காஃபி வித் கிட்டு-110 - மகளிருக்கு இலவசம் - புடவை - தெனாலிராமன் - காசு இருந்தால் - BYNGE - கொடையாளி - ஓவியம்

அன்பின் நண்பர்களுக்கு, இனிய காலை வணக்கம். இந்த நாளில் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

நேற்று வெளியிட்ட குறும்படப் பதிவை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

தவறு செய்யும் மனிதர்களைப் பார்த்து தவறாகப் பேசாதீர்கள்; ஏனெனில், இன்னும் உங்கள் வாழ்க்கை முடியவில்லை.

******

இந்த வாரத்தின் எண்ணங்கள் - பேருந்துகளில் மகளிருக்கு பயணம் இலவசம்: 

ஏற்கனவே தலைநகர் தில்லியில் சில வருடங்களாக இந்தத் திட்டம் இருக்கிறது. தலைநகரில் ஓடும் எல்லா பேருந்துகளிலும் மகளிர் பயணம் செய்ய கட்டணம் இல்லை.  ஆனால் எல்லாப் பெண்களுக்கும் ஒரு தனி வண்ணத்தில் பயணச் சீட்டு கொடுப்பார்கள்.  அந்த எண்ணிக்கையைப் பொறுத்து தில்லி ட்ரான்ஸ்போர்ட் கார்பொரேஷனுக்கு தில்லி அரசாங்கம் பணம் தரும்.  பெண் பயணிகளுக்கு இலவசம் என்றாலும் பேருந்துகளை நிர்வகிக்கும் நிறுவனத்திற்கு அதிக நஷ்டம் இல்லை (ஏற்கனவே அவை நஷ்டத்தில் இயங்குகின்றன என்பது வேறு விஷயம்).  இங்கே இதுவரை அப்படியான திட்டம் ஏதும் இருப்பதாகத் தெரியவில்லை.  பெண்களுக்குப் பயணச் சீட்டு ஏதும் தருவதில்லை.  அதனால் எத்தனை பெண்கள் பயணித்தார்கள் என்ற புள்ளி விவரங்கள் அரசுக்குத் தெரியப்போவதில்லை.  அரசுப் போக்குவரத்துத் துறைக்கு என்ன நஷ்டம் என்பதை கணக்கிட வழியில்லை.  சமீபத்தில் (எட்டாம் தேதி) - லாக்டவுனுக்கு முன்னர் சத்திரம் பேருந்து நிலையத்திலிருந்து திருப்பராய்துறை வரை சென்று திரும்பினேன்.  பேருந்தில் இருந்த பயணிகளில் 95 சதவீதம் பெண்கள் தான். மீதி ஐந்து சதவீதம் மட்டுமே ஆண்கள் - அவர்கள் மட்டுமே பயணச் சீட்டு வாங்கிக் கொள்ள நடத்துனர் இருக்கையில் அமர்ந்து கொண்டு பயணித்துக் கொண்டிருந்தார்.  

சீட்டுக் கொடுக்கும் வேலை இல்லை என்றாலும், மற்ற வேலைகள் இருக்கிறது என்று சொல்லிக் கொண்டிருந்தார்.  அவர் அமர்ந்திருந்த இருக்கைக்கு ஒரு ஆண் பயணி, ”நான் காசு கொடுத்து பயணிக்கிறேன் - எனக்கு உன் இருக்கையைத் தா” என்று சண்டை பிடித்துக் கொண்டிருந்தார்.   அடுத்த அடுத்த நிறுத்தங்களில் இறங்குபவர்கள் கூட பேருந்தில் பயணிப்பதைப் பார்க்க முடிந்தது.  ஒரு சக ஆண் பயணியின் புலம்பல் - ராஜா காது கழுதைக் காது பகுதியாக இதே பதிவில்!  இலவசங்கள் நல்லதா கெட்டதா என்பதைப் பற்றி எதுவும் சொல்லப் போவதில்லை - ஆனால் காசு கொடுத்து பயணிக்க முடிந்தவர்கள் அப்படிச் செய்தால் போக்குவரத்துத் துறை நஷ்டத்தில் இயங்குவதைத் தவிர்க்க முடியும் என்பதைச் சொல்லத் தேவையில்லை. கல்வி மற்றும் மருத்துவம் தவிர மற்ற இலவசங்கள் தேவையில்லை என்பது தான் பலருடைய எண்ணமும் எனத் தோன்றுகிறது.  அனைவருக்கும் கல்வி, அனைவருக்கும் மருத்துவம் என்பதை நோக்கிய பயணத்தினை நம் நாடு எங்கே எப்போது தொடங்கப் போகிறது என்பது பெரிய கேள்விக்குறி தான். 

