காஃபி வித் கிட்டு - 236 - தேரடி வீதியில் - மயில் வடிவ அடுப்பு - அன்பின் மொழி - காட்சிப் பிழை - Shahtoot Lassi - வாகன வாசகம் - ஒடிஷாவின் பாரம்பரியம்

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

இதற்கு முன்னர் வெளியிட்ட மூன்று நாட்கள் மூன்று சிகரங்கள் - அம்ருத் கங்கா அருவி பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

பழைய நினைப்புடா பேராண்டி : தேரடி வீதியில்… 

2017-ஆம் ஆண்டு இதே நாளில் வெளியிட்ட பதிவு - தேரடி வீதியில்... - திருவரங்கம் சித்திரைத் தேர் 2017 - இன்றைய பழைய நினைப்புடா பேராண்டி பதிவாக! அந்தப் பதிவிலிருந்து சில வரிகள் இங்கே. 

திருவரங்கம் நகரில் இன்று திருத்தேர்! சித்திரைத் தேர்.  வருடத்திற்கு இங்கே மூன்று முறை தேர் இழுக்கும் வைபவம். சித்திரைத் தேர் கொஞ்சம் ஸ்பெஷல்! சுற்றுப்பக்க கிராமத்தினர் அனைவரும் முதல் நாளே வண்டி கட்டிக்கொண்டு வந்து திருவரங்கத்து வீதிகளில் தங்கி, காவிரி/கொள்ளிடத்தில் குளித்து [அவ்வளவு தண்ணீர் இருக்கா என்ன?] தேரோட்டத்தில் பங்குபெற்று, மகிழ்ச்சியோடு இருக்கும் நாள். தேரோட்டம் என்றாலே அனைவருக்குமே சந்தோஷம் தானே.

வேட்டு, குதிரை, யானை, மாட்டின் மேல் வைத்து கட்டப்பட்ட மேளம், குழந்தைகளை மகிழ்விக்க பல்வேறு பொம்மைகளின் விற்பனை, கடவுளர்களின் வேடங்கள் தரித்து வரும் ஆட்கள், தின்பண்டங்கள் விற்பவர், ”கழுத்துச் செயினை தலைப்பால மூடும்மா” என்று அறிவிக்கும் காவல்துறையினர் என தேரடி வீதியே கலகலவென்று இருக்கும்! சித்திரை மாதத்துத் தேர், திருவரங்கத்தின் சித்திரை வீதிகளில் தான்! தைத் தேர் என அழைக்கப்படும் சிறிய தேர் தை மாதத்தில் கோவிலின் உத்திர வீதிகளில் ஓடும். இந்தச் சித்திரைத் தேர் தைத் தேரை விட பெரியது. ஆகவே, கொண்டாட்டங்களும் அதிகம்!

நேற்று தான் தலைநகரிலிருந்து திருவரங்கம் வந்து சேர்ந்தேன். தேர் சமயத்தில் இங்கே இருந்தால், வேறு என்ன வேலை – கையில் கேமராவுடன் காலையிலேயே சித்திரை வீதிக்குச் சென்று சில புகைப்படங்கள் எடுத்தாயிற்று! அனைத்து படங்களையும் இங்கே பகிர்ந்து கொள்வது முடியாதது! கிட்டத்தட்ட 150 படங்களுக்கு மேல் என்பதால் இங்கே தேர்ந்தெடுத்த சில படங்கள் மட்டும். 

மேலே உள்ள சுட்டி வழி முழு பதிவையும் படி(பார்)க்கலாமே - இது வரை நீங்கள் படி(பார்)த்திருக்காவிட்டால்!  

