ருபின் பாஸ் - உத்திராகண்ட் - மலையேற்றம் - ப்ரேம் Bபிஷ்ட் - பகுதி ஏழு

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

 

நேற்று வெளியிட்ட யாரிவள் பதிவை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

 

DON’T GAIN THE WORLD AND LOSE YOUR SOUL, WISDOM IS BETTER THAN SILVER OR GOLD.

 

******

 

ருபின் பாஸ் குறித்து இது வரை சில பகுதிகள் வெளியிட்டு இருக்கிறேன். முதல் பகுதி இங்கே! இரண்டாம் பகுதி இங்கே! மூன்றாம் பகுதி இங்கே! நான்காம் பகுதி இங்கே! ஐந்தாம் பகுதி இங்கே! ஆறாம் பகுதி இங்கே! பயணம் குறித்தும் தொடர்ந்து நண்பர் ப்ரேம் Bபிஷ்ட் அவர்களின் வார்த்தைகளில் படிக்கலாம் வாருங்கள் - வெங்கட் நாகராஜ். ஓவர் டு ப்ரேம்!

 

*****

 

எங்கள் பயணத்தின் ஏழாம் நாள், நாங்கள் அதிகாலையில் எழுந்து, காலை 05.30 மணியளவில் ரோங்டி காட்டில் இருந்து சுமார் 5 கி.மீ தூரமுள்ள சாங்லாவுக்கு புறப்பட்டோம்.  இந்தப் பாதையில் பயணிப்பது கொஞ்சம் சுலபமானது மட்டுமல்லாது அழகான புல்வெளிகள் வழியாகச் செல்லும் பாதை.  இறங்குமுகமாகச் சென்ற இந்த பாதையில் ஆங்காங்கே, மேய்ப்பர்களின் சில குடிசைகளைக் காண முடிந்தது. செல்லும் வழியில், நாங்கள் காலை 7.00 மணியளவில், மேய்ப்பர்களின் குடிசைகளில் ஒன்றின் அருகில் நின்று காலை தேநீர் அருந்தினோம்.  தொடர்ந்து பயணித்து நாங்கள் அதே பாதையில் மேலும் சென்று, சாங்லா பள்ளத்தாக்கைப் பார்த்தபடி, பைன், தியோதார் மற்றும் ஓக் மரங்கள் நிறைந்த காடுகளுக்குள் நுழைந்தோம்.

 

கின்னர் கைலாஷ் மலைத்தொடர்களின் உயரமான சிகரங்களை நேருக்கு நேர் பார்த்த போது, அந்த காட்சி எங்களை மிகவும் வசீகரிக்கும் விதமாக இருந்தது.  காலை 9.15 மணியளவில், எங்கள் குழு அழகான சாங்லா பகுதிக்குள் நுழைந்து, காலை 9.30 மணியளவில் சாங்லா பாலத்தைக் கடந்தோம்.  பாஸ்பா நதி மற்றும் அதைச் சுற்றியுள்ள பகுதிகளில் சில காட்சிகளை படங்களாகவும் எடுத்தோம். சாங்லாவின் புகழ்பெற்ற நாக் கோயிலையும் நாங்கள் வழியில் கண்டோம்.

 

நாங்கள் காலை 10.15 மணியளவில் அந்தப் பகுதியில் வாகனங்கள் பயணக்கூடிய சாலையை அடைந்தோம். அங்கிருந்து சுமார் 260 கி.மீ தொலைவில் இருந்த உத்திராகண்ட் மாநிலத்தின் மோரி எனும் பகுதிக்குச் செல்ல வாடகைக்கு வாகனம் அமைத்துக் கொள்ளலாம் என்று முடிவு செய்தோம்.  வாடகை வாகனத்தில் பயணித்தால், அன்று மாலைக்குள் எங்கள் வாகனம் நிறுத்தி இருந்த  மோரி பகுதிக்குச் சென்று விடலாம் என்பதால் இந்த முடிவு. சாங்லாவிலிருந்து ராம்பூர் வரை ஒரு வாடகை வாகனமும், அங்கிருந்து மோரி பகுதிக்கு ஒரு வாகனமும் என வாடகைக்கு எடுத்துக் கொள்ள வேண்டியிருந்தது.  இறுதியாக, இரவு 8.45 மணியளவில் நாங்கள் மோரியை சென்று அடைந்து, இரவு உணவை முடித்துக் கொண்டு நீண்ட பயணத்தினால் ஏற்பட்ட களைப்பினைப் போக்கிக் கொள்ள ஓய்வெடுத்துக் கொண்டோம்.

