சிறு வியாபாரிகள்.......

தமிழில் புகைப்படக் கலை அதாவது Photography in Tamil வலைப்பூவில் ஒவ்வொரு மாதமும் ஒரு தலைப்பில் போட்டி வைப்பது உங்களுக்குத் தெரிந்திருக்கும். புகைப்படங்கள் எடுப்பதில் ஆர்வம் உள்ள அனைவரும் மாதாமாதம் நடக்கும் போட்டியினை ஆர்வத்துடன் எதிர்பார்த்து, அறிவிப்பு வந்த பின் அந்த மாத தலைப்பிற்கேற்ப தாங்கள் எடுத்த புகைப்படங்களை போட்டிக்கு அனுப்பி வைப்பது வழக்கம்.  ஒரு சில முறை மட்டுமே நான் அனுப்பி இருக்கிறேன்.

ஒவ்வொரு மாதமும் அனுப்ப நினைத்தாலும், ஏனோ அனுப்புவதில்லை! இந்த மாதமும் அதே! கடைசி தேதியான 20-03-2014 முடிந்து விட்டது. இந்த மாத தலைப்பு ”சிறு வியாபாரிகள்”.  ஒவ்வொரு ஊருக்குச் செல்லும்போதும் எனது காமிராவுக்குள் சில வியாபாரிகளை சிறைபிடிப்பதுண்டு! அப்படி சிறை பிடித்த வியாபாரிகளின் படங்கள் இந்த ஞாயிறில் பார்க்கலாம்!

சமீபத்தில் ஹோலி விழா வட இந்தியா முழுவதும் கோலாகலமாக கொண்டாடப்பட்டது. இப்போதெல்லாம் தென்னிந்தியாவில் கூட கொண்டாட ஆரம்பித்து விட்டார்கள்.....  இந்த ஹோலி கொண்டாட்டத்தின் முக்கிய தேவையான வண்ண வண்ணப் பொடிகள் விற்கும் ஒரு பெரியவர் – படம் எடுக்கப்பட்ட இடம் – [G]கோவர்த்தன், உத்திரப் பிரதேசம். மற்ற நாட்களில் இவர் சிறுவர்களுக்கான பொம்மைகள் விற்கும் வியாபாரி.  

[B]பேல் பூரி சாப்பிடதுண்டா? பார்க்கும்போதே கொஞ்சம் கலங்க வைக்கும் வண்ணத்தில் இருக்கும் இவற்றில் போடப்படும் வஸ்துகள்! :) இங்கே ஒரு வியாபாரி [B]பேல் பூரி தயாரிக்க, வெங்காயம் வெட்டிக் கொண்டு இருக்கிறார். பக்கத்திலே அதில் கலக்கப்படும் மற்ற வஸ்துகள்! படம் எடுத்த இடம் தில்லி-ஆக்ரா நெடுஞ்சாலை - “பல்வல்” எனும் இடத்திற்கு அருகில் உள்ள சாலையோர உணவகம் ஒன்றின் வெளியே!

என்ன தான் பல வண்ணங்களில் வெளிநாட்டு பானங்கள் வந்துவிட்டாலும், வட இந்தியாவின் பாரம்பரிய பானமான “லஸ்ஸி”க்கு ஈடாகுமா? லஸ்ஸி விற்கும் வியாபாரி – வாகனத்தில் இருந்தபடியே எடுத்ததில் வியாபாரி கொஞ்சம் Out of Focus! :( ஆனாலும் அவர் தயாரிக்க வைத்திருக்கும் தயிரைப் பாருங்கள்..... மேலே ஒரு அழகுக்காக வைத்திருக்கும் ரோஜாப்பூ! – படம் எடுத்தது விருந்தாவன், உத்திரப் பிரதேசம்.

 

சிறு வியாபாரி – தலைப்புக் கேற்ப இவர் சிறு வியாபாரி – அதாவது சிறுவன்! இளம் வயதிலேயே வியாபாரத்திற்கு வந்து விட்ட இவர் விற்பது என்ன என்று யூகிக்க முடிந்தால் பின்னூட்டத்தில் சொல்லுங்களேன். படம் எடுத்த இடம் – [G]கோவர்த்தன், உத்திரப் பிரதேசம்.

