கதம்பம் - அரங்கனின் தரிசனம் - சமயபுரத்தாள் தரிசனம் - மஹா சிவராத்திரி - மகளிர் தினம் - தலையெழுத்து மாறிய நாள்

அன்பின் நண்பர்களுக்கு, இனிய காலை வணக்கம். இந்த நன்நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.  

இதற்கு முன்னர் வெளியிட்ட பிரதான் மந்த்ரி சங்க்ரஹாலய் - நிழற்பட உலா பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

*******

அரங்கனின் தரிசனம் - 05 மார்ச் 2024:

ஐந்து நிமிடம் முன்னே பின்னே என்றாலும் என்னுடைய இடத்தை யாருக்காகவும் விடவே மாட்டேன் என்று வரிசையில் உள்ளோரிடம்  சண்டையிடும் சகமனிதர்கள்!

தன்னுடைய வயதான அம்மாவுக்கு கோவிலின் முக்கிய சன்னிதிகளை மட்டுமாவது காண்பிக்கும் பொருட்டு இன்னும் எவ்வளவு தூரம் இருக்கு? பாதை நன்றாக இருக்குமா? என்று மிகுந்த அக்கறையுடன் விசாரித்த பெண்மணி!

அக்கா! இந்த விளக்கு பார்க்கறீங்களா? செவ்வா வெள்ளில வீட்டுல ஏத்தி வைங்க! உங்க கஷ்டமெல்லாம் கரைஞ்சு போயிடும்!என்று கோவில் கடைகளில் இரும்பால் ஆன அகல் விளக்கை வாங்கிக் கொள்ளச் சொல்லும் கடைக்காரர்!

தன் தோழி ஆண்டாளைக் காணாமல் ஏக்கத்துடன் காத்திருக்கும் லஷ்மி! வருகின்ற பக்தர்களுக்கு ஆசீர்வாதம் செய் என்ற பாகனின் சொல்லுக்கு கட்டுப்பட்டு செய்து கொண்டிருந்தது!

தாயாருக்கு எல்லா உற்சவங்களுமே இங்கேயே தான்! அவள் 'படி தாண்டா பத்தினி!' பெருமாள் தான் இங்கே வருவார்! என்று தோழியிடம் சொல்லிக் கொண்டிருக்கும் போது…

இந்தாங்க! தாயார் பிரசாதம்! என்று எதிர்பார்க்காத நேரத்தில் கைநிறைய பன்னீர் ரோஜாக்களை கொடுத்துச் சென்ற பெண்மணி!

இன்றைய நாளை இனிதாக்கிய தருணங்கள்!

******

சமயபுரத்தாள் தரிசனம் - 06 மார்ச் 2024:

நேற்றைய பொழுது அரங்கனின் காலடியில் என்றால் இன்றைய பொழுது சமயபுரத்தாளின் அருளைப் பெறுவதற்காக! 

திருவரங்கத்தைப் போலவே அவரின் தங்கையைக் காணவும் எப்போதும் பெருந்திரளாய் மக்கள் நேர்த்திக் கடன் செலுத்தவும், கண்ணீர் மல்கி பிரார்த்திக்கவும்  பாதயாத்திரையாகவே செல்வர்!

வரும் ஞாயிறன்று சமயபுரம் மாரியம்மனுக்கு பூச்சொரிதல் நிகழப் போகிறது! இது முதல் வாரம் தான்! இன்னும் இரண்டு வாரங்களும் பூச்சொரிதல் நடைபெறும்! வண்டி வண்டியாக பூக்களை எடுத்து வந்து அவளை குளிர்விப்பார்கள்! வழியெங்கும் இப்போதே பால் குடங்களும் முளைப்பாரியும் எடுத்துச் சென்று கொண்டிருக்கும் மக்களால் நிறைந்திருந்தது ஸ்தலம்!

வரிசையில் நின்று நகர்ந்து நகர்ந்து அவளின் திருமுகத்தை பார்த்துக் கொண்டே எல்லோருக்காகவும் மனமுருக பிரார்த்தித்துக் கொண்டேன்! நோய்நொடி இல்லாத வாழ்வும், அன்பும், புரிதலும் எல்லோரிடையேயும் மேம்படணும்! அழகான நிம்மதியான தரிசனம் கிடைத்த திருப்தியில் வெளியே வந்தோம்!

நம்முடனேயே வழியெங்கும் துரத்திக் கொண்டு யாசகம் கேட்போர்! நீ தீர்க்க சுமங்கலியா இருப்ப! புள்ள குட்டியெல்லாம் நல்லாருக்கும்! ஏம்மா!  கொஞ்சம் காசு குடுத்துட்டு போனாத் தான் என்ன! பெரிய பேகெல்லாம் மாட்டிட்டு போற! ஓடு! ஓடு! நீ எங்களுக்கு குடுக்காம எப்படி போறன்னு பார்க்கலாம்! அவளுக்கு மட்டும் குடுத்தா ஆச்சா! இப்படியும் சிலர்! ஒருத்தர் ரெண்டு பேர் அல்ல! குறைந்தபட்சம் ஐம்பது பேராவது இருக்கிறார்கள்!