******

இந்த வாரத்தின் பகிர்வு : மயில் வடிவ அடுப்பு

நம் நாட்டில் திறமைக்கு பஞ்சமே இல்லை - எத்தனை எத்தனை திறமைகளை வைத்துக் கொண்டு மனிதர்கள் வாழ்ந்து வருகிறார்கள். களி மண் கொண்டு அடுப்புகள் செய்த காலம் எல்லாம் போய்விட்டது - கிராமங்களைத் தவிர வேறு எங்கேயும் மண் அடுப்புகளை பார்க்கவே முடியாத அளவிற்கு மாற்றம் கண்டிருக்கிறோம்.  சில நாட்களாக, ஒரு தேவையில்லாத போர் காரணமாக சமையல் எரிவாயு தட்டுப்பாடு ஏற்பட்டதாக பிம்பம் உருவானபோது கூட மண் அடுப்புகள் பற்றி யோசிக்க முடியாமல், எலெக்ட்ரிக் அடுப்புகள் குறித்து தான் யோசித்தார்கள் மக்கள்.  ஆனாலும், இப்போதும் சில கிராமங்களில் மண் அடுப்புகள் தான் அதிகமாக உபயோகிக்கிறார்கள்.  அப்படிப்பட்ட அடுப்பு கூட கலைநயத்தோடு உருவானால் எப்படி இருக்கும்! பெங்கால் பகுதியில் இருக்கும் ஒரு பெண்மணி உருவாக்கிய மயில் வடிவ மண் அடுப்பு குறித்து அவர் முகநூல் கணக்கில் பகிர்ந்த ஒரு காணொளி தான் இந்த வாரத்தின் பகிர்வு.  கீழே உள்ள சுட்டி வழி பாருங்களேன்!

மயில் வடிவ மண் அடுப்பு

******

இந்த வாரத்தின் கவிதை :  அன்பின் மொழி

இந்த வாரத்தின் கவிதையாக ஒரு படமும் அதற்கான கவிதையும் - தமிழ்முகில் பிரகாசம் அவர்கள் முகநூலில் எழுதிய கவிதை ஒன்று.  படம் பார்த்ததில் உங்களுக்குத் தோன்றிய எண்ணம் என்ன? பின்னூட்டத்தில் சொல்லுங்களேன். கவிதை குறித்தும் சொல்லலாமே!

கடைக்குட்டி மகளுக்கு விளையாட்டுத் தோழன்//

தலையை ஆட்டி  விழிகள் அகல //

கதை பேசும் பாங்கினில் -- இருவருக்கும்//

பரஸ்பரம் புரிந்ததும் தான் என்னவோ//

கிள்ளையின் கள்ளமில்லா கலகல சிரிப்புக்கு//

ஒத்திசைவாய் கழுத்தின் மணி அசைத்து//

தன் குதூகலத்தை உணர்த்துகிறது கன்றுக்குட்டி//

வார்த்தைகள் இல்லா மேன்மையான அன்பின் பகிர்வில்//

விரல்களின் சிறு வருடலும்  -- சுழற்றும் //

நாவின்கண் ஊறும் எச்சிலின் ஸ்பரிசமும் //

பரஸ்பரம் உணர்த்திடும் உள்ளங்களின் பேரன்பை //

அன்பைச் சொல்ல உலகில் தனிமொழியும் உண்டோ //

இதயங்கள் பேசும் மொழி அன்பன்றோ//

பி. தமிழ் முகில் #சிங்கப்பூர்த்_தமிழ்மொழி_விழா_2026

#நாள்18 #கவிதை18

******

 

இந்த வாரத்தின் ரசித்த குறும்படம் : காட்சிப் பிழை

சென்ற வருடம் வெளியான ஒரு நிமிட குறும்படம் - காட்சிப்பிழை. படம் குறித்து நான் இங்கே சொல்லிவிட்டால் உங்களுக்கு பார்க்கும் ஆர்வம் குறையலாம். ஒரு நிமிடம் வரக்கூடிய குறும்படம் தான் - நிச்சயம் பாருங்கள்! மனதைத் தொடும் விதமாக இருக்கும் என்பதற்கு நான் உத்திரவாதம்!

