கவிதைப் போட்டி-2015 மற்றும் ஒரு போட்டியும்!

வலைப்பதிவர்கள் அனைவருக்கும் வணக்கம்! நண்பர் ரூபன் அவரது வலைப்பூவில் இந்த தீபாவளிக்கும் ஒரு கவிதைப் போட்டி பற்றிய அறிவிப்பினை வெளியிட்டு இருக்கிறார். தீபாவளி, பொங்கல் என அவ்வப்போது போட்டிகள் வைத்து பதக்கமும் சான்றிதழும், பரிசும் கொடுத்து தமிழுக்கு சேவை செய்து கொண்டிருக்கும் நண்பருக்கு வாழ்த்துகளும் பாராட்டுகளும்.

போட்டி பற்றிய தகவல்களை முழுதும் தெரிந்து கொள்ள கீழுள்ள தளங்களுக்கு செல்ல வேண்டுகிறேன்.

தீபாவளித் திருநாளை முன்னிட்டு உலகம் தழுவிய மா பெரும் கவிதைப் போட்டி-2015

2015 தீபாவளித் திருநாளை முன்னிட்டு நாடாத்தப்படும் கவிதைப் போட்டிக்குத் தயாரா?

அது சரி தலைப்பில் இருக்கும் மற்றுமொரு போட்டி என்ன?  என்னை மாதிரி கவிதை எழுதத் தெரியாதவர்களுக்கான போட்டி அது! பத்திரிகைகளில் வாராவாரம் படம் கொடுத்து ஆறு வித்தியாசம் கண்டுபிடிப்பது, குறுக்கெழுத்து போன்ற போட்டிகள் நடத்துவார்கள் அல்லவா? அது போன்று ஒரு படம் தான் இன்றைக்கு தரப் போகிறேன். அப்படத்தின் தலைப்பான “ஆறுவது சினம்” என்பதில் உள்ள எழுத்துகளைக் கொண்டு எத்தனை வார்த்தைகள் சேர்க்க முடியும்?

மொத்தம் 21 வார்த்தைகள் சேர்க்க முடியும் என்று போட்டி வெளிவந்திருந்த கலைமகள் தீபாவளி மலர்-1951-ல் சொல்லி இருக்கிறார்கள்.  ”அரை மணி நேரத்தில் 15 வார்த்தைகளுக்கு மேல் சேர்ப்பவர்கள் கெட்டிக்காரர்கள். 10-க்கும் மேல் குற்றமில்லை. 7-க்கு மேல் சுமார். மற்றவர்களைப் பற்றி சொல்ல ஒன்றுமில்லை!”   என்று அவர்களே சொல்லி இருக்கிறார்கள். எத்தனை வார்த்தைகள் உங்களால் சேர்க்க முடிந்தது என்பதையும், அந்த வார்த்தைகளையும் பின்னூட்டத்தில் சொல்லுங்களேன்.

டிஸ்கி: அவர்கள் விடையாகத் தந்திருந்த 21 வார்த்தைகளும் இன்று இரவுக்கு மேல் இப்பதிவில் சேர்க்கப்படும். அதுவரை நான் காத்திருக்கிறேன் என்று சொல்லக்கூடாது! :)

புத்தகத்தில் கொடுத்திருந்த விடைகள்:

1.  ஆ [பசு]; 2. ஆறு [நதி]; 3. ஆவ [ஐயோ]; 4. ஆவது [ஆகும் காரியம்]; 5. ஆசி [ஆசீர்வாதம்]; 6. ஆம்; 7. ஆதும் [ஆவோம்]; 8. துறு [நெருங்கு]; 9. வசி; 10. வனம்; 11. ஆவம் [அம்புறாத்துணி]; 12. சிறுவ; 13. சிறு; 14. ஆறுதும் [ஆறுவோம்]; 15. சிவம்; 16. சிவ; 17. சிறுவனது; 18. ஆறும்; 19. துறும் [நெருங்கும்]; 20. வது [மணப்பெண்].

அது சரி, வார்த்தைகள் கண்டுபிடிக்கும் போட்டிக்கு என்ன பரிசு? என்று கேட்பவர்களுக்கு, உங்களுக்கு நீங்களே சபாஷ் என்று சொல்லிக்கொள்ள பரிந்துரைக்கப்படுகிறது.  மேலும் உங்களை ஊக்குவிக்க இன்னுமொரு போட்டியும் அடுத்த சனிக்கிழமையில் பொக்கிஷப் பகிர்வாக வெளியிடப்படும்!

நாளை வேறு பதிவில் சந்திக்கும் வரை...

நட்புடன்