அங்கிருந்து வெளியே வந்து இரண்டு கிமீ தொலைவில் 'இனாம்' என்ற இடத்தில் உள்ள ஆதி மாரியம்மன் கோவிலுக்கும் சென்று வந்தோம்! சமயபுரம் மாரியம்மன் பிறந்த தலம் இது என்று சொல்லப்படுகிறது! சமயபுரம் மாரியம்மனுக்கு நேர்த்திக் கடன் செலுத்த வருபவர்கள் இங்கே தான் வருகின்றனர்!

இந்தக் கோவிலுக்கு போகும் பாதையில் ஒழுங்கான சாலைகளும் இல்லை! கருங்கல் பாதை தான்! அதில் சற்று தொலைவு செருப்பில்லாமல் நடக்கவே சிரமமாக இருந்தது! ஆனால் மக்கள் இங்கே அலகு குத்துதல், அங்க பிரதட்சணம் செலுத்திய நேர்த்திக்கடனை பார்த்த போது நாம் ஒன்றுமே இல்லை  என்று தோன்றச் செய்தது!

இது ஆன்மீக பூமி! இங்கு பக்தியால் பிணைக்கப்பட்ட மனிதர்களால் உருவான தேசம் இது! நல்லதே நடக்கட்டும்! நலமே சூழட்டும்!

******

மஹாசிவராத்திரி - 08 மார்ச் 2024:

பெண் எனும் சக்திக்கு தன் உடம்பில் சரிபாதியைத் தந்திட்ட ஈசனை போற்றும் நாள் இன்று! அடிமுடி காண இயலாத அந்த பரம்பொருளினை வணங்கி நாடும் வீடும் நலமுடன் இருக்க பிரார்த்தனை செய்வோம். இன்றைய நாளில் அபிஷேகப் பிரியனான ஈசனுக்கு நம்மால் இயன்ற திரவியங்களை கோவிலில் தந்தும், வீட்டில் பூஜை செய்தும் வழிபடலாம்! தேவார திருவாசகப் பதிகங்களைச் சொல்லியும் கேட்டும் அந்த இறைவனைத் துதிப்போம்.

ஓம் நமசிவாய! தென்னாடுடைய சிவனே போற்றி! ஹர ஹர மஹாதேவ்! 🙏 🙏

மஹாசிவராத்திரி நிவேதனமாக சர்க்கரை வள்ளிக்கிழங்குடன் நாட்டுச்சர்க்கரை சேர்த்து நெய் விட்டு அல்வாவாக கிளறி செய்திருந்தேன்! வீட்டு பூஜையை முடித்து விட்டு அருகிலுள்ள சிவன் கோவிலுக்குச் சென்று முதல் கால பூஜையின் தீபாராதனையை பார்க்க முடிந்தது!

இரண்டாம் கால பூஜைக்காக பால் மற்றும் பூஜை பொருட்களை கொடுத்து விட்டு பிரசாதத்துக்கான வரிசையில் நின்று சுடச்சுட வெண் பொங்கலையும் வாங்கிக் கொண்டு வீடு திரும்பினேன்!

இன்றைய நாள் இனிய நாள்!

******

மகளிர் தினம் - 08 மார்ச் 2024:

இவள்!

ஒவ்வொரு நாளும் நிமிடமும் தனக்கு தரப்பட்ட சவால்களை திறம்பட செயல்பட்டு சாதித்துக் கொண்டிருப்பவள்! அன்பு, பாசம், தாய்மை, காதல், வீரம், துணிச்சல், தைரியம், உழைப்பு என்று பல உணர்வுகளின் கலவை இவள்! தன் குடும்பத்துக்காகவும், குழந்தைகளுக்காகவும் எத்தனையோ துயரங்களையும், அவமானங்களையும் சகித்துக் கொண்டு செல்பவள்! தியாகங்களைச் செய்கிறாள் என்பதற்காக இவளை உரசிப் பார்த்தால் அவர்களை பொசுக்கும் வல்லமையும் பெற்றவள்! 

பெண்ணைக் கொண்டாடும் இந்த சமூகத்தில் தான் பிஞ்சுக் குழந்தைக்கு கூட பாதுகாப்பில்லாமல் இருக்கிறது! பெண்ணைப் போகப் பொருளாக மட்டுமே பார்க்கும் மிருகங்களும் இருக்கத் தான் செய்கிறார்கள் என்பது மிகவும்  வேதனையான விஷயம்! நிச்சயம் இந்த நிலை மாறி பெண்ணை பாதுகாக்கணும் என்ற எண்ணம் ஒவ்வொருவருக்கும் இருக்கணும்! நல்லதொரு சமுதாயத்தை உருவாக்கும் சக்தி பெண்!

மங்கையர் அனைவருக்கும் இனிய மகளிர் தின வாழ்த்துகள்!

******

தலையெழுத்து மாறிய நாள் - 08 மார்ச் 2024:

இந்த தினத்தில் தான் 'அவளும் அவனும்' முதன்முதலாக சந்தித்துக் கொண்ட நாள்! பிடித்திருக்கிறது! ஓகே! என்று சொன்னதால் அன்றிலிருந்து தன்னுடைய தலையெழுத்தே மாறிப் போய்விட்டதாக 'அவன் அவளிடம்' எப்போதும் சொல்வதுண்டு...🙂 

இன்று தான் 'பஜ்ஜி சொஜ்ஜி' சாப்பிட்டு ஓகே என்று சொன்ன நாள்! அட! பஜ்ஜியை இல்லங்க...🙂 பெண் பார்த்த நாள்..🙂

*******

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

ஆதி வெங்கட்