******

இந்த வாரத்தின் குளிர்பானம் - Shahtoot Lassi :

தலைநகர் தில்லியில் பல வீதிகளில் இந்த மரம் தானாகவே வளர்ந்திருக்கும்.  குழந்தைகள் பலரும் இந்த மரத்தின் பழங்களை பறித்து உண்பார்கள் - ஷஹ்தூத் என்று சொல்லப்படும் பழம் - முசுக்கொட்டை என்று தமிழில் சொல்லப்படும் மல்பெரி பழங்கள் தாம்.  இந்தப் பழங்கள் கொண்டு, இப்போதைய கோடைக்கு இதமாக ஒரு லஸ்ஸி தயாரித்துத் தந்தால் எப்படி இருக்கும் ! இங்கே இந்தப் பழங்கள் கிடைக்கிறதா என்பது தெரியவில்லை. கிடைத்தால் இந்தக் காணொளியில் சொல்வது போல செய்து பருகலாம்! 

Shahtoot Mishri Lassi - Sweet, Royal & Refreshing! #shorts - YouTube

******

இந்த வாரத்தின் வாகன வாசகம் :  தன் உயிர் மறந்து

பேருந்துகள், லாரி, வேன் போன்ற வாகனங்களில் ஓட்டுனர் இருக்கைக்கு வெளியே இருக்கும் கதவில் நிறைய விதத்தில் ஓட்டுனர் என்பதை எழுதி இருப்பார்கள்.  வடக்கில் இருக்கும் பல தனியார் பேருந்துகளில் ஓட்டுனரின் கதவில் “Pilot” என்று எழுதி இருப்பதைப் பார்த்திருக்கிறேன்.  அவர் ஓட்டுவது பேருந்து தான் என்றாலும் விமான ஓட்டி போல “Pilot” என்று எழுதி வைத்துக் கொள்வதில் அவருக்கு கிடைப்பது ஒரு அலாதி இன்பம் என்று நினைத்துக் கொள்வேன்.  பல பேருந்துகளில் இப்படி வித்தியாசமாக எழுதி வைத்திருப்பதைப் பார்த்திருக்கிறேன்.  சமீபத்தில் தமிழகத்தில் பேருந்தில் சென்று கொண்டிருந்தபோது, எங்கள் பேருந்து மற்றொரு சிற்றுந்தைக் கடந்து கொண்டிருந்தது. அந்தச் சிற்றுந்தின் ஓட்டுனர் பக்கம் இருந்த கதவில் எழுதி இருந்த வாசகம் - மனதைக் கவர்ந்தது - பல சமயங்களில் அது உண்மை இல்லை என்றாலும்! அப்படி எழுதி இருந்த வாசகம் கீழே….

தன் உயிர் மறந்து உன் உயிர் காப்பவன்

******

இந்த வாரத்தின் பாசிட்டிவ் செய்தி - ஒடிஷாவின் பாரம்பரியம்  :

17 வருடங்கள் தனியார் துறையில் பணி புரிந்த பிறகு அந்த வேலையை விட்டுவிட்டு ஒடிஷாவின் பாரம்பரியமான கலைகளிலும் அந்த கலைகளுக்குச் சொந்தக்காரர்களான ஆதிவாசிகளின் வாழ்விலும் ஒன்றி, பெரிய முன்னேற்றத்தினை உருவாக்கி, சாதனை புரிந்து கொண்டிருக்கும் ரிச்சா மகேஷ்வரி என்பவரின் கதை.  படித்துப் பாருங்களேன்…. 

Boito: Odisha Tribal Textiles Reimagined as Global Luxury 

******

இந்த வாரத்தின் காஃபி வித் கிட்டு பதிவு குறித்த தங்களது எண்ணங்களை பின்னூட்டம் வாயிலாக சொல்லுங்களேன்.  மீண்டும் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

திருவரங்கம்

25 ஏப்ரல் 2026