 

எங்கள் பயணத்தின் எட்டாம் நாள் காலை 5.00 மணியளவில் மோரியில் இருந்து புறப்பட்டோம். மோரியில் இருந்து எங்களின் பயணப் பாதையில் மேல்நோக்கிச் செல்ல, மழை பெய்ய ஆரம்பித்தது. பல இடங்களில் மழைநீர் ஓடைகள் திடீரென தோன்றி சாலையில் உருண்டோடியது. ஒரு இடத்தில், தண்ணீரின் ஆர்ப்பரிப்பு மிகவும் வலுவாக இருந்ததால் நாங்கள் எங்கள் வாகனத்தினை 15 நிமிடங்கள் நிறுத்தி, மழை மற்றும் ஓடையின் வேகம்  தணிந்தவுடன் அந்தப் பகுதியைக் கடந்தோம்.  ஆனால் அந்தப் பகுதியைக் கடந்து சற்றே தொலைவில் இருக்கும் புரோலா எனும் இடத்தினை அடைந்தபோது, ஒப்பீட்டளவில் மழை இல்லாமல் வறண்டிருந்தன. காலை 11.30 மணியளவில், நாங்கள் விகாஸ்நகர் பகுதியை அடைந்தோம்.  மேலும் பயணித்து Pபோண்டா சாஹிப்பைக் கடந்து ஹரியானாவின் யமுனாநகருக்குள் நுழைந்தோம்.  மாலை 5.30 மணியளவில், அவரவர் வீடுகளை வந்தடைந்தோம். 

 

மிகவும் கடினமான சூழ்நிலையில் அமைந்த இந்தப் பயணம் எங்களின் மறக்கமுடியாத மலையேற்றப் பயணமாக இருந்தது. உத்தராகண்ட் மற்றும் ஹிமாச்சல் பிரதேச கிராமங்களின் கலவையான இந்த பாதையில் நாங்கள் கண்ட பசுமையான புல்வெளிகள், காடுகள், நீர்வீழ்ச்சிகள் மற்றும் ஹிமாச்சலப் பகுதியில் இந்த பாதையில் பயணித்து, சாங்லா பள்ளத்தாக்கை அடையும் வரை கண்ட இயற்கை மற்றும் இயற்கைக்காட்சிகள் ஆகியவற்றின் நினைவுகள் மற்றும் அனுபவங்கள் மறக்க முடியாதவை.  இந்தப் பயணம் எங்களுக்குத் தந்த அனுபவங்களை உங்களுடன் பகிர்ந்து கொள்ள முடிந்ததில் மகிழ்ச்சி.  இந்தப் பயணம் குறித்த தகவல்கள் உங்களுக்கும் பிடித்திருக்கலாம்!  பயனுள்ளதாகவும் அமைந்தால் மகிழ்ச்சியே!  மீண்டும் ஒரு பயணம் குறித்த தகவல்களுடன் உங்கள் அனைவரையும் சந்திக்கும் வரை….

 

நட்புடன்

 

ப்ரேம் Bபிஷ்ட்

 

******

 

நண்பர் ப்ரேம் அவர்களின் அனுபவங்கள் உங்களுக்கும் பிடித்திருக்கலாம்.  பதிவு வழி பகிர்ந்து கொண்ட விஷயங்கள் குறித்த தங்களது கருத்துகளை பின்னூட்டம் வாயிலாக பகிர்ந்து கொள்ளலாமே!  விரைவில் வேறொரு பதிவுடன் உங்கள் அனைவரையும் சந்திக்கும் வரை…

 

நட்புடன்

 

வெங்கட் நாகராஜ்

புது தில்லியிலிருந்து….