புறாவுக்கு தானியம் - Gகோல் மார்க்கெட் - நடை நல்லது - பகுதி ஆறு

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

இதற்கு முன்னர் வெளியிட்ட நவராத்திரி தொடக்கம் பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

நடை நல்லது வரிசையில் இதோ இன்றைக்கு ஆறாம் பகுதி! என்னதான் முகநூலில் ஒவ்வொரு தினமும் நடை நல்லது என்ற தலைப்பில் இந்த விஷயங்களை பகிர்ந்து கொண்டேன் என்றாலும், இங்கே, வலைப்பூவில் பகிர்ந்து கொள்வதில் இருக்கும் மகிழ்ச்சி அங்கே இல்லை என்பது என் எண்ணம்.  எனக்கான சேமிப்பாகவும், முகநூலில் இல்லாதவர்கள் படிக்க வசதியாகவும், நடை நல்லது பதிவுகள் இங்கேயும்!

புறாவுக்கு தானியம் - வயிற்றுப் பிழைப்பு - 1 செப்டம்பர் 2024:

முன்பெல்லாம் நம் ஊரில் புறாக்கள் பார்ப்பது அரிது. காக்கைகளும் குருவிகளும் தான் அதிகம் பார்க்கக் கிடைக்கும். ஆனால் இப்போது பல அடுக்குமாடிக் குடியிருப்புகளின் பிரச்சனைகளில் ஒன்றாகக் கருதப்படும் விஷயம் அதிக அளவில் இருக்கும் புறாக்களின் எண்ணிக்கை மற்றும் அவற்றால் உண்டாகும் என்று கருதப்படும் நோய்களும்.  ஆனால் தில்லி போன்ற வடக்கின் பெரு நகரங்களில் பல ஆண்டுகளாகவே புறாக்கள் உண்டு. 

ஒவ்வொரு சாலை சந்திப்பிலும் நூற்றுக்கணக்கில் புறாக்கள் இருப்பதையும் அவற்றுக்கு மனிதர்கள் தானியங்கள், குடிநீர் போன்றவற்றை தருவதையும் பார்க்க முடியும். மும்பையிலும் இந்த காட்சிகளை பார்க்க முடியும். ஒரு சில தமிழ் படங்களிலும் (நாயகன் படத்தில் கூட இப்படி ஒரு காட்சி உண்டு) இப்படியான காட்சிகளை பார்த்து இருக்கலாம். 

இங்கே இப்படியான சாலை சந்திப்புகளில் இருக்கும் புறாக்களுக்கு வீட்டில் இருந்தே தானியங்கள் கொண்டு வருபவர்கள் இருந்தாலும் அதே இடத்தில் தானியங்கள் விற்பனை செய்பவர்களிடம் வாங்கி புறாக்களுக்கு தருவதும் உண்டு. சின்னச் சின்ன தட்டுகளில் சோளம், கம்பு, கேழ்வரகு போன்றவற்றை கலந்தோ தனியாகவோ விற்பனை செய்வார்கள். அளவைப் பொறுத்து விலை பத்து, இருபது என விற்பனை நடக்கும். காலை, மாலை என இரு வேளைகளிலும் இப்படியானவர்களிடம் தானியங்களை வாங்கி புறாக்களுக்கு இடுவார்கள். பல சாலை சந்திப்பிலும் இப்படியான மனிதர்களுக்கு இது ஒரு வாழ்வாதாரம். தானியங்களை வாங்கி புறாக்களுக்கு போடுபவர்களுக்கு ஒரு பக்கம் புண்ணியம் கிடைக்கிறது என்றால் இன்னொரு பக்கம் ஒரு குடும்பத்திற்கு வாழ்வளித்த புண்ணியமும் கிடைக்கிறது. 

சின்னச் சின்ன விஷயங்களிலும் கூட ஏதோ ஒரு விதத்தில் சக மனிதனுக்கு நன்மை உண்டானால் நல்லது தானே. ஒரு சாலை சந்திப்பில் அமர்ந்திருந்த மூதாட்டியிடம் தானியம் வாங்கி புறாக்களுக்கு போட்டுவிட்டு அவரிடம் பேசியதில் சராசரியாக  நாற்பது ஐம்பது தட்டு வரை ஒவ்வொரு நாளும் விற்று விடுவேன் என்று புன்னகையுடன் சொன்னார். எனது தேவைகளை கிடைக்கும் பணத்தில் பூர்த்தி செய்து கொள்ள முடிகிறது. இதை விட வேறென்ன எனக்கு வேண்டும் மகனே என்கிறார் எதிரே இருக்கும் குருத்வாராவின் தங்கக் கோபுரத்தை நோக்கி கைகூப்பியபடி…..