******

ராஜா காது கழுதைக் காது - நாங்க என்ன பாவம் செய்தோம்: 

பேருந்தில் பயணித்த ஆண் பயணி ஒருவர் காசு கொடுத்து பயணச் சீட்டு வாங்கிய பின்னர் - “நாங்களும் தான உங்களுக்கு ஓட்டு போட்டோம்! எங்களுக்கு மட்டும் இலவசமா பேருந்தில் பயணம் செய்ய வழி செய்யலையே! நாங்க என்ன பாவம் செய்தோம்? ஏய் கண்டக்டர், இதெல்லாம் அனியாயமா உனக்குத் தெரியலையா? பேசாம, நாளையிலிருந்து புடவை கட்டிட்டு வர வேண்டியது தான்”.  அவர் கீழே இறங்கும்போது ஊரில் ஒருவர் கேட்ட கேள்வி இன்னும் அவரை கோபப்படுத்தியது - “என்ன பெரிசு, புடவை கட்டிட்டு வந்திருந்தா காசு இல்லாமல் பஸ்ல வந்திருக்கலாமே!”  அதற்கு கோபமாக அவர் சொன்ன பதில் - “ஏலே ஏதாவது சொல்லிடப் போறேன்…  நீ வேணும்னா புடவை கட்டிட்டுப் போ! என்ன சொல்ல வந்துட்டான்!”    

******

பின்னோக்கிப் பார்க்கலாம் - தெனாலிராமன் – வெல்லட்டும்….டும்..: 

2014-ஆம் ஆண்டு இதே நாளில் வெளியிட்ட ஒரு பதிவு பற்றி தான் இங்கே பார்க்கப் போகிறோம்.  ஏழு வருடங்களுக்கு முன்னர் திருச்சியில் பார்த்த தெனாலிராமன் திரைப்படம் குறித்து இப்படி எழுதி இருக்கிறேன்.

தில்லியில் இருந்தபோதே திரையுலக மறுபிரவேசமாக வடிவேலு அவர்கள் நடித்த தெனாலிராமன் படத்தின் விமர்சனங்களை வலையுலகத் தோழர்கள் எழுதியதைப் படித்தபோது “வடிவேலுவிற்காக பார்க்க நினைத்திருக்கிறேன்” என பின்னூட்டத்தில் எழுதியிருந்தேன். திருச்சி வந்தவுடனே வீட்டிலும் தெனாலிராமன் படத்திற்குச் செல்ல வேண்டும் எனச் சொல்லவே கடந்த 4-ஆம் தேதி ஞாயிறன்று திருச்சி நகரின் பழைய திரையரங்குகளில் ஒன்றான ஊர்வசி திரையரங்கில் மாலைக் காட்சியாக தெனாலிராமன் படத்தினைப் பார்த்தேன்/தோம்.

மாலை 06.30 மணிக்குதான் காட்சி என்றாலும் ஐந்து மணிக்கே சென்றுவிட, 06.00 மணிக்கு தான் நுழைவுச் சீட்டுகள் தருவோம் எனச் சொல்லவே கொஞ்சமாக அப்படியே நடந்து பக்கத்தில் உள்ள நாகநாதர் கோவிலுக்குச் சென்றோம். வவ்வால்கள் நிறையவே குடியிருப்பதால் இருக்கும் ஒரு வித நாற்றத்தின் தாக்கத்தோடு கோவிலைச் சுற்றி வந்தோம். நாகநாத ஸ்வாமியிடம் இது போன்ற கோவில்களை பராமரிக்கும் பணியை விரைவில் நடத்திக்கொள்ள ஏதும் வழி செய்து கொள்ளக்கூடாதா என்ற கேள்வியைக் கேட்டு, “கொஞ்சம் கவனித்துக்கொள்ளேன்” என்று சொல்லி சற்று நேரம் அமர்ந்திருந்து விட்டு வெளியே வந்தோம்.

மீண்டும் திரையரங்கு பக்கம் வர, ஊர்வசியின் படிக்கட்டுகளில் மக்கள் அனைவரும் பந்தியில் சாப்பாடு கிடைப்பதற்கு முன் அமர்ந்திருப்பது போல அமர்ந்திருந்தார்கள். திடீரென திரையரங்கின் ஊழியர் ஒருவர் ”டிக்கெட் 100 ரூபாய், 80 ரூபாய் – எல்லாத்துக்கும் ஒரே லைன்! வீட்டுக்கு ஒருத்தர் லைன்ல நில்லுங்க போதும்” என்று சொல்ல அனைவரும் முண்டியடித்து வரிசையில் நின்றார்கள். கூட்டத்தோடு கூட்டமாக நானும் நிற்க மூன்று நுழைவுச்சீட்டுகளை வாங்கிக் கொண்டேன்.

முழுப்பதிவும் படிக்க ஏதுவாக சுட்டி கீழே…

தெனாலிராமன் – வெல்லட்டும்….டும்..

