குவாரி பாஸ் - மலையேற்றம் - நிழற்பட உலா - பகுதி மூன்று

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

நேற்று வெளியிட்ட காஃபி வித் கிட்டு பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

எனது அலுவலக நண்பர் Pபிரேம் Bபிஷ்ட் அவர்களின் மலையேற்றப் பயணங்களில் ஒன்றாக உத்திராகண்ட் மாநிலத்தில் இருக்கும் குவாரி பாஸ்  சென்ற போது எடுத்த படங்களில் சிலவற்றையும், அந்த இடம் குறித்த சில தகவல்களையும் கடந்த இரண்டு ஞாயிறில் - பகுதி ஒன்று மற்றும் பகுதி இரண்டு - பதிவுகளாக வெளியிட்டது நினைவில் இருக்கலாம். இந்த வாரம் மேலும் சில தகவல்களையும் படங்களையும் பார்க்கலாம்.  

பயணத் திட்டம் - மேலும் தகவல்கள்:

சென்ற இரண்டு பகுதிகளில் பயணம் குறித்த தகவல்களையும் முதல் மூன்று நாட்களுக்கான திட்டங்களையும் இங்கே பகிர்ந்து கொண்டிருந்தேன்.  இந்தப் பகுதியில் மலையேற்றத்தில் கடைசி மூன்று நாட்கள் என்னென்ன நிகழ்வுகளை வைத்துக் கொள்ளலாம் என்பதைக் குறித்துப் பார்க்கலாம் வாருங்கள். 

நான்காம் நாள்:  பயணத்தின் நான்காம் நாள் மலையேற்றம் கொஞ்சம் கடினமானது. நான்காம் நாள் அன்றே இப்பயணத்தின் பிரதான இலக்கான குவாரி பாஸ் பகுதிக்குச் செல்வோம்.  மூன்றாம் நாள் தங்கிய இடமான குல்லாடாவிலிருந்து புறப்பட்டு பயணத்தின் இலக்கான குவாரி பாஸ் சென்று அதன் பிறகு அங்கிருந்து கீழ் நோக்கிச் சென்று தாலி எனும் இடத்தினை அடையலாம்.  மொத்த தூரம் சுமார் ஏழரை கிலோமீட்டர்.  அன்றைய தினம் கடல் மட்டத்திலிருந்து 12500 அடி உயரத்தினை (குவாரி பாஸ்) அடைந்து மீண்டும் கீழ் நோக்கி இறங்கி 11000 அடி உயரத்திற்கு (தாலி) வந்து சேர்வீர்கள். இந்த நாளில் நடைப்பயணம் மொத்தமாக 9 மணி நேரம் வரை எடுக்கும்.

ஐந்தாம் நாள்:  ஐந்தாம் நாள் அன்று மீண்டும் தாலி என்கிற இடத்திலிருந்து புறப்பட்டால், எட்டரை கிலோமீட்டர் நடந்து நீங்கள் சென்று சேர்கிற இடம் ஔலி (Auli) என்கிற இடத்தினை அடையலாம். அதற்கு சுமார் எட்டு மணி நேரம் ஆகலாம். ஐந்தாம் நாள் சென்று சேரும் இந்த இடம் மிகவும் பிரபலமான சுற்றுலாத்தலம்.  பனிச்சறுக்கு விளையாட்டுகளுக்கு பெயர் பெற்ற இடமும் கூட. இது போன்ற விஷயங்களில் உங்களுக்கு ஈடுபாடு இருந்தால் இங்கே கூடுதலாக ஒரு நாள் தங்கி பனிச்சறுக்கு விளையாடுகளில் ஈடுபடலாம். அல்லது அங்கே ஒரு நாள் தங்கி ஓய்வெடுக்கலாம்.  

ஆறாம் நாள்: ஔலி (Auli) யிலிருந்து புறப்பட்டால் மாலைக்குள் சாலை வழியாக நீங்கள் வாகனத்தில், மாலைக்குள் ரிஷிகேஷ் வரை வந்து சேரலாம்.  ரிஷிகேஷ் வரையான மொத்த தூரம் சுமார் 270 கிலோ மீட்டர். இந்த தூரத்தினைக் கடக்க சுமார் பத்து மணி நேரம் ஆகலாம்.  அதன் பிறகு ரிஷிகேஷ் நகரில் அன்றைய இரவு தங்கிவிட்டு உங்கள் அடுத்த பயணத்திட்டத்தினை தொடங்கலாம்.  

ஆக ரிஷிகேஷ் நகரிலிருந்து ரிஷிகேஷ் வரை வருவதற்கே ஆறு நாட்கள் தேவைப்படும் என்பதை மனதில் கொண்டு இந்த குவாரி பாஸ் மலையேற்றத்தினை நீங்கள் திட்டமிடலாம்.  முதல் பகுதியில் சொன்னது போல தாங்களாகவே பயணிப்பது கொஞ்சம் கடினம்.  தகுந்த பயண ஏற்பாட்டாளர்கள் மூலம் இந்த இடத்திற்குச் செல்வது உத்தமம்.  வாருங்கள் நண்பர் ப்ரேம் பிஷ்ட் அவர்கள் அவரது குவாரி பாஸ் பயணத்தில் எடுத்த சில படங்களை பார்க்கலாம்.  

இத்தொடரில் அடுத்த வாரம் இங்கே எடுத்த சில காணொளிகளைப் பகிர்ந்து கொள்கிறேன். அடுத்த வாரம் வரை காத்திருங்கள் நண்பர்களே...

******

இந்த நாளின் பதிவு குறித்த தங்களது எண்ணங்களை பின்னூட்டம் வாயிலாக சொல்லுங்களேன்.  மீண்டும் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

புது தில்லியிலிருந்து….