Gகோல் மார்க்கெட் - 2 செப்டம்பர் 2024:

என் வீடு அமைந்திருக்கும் பகுதியின் பெயர் Gகோல் மார்க்கெட் - அதென்ன Gகோல் மார்க்கெட்? Gகோல் என்றால் ஹிந்தியில் வட்ட வடிவம்! வட்ட வடிவமாக அமைக்கப்பட்ட ஒரு மார்க்கெட் தான் இந்த Gகோல் மார்க்கெட்! இந்தப் பகுதியில் இருக்கும் பழமையான கட்டிடங்களில் ஒன்றாக இருந்தது.  1921-ஆம் ஆண்டில் சில கடைகளும்,  சாலை சந்திப்பில் ஒரு வட்ட வடிவ மார்க்கெட்-உம் உருவாக்கப்பட்டதோடு அருகிலேயே வேறு வடிவங்களில் அழகிய கடைத்தெருவும் உருவாக்கப்பட்டது.  தில்லியின் பிரபலமான கன்னாட் ப்ளேஸ் கட்டுவதற்கு முன்னதாகவே ஒரு மாதிரியாக அமைக்கப்பட்ட கடைத்தெருவாகவும் இது இருக்கிறது.  மத்திய அரசு அலுவலகங்கள் கொஞ்சம் கொஞ்சமாக பழைய தில்லியிலிருந்து புது தில்லிக்கு மாற்றப்பட்ட சமயத்தில் இங்கே அரசு அலுவலர்களுக்கான குடியிருப்புகள் கட்டியதோடு இந்த கடைத்தெருவும் கட்டப்பட்டது.  கொஞ்சம் கொஞ்சமாக இந்த கட்டிடம் வலுவிழந்து போனதோடு மாநகராட்சியின் அனுமதியின்றி பல மாறுதல்களும் இங்கே இருந்த கடைக்காரர்கள் செய்ய, மொத்தமாக அதன் பழமையையும் பொலிவையும் இழந்தது இந்த Gகோல் மார்க்கெட்.

ஒவ்வொரு நாளும் என் வீட்டிலிருந்து அலுவலகம் செல்லும்போதும், வீடு திரும்பும்போதும், நடைப்பயணங்களின் போதும் இந்தப் பகுதியைக் கடந்தே செல்ல வேண்டும். தில்லி வந்ததிலிருந்தே இந்த இடத்தினை பார்த்துக் கொண்டு இருக்கிறேன். ”எப்படி இருந்த நான் இப்படி ஆயிட்டேன்” என்கிற நகைச்சுவை காட்சியினைப் போலவே கொஞ்சம் கொஞ்சமாக அதன் பொலிவை இழந்து இன்றைக்கு இருக்கும் நிலையைப் பார்க்கும் போது வேதனை தான் மிஞ்சுகிறது.  ஒரு கட்டத்தில் இங்கே இருந்த கடைகளுக்கான வட்ட வடிவ கட்டிடம் முழுவதுமே பயன்பாட்டுக்கு ஏற்றதல்ல என்பதோடு ஆபத்தான நிலையில் இருக்கிறது என அங்கே இருந்த கடைகள் வேறு பகுதிகளுக்கு மாற்றினார்கள்.  மாநகராட்சி இங்கே இருக்கும் கட்டிடத்தினை அகற்றி அங்கே ஒரு அருங்காட்சியகம் அமைக்க ஏற்பாடுகள் செய்தபோது, அங்கே இருந்த கடைக்காரர்கள் வழக்கு தாக்கல் செய்ய, பல காலமாக தகரங்கள் கொண்டு மூடி வைக்கப்பட்டு இருக்கின்றது. சமீபத்தில் தான் வழக்கு அரசு தரப்பிற்கு சாதகமாக முடிவு ஆகியிருக்கிறது. 

தற்போது அங்கே இருந்த கட்டிடம் இடிப்பதற்கான வேலைகள் நடந்து கொண்டிருக்கின்றன. புதியதாக என்ன கட்டிடம் உருவாகப் போகிறது, பழமை பாதுகாக்கப்படுமா இல்லை மொத்தமாக வேறு வடிவில் ஏதேனும் ஒரு கட்டிடம் எழும்புமா என்ப்தையெல்லாம் பொறுத்திருந்து தான் பார்க்க வேண்டும்.  ஆனாலும், தில்லியின் பழமையான கட்டிடங்களில் ஒன்றாக இருந்த Gகோல் மார்க்கெட் இனி இல்லை என ஆகப் போகிறது என்பது வேதனையான விஷயமாகவே எனக்குத் தோன்றுகிறது. இணையத்திலிருந்து எடுத்த பழைய நிழற்படம் ஒன்றும் சமீபத்தில் நடைப்பயணத்தின் போது எடுத்த நிழற்படம் ஒன்றும் சேர்த்திருக்கிறேன்.  கொஞ்சம் கொஞ்சமாக இடிபட்டுக் கொண்டிருக்கும் கட்டிடத்தைப் பார்க்கும் போது கொஞ்சம் வேதனையாகவே இருக்கிறது என்பதைச் சொல்லத் தேவையில்லை. 

மாற்றங்கள் ஒன்று மட்டுமே மாறாதது என்று மனதைத் தேற்றிக் கொண்டாலும், சில மாற்றங்கள் மனதுக்கு உகந்ததாக இல்லை என்பதும் நிதர்சனம்.

மேலும் நடப்போம்…… மேலும் பேசுவோம்……

*******

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

புது தில்லி

4 அக்டோபர் 2024