******

இந்த வாரத்தின் விளம்பரம் - காசு இருந்தால் எதையும் வாங்கி விடமுடியாது: 

இந்த வாரத்தின் விளம்பரம்/குறும்படம் ஒன்று உங்கள் பார்வைக்கு.   காசு இருந்தால் எதையும் வாங்கி விட முடியும் என நினைப்பது எத்தனை தவறு என்பதைச் சிறப்பாகச் சொல்லி இருக்கிறார்கள் இந்த விளம்பரம்/குறும்படத்தில்… பாருங்களேன். (இங்கேயே காணொளி சேர்த்து வெளியான பிறகு Content Policy Violation என பதிவை நீக்கி விட்டது Blogger!). பிரச்சனை இருப்பதாக எனக்குத் தோன்றவில்லை. அதனால் கீழே சுட்டி மட்டும்!

காசு இருந்தால்....

******

இந்த வாரத்தின் செயலி - BYNGE:

சில வாரங்களுக்கு முன்னர் இந்த செயலி குறித்து தெரிந்து கொண்டபோது அலைபேசியில் தரவிறக்கம் செய்து கொண்டேன் - அதில் வந்து கொண்டிருந்த இந்திரா சௌந்தரராஜன் அவர்களின் ”நந்திபுரம்” தொடருக்காகவே.  அத் தொடரை படித்துக் கொண்டிருக்கும் போதே, காலச்சக்கரம் நரசிம்மா அவர்களின் “மயிலங்கி மங்கையின் மரகதப் பெட்டி” தொடரும் ஆரம்பிக்க, தொடர் பகுதிகள் வெளி வரும் நாட்களில் படித்து விடுகிறேன்.  இரண்டு தொடருமே ஸ்வாரஸ்யமாகச் சென்று கொண்டிருக்கிறது.  இது தவிர, சா. விஸ்வநாதன் (சாவி) அவர்களின் விசிறி வாழை, வடம் பிடிக்க வாங்க ஜப்பானுக்கு ஆகிய இரண்டு நூல்களையும் படித்து முடித்தேன். இந்த நூல்களைத் தவிர வேறு சில எழுத்தாளர்களின் நூல்கள் இந்த செயலியில் இருக்கின்றன.  வாய்ப்பு இருப்பவர்கள் தரவிறக்கம் செய்து நூல்களை வாசிக்கலாம்.  வசதியாகவும் இருக்கிறது. கிண்டில் மூலம் படிப்பது தவிர இந்த செயலி மூலமும் வாசிப்பது தொடர்கிறது - நேரம் கிடைக்கிறபோது! அலைபேசியில் Google Play Store மூலம் இந்த செயலியைத் தரவிறக்கம் செய்து கொள்ளலாம். 

******

இந்த வாரத்தின் கேள்வி பதில் - உண்மையில் யார் கொடையாளி?

நான் ஒரு முறை கோவையில் இருந்து சேலம் செல்லும் போது என் உடன் பயணித்த 22 வயது பெண் தன் செருப்பை காணாமல் தேடினார். அவர் இறங்க வேண்டிய இடம் நெருங்கும் போது தான் ஒரு நேர்காணலுக்கு செல்வதாகவும் செருப்பு இல்லாமல் என்ன செய்வேன் என்று புலம்ப தொடங்கி விட்டார்.

அப்போது ஒரு குழந்தையுடன் இருந்த பெண்மணி சிறிதும் யோசிக்காமல் அவரது ஓரளவு புதிய செருப்பைத் தந்தார். இதற்கு அவர் பார்க்க வறுமையான குடும்பத்தை சேர்ந்தவராகவே தெரிந்தார்.

பாவம் படிக்கற புள்ள வெறுங்காலால் எப்படி போகும்? என்று கூறி அவர் வெறும் காலில் தன் கைகுழந்தையுடன் நடந்து போனார்.

என்னை பொறுத்த வரை தேவையான நேரத்தில் தேவையானதை தேவை அறிந்து கேட்காமல் கொடுப்பவர் தான் சிறந்த கொடையாளி.

- தமிழ் கோரா தளத்தில் கேட்கப்பட்ட கேள்வியும், அதற்கு ஒரு குடும்பத் தலைவி அளித்த பதிலும் மேலே - சிறப்பான பதிலைச் சொல்லி இருக்கிறார்.  உங்களிடம் இதே கேள்வியைக் கேட்டால் என்ன பதில் சொல்வீர்கள் என்று பின்னூட்டத்தில் சொல்லலாமே!

******

இந்த வாரத்தின் ரசித்த ஓவியம்:

சமீபத்தில் பார்த்து ரசித்த ஒரு ஓவியம் உங்கள் பார்வைக்கு! எத்தனை அழகு இந்த ஓவியம்?  வரைந்தவருக்கு பாராட்டுகளும் வாழ்த்துகளும். 

******

நண்பர்களே, இந்த வாரத்தின் காஃபி வித் கிட்டு பதிவு குறித்த உங்கள் எண்ணங்களை பின்னூட்டம் வாயிலாகச் சொல்லுங்கள். நாளை வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

திருவரங்கத்திலிருந்து...