காஃபி வித் கிட்டு - 186 - வலிகள் மறந்த நேரம் - உறக்கம் - பக்கத்து வீட்டில் இருப்பவர் - சார் - மதுபனி ஓவியங்கள் - 3-2-3 - பார்பி

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

இதற்கு முன்னர் வெளியிட்ட ஜைனர்களின் வழிபாட்டுத் தலங்கள் பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

இந்த வாரத்தின் ரசித்த கவிதை : வலிகள் மறந்த நேரம்

வலிகள் மறந்த நேரம்

🌼💮🌼💮🌼💮🌼💮🌼💮🌼💮🌼💮🌼

ரோஜா வானின் கீழே 

மழையும் மண்ணும் சுகிக்கும் 

இனிய தீண்டலின் இசைவென 

கிளர்ந்து வளரும் பசும்புல் 

ஒற்றைக் குயிலின் கீதம் 

முற்றுப்பெறாமல் 

காற்றில் கனக்கும் ரகசிய வலி

தழை தின்று களைத்த ஆடுகள்

 தம்குட்டிகளுக்கு மடிதந்து 

அயரும் அந்தி 

பனிபோர்த்திய நேரத்தில் 

தனிமை விரட்ட வந்த 

ஓர் ஆட்டை கையணைத்து எடுத்து 

கனிவாய் ஒரு தற்படம் 

கைபேசியில்  பிடித்து

வெள்ளைப்பூவென ஒரு முறுவல் 

வலிகள் மறந்த மௌன ஆறுதல்

 ©® SREEMATHI 

1st MARCH 2017

******

இந்த வாரத்தின் எண்ணங்கள் : உறக்கம் இல்லா இரவுகள்

குளியலறையில் ஒரு குழாயிலிருந்து தண்ணீர் சொட்டும் சப்தம்… வீட்டின் வெகு அருகே இருக்கும் மந்திர் மார்க் எனும் பிரதான சாலையில், நொடிக்கு ஒரு முறை செல்லும் வாகனங்களின் ஓசை... திடீரென பதட்டப்பபட வைக்கும் ஆம்புலன்ஸ் மற்றும் காவல் துறை வாகனங்கள் எழுப்பும் சைரன் ஒலி... எங்கிருந்தோ குரைக்கும் ஒரு செல்லத்தின் சப்தம்... இரவின் அமைதியைக் குலைக்கும்படி போட்டி போட்டுக் கொண்டு HAYABUSA போன்ற விலையுயர்ந்த bikes கொண்டு வந்து அதீத சப்தத்துடன் ரேஸ் செய்யும் பணக்கார இளம்தாரிகள்... எல்லாவற்றையும் கேட்டுக்கொண்டு தூக்கம் வராமல் புரண்டு புரண்டு படுத்திருக்கும் இரவுகள்… எப்படியும் உறங்கிவிடலாம் என்ற நம்பிக்கையுடன் நானும்........

******

இந்த வாரத்தின் ரசித்த குறும்படம்:  பக்கத்து வீட்டில் இருப்பவர்

பணம், முதலீடு போன்றவை குறித்து பெண் குழந்தைகளுக்கு நம்மில் பலரும் சொல்லிக் கொடுப்பதில்லை. சிறு வயதிலேயே ஆணோ, பெண்ணோ, பணம், சேமிப்பு, முதலீடு குறித்த சில தகவல்களையேனும் சொல்லிக் கொடுப்பது நல்ல விஷயம் - அதிலும் பெண்ணுக்கு எதற்கு இதெல்லாம் என்று இன்றைக்கும் சில பெற்றோர்கள் - குறிப்பாக அப்பாக்கள் நினைப்பது நிதர்சனமான உண்மை.  அது தவறு என்று சொல்லும் ஒரு குறும்படம் கீழே.

மேலே உள்ள காணொளியை பார்க்க முடியவில்லை என்றால், கீழேயுள்ள சுட்டி வழியும் பார்க்கலாம்!

The neighbor we didn't know we needed! | Short Film (youtube.com)

******

இந்த வாரத்தின் ரசித்த முகநூல் இற்றை - சார்

கடவுளை

"சார்!" என்றழைக்கும்

நபர் ஒருவரை

வாழ்வில்

முதல் முறையாக

ஒரு கோவிலில் பார்த்தேன்.

"சார் !

முடியும்னா முடியும்னு சொல்லுங்க

முடியலைன்னாலும் முடியலைன்னு

சொல்லுங்க.

நான் பாட்டுக்கு தினம் வந்து

முட்டிக்கிட்டு இருக்கேன்.

ஏன் வரேன்னே தெரியலை சார்!"

என்றவர்

என் பார்வையை உணர்ந்து

சற்றே கம்மிய குரலில்

கடவுளுக்கும் எனக்கும் 

பொதுவாகச் சொன்னார்.

"முடியலை சார்!"

- Bபோகன் சங்கர்

******

பழைய நினைப்புடா பேராண்டி : மதுபனி [MADHUBANI] ஓவியங்கள்

2014-ஆம் ஆண்டு இதே நாளில் வெளியிட்ட பதிவு - மதுபனி [MADHUBANI] ஓவியங்கள் - அந்தப் பதிவிலிருந்து சில வரிகள் இங்கே.  

