சந்தித்ததும் சிந்தித்ததும்: விஜயவல்லி சமேத சுதர்சனர்.....

ஞாயிறு, 5 ஜனவரி, 2014

விஜயவல்லி சமேத சுதர்சனர்.....

மஹாவிஷ்ணுவின் ஆயுதங்களில் முக்கியமான ஒன்று சக்கரம். அவரது வலது கையில் வைத்திருக்கும் இந்தச் சக்கரத்தினை சுதர்சன பகவான் என்று அழைக்கிறார்கள். சுதர்சன பகவானே ஸ்ரீமன் நாராயணின் ஒரு உருவம் தான் என்றும் சொல்வதுண்டு. ”சுதர்சனா” என்ற சொல்லுக்கே “மோக்ஷத்திற்குச் செல்லும் சரியான வழியைச் சொல்பவர்” என்ற அர்த்தமும் உண்டு. எல்லா முக்கியமான திவ்யதேசங்களிலும் சுதர்சன பகவானுக்கும் ஒரு இடம் உண்டு. திருவரங்கத்தில் சக்கரத்தாழ்வார் [சுதர்சனர்] தனியாகவே சன்னதி உண்டு.

இப்படிப்பட்ட சுதர்சனருடைய பக்தியில் திளைக்க, தில்லியில் ஸ்ரீ விஜயவல்லி சுதர்சன சேவா சத்ஸங்கம் என்ற ஒரு சத்ஸங்கம் ஏற்படுத்தி, சங்க உறுப்பினர்களின் வீடுகளிலும், புண்ணிய பூமிகளிலும் சுதர்சன ஹோமம், அபிஷேகம் போன்றவற்றை நடத்தி வருகிறார்கள். ஒவ்வொரு வருடமும் பத்ரிநாத், கேதார்நாத், யமுனோத்ரி, கங்கோத்ரி, ஹரித்வார், ரிஷிகேஷ், குருக்ஷேத்திரா, அயோத்யா, நைமிசாரண்யம், பிட்டூர், கோவர்த்தன், பிருந்தாவன், மதுரா, முக்திநாத், காத்மண்டு வில் உள்ள ஜல் நாராயணன் கோவில், சுக்ரதால், புஷ்கர் போன்ற புண்ணிய ஸ்தலங்களுக்கு புனித யாத்திரையும் மேற்கொண்டு அங்கேயும் சுதர்சன ஹோமம், அபிஷேகம், கல்யாண உத்ஸவம் போன்றவற்றை நடத்துவார்கள்.

இந்த வருடம் ஏப்ரல் மாதம் 23-ஆம் தேதியிலிருந்து மே மாதம் 1-ஆம் தேதி வரை முக்திநாத் பயணம் மேற்கொள்ள இருக்கிறார்கள். விவரங்கள் அவர்களது தளத்தில் இருக்கிறது.

எனது நெருங்கிய நண்பர் இந்த ஸத்ஸங்கத்தில் உறுப்பினர் என்பதால், அவர்கள் வீட்டில் ஸத்ஸங்கத்தினர் நடத்தும் சில நிகழ்ச்சிகளில் நானும் கலந்து கொண்டதுண்டு. அங்கே எடுத்த சில புகைப்படங்களை உங்களுடன் இந்த ஞாயிறில் பகிர்ந்து கொள்கிறேன்.