நினைக்கத் துவங்கினேன்..அவரிடம் இப்போது வரை சிறுபிள்ளையாகத் தான் நடந்து கொள்வேன். அவர் பேச்சை மீறியதும் இல்லை.  

பொறுப்பு உள்ளவளாக இருந்தாலும் ஏனோ எதுவும் அறியாத அப்பாவி புவனாவாகவும், ஆதியாகவும் தான் இருந்தேன். அப்போதெல்லாம் பயமும், மிரட்சியும் தான் என்னிடம் இருந்தது. 

ஆனால் 19 வருட இல்லறம் அனைத்தையும் மாற்றிவிட்டது. அதுவும் இந்த 9 வருட அஞ்ஞாத வாசம் நிறைய நிறைய அனுபவங்களையும், புரிதல்களையும், தனித்து செயல்படுவதற்கான தைரியத்தையும், பக்குவப்படுவதற்கும் கற்றுத் தந்திருக்கிறது. 

எப்போதுமே பணம் என்னைக் கவர்ந்ததில்லை. எனக்கான தேவைகளும் பெரிதாக ஒன்றுமே இல்லை.. எப்படியிருந்தாலும் என்னால் இயங்க முடியும். 

அன்றைக்கு கைவசம் இருப்பதை வைத்து குடித்தனம் செய்திடும் பக்குவம் எப்போதுமே உண்டு. இதையெல்லாம் கற்றுக் கொடுத்த என்னவருக்கு தான் நான் நன்றி சொல்லிட வேண்டும். என்னை பக்குவப்பட வைத்திருக்கிறார். 

சுயசார்பு ஆதியாக செயல்பட வைத்திருக்கிறார். நம்மை தாங்குவதற்கோ, ஆதரவு காட்டவும் யாரும் இல்லையே என்பதை விட 'நமக்கு நாமே' போதும் என்பதான எண்ணங்கள் தான் இப்போது மேலோங்கி உள்ளது. 

அன்பு, பாசம், அரவணைப்பு, புரிதல், விட்டுக் கொடுத்தல், சின்ன சின்ன அர்த்தமில்லாத ஊடல் என்று எல்லாம் கலந்ததே இல்லறம். 

இந்த சிறப்பான நாளில் பெரியோர்களின் ஆசிகளும், நட்புகளின் வாழ்த்துகளும் கிடைத்தால் மகிழ்வோம்.

*****

நண்பர்களே, இன்றைய பதிவு குறித்த உங்கள் எண்ணங்களை, பின்னூட்டம் வாயிலாக பகிர்ந்து கொள்ளுங்கள்.  மீண்டும் வேறு ஒரு பதிவுடன் சந்திக்கலாம்.  அது வரை…

நட்புடன்

ஆதி வெங்கட்