நேற்று நானும் நண்பர் பத்மநாபன் அவர்களும் தில்லியின் ஜன்பத் பகுதியில் இருக்கும் ஒரு கிராமிய கலை மற்றும் உணவு திருவிழா சென்றிருந்தோம். இப்போதெல்லாம் ஏதாவது கண்காட்சி என்று சொன்னால், அதுவும் கிராமிய/பழங்குடிகளின் கண்காட்சி என்று சொன்னால் அத்தனை மக்களை ஈர்க்கமுடியாது என்பதாலோ என்னவோ உணவினையும் தலைப்பில் சேர்த்து விட்டார்கள் போல!

அங்கே சில கிராமிய/பழங்குடி மக்கள் பழக்கத்தில் இருந்த ஓவியங்களை கண்காட்சியாகவும், விற்பனைக்காகவும் வைத்திருந்தார்கள். பல இடங்களிலிருந்து வந்திருந்தாலும், இன்றைக்கு நாம் பார்க்கப்போவது மதுபனி ஓவியங்கள் மட்டுமே. மதுபனி [MADHUBANI] எனும் நகரம் பீஹார் மாநிலத்தில் இருக்கிறது. மிதிலா அல்லது மைதிலி என்ற மொழி பேசும் மக்கள் அதிகம் இருக்கும் இடம் இது. மதுபனி என்பதன் அர்த்தம் தேன் நிறைந்த காடு!

பெரும்பாலான மதுபனி ஓவியங்கள் இந்து கடவுள்களான ராமர், கிருஷ்ணர், சிவன், சரஸ்வதி, துர்க்கை போன்றவர்களையும் இயற்கை அழகினையும் காண்பிப்பவை. பெரும்பாலும் பெண்களால் தான் இந்த ஓவியங்கள் வரையப்படுகின்றன என்றாலும் ஆண்களும் வரைவதில் வல்லவர்கள் தான். முதன் முதலில் இந்த ஓவியங்களை வரைந்தது மிதிலையின் மன்னரான ஜனக மஹாராஜா காலத்தில் என்றும், அவரது மகள் சீதையின் திருமணத்தின் போது இந்த ஓவியங்களை வரைய வைத்தார் எனவும் சொல்வார்கள்.

முழு தகவல்களும் படிக்க, மேலே உள்ள சுட்டி வழி பதிவினைப் படிக்கலாமே!

******

இந்த வாரத்தின் ரசித்த கண்டுபிடிப்பு : 3-2-3

இரு சக்கர வாகனங்களை நமக்கு நன்றாகவே தெரியும். அதைப் போலவே மூன்று சக்கரங்கள் கொண்ட ஆட்டோ, சரக்கு வண்டிகள் என்பதும் தெரியும்.  ஆனால் ஒரே வண்டியில் இரண்டுமே இருந்தால்….  ஆம் அப்படி ஒரு வண்டி ஹீரோ தயாரிப்பில் வெளிவர இருக்கிறது. மூன்று பட்டன்களை மட்டும் இயக்கி மூன்று சக்கர வாகனம், இரு சக்கர வாகனம் என்று மாற்றிக் கொள்ளக் கூடிய வகையில், இரண்டையும் தன்னகத்தே கொண்ட ஒரு வாகனம் - Surge S32 என்ற பெயரில் வர இருக்கிறது!  எப்படி இயக்கலாம், வாகனத்தில் என்னென்ன சிறப்பு என்பதெல்லாம் குறித்து தெரிந்து கொள்ள விரும்பினால் கீழேயுள்ள சுட்டி வழி தெரிந்து கொள்ளலாம்!  மேலும் இந்தத் தளத்திலும் பார்த்து தெரிந்து கொள்ளலாம்!

Convert Scooter Into Three Wheeler | Surge S32 Convertible | Bharat Mobility Expo 2024 #surge #hero - YouTube

******

இந்த நாள் இனிய நாள் : பார்பி

பார்பி பொம்மைகள் யாருக்குத் தான் பிடிக்காது! பொதுவாக அனைத்து பெண் குழந்தைகளுக்கும் பார்பி பொம்மைகளை பிடிக்கும் என்றாலும் சில ஆண் குழந்தைகளுக்கும் இந்த பார்பி வகை பொம்மைகளை பிடிக்கும்.  முதன் முதலாக பார்பி பொம்மைகள் தயாரிக்கப்பட்ட வருடம் 1959! நாள் 9 மார்ச்!  மார்ச் 9-ஆம் தேதி தேசிய பார்பி டே ஆக அமெரிக்காவில் கொண்டாடுகிறார்களாம். Ruth Handler என்பவரால் உருவாக்கப்பட்ட பார்பி பொம்மைகளுக்கு அவர் வைத்த முழுப் பெயர் என்ன தெரியுமா? Barbara Millicent Roberts என்பது தானாம்.  பார்பி குறித்து இன்னும் பல செய்திகள் இந்தத் தளத்தில் இருக்கின்றன.  முடிந்தால் படித்துத் தெரிந்து கொள்ளுங்கள்!

******

இந்த வாரத்தின் காஃபி வித் கிட்டு பதிவு குறித்த தங்களது எண்ணங்களை பின்னூட்டம் வாயிலாக சொல்லுங்களேன்.  மீண்டும் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

புது தில்லியிலிருந்து…