மேலுள்ள படம் எடுக்கப்பட்ட இடம் – கோவர்த்தன மலையை வலம் செய்யும் பாதையில்.  கிரிவலம் பாதையில் இவர் விற்பது என்ன? கண்டுபிடிக்க முடிகிறதா பார்க்கலாம்! பதிவின் முடிவில் இதற்கான விடையைச் சொல்கிறேன். ம்ம்ம்ம்... யாருப்பா அது படிக்காம வேகமா ஸ்க்ரோல் பண்ணிட்டு போறது! ம்ம்ம்.....  பேச்சு பேச்சாதான் இருக்கணும் சொல்லிட்டேன்!

என்னைப் புகைப்படம் எடுத்து “[Ch]சாய் வாலி” என்று போடப் போகிறீர்களா? என்று கேட்ட அவருக்கு நான் சொன்ன பதில்...  ”நீங்கள் தேநீர் விற்பவர் என்று ஏன் உங்களை தாழ்வாக நினைத்துக் கொள்ள வேண்டும்.....  நீங்கள் ஒரு தொழிலதிபர் என்று உயர்வாக நினைக்க வேண்டும். உழைத்து முன்னேற நினைக்கும் நீங்கள் உயர்வானவர் தான்!”  - இந்தப் படமும் எடுத்தது [G]கோவர்த்தன், உத்திரப் பிரதேசத்தில் தான்!

என்னம்மா கண்ணு, என்னை ஏன் ஃபோட்டோ புடிக்கிற.....  என்று பார்வையால் கேட்கும் இளம் வியாபாரி!  ஹோலி என்றால் இந்த மாதிரி வண்ண வண்ணப்பொடிகள் விற்கும் கடைகள் வட இந்தியா முழுவதும் முளைத்துவிடும். இந்தப் புகைப்படம் எடுத்தது – ராதாகுண்ட் எனும் இடம்.

சில மாதங்கள் முன்னர் என்னுடைய பக்கத்தில் வெளியிட்ட ‘அப்பள வியாபாரி’ பதிவினை படித்திருக்கலாம். அந்த பதிவிற்காக நான் எடுத்த புகைப்படம் இது. ஆனால் பதிவினில் வெளியிடாத படம்! எடுத்த இடம் – இந்தியா கேட், புது தில்லி.  அதே இந்தியா கேட் பகுதியில் சிறிய மணிகள் கோர்த்து உங்கள் பெயரை கைகளில் கட்டிக்கொள்ளும் கயிறாக செய்து விற்பனை செய்யும் ஒரு பெண்மணியின் படம் கீழே..... இவர் பற்றிய தகவல்கள் வேறொரு பதிவாக பின்னர் வெளியிடுகிறேன்!

இந்த இளைஞர்கள் விற்பது பல விதமான களிமண் பொம்மைகள். மேற்கு வங்கத்தினைச் சேர்ந்த இவர்கள் தாங்கள் தயாரித்த பொருட்களை விற்பனைக்கு வைத்திருந்த இடம் புது தில்லியின் ஒரு கண்காட்சி.....  அதில் இருந்த பல பொம்மைகள் அழகாய் இருந்தன.  குறிப்பாக மண்பானையில் தண்ணீர் அருந்த முயலும் காக்கை! பானையின் அடியில் தண்ணீர் இருக்க, கற்களைப் போட்டு தண்ணீர் மேலே வந்ததும் அதை அருந்திய காக்கை கதை நினைவுக்கு வருகிறதா?

என்ன நண்பர்களே.....  இந்த ஞாயிறில் பகிர்ந்து கொண்ட “சிறு வியாபாரிகள்’ படங்கள் பிடித்திருந்ததா?  மீண்டும் அடுத்த ஞாயிறில் வேறு சில படங்களோடு உங்களைச் சந்திக்கிறேன்....

ம்...  நினைவிருக்கிறது! சிறுவன் விற்பது என்ன என்று பின்னூட்ட்த்தில் சொல்லுங்கள்.....  இரண்டாம் இளைஞர் விற்பது என்ன என்பதை இங்கேயே, இப்போதே சொல்லி விடுகிறேன் – இவர் விற்பது ஐம்பது பைசா/ஒரு ரூபாய் நாணயங்கள்.  நூறு ரூபாய் கொடுத்தால் 90/95 ரூபாய்க்கு நாணயங்கள் தருவார். கிரிவலம் வரும் பலர் இந்த நாணயங்களை வாங்கிக் கொண்டு வழியில் கை நீட்டும் பல பிச்சைக்காரர்களுக்கு தானமாக வழங்குகிறார்கள்.....

மீண்டும் சந்திக்கும் வரை.....

நட்புடன்

வெங்கட்.

புது தில்லி.