தலைநகர் நோக்கி ஒரு பயணம் - பகுதி எட்டு - ஆதி வெங்கட்

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

நேற்று வெளியிட்ட மலை இரயிலில் ஒரு பயணம் படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

ACCEPT YOUR PAST WITHOUT REGRETS; HANDLE YOUR PRESENT WITH CONFIDENCE; FACE YOUR FUTURE WITHOUT FEAR.

******

தலைநகர் நோக்கி ஒரு பயணம் - பகுதி ஒன்று 

தலைநகர் நோக்கி ஒரு பயணம் - பகுதி இரண்டு  

தலைநகர் நோக்கி ஒரு பயணம் - பகுதி மூன்று 

தலைநகர் நோக்கி ஒரு பயணம் - பகுதி நான்கு 

தலைநகர் நோக்கி ஒரு பயணம் - பகுதி ஐந்து

தலைநகர் நோக்கி ஒரு பயணம் - பகுதி ஆறு

தலைநகர் நோக்கி ஒரு பயணம் - பகுதி ஏழு

அனைவருக்கும் இனிய காலை வணக்கம்!

Janpath road!

ஒரு மாலைப்பொழுதில் பேருந்தில் ஒரு உலா வரலாம் எனப் புறப்பட்டோம்!  பேருந்தில் மகளும், நானும் அருகருகே அமர்ந்திருக்க எங்களின் பின்னே ஒரு இளைஞன் நின்று கொண்டு எங்களைப் பார்த்தவாறே ஹிந்திப் பாடலொன்று  பாடிக் கொண்டிருந்தான்! நல்ல குரல்வளத்துடன் பாடலும் கேட்க இனிமையாகவே இருந்தது! 

சிறிதுநேரம் இப்படியே பாடிக் கொண்டிருந்தவன் எங்களிடமிருந்து எந்த ரெஸ்பான்ஸும்  கிடைக்காமல் போகவே அந்த இடத்திலிருந்து  கிளம்பி பேருந்தின் பின்புறமிருந்த  இருக்கைக்கு சென்று விட்டான்...🙂 பேருந்தை விட்டு இறங்கிய பின்னர் என்னவரிடமும் இதைச் சொல்லி சிரித்துக் கொண்டேன்..🙂

சரி! எதற்காக புறப்பட்டோம்? எங்கு சென்று இறங்கினோம்?

பேருந்தில் நாங்கள் சென்று இறங்கிய இடம் ஜன்பத் ரோட்!  இங்கு தான் திபெத்தியன் மார்க்கெட் இருக்கிறது! துணிக்கடைகள், கைவினைப் பொருட்கள், bags, clutch, காதணிகள் என்று ஏராளமானவை இங்கு விற்பனைக்கு உள்ளன!

ஒரு ரவுண்ட் வந்து எல்லாவற்றையும் பார்வையிட்டு, வேண்டியவற்றை வாங்கிக் கொண்டு திரும்பினோம்!

டெல்லி வந்த பின் நிறைய விதமான  இனிப்புகளை ருசி பார்த்தேன். ரப்டி ரஸமலாய், கேஸர் ரஸமலாய், குஜியா, ஹனிமூன், ராஜ்போக் மற்றும் Gகூட் ரஸகுல்லா (வெல்லம் சேர்த்து செய்தது)  அளவான இனிப்பில் அனைத்துமே சுவையாக இருந்தது! வாய்ப்பு கிடைக்கும் போது நீங்களும் சுவைத்துப் பாருங்களேன்.

******

Talkatora Garden!

குடியிருப்பிலிருந்து நடக்கும் தொலைவில் இந்த மிகப்பெரிய கார்டன் மற்றும் ஸ்டேடியம்! பாக்ஸிங், கிரிக்கெட், டென்னிஸ் என்று எல்லாவற்றுக்கும் இங்கே பயிற்சி செய்கிறார்கள்! அங்கேயே சில MPக்களின் குடியிருப்பும் அமைந்துள்ளது! கார்டனின் நுழைவாயில் அருகே கெளதம் கம்பீரின் குடியிருப்பு இருந்தது! 

இந்த கார்டனில் 90 வயதைக் கடந்த அடர்வான மரங்களும், சீசனுக்கேற்ற படி பூக்கும் பூக்களும், நீரூற்றுகளும், புல்வெளிகளும் என வெகு அழகாக உள்ளது! இந்த கார்டனை ஒரு ரவுண்ட் அடித்தால் நீங்கள் 2 1/2 கி.மீ நடந்ததாக எடுத்துக் கொள்ளலாம்!

இந்த வெயில் சீசனிலும் பூத்திருந்த பூக்களை படம் பிடித்துக் கொண்டு வலம் வந்தோம்! அங்கிருந்து வீட்டுக்குத் திரும்பும் வழியில் Kali bari காளி கோவிலுக்கும், அருகிலிருந்த புத்தா கோவிலுக்கும் சென்று விட்டு வந்தோம்!

மாலை நல்ல காற்றுடன் லேசான மழை! பேருந்தில் பயணித்து Pusa road அருகே இறங்கிக் கொண்டோம்! Haldiramன் Family restaurant இங்கு தான் அமைந்துள்ளது! சென்ற முறை கொரோனாவுக்கு முன் நாங்கள் டெல்லி வந்த போது இங்கு இரண்டு மூன்று முறை சாப்பிட்டிருக்கிறோம்! அருமையாக இருக்கும்!

மூவரும் Chole bhature ஆர்டர் செய்து சுவைத்தோம்! அதே சுவை! மாற்றமில்லை! இனிப்புக்காக நாங்கள் தேடி வாங்கி ருசித்தது Gajra bahaar ! மல்லிப்பூ செண்டு என்பது போல அர்த்தம்! மேலே கோவா போன்றும் அடியில் ரஸகுல்லா போன்றும் மிகவும் சுவையாக இருந்தது! பெயர் தான் மனதில் நிற்கவில்லை! ஜவஹரா?? என்று கேட்டு பின்பு என்னவரை கேட்டு தான் இதை  எழுதுகிறேன்...🙂 ஹா..ஹா..ஹா..!

******

தலைநகருக்கு டாடா…!

தலைநகரில் இனிமையாக 20 நாட்களை செலவிட்ட நாங்கள் இதோ என்னவருக்கும், டெல்லிக்கும் பை பை சொல்லி  இங்கிருந்து கிளம்பி விட்டோம்! நாட்கள் கடந்து சென்றதே தெரியவில்லை! கிடைத்த நேரத்தில் சுற்றிப் பார்த்து, நட்புகளையும், உறவுகளையும் கண்டு மகிழ்ந்து என்று மிகவும் இனிமையாக செலவிட்டோம்!

இப்போது அடுத்து செய்ய வேண்டிய வேலைகள் தான் கண்முன்னே நிற்கின்றன!! மகளை கல்லூரியில் சேர்க்கணும்! அவளுக்காக செய்து கொடுக்க வேண்டிய விஷயங்கள் நிறைய உள்ளன! அவற்றையெல்லாம் கவனிக்க வேண்டும்! இந்த எண்ணங்களுடன் தலைநகரிலிருந்து புறப்பட்டோம்.  இந்த முறை விமானத்தில் இல்லாமல் இரயிலில் பயணம்.  பயணம் எப்படி இருந்தது என்று அடுத்த பகுதியில் சொல்கிறேன்.  தொடர்ந்து பயணத்தில் இணைந்திருக்க வேண்டுகிறேன். 

******

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

ஆதி வெங்கட்