முகநூல் இற்றைகள் - பழையன கழிதலும் புதியன புகுதலும்…

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

 

நேற்று வெளியிட்ட கதம்பம் பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

 

PROGRESS IS IMPOSSIBLE WITHOUT CHANGE; AND THOSE WHO CAN NOT CHANGE THEIR MINDS, CANNOT CHANGE ANYTHING - BERNARD SHAW.

 

******

 

முகநூல் இற்றைகள் - பழையன கழிதலும் புதியன புகுதலும்… - 1 ஃபிப்ரவரி 2023

 

கடந்த மாதம் தான் Bபோகி பண்டிகை முடிந்திருக்கிறது.  பொதுவாக Bபோகி என்றால் வீட்டில் தேவையில்லாத பல பொருட்களை போட்டு கொளுத்திவிடுவது வழக்கம் இல்லையா? 

 

பழையன கழிதலும் புதியன புகுதலும்

வழுவல கால வகையினனானே

 

மாதத்தின் கடைசி நாளன்று தேவையற்ற பழைய பொருட்களை எரித்து, பழைய சிந்தனைகளையும் தேவையற்ற மன அழுக்கையும் Bபோகியில் போக்கிவிட்டு, புதிய பொருட்கள், புதிய எண்ணங்களுடன் தை மாதத்தினை எதிர்கொள்ள காத்திருப்பது வழக்கம் தானே! 

 

ஆனால் என்னைப் பொறுத்தவரை பழைய பொருட்கள் அவை நமக்குத் தேவை இல்லையெனில், தேவைப்படுபவர்களுக்கு கொடுத்துவிடுவதையே அதிகம் விரும்புவேன்.  அதற்காக Bபோகி வரை காத்திருக்க எனக்கு பிடிக்காது.  அப்போதைக்கு அப்போது தேவையானவை, தேவையற்றவை என பிரித்து எனக்குத் தேவையற்றவை எனில், அந்தப் பொருட்கள் வேறு யாருக்கேனும் தேவை எனில் உடனடியாக கொடுத்து விடுவது எனது வழக்கம்.  ஆனால் பலருக்கும் நான் இப்படி இருப்பது சரியானதாக தோணாது. 

 

கடந்த சில நாட்களாக எங்கள் வீட்டு பெரியவர்களின் வீடுகள் சுத்தம் செய்ய முடியாமல் கிடக்க, அவற்றை எல்லாம் எடுத்துப் பார்த்து தேவையற்றவற்றை அனைத்தையும் களைந்து கொண்டு இருக்கிறேன்.  பல பொருட்களை பிறகு எப்போதாவது தேவைப்படும் என நினைத்து எடுத்து வைத்து, அவை பல வருடங்களாக தொட்டுக்கூட பார்க்கப்படாமல் அப்படியே இருக்கிறது.  என்றைக்காவது உபயோகப்படும் என எடுத்து வைக்கப்பட்ட பொருட்கள் எதுவுமே இன்றைக்கு உபயோகம் செய்ய முடியாத அளவிலேயே இருக்கின்றன என்பது வேதனையான உண்மை.  இப்போது கூட அந்தப் பொருட்களை தூக்கிப் போட பெரியவர்களுக்கு மனதில்லை.  வேண்டாமே என்று சொல்லும்போது அவர்கள் சொல்லும் வாக்கியம் - “நான் இருக்கற வரைக்கும் இருக்கட்டும், நான் போனா என் கூடவே அந்தப் பொருட்கள் எல்லாவற்றையும் போட்டு எரிச்சுடு!” என்று சொல்லி முகத்தினை தூக்கி வைத்துக் கொண்டு உட்கார்ந்து விடுவார்கள். :(

 

பல பொருட்களுக்கு அதன் Utility Value ஒரு சில மாதங்கள்/வருடங்கள் மட்டுமே எனும்போது அந்த காலம் கடந்த பிறகு அவற்றை வைத்துக் கொள்வதில் என்ன பயன்? ஒரு சில மருந்துகள் கூட அப்படியே இருக்கிறது - அதன் Expiry Date முடிந்து ஐந்து வருடங்கள் கழித்தும்!  அதனை சாப்பிட்டு விட்டால் ஏதாவது பக்கவிளைவுகள் ஏற்பட்டுவிடக்கூடும் என்பதால் சொல்லாமல் கொள்ளாமல் தூக்கி எரிந்து தேவையில்லாத காகிதங்களோடு சேர்த்து கொளுத்தி விட்டேன்!  சொன்னால் மன வருத்தம் மட்டுமே மிஞ்சுகிறது! 

 

இந்த சமயத்தில் ஜப்பானிய பெண்மணி Marie Kondo குறித்து இங்கே சொல்ல நினைக்கிறேன்.  பத்தொன்பது வயதில் தங்கள் வீடுகளை எப்படி சுத்தமாக வைத்துக் கொள்வது என சொல்ல ஆரம்பித்து, இந்த விஷயத்தில் புத்தகங்கள் எழுதியதோடு, அதனை தனது தொழிலாகவே மாற்றிக்கொண்டு இருக்கிறார் - அதிலும் ஒரு சாதனையாளராக இருக்கிறார் என்று சொல்லும்போது இந்த விஷயம் எவ்வளவு முக்கியத்துவம் வாய்ந்தது என்று புரியும்.  இணையத்தில் இந்தப் பெண்மணி குறித்து தேடித்தான் பாருங்களேன்.  YOUTUBE-ல் மட்டுமல்லாது Tidying Up with Marie Kondo என்ற பெயரில் NETFLIX-இலும் அவரது தொடர் வருகிறது.

 

அது சரி, தேவையற்ற பொருட்களை வீட்டிலிருந்து அகற்றுவது குறித்து உங்கள் கருத்தென்ன? உங்கள் வீட்டிலும் இப்படி எந்தெந்த பொருட்கள் தேவையற்றவை எனத் தோன்றுகிறது என பட்டியல் போடமுடியுமா என சிந்தித்துப் பாருங்களேன்.  இந்த விஷயம் குறித்த உங்கள் கருத்துகளையும் பகிர்ந்து கொள்ளுங்களேன்.

 

******

 

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

 

நட்புடன்

 

வெங்கட் நாகராஜ்

திருவரங்கத்திலிருந்து.