மகளுக்கு ஒரு கடிதம்

 

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

 

நேற்று வெளியிட்ட பதிவை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி. நேற்றைய கேதார் தால் நிழற்பட உலா பதிவினை படிக்காதவர்கள்/பார்க்காதவர்கள் இந்தச் சுட்டி வழி படி(பார்)க்கலாமே! இந்த நாளை நல்லதொரு வாசகத்துடன் தொடங்கலாம் வாருங்கள். 

 

THE GREAT THING ABOUT GETTING OLDER IS THAT YOU DON’T LOSE ALL THE OTHER AGES YOU’VE BEEN.

 

******

 

 

 

அன்பு மகள் ரோஷ்ணிக்கு!

 

இனிய பிறந்தநாள் வாழ்த்துகள் கண்ணா! 

 

ஒரு அம்மாவாக இந்த இனிய நாளில் உன்னோடு பகிர்ந்து கொள்வதற்கும் நீ என்றும் நினைவில் வைத்துக் கொள்வதற்கும் என்னிடம் சில விஷயங்கள் அணிவகுத்து நிற்கின்றன.

இப்போது தான் உன்னை பிரசவித்தது போல் உள்ளது! அதற்குள் வருடங்கள் அதிவேகமாக உருண்டோட 17 வயது சுட்டிப்பெண்ணாக இப்போது வளர்ந்து விட்டாய்! 

 

எங்கள் இனிய வாழ்வுக்கு மேலும் சுவைக்கூட்ட என் வயிற்றில் வளர்ந்தாய்! எந்த காலத்திலும் திருமணமான ஒவ்வொரு பெண்ணும் எதிர்கொள்ளும் கேள்விக்கணைகளிலிருந்து நீண்ட காலம் தவிக்க விடாமல் என்னைக் காப்பாற்ற விடையாக வந்தாய்!

 

என் அம்மாவும் உன்னை எப்படியாவது கண்டிடவே நிதமும் அந்த கணேசனை வலம் வந்தாள்! பின்பு அம்மாவே உன்னுருவாய் எனை வந்து சேர்ந்தாள்! அம்மாவைப் போலவே நீயும் அந்த கணேஷாவை பிரியமான தோழனாக்கிக் கொண்டாய்!

 

உன்னாலே எங்கள் வாழ்வுக்கும் ஓர் பிடிப்பு வந்தது! உன்னைச் சுற்றியே எங்கள் உலகம் உருவானது! உன் ஒவ்வொரு பருவத்திலும் நீ செய்த விஷமங்களையும் மிகவும் ரசித்தோம்! உன்னை வளர்த்ததோடு உன்னோடு நானும் வளர்ந்து என்னை மேம்படுத்திக் கொண்டேன்.

 

எதற்காகவும் அடம் பிடிக்காத குழந்தையாக வளர்ந்தாய். எங்கள் எளிமையான வாழ்க்கை முறைக்கு நீயும் எளிதாக பழகிக் கொண்டாய்! படிப்பிலும், ஓவியம் தீட்டவும், கவிதை எழுதவும், கைவேலைகள் செய்வதிலும் மிளிர்ந்து வருகிறாய்!

 

உன் வாழ்வை அழகாக்கவும், உன் பெயருக்கேற்றாற் போல் பிரகாசமான எதிர்காலத்தை ஏற்படுத்திடவும் உன் அப்பாவும் தான் நம்மை விட்டு தொலைவில் இருந்து கொண்டு அனுதினமும் அயராது உழைக்கிறார்.

 

மேன்மேலும் பல சாதனைகள் புரிந்து உன் திறமைகளோடும் நற்சிந்தனைகளோடும் நீ வளர்ந்து சமுதாயத்தில் சிறந்த பெண்மணியாக திகழணும்! உன்னைச் சுற்றியுள்ள மனிதர்களுக்கு என்றும் உதவியாக இருக்கணும்! யாரையும் மனதளவில் கூட காயப்படுத்தாத குணம் கொண்டவளாய் இருக்கணும்!

 

இனி வரும் காலங்கள் யாவும் வாழ்வில் எல்லா நலங்களும், வளங்களும் கிடைக்கப் பெற்று சிறந்து விளங்கிட எங்கள் மனமார்ந்த ஆசிகள்!

 

இனிய பிறந்தநாள் வாழ்த்துகள் கண்ணா!

 

என்றும் அன்புடன்,

 

அம்மாவும் அப